Gebroiki den video fu gi leri
1. Fa Yehovah gebroiki sani di sma kan si, di a ben gi leri na den owruten futuboi fu en? San ben de a bakapisi fu dati?
1 Son leisi Yehovah gebroiki fisyun nanga dren fu sori den owruten futuboi fu en prenspari tori. Prakseri a fisyun fu Esekièl fu a wagi fu Yehovah na hemel (Esek. 1:1-28). Prakseri fa Danièl ben firi, baka di a kisi a dren di ben abi fu du nanga wan profeititori di ben sori den difrenti grontapu tirimakti di ben o opo kon (Dan. 7:1-15, 28). Èn fa a de nanga a span openbaring di na apostel Yohanes ben kisi „nanga yepi fu marki” di abi fu du nanga sani di ben o pasa na ini „a dei fu Masra”? (Openb. 1:1, 10) Yehovah ben gi Esekièl, Danièl nanga Yohanes leri nanga yepi fu ala sortu moi kloru, èn a ben meki ala sortu span sani pasa, so taki den no ben o frigiti den sani disi den heri libi langa.
2. San wi kan gebroiki fu leri trawan a waarheid fu Bijbel?
2 Efu wi wani leri tra sma a waarheid fu Bijbel na so wan fasi, taki den no e frigiti en esi-esi, dan wi kan gebroiki den video fu gi leri. Den video fu wi e taki fu furu difrenti sani èn den e gi sma deki-ati fu poti frutrow na ini Bijbel, na ini na organisâsi fu Yehovah, èn na ini markitiki di e meki taki wi e tron moro bun Kresten. Luku wan tu fasi fa wi kan gebroiki den video fu wi fu gi leri. Disi na wan tu eksempre fu a fasi fa wi kan gebroiki den video.
3. San yu kan gebroiki fu sori wan bijbelstudenti fa sani e waka na ini na organisâsi fu wi?
3 Na ini a diniwroko: Yu fruteri wan bijbelstudenti fa wi leki Kresten e libi leki brada na heri grontapu? Sori en disi nanga yepi fu a video Onze gehele gemeenschap van broeders. Kande yu kan leni en a video, so taki a kan luku en fosi yu e go studeri baka nanga en, noso yu kan luku a video makandra nanga en te yu e go baka na en. Baka dati, yu kan luku den aksi di skrifi na ini Wi Kownukondre diniwroko fu yuni 2002.
4. Sortu sani fu gi leri wan yongu Kotoigi kan gebroiki na skoro?
4 Yonguwan, kande yu kan aksi a leriman fu yu efu yu mag sori den trawan na ini yu klas a video Jehovah’s Getuigen — Standvastig onder nazi-terreur, noso a video Getrouw onder beproevingen — Jehovah’s Getuigen in de Sovjet-Unie. Gebroiki den aksi fu Wi Kownukondre diniwroko fu yuni 2001, noso fu februari 2003 fu poti aksi gi den pikin na ini a klas.
5. San papa nanga mama kan gebroiki na den osofamiri-studie?
5 Na ini na osofamiri èn nanga mati: Papa nanga mama, o ten ben de a lasti leisi di den pikin fu unu si a video Jonge mensen vragen — Hoe kom ik aan echte vrienden? Fu san ede unu no e luku en ete wan leisi te unu e hori na osofamiri-studie? Yu kan gebroiki den aksi di skrifi na ini Wi Kownukondre diniwroko fu april 2002, fu hori wan bun takimakandra pe unu e taki krin nanga makandra.
6. Fa yu kan seti sani so taki yu nanga den mati fu yu kan bow makandra na yeye fasi?
6 Yu abi mati na ini yu gemeente di yu wani kari kon na yu oso? A ben o bun fu luku a video Heb respect voor Jehovah’s autoriteit makandra nanga den, so taki unu kan bow makandra na yeye fasi. Disi sa de so, spesrutu te unu e taki fu den sani di unu leri fu a video, èn te unu e gebroiki den aksi di skrifi na ini Wi Kownukondre diniwroko fu september 2004.
7. Sortu tra okasi yu abi na prakseri fu gebroiki den video fu wi?
7 Tra okasi: Na sortu tra fasi yu kan gebroiki den 17 video di wi abi? Te yu e go na wan sma doronomo, dan a kan de wan yepi gi en na yeye fasi, efu yu ben o sori en wán, noso tu fu den video disi? Kande yu kan aksi fu sori den video na wan presi pe den e sorgu owrusma noso wan presi pe owrusma e tan. Yu denki taki den video kan yepi yu fu wini a lespeki fu den famiri fu yu di no de na bribi, den birtisma, nanga den sma di e wroko nanga yu? Den video fu wi moi srefisrefi, den e leri sma furu sani, èn den sani di den e sori, e yepi sma trutru. Gebroiki den fu gi sma leri.