Troe kolokoe ini a dini foe Jehovah
Kolokoe a sma de di abi a Gado foe Jakob leki en jepi, di a howpoe foe en de ini Jehovah, a Gado foe en.” — PSALM 146:5.
1, 2. San den ben taki foe san kolokoe wani taki èn san kolokoe wani taki gi foeroe sma ini a ten disi?
SAN na kolokoe? Hondrohondro jari langa den skrifiman foe wortoeboekoe, den filosoof, nanga den theoloog ben proeberi foe skrifi san disi wani taki. Ma den no ben man taki, na wan fasi di ala sma feni boen, san kolokoe wani taki. Na Encyclopædia Britannica e erken: „’Kolokoe’ na wan foe den moro moeilek wortoe di sma moesoe skrifi san a wani taki.” A de krin taki kolokoe wani taki difrenti sani gi difrenti pipel, foe di disi e anga foe na fasi fa den e prakseri foe a libi.
2 Gi foeroe sma kolokoe e drai lontoe wan boen gosontoe, goedoe na skin fasi, èn switi demakandra nanga kompe. Ma tokoe, sma de di abi ala den sani dati, ma di no de kolokoe. Gi den man nanga den oema di gi densrefi abra na Jehovah Gado, bijbel e gi wan idea foe kolokoe di de difrenti krinkrin foe na fasi fa moro foeroe sma e si en.
Wan tra fasi foe si kolokoe
3, 4. (a) Soema Jesus ben taki de kolokoe? (b) San wi kan taki ini a tori foe sani di e gi kolokoe èn di Jesus ben kari?
3 Na ini en Bergipreiki, Jesus Krestes no ben taki, dati kolokoe e anga foe wan boen gesontoe, goedoe na skin fasi, èn den sortoe sani dati. A ben taki, dati den sma di de troetroe kolokoe ben de den sma „di sabi a jeje nowtoe foe den” èn den sma „di e angri èn e dreiwatra foe regtfardikifasi.” San ben abi foe doe nanga den toe sani disi di de fanowdoe gi troe kolokoe na den wortoe foe Jesus di sori leki den de kontrari makandra: „Kolokoe foe den wan di de nanga sari, bikasi den o feni trowstoe” (Mateus 5:3-6). A de krin, taki Jesus no ben taki, dati sondro foe sma doe wan sani, den ben sa de kolokoe te den ben lasi wan lobiwan. Na presi foe dati, a ben taki foe den sma di ben bari krei foe a sondoefasi foe den èn den bakapisi foe dati.
4 Na apostel Paulus ben taki foe libisma mekisani di e soktoe na ondro sondoe tapoe a fondamenti foe howpoe taki den „sa kon fri foe na katibo na pori” (Romesma 8:21, 22). Libisma di teki a seti di Jehovah seti sani foe verzoen wi sondoe nanga jepi foe Krestes srakti ofrandi èn di e doe a wani foe Gado, e kisi troetroe trowstoe èn e kon kolokoe (Romesma 4:6-8). Na ini a Bergipreiki, Jesus ben taki toe taki den „safri-atisma”, „den sari-atiwan”, „den wan di de soifri na ini ati”, èn „den wan di lobi vrede” de kolokoe. A ben gi a djaranti taki awasi den ben kisi froefolgoe, dan tokoe den safri-atiwan disi no ben sa lasi a kolokoe foe den (Mateus 5:5-11). A de wan moi sani foe si taki den sani disi, di de moro prenspari foe gi kolokoe, e poti a goedoeman èn a pôtiwan tapoe wán lin.
A fondamenti gi troe kolokoe
5. San na a fondamenti gi a kolokoe foe den foetoeboi foe Gado di gi densrefi abra?
5 A fonten gi troe kolokoe no de foe feni na ini goedoe na skinfasi. A koni kownoe Salomo ben taki: „A blesi foe Jehovah — dati na san e meki sma goedoe èn a no e poti sari a tapoe” (Odo 10:22). Gi sma di e erken na universeel soevereiniteit foe Jehovah, kolokoe na wan sani di sma no man si aparti foe a blesi foe Gado. A sma di gi ensrefi abra èn di abi èn e firi den blesi foe Jehovah na en tapoe, de troetroe kolokoe. Te joe e loekoe en so leki fa a skrifi na bijbel, dan kolokoe abi foe doe nanga wan fasi foe de tevrede, foe abi satisfaksi èn foe abi satisferi ini a dienst foe Jehovah.
6. San den e aksi foe a pipel foe Jehovah, foe meki den de troetroe kolokoe?
6 Troe kolokoe e anga foe wan joisti matifasi nanga Jehovah. A abi en fondamenti tapoe a lobi gi Gado èn getrowfasi na en. Den foetoeboi foe Jehovah di gi densrefi na en, e erken den wortoe foe Paulus nanga den heri ati: „No wan foe oenoe, foe taki en leti, e libi soso gi ensrefi . . . Wi e libi gi Jehovah . . . Wi na foe Jehovah” (Romesma 14:7, 8). Foe dati ede wi no kan kisi troe kolokoe sondro foe gi jesi na Jehovah èn foe saka wisrefi nanga prisiri na en wani ondro. Jesus ben taki: „Kolokoe den wan de di e jere a wortoe foe Gado èn e doe en!” — Lukas 11:28.
Sani di e gi kolokoe, e anga foe omstandigheid
7, 8. (a) Fa wi kan seti den sani di e gi kolokoe ini difrenti groepoe? (b) San wi kan taki foe a trowlibi èn a kisi foe pikin?
7 Wi kan kari den sani di kari a fesi, di e gi kolokoe leki „fondamenti sani”, noso „sani di e tan doronomo”, foe di foe ala ten den abi waarde gi den foetoeboi foe Jehovah di gi densrefi abra. Boiti dati, joe abi san sma ben kan kari, fansortoe kolokoe, sani di kan abi kolokoe leki bakapisi a wan leisi, ma di kan abi pikinso noso no wan kolokoe a tra leisi. Ini a ten foe den famiri-edeman èn den pisi ten bifo den kresten, sma ben si a trowlibi èn a kisi foe pikin leki sani di ben moesoe foe de foe sma kan de kolokoe. Disi de foe si baka ini a sari aksi di Rakèl ben aksi Jakob: „Gi mi pikin noso mi sa de wan dede oema” (Genesis 30:1). A fasi foe denki disi ini a tori foe a kisi foe pikin, ben fiti a prakseri foe Jehovah foe a pisi ten dati. — Genesis 13:14-16; 22:17.
8 Sma ben si a trowlibi èn a kisi foe pikin leki wan blesi di Gado ben gi na mindri Jehovah pipel foe fositen. Ma, banawtoe ben moksi nanga den sani disi èn tra omstandigheid ini den pisi ten foe rampoe ini a historia foe Israèl. (Teki gersi Psalm 127, 128 nanga Jeremia 6:12; 11:22; Kragisingi 2:19; 4:4, 5.) Foe dati ede, a de krin taki a trowlibi èn a kisi foe pikin a no sani di e gi kolokoe di e tan.
Kolokoe sondro foe trow ini a ten di pasa
9. Foe san ede na oemapikin foe Jefta ben kisi prèise ala jari?
9 Foeroe foetoeboi foe Jehovah, ben feni troe kolokoe sondro foe den trow. Foe di na oemapikin foe Jefta ben abi respeki gi a sweri di en papa ben meki, meki a ben tan en wawan sondro foe trow. Foe wan pisi ten en nanga den oema-kompe foe en, ben krei foe a njoenwenke fasi foe en. Ma fa a ben prisiri foe dini foeroeten na a oso foe Jehovah, kande a mindri „den oema foetoeboi di ben doe diniwroko di ben orga na a dromofo foe a tenti foe konmakandra”! (Exodus 38:8) Foe disi ede, a ben kisi prèise ala jari. — Kroetoebakra 11:37-40.
10. San Jehovah ben aksi foe Jeremia, èn a e sori taki leki bakapisi foe dati, a ben libi wan libi di no kolokoe?
10 Foe den span ten ede pe a profeiti Jeremia ben libi na ini meki Jehovah ben aksi en foe no trow èn foe no kisi pikin (Jeremiah 16:1-4). Ma Jeremia ben ondrofeni a troe foe den wortoe foe Jehovah: „Blesi foe a tranga man na skinfasi di ben poti en froetrow na Jehovah tapoe èn di Jehovah kon tron en froetrow” (Jeremiah 17:7). Na ini den moro leki 40 jari foe en wroko leki profeiti, Jeremia ben dini Jehovah getrow leki wan man di ben de en wawan sondro foe trow. Foe so fara wi sabi, dan a no ben trow èn abi pikin noiti. Ma tokoe, soema kan degedege taki Jeremia ben de kolokoe, neleki a getrow djoe fikapisi di ’ben kon skèin foe na boen-ati foe Jehovah’? — Jeremia 31:12.
11. San na wan toe bijbel eksempel foe den getrow foetoeboi foe Jehovah di ben de kolokoe, ala di den no ben abi wan trowpatna?
11 Foeroe tra sma ben dini Jehovah nanga prisiri sondro trowpatna. Den ben de den wawan sondro foe trow, noso man ofoe oema di ben de weduwe. Na mindri den joe ben abi a profeiti-oema Ana; kande Dorkas, noso Tabita; na apostel Paulus; èn a moro bigi eksempel foe alamala — Jesus Krestes.
De joe wawan sondro foe trow, ma kolokoe ini a ten disi
12. Gi san wan toe kolokoe foetoeboi foe Jehovah, di gi den srefi abra ben meki presi ini a ten disi èn foe san ede?
12 Ini a ten disi, doesoendoesoen Jehovah Kotoigi e dini Gado getrow sondro trowpatna. Sonwan ben man foe teki a kari foe Jesus: „A sma di man meki presi foe dati [a presenti foe de joe wawan sondro foe trow] meki a meki presi foe dati.” Den doe disi „foe a kownoekondre foe hemel ede” (Mateus 19:11, 12). Dati wani taki, dati den ben gebroiki a fri foe den di Gado gi den, boen, foe di den ben gi moro ten èn krakti foe meki Kownoekondre afersi go a fesi. Foeroe foe den e dini leki pionier, zendeling, noso memre foe a Bethelfamiri na a edekantoro foe a Wachttorengenootschap na grontapoe noso na wan foe den bijkantoro foe a Genootschap.
13. Sortoe eksempel e sori taki wan kresten kan de en wawan sondro foe trow èn kolokoe?
13 Wan lobi sisa di owroe ben skrifi a tori foe en libi na ondro a nen di e taki foeroe: „Mi de mi wawan sondro foe trow ma kolokoe leki wan pionier” (The Watchtower, 1 mei 1985, bladzijde 23-26). Wan tra sisa di de en wawan sondro foe trow èn di ben dini moro leki 50 jari na Bethel, ben froeteri: „Mi de tevrede dorodoro nanga mi libi èn mi wroko. Mi abi now moro foe doe leki ini wan ten a fesi ini wan wroko di mi lobi srefisrefi. Mi no e firi sari foe dati. Mi ben sa teki a srefi bosroiti baka.” — The Watchtower, 15 juni 1982, bladzijde 15.
14, 15. (a) So leki fa na apostel Paulus e taki, dan san de fanowdoe so taki wi kan tan wi wawan sondro foe trow? (b) Foe san ede Paulus e taki, dati a sma di de en wawan sondro foe trow e doe „moro boen” èn „de moro kolokoe”?
14 Loekoe a wortoe dati „bosroiti”. Paulus ben skrifi: „Efoe wan sma tanapoe fasti ini en ati, no e firi a fanowdoe, ma abi a makti tapoe en eigi wani èn ben teki a bosroiti disi ini en eigi ati, foe kibri en eigi njoen-wenke fasi, a sa doe boen. Ma a sma di so srefi e gi en njoenwenke-fasi ini trow, e doe boen, ma a sma di no e gi en njoenwenke fasi ini trow, sa doe moro boen” (1 Korentesma 7:37, 38). Foe san ede „moro boen”? Paulus ben froeklari: „Mi wani, taki oenoe de fri foe sorgoe. A man di no trow e broko en ede gi den sani foe Masra, fa a sa kisi na boen-ati foe Masra. . . . Moro fara, na oema di no trow, èn a njoenwenke, e broko en ede gi den sani foe Masra . . . Ma mi e taki disi foe oenoe eigi boen, . . . foe boeweigi oenoe gi san boen èn san wani taki a dini foe Masra doronomo, sondro foe sani poeroe oenoe prakseri. — 1 Korentesma 7:32-35.
15 „Foe dini Masra doronomo sondro foe sani poeroe oenoe prakseri” nanga ’a kisi foe a boen-ati foe Masra’ na wi fesi, abi foe doe nanga kolokoe? A de krin taki Paulus ben prakseri dati. Di a ben taki foe wan kresten weduwe, a ben taki: „A de fri foe trow nanga soema a wani, ma soso ini Masra. Ma a de moro kolokoe efoe a tan leki fa a de, so leki fa mi e denki. Foe troe mi e denki taki mi toe abi a jeje foe Gado.” — 1 Korentesma 7:39, 40.
Den wini foe a fasi foe no trow
16. San na wan toe wini di Kotoigi foe Jehovah di no trow e njanboen foe den?
16 Efoe wan kresten de en wawan sondro foe trow, foe di ensrefi teki a bosroiti noso foe di omstandigheid e dwengi en, tokoe a fasi foe no trow e tjari foeroe persoonlijk wini kon. Sma di de den wawan sondro foe trow moro foeroe abi moro ten foe studeri a Wortoe foe Gado èn foe prakseri sani dipi. Efoe den e meki gebroiki foe na omstandigheid disi, dan a jeje fasi foe den sa kon moro tranga. Foe di foeroe foe den no abi wan trowpatna di den kan taki foe den problema nanga den, meki den e leri foe anga moro hebi na Jehovah èn foe soekoe a tiri foe en na ini ala sani (Psalm 37:5). Disi e jepi den foe kisi wan moro krosibei matifasi nanga Jehovah.
17, 18. (a) Sortoe okasi foe wan moro bradi kontren foe dienst de gi den foetoeboi foe Jehovah di no trow? (b) Fa wan toe foetoeboi foe Jehovah di no trow e taki foe a kolokoe foe den?
17 Kresten di no trow abi okasi foe wan moro bradi kontren foe dienst so taki Jehovah kisi prèise. A spesroetoe skoro di den e gi now na bekwaam brada na a Bedinari Skoro, de soso gi den brada di de den wawan sondro foe trow noso di a wefi foe den dede. Sisa toe di de den wawan sondro foe trow, de moro fri foe soekoe foe kisi moro grani ini a diniwroko foe Gado. Na owroe sisa di wi ben kari a fesi, ben wani dini nanga en friwani na ini wan kondre foe Afrika na wan ten, so leki fa ensrefi e taki, pe a ben de „wan oema di ben swaki pikinso èn di ben pasa 50 jari kaba.” Èn a tan drape, srefi di lanti ben tapoe a wroko èn ben jagi ala zendeling gowe. A e dini drape te now ete leki wan pionier, ala di a abi now moro leki 80 jari. A de kolokoe? A ben skrifi na ini a libitori foe en: „Mi ben man gebroiki na ekstra fri, èn a go di mi ben man go pe mi wani, di a de di wan sma de en wawan sondro foe trow e gi en na okasi, foe tan abi foeroe foe doe ini a diniwroko, èn disi ben tjari foeroe kolokoe gi mi. . . . Ini den jari di pasa a matifasi foe mi nanga Jehovah ben kon moro tranga. Leki wan oema di de mi wawan sondro foe trow, na wan Afrikan kondre, mi ben si en leki wan Kibriman.”
18 San moi foe si toe, na den wortoe foe wan brada di tintin jari ben wroko na a edekantoro foe a Wachttorengenootschap. A ben de kolokoe, ala di a no ben trow noiti èn ala di a ben abi wan hemel howpoe, nanga no wan froewakti foe wan trowlibi. Na a libijari foe 79, a ben skrifi: „Ibri dei mi e aksi a lobi hemel Tata foe wi ini begi foe gi mi jepi èn koni foe hori misrefi gosontoe na jeje fasi èn so srefi na skinfasi èn tranga so taki mi kan tan doe a santa wani foe en. Na ini ala den fotenti na neigi jari disi di ben pasa, na ini a dienst foe Jehovah, mi ben njanboen foe troe foe wan kolokoe fasi foe libi, di ben e pai èn di ben abi blesi. Èn nanga a no froedini boenfasi foe Jehovah mi e loekoe go a fesi foe tan dini en, foe en kisi grani èn glori èn foe a pipel foe en kisi blesi. . . . [A] prisiri foe Jehovah e jepi mi foe tan feti a boen feti foe bribi, foe di mi e loekoe go a fesi na a ten te den feanti foe Jehovah no de moro èn a heri grontapoe foeroe nanga en glori.” — Numeri 14:21; Nehemia 8:10; The Watchtower, 15 november 1968, bladzijde 699-702.
Foe san troe kolokoe e anga?
19. Foe san a kolokoe foe wi sa anga ala ten?
19 A diri matifasi foe wi nanga Jehovah, a feni di a e feni wi boen, èn a blesi foe en — disi na den sani di sa tjari troe kolokoe gi wi te foe têgo. Nanga a joisti froewakti disi foe san e tjari troe kolokoe, dan srefi foetoeboi foe Jehovah di trow e froestan taki a trowlibi foe den, no de a moro prenspari sani ini a libi foe den. Den moesoe gi jesi na a rai foe na apostel Paulus: „Disi mi e taki, brada, a ten di tan abra kon sjatoe. Meki foe dati ede den wan di abi wefi de leki den no ben abi wan” (1 Korentesma 7:29). Disi no wani taki, dati den no moesoe ke foe den wefi foe den. Lepi kresten masra e poti a dienst foe Jehovah fosi, èn na so den lobi wefi foe den di e dini Gado èn di e horibaka gi den masra, e doe toe, sonwan foe den e dini srefi foeroeten leki wan kompe foe a masra foe den. — Odo 31:10-12, 28; Mateus 6:33.
20. Sortoe joisti fasi foe doe foeroe kresten abi ini a tori foe a trowlibi?
20 Brada di trow èn di de opziener di e rèis, friwani wrokoman foe Bethel, gemeente owroeman — ija, ala kresten di trow èn di e poti Kownoekondre belang fosi — no e ’gebroiki grontapoe dorodoro’; den e wroko foe meki den grani foe a trowlibi foe den fiti ini a libi foe dienst foe den di den ben gi abra na Jehovah (1 Korentesma 7:31). Tokoe, den de kolokoe. Foe san ede? Foe di a moro prenspari reide foe a kolokoe foe den a no a trowlibi foe den, ma a dienst foe den gi Jehovah. Èn foeroe getrow trowmasra èn trowoema — ija, èn so srefi den pikin foe den — de kolokoe taki sani de so.
21, 22. (a) Tapoe a fondamenti foe Jeremia 9:23, 24, dan san moesoe foeroe wi nanga kolokoe? (b) Sortoe sani di e gi kolokoe Odo 3:13-18 e kari?
21 A profeiti Jeremia ben skrifi: „Disi na san Jehovah ben taki: ’No meki a koniman bigi ensrefi foe di a koni, èn no meki a tranga man bigi ensrefi foe di a abi makti. No meki a goedoeman bigi ensrefi, foe di a abi goedoe. Ma meki a sma di e bigi ensrefi, bigi ensrefi foe na soso sani disi, taki a abi inzicht èn na abi di a abi sabi foe mi, taki mi na Jehovah, a sma di e sori lobi boenfasi, gerègtighèit nanga regtfardikifasi na grontapoe, bika na ini den sani disi mi abi troetroe prisiri’, na so Jehovah e taki”. — Jeremia 9:23, 24.
22 Efoe wi de wi wawan sondro foe trow noso efoe wi trow, wi moro bigi fonten foe kolokoe moesoe de a sabi di wi abi foe Jehovah èn na overtoigi taki wi abi a blesi foe en, foe di wi e doe a wani foe en. Wi de kolokoe toe foe abi inzicht na ini san na den troetroe warti sani ini libi, den sani di Jehovah abi prisiri na ini. Kownoe Salomo di ben trow foeroe leisi, no ben si a trowlibi leki na wan enkri sroto foe de kolokoe. A ben taki: „Kolokoe a libisma di e feni koni èn a libisma di e kisi a koni foe si sani, bikasi foe abi en leki wini, moro boen leki foe abi solfroe leki wini èn foe abi en leki san joe wroko, moro boen leki gowtoe srefi. A moro diri leki koraal, èn ala joe tra prisiri sani no kan kon na en bakafoetoe. Langa foe dei de ini a reti-anoe foe en; ini en kroektoe anoe goedoe nanga glori. Den pasi foe en na pasi di switi èn ala den pasi foe en na vrede. A de wan bon foe libi gi den sma di e graboe en hori, èn den sma di e tan hori en steifi, joe kan kari kolokoe.” — Odo 3:13-18.
23, 24. Foe san ede wi kan de seiker taki ala den getrow foetoeboi foe Jehovah sa de kolokoe ini a njoen seti foe sani?
23 Meki den wan foe wi di trow feni têgo prisiri ini a doe foe Gado wani. Èn meki den lobi brada èn sisa foe wi di de den wawan sondro foe trow, foe di densrefi teki a bosroiti noso foe di omstandigheid e dwengi den, horidoro na ondro ala den tesi èn feni kolokoe èn satisfaksi ini a dini foe Jehovah now èn foe têgo (Lukas 18:29, 30; 2 Petrus 3:11-13). Ini Gado en seti foe sani di e kon, den sa opo „boekoelolo” (Openbaring 20:12). Disi sa abi na ini njoen komando èn seti di o span. Gado e gi wi a djaranti: „Loekoe! Mi e meki ala sani njoen.” — Openbaring 21:5.
24 Foe troe, wi kan abi na froetrow taki a „kolokoe Gado” foe wi, abi toemoesi moi sani gi wi na prakseri di sa abi a dorodoro kolokoe foe wi leki bakapisi (1 Timoteus 1:11). Gado sa go doro foe ’opo en anoe èn foe kowroe a lostoe foe ala sani di e libi.’ (Psalm 145:16). A no de foe froewondroe taki troe kolokoe de èn sa de foe ala ten, ini a dini foe Jehovah.
Fa joe ben sa piki?
◻ San na a fondamenti gi a kolokoe foe den foetoeboi foe Jehovah?
◻ Ini bijbel ten, dan soema ben de wan toe kolokoe foetoeboi foe Jehovah di no ben trow?
◻ Foe san ede Paulus ben rikomanderi foe sma de den wawan sondro foe trow, èn fa son kresten ben feni taki disi na wan kolokoe libi?
◻ Foe san a kolokoe foe wi sa anga ala ten?
◻ Foe san ede wi moesoe abi a froetrow taki ala den getrow wan ini a njoen seti foe sani sa de kolokoe?
[Prenki na tapoe bladzijde 29]
Foeroe sisa di de den wawan sondro foe trow de kolokoe foe dini Jehovah na wan getrowfasi leki foeroeten dinari
[Prenki na tapoe bladzijde 31]
Foe dini den belang foe Jehovah na a moro prenspari fonten foe de kolokoe