A krakti di video abi tapu a kotoigiwroko
1 „A manpikin fu wi bigin luku a video dati bifo a ben man waka srefi. A e luku en ibri tron baka. Wi breiti srefisrefi taki wi abi yepisani di e yepi wi pikin fu lobi Yehovah!” Fu sortu video a Kresten papa noso mama disi e taki? A de a video di nen Noach — Hij wandelde met God (Noa—A ben waka nanga Gado). A manpikin fu wan mama di no de wan Kotoigi ben si a Noach-video na wan tra sma oso. Baka dati a mama fu a boi disi seni 90 Amerkan dala go na a bijkantoro fu horibaka gi a wroko fu wi. A seni aksi tu efu wi no abi tra video gi pikin-nengre. Den video di Yehovah organisâsi e meki abi bigi krakti tapu yonguwan nanga owruwan.
2 Na ini na osofamiri: Baka di wan Kotoigi famiri ben luku a video Jehovah’s Getuigen — Standvastig onder nazi-terreur (Yehovah Kotoigi e kakafutu gi a nazi tirimakti), dan a mama fruteri: „A heri dei mi sidon denki fa Yehovah yepi sma leki mi nanga yu fu horidoro te den miti nanga hebi tesi! Fu di mi sidon denki fu den sani dati, meki mi kon frustan taki, te yu luku en bun, dan den problema fu mi no bigi so. Fu di wi luku a video disi makandra nanga den pikin fu wi, meki dati yepi den fu si moro krin fu san ede a de fanowdu fu frutrow tapu Yehovah. Bakaten, wi ben taki fu a tori disi nanga den umapikin fu wi. Dati yepi den fu sreka densrefi moro bun fu tan tanapu kánkan, awinsi sortu frufolgu den ben sa kisi.”
3 Na skoro: Wan yongu Kotoigi di na wan tini ete ben abi fu taki fu wan tori na fesi a klas na skoro. Leki wan pisi fu a takimakandra fu en a ben kisi na okasi fu sori den pikin fu a klas wan pisi fu a Standvastig-video. Fosi a skoromisi fu en ben taki dati a no ben lobi den Kotoigi. Baka di a si a video, a taki: „A sani disi kenki a fasi fa mi e si Yehovah Kotoigi krinkrin. Mi e pramisi yu taki a tra leisi di den o kon na mi oso baka, mi sa arki den èn mi o bigin studeri Bijbel nanga den!” San meki a skoromisi disi go denki tra fasi fu wi? A taki dati a ben de a „trutru lobi di wi abi èn a getrowfasi fu wi”.
4 Na ini a preikiwroko: Wan sisa ben miti wan uma di ben e draidrai fu teki den buku fu wi. Toku na uma disi ben abi furu aksi di ben abi fu du nanga wi èn nanga san wi e bribi. A sisa ben go baka na a uma nanga a video Jehovah’s Getuigen — De organisatie achter de naam (Yehovah Kotoigi—Na organisâsi baka a nen). A drai a video gi na uma nanga en masra. Ala tu ben fruwondru srefisrefi fu san den ben si èn den ben bigin studeri Bijbel. Leki bakapisi fu a tumusi bun kotoigi disi di den kisi, den bigin libi akruderi a wani fu Gado.
5 Yu e gebroiki den video fu wi so bun leki yu man?