A trowlibi na a wan enkri sroto foe de kolokoe?
„A de fri foe trow nanga soema a wani, ma soso ini Masra. Ma a de moro kolokoe efoe a tan leki fa a de.” — 1 KORENTESMA 7:39, 40.
1. Fa den Boekoe e skrifi foe Jehovah èn san a ben doe gi den mekisani foe en?
JEHOVAH na „a kolokoe Gado” (1 Timoteus 1:11). Leki a Sma di e gi „ibri boen presenti èn ibri volmaakti kado” pasa marki, a e gi ala en mekisani di abi froestan — libisma nanga jeje — joisti san den abi fanowdoe foe de kolokoe ini a dienst foe en (Jakobus 1:17). Foe dati ede, wan fowroe di e singi moi srefisrefi, wan pikin dagoe di e djompodjompo foe prisiri, noso wan profosoe di lobi foe preiprei, e boeweisi alamala taki Jehovah ben meki meti foe njanboen foe a libi na ini a kontren pe ibriwan foe den e libi. A psalm skrifiman e go srefi so fara foe taki na poewema fasi taki „den bon foe Jehovah de nanga satisfaksi, den sedre foe a Libanon di a ben prani”. — Psalm 104:16.
2. (a) San e sori taki Jesus ben feni kolokoe ini a doe foe a wani foe en Tata? (b) Sortoe reide foe de kolokoe den disipel foe Jesus abi?
2 Jesus Krestes na a ’soifri prenki foe a sma di Jehovah de’ (Hebrewsma 1:3). A no de foe froewondroe dan, taki den moesoe kari Jesus „na kolokoe èn wan enkri Sma di abi makti” (1 Timoteus 6:15). Jesus e gi wi wan heri moi eksempel fa a doe foe a wani foe Jehovah kan gi moro satisfaksi leki njanjan, foe di disi e gi troetroe prisiri. Jesus e sori wi toe, taki wi kan abi prisiri te wi e handri ini a frede foe Gado, dati wani taki nanga ala lespeki èn wan gosontoe frede foe no plisi En (Psalm 40:8; Jesaja 11:3; Johanes 4:34). Di 70 foe Jesus disipel ben drai kon baka „nanga prisiri” baka di den ben waka lontoe foe preiki a Kownoekondre, dan Jesus srefi „ben kon foeroe nanga prisiri ini santa jeje”. Baka di a ben tjari gi en Tata a prisiri foe en ondro wortoe na ini begi, a ben drai loekoe den disipel foe en èn a ben taki: „Kolokoe den ai, di e si den sani di oenoe e si. Bikasi mi e taigi oenoe taki: Foeroe profeiti nanga kownoe ben wani si den sani di oenoe e si ma den no ben si den, èn foe jere den sani di oenoe e jere, ma den no ben jere den.” — Lukas 10:17-24.
Reide foe de kolokoe
3. San na wan toe reide foe de kolokoe?
3 Den ai foe wi no moesoe de kolokoe, foe di den e si den sani di wi e si now leki wan kontroe foe Jehovah Wortoe èn den prakseri foe en ini a ten disi foe a kaba? Wi no moesoe de nanga prisiri pasa marki, foe di wi e froestan profeititori di den getrow profeiti nanga kownoe foe owroeten, so leki Jesaja, Danièl, èn David no ben man froestan? Wi no de kolokoe foe dini a kolokoe Gado, Jehovah, ondro a tiri foe a kolokoe Sma di abi makti, a kownoe foe wi Jesus Krestes? A no de foe taki!
4, 5. (a) Foe san wi moesoe tan farawe, foe tan kolokoe ini Jehovah dienst? (b) San na wan toe sani di e meki wi de moro kolokoe èn sortoe aksi disi e meki opo kon?
4 Ma efoe wi wani tan de kolokoe ini a dienst foe Jehovah, dan wi no moesoe poti wi eigi kondisi foe de kolokoe tapoe a fondamenti foe grontapoe fasi foe denki. Makriki disi kan troeboe a denki foe wi, foe di den abi na ini goedoe na skin fasi, wan fasi foe libi pe wi e prodo nanga sani èn so moro fara. Iniwan „kolokoe” di abi en fondamenti na tapoe den sortoe sani disi sa de foe wan sjatoe pisi ten, foe di a grontapoe disi e pasa gowe. — 1 Johanes 2:15-17.
