Den sani di Yesus leri wi

Fa wi kan de koloku

Sortu prenspari sani o meki taki wi de koloku?

▪ Na ini a Bergitaki fu Yesus, di furu sma sabi, a e taki na a bigin fu a sani di e meki sma de koloku. A ben taki: „Koloku fu den sma di sabi taki den de na nowtu na yeye fasi” (Mateyus 5:3). San a ben wani taki nanga dati? San na a nowtu fu wi na yeye fasi?

Efu wi wani tan na libi, dan wi musu hari blo, wi musu dringi, èn wi musu nyan. Na so meti e du tu. Ma efu wi wani de koloku, dan wi abi wan sani fanowdu di meti no abi. Iya, a de fanowdu taki wi e frustan fu san ede wi de na libi. Na a Mekiman wawan kan sorgu gi dati. Fu dati ede, Yesus ben taki: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4). Den sma di sabi taki den de na nowtu na yeye fasi, de koloku fu di den e kon krosibei na Yehovah, „a koloku Gado”, èn a e gi den wan sani di de tumusi prenspari fu meki den de koloku. A sani dati na howpu.—1 Timoteyus 1:11.

Fa Yesus ben gi sma howpu?

▪ Yesus ben taki: „Koloku fu den safri-ati sma, bika den o kisi grontapu” (Mateyus 5:5). Yesus ben gi libisma howpu te a ben e dresi sikisma, èn te a ben e gi den dedewan wan opobaka fu libi na grontapu. A ben e fruteri sma wan boskopu di e gi howpu tu. A ben taki: „Gado ben lobi grontapu so te, taki a gi en wan-enkri Manpikin, so taki ala sma di e bribi na ini en no sa dede, ma sa kisi têgo libi” (Yohanes 3:16). Sma di e gi yesi na Gado o libi fu têgo na grontapu. Prakseri fa a o de efu yu noiti no o kon owru moro èn fa a o de fu libi makandra nanga safri-ati sma. A no e fruwondru wi taki Gado Wortu e taki disi: „Prisiri nanga a howpu di unu abi” (Romesma 12:12). Yesus ben taki tu fa sma kan de koloku now.

San Yesus ben leri sma te a abi fu du nanga wan koloku libi?

▪ Yesus ben e gi bun rai te a abi fu du nanga tori soleki fa sma musu libi nanga makandra, fa a trowlibi musu de, fa wi musu sori sakafasi, èn san na a yoisti fasi fu si gudu (Mateyus 5:21-32; 6:1-5, 19-34). Te yu e teki a rai fu Yesus, dan dati sa yepi yu fu de koloku.

Wi o de koloku tu te wi lobi fu gi sani (Tori fu den Apostel 20:35). Fu eksempre, Yesus ben taki: „Te yu o sreka wan fesa, dan kari den pôtisma kon nanga den malengrisma nanga den sma di lan nanga den brenisma, dan yu o de koloku, bika den no abi noti fu pai yu baka” (Lukas 14:13, 14). Wi no musu prakseri nomo fa wi kan de koloku, fu di a sani di o meki wi de koloku na te wi e yepi trawan fu de koloku.

San na a moro prenspari sani di e meki wi de koloku?

▪ Te yu e du sani gi tra sma, dan dati kan meki yu de koloku. Ma te yu e du sani gi Gado, dan dati o meki yu de moro koloku. Te wi e du sani gi Gado, dan dati o meki wi de moro koloku srefi leki wan papa noso mama di lobi en pikin. A sani disi e kon na krin te wi e luku san ben pasa wan leisi di Yesus ben e gi sma leri. „Wan uma opo en sten na mindri den sma, taki: ’Koloku fu na uma di ben tyari yu na ini en bere èn di ben gi yu bobi!’ Ma Yesus taki: ’Nôno, koloku fu den sma di e yere a wortu fu Gado èn di e du san a wortu e taki!’”—Lukas 11:27, 28.

Yesus srefi ben kon de koloku fu di a ben e du a wani fu en hemel Tata. Gado wani taki sma yere fu a howpu di e sori taki sma kan libi fu têgo. Wan leisi, baka di Yesus taki fu a howpu disi nanga wan sma di ben wani sabi moro fu a boskopu fu en, dan Yesus ben taki: „Mi nyanyan na taki mi musu du a wani fu a sma di seni mi kon” (Yohanes 4:13, 14, 34). Yu sosrefi kan de koloku te yu e du wan sani di e plisi Gado, iya, te yu e fruteri trawan den tru tori fu Bijbel.

Efu yu wani sabi moro, dan luku kapitel 1 fu a buku disi, San Bijbel e leri wi trutru? di Yehovah Kotoigi tyari kon na doro.

[Prenki na tapu bladzijde 24]

Wi o de trutru koloku te wi e frustan fu san ede wi de na libi