A moro koloku pipel fu grontapu
1 „Koloku fu a pipel di en Gado na Yehovah!” (Ps. 144:15) Den wortu dati e sori taki Yehovah Kotoigi na a moro koloku pipel fu grontapu. Nowan tra sani no de di e gi sma moro bigi prisiri leki fu dini a wan-enkri tru Gado, Yehovah. Fu di en na a „koloku Gado”, meki den wan di e anbegi en abi a srefi prisiri dati (1 Tim. 1:11). Sortu sani di abi fu du nanga na anbegi fu wi e meki taki wi e prisiri sote?
2 Sani di e meki wi de koloku: Yesus ben taigi wi krin taki wi sa de koloku te wi „sabi [a] nowtu [fu wi] na yeye fasi” (Mat. 5:3). Te wi e tan studeri Bijbel èn e tan go na ala den Kresten konmakandra, dan dati e yepi wi fu tapu a nowtu dati. Di wi ben leri a waarheid fu a Wortu fu Gado, dan dati meki wi kon fri fu falsi kerkileri nanga fowtu denki (Yoh. 8:32). Den Buku fu Bijbel leri wi tu san na a moro bun fasi fu libi (Yes. 48:17). Fu dati ede wi e nyan bun fu a prisiri demakandra di wi abi nanga ala wi Kresten brada nanga sisa.—1 Tes. 2:19, 20; 1 Petr. 2:17.
3 Te wi e gi yesi na den hei markitiki fu Gado ini a tori fu bun gwenti nanga gronprakseri, dan dati e gi wi prisiri srefisrefi. Wi e gi yesi na dati, fu di wi sabi taki den markitiki disi e kibri wi èn fu di wi sabi taki wi e meki Yehovah firi koloku te wi e du dati (Odo 27:11). Wan koranti nyunsuman ben taki: „Aladi den e hori densrefi soifri na spesrutu markitiki, toku Yehovah Kotoigi a no sma di no de koloku. Na presi fu dati a de so taki den alamala, yonguwan noso owruwan, na sma di moro furu de nanga prisiri èn den sabi fa fu tyari densrefi na wan yoisti fasi.” Fa wi kan yepi trawan fu feni a srefi koloku libi di wi abi?
4 Yepi trawan fu feni koloku: Grontapu lai nanga sma di no de koloku, èn furu sma no e denki taki sani sa waka bun na ini a ten di e kon. Ma wi sabi taki wan tumusi moi ten de na wi fesi e kon, pe nowan sari no sa de moro (Openb. 21:3, 4). Fu dati ede wi e wroko fayafaya na ini a preikiwroko, aladi wi e suku opregti sma nanga suma wi kan taki fu a howpu fu wi èn fu a bribi fu wi na ini Yehovah.—Esek. 9:4.
5 Wan pionier sisa ben taki: „Nowan tra sani no de di e gi moro prisiri, leki fu yepi tra sma fu kon sabi Yehovah nanga den tru tori di a e leri wi.” Meki wi du ala san wi man fu gi moro sma deki-ati fu teki wan oso-bijbelstudie. Wi e prisiri srefisrefi taki wi man dini Yehovah èn taki wi kan gi wisrefi fu yepi trawan fu dini en tu.—Tori. 20:35.