5 Moro foeroe foe Jehovah en foetoeboi di gi densrefi abra, e froestan taki foe feti a baka grontapoe marki no sa tjari troetroe kolokoe. Soso wi hemel Tata e sorgoe gi sani na jeje fasi èn na skin fasi, di kan meki a troetroe kolokoe foe den foetoeboi foe en kon moro bigi. Fa wi de grantangi gi a njanjan na jeje fasi di a e gi wi nanga jepi foe „a getrow èn koni srafoe”! (Mateus 24:45-47) Wi de grantangi toe gi a njanjan na skin fasi èn tra sani na skin fasi, di wi e kisi foe Gado en lobi anoe. Dan wi abi toe a toemoesi moi presenti foe a trowlibi èn den prisiri di e kon foe na osofamiri libi. A no de foe froewondroe, taki na opregti winsi foe Naomi gi den wefi foe den manboi foe en, di ben tron weduwe, ben de foe si ini den wortoe disi: „Meki Jehovah gi oenoe wan presenti, èn meki oenoe feni wan rostoepresi ibriwan foe oenoe ini na oso foe en masra” (Rut 1:9). So boen a trowlibi na wan sroto di kan opo a doro go na bigi kolokoe. Ma a trowlibi na a wan enkri sroto di man opo a doro go na wan kolokoe libi? Jongoewan spesroetoe moesoe go ondroesoekoe serjoesoe efoe disi de so.
6. So leki fa Genesis e sori, dan san ben de a moro prenspari marki foe a seti foe a trowlibi?
6 Te bijbel e froeteri foe a bigin foe a trowlibi, dan a e taki: „Gado ben go abra foe meki libisma leki a prenki foe en, leki a prenki foe Gado a ben meki en; man nanga oema a ben meki den. Morofara Gado ben blesi den èn Gado ben taigi den: ’Meki pikin èn kon foeroe èn foeroe grontapoe èn poti en na oenoe ondro’” (Genesis 1:27, 28). Foe di Jehovah ben seti a trowlibi, meki a ben gebroiki Adam foe meki moro libisma mekisani kon a libi, èn na so a ben meki a libisma ras kon moro bigi. Ma moro foeroe sani de na a trowlibi leki, den sani disi nomo.
„Soso ini Masra”
7. Sortoe markitiki ini a trowloibi wan getrow famiri edeman ben doe boen foeroe moeiti foe meki disi kon troe?
7 Foe di na Jehovah Gado na a Sma pe a trowlibi abi en roetoe, wi ben sa froewakti taki en ben o poti den markitiki foe a trowlibi, di ben sa abi kolokoe gi den foetoeboi foe en leki bakapisi. Na ini den ten foe den famiri-edeman, den ben gi deki-ati foe no trow kwetikweti nanga sma di no ben de anbegiman foe Jehovah. Abraham ben meki Eli-eser, a foetoeboi foe en sweri na Jehovah taki a no ben sa teki wan wefi gi Isak, a manpikin foe a famiri-edeman, na mindri foe den Kanansma. Eli-eser ben waka wan langa pasi èn a ben waka soifri baka den bodoi foe Abraham, so taki a ben kan feni ’na oema, di Jehovah ben e sori, gi a manpikin foe en masra’ (Genesis 24:3, 44). Na so Isak ben trow nanga Rebeka. Di Esau a manpikin foe den, ben teki wefi na mindri den hèiden Hetitsma, den oema disi „ben de wan fonten foe sari foe jeje, gi Isak nanga Rebeka.” — Genesis 26:34, 35; 27:46; 28:1, 8.
8. Sortoe skotoe a Wetfroebontoe ben poti ini a tori foe a trowlibi èn foe san ede?
8 Na ondro a Wetfroebontoe, den ben tapoe sma foe trow nanga man noso oema di ben de foe den nâsi foe Kanan, di den ben kari a nen foe den finifini. Jehovah ben gi a pipel foe en a bodoi: „Oenoe no moesoe meki wan frobontoe foe trow nanga den. Na oemapikin foe oen oenoe no moesoe gi na a manpikin foe en èn na oemapikin foe en oen no moesoe teki gi a manpikin foe oenoe. Foe di a sa meki a manpikin foe oenoe no waka a mi baka, èn foe troe den sa dini tra gado; èn na atibron foe Jehovah sa kon foe troe na oenoe tapoe, èn foe troe a sa pori oenoe djonsro.” — Deuteronomium 7:3, 4.
9. Sortoe rai ini a tori foe a trowlibi, bijbel e gi kresten?
9 A no de foe froewondroe taki densrefi sortoe skotoe foe no trow nanga sma di no e dini Jehovah, ben sa moesoe fiti ini a kresten gemeente. Na apostel Paulus ben warskow den kompe bribiman foe en: „No kon ondro wan tjatjari di no de a srefi nanga sma di no de na bribi. Bikasi san regtfardikifasi abi foe doe nanga kroektoedoe? Noso san leti abi foe doe nanga doengroe? Moro fara, san Belial abi foe doe nanga Krestes? Noso sortoe pisi wan bribiman abi nanga wan sma di no de a bribi?” (2 Korentesma 6:14, 15) A rai dati e fiti na difrenti fasi, èn seiker a e fiti a trowlibi. A soifri ordroe foe Paulus gi ala foetoeboi foe Jehovah di gi densrefi abra de, taki den moesoe prakseri foe go trow nanga wan sma, „soso te a sma de na ini wánfasi nanga Masra”. — 1 Korentesma 7:39, foetoewortoe.
Okasi no de foe trow „ini Masra”
10. San foeroe kresten, di no trow, e doe èn sortoe aksi e kon foe disi?
10 Foeroe kresten di de den wawan, ben froekisi foe waka baka na eksempel foe Jesus Krestes, foe di den e kweki lobi gi a presenti foe tan den wawan. Wan tra sani, foe di foeroe getrow kresten no de ini a okasi foe feni wan trowpatna di e frede Gado èn so boen no man trow „ini Masra”, den poti a froetrow foe den ini Jehovah èn den tan den wawan, na presi foe go trow nanga wan sma di no de na bribi. A jeje foe Gado e tjari na ini den, den sortoe froktoe leki, prisiri, vrede, bribi nanga dwengi joesrefi so taki den man tan hori wan krin fasi foe de den wawan (Galasiasma 5:22, 23). Na mindri den wan di nanga boen bakapisi e ondrofeni a tesi disi, foe gi densrefi ini a dini foe Gado, wan bigi nomroe foe wi kresten sisa de, èn wi abi dipi lespeki gi den. Na difrenti kondre a nomroe foe den de moro foeroe leki di foe den brada èn foe dati ede den abi wan boen bigi prati na a preikiwroko. A no de foe taki, dati „Jehovah srefi e gi a wortoe; den oemasma di e froeteri a boen njoensoe, na wan bigi legre” (Psalm 68:11). Foe taki en leti, dan foeroe foe den foetoeboi foe Gado di no trow, so boen man nanga oema, e tan hori a soifri retifasi foe den, foe di den e ’froetrow tapoe Jehovah nanga den heri ati èn a e meki den pasi foe den reti’ (Odo 3:5, 6). Ma den wan di nojaso no man trow „ini Masra”, o de kolokoe seiker?
11. Foe san kresten, di e tan den wawan foe di den abi respeki gi bijbel gronprakseri, kan de seiker?
11 No meki wi frigiti taki wi na Kotoigi foe a kolokoe Gado, Jehovah èn taki wi e dini ondro a kolokoe Sma di abi makti, Krestes Jesus. So boen, efoe a lespeki foe wi gi skotoe, di bijbel e tjari finifini kon a krin, ben sa boeweigi wi foe tan wi wawan, foe di okasi no de foe feni wan trowpatna „na ini Masra”, dan a de wan logis sani foe denki taki Gado nanga Krestes ben sa libi wi sondro foe de kolokoe? Kwetikweti. Foe dati ede, wi moesoe kon na a bosroiti taki wi man de kolokoe leki kresten, ala di wi no de ini a okasi foe trow. Jehovah kan meki wi troetroe kolokoe efoe wi trow noso de wi wawan.
A sroto gi troe kolokoe
12. San a kefal foe den engel, di no ben gi jesi, e sori ini a tori foe a trowlibi?
12 No gi ala den foetoeboi foe Gado, trow na a wan enkri sroto foe de kolokoe. Teki leki wan eksempel den engel. Bifo a Froedoe, dan wan toe foe den engel ben kweki lostoe di no ben de akroederi a fasi fa jeje mekisani meki, den no ben abi satisfaksi taki den no ben man trow, èn den ben teki libisma skin, so taki den ben kan teki oema foe tron den wefi. Foe di den engel disi na so fasi „ben gowe libi den eigi joisti tanpresi” meki Gado „ben kibri den nanga têgo banti ondro deki doengroe gi a kroetoe foe a bigi dei” (Judas 6; Genesis 6:1, 2). A de krin taki Gado noiti ben seti sani foe meki den engel trow. So boen a trowlibi no ben kan de a sroto foe den ben de kolokoe.
13. Foe san ede den santa engel de kolokoe èn san disi e sori ini a tori foe ala den foetoeboi foe Gado?
13 Tokoe den getrow engel de kolokoe. Jehovah ben poti den fondamenti foe grontapoe „san ben meki den mamanten stari singi makandra foe prisiri èn a grani di den [engel] manpikin foe Gado ben gi leki nanga wán mofo” (Job 38:7, The Jerusalem Bible). Foe san ede den santa engel de kolokoe? Foe di den e dini Jehovah Gado doronomo, „e arki a sten foe en wortoe”, foe doe disi. Den e prisiri „foe doe san e plisi en” (Psalm 103:20, 21, foetoewortoe). Ija, a kolokoe foe den santa engel e kon foe di den e dini Jehovah getrow. Dati na a sroto, gi libisma toe, foe de kolokoe troetroe. Foe a reide dati, salfoe kresten di trow èn di e dini Gado kolokoe now, no sa trow te den opobaka foe kisi hemel libi, ma den sa de kolokoe leki jeje mekisani di e doe Gado wani. Foe dati ede efoe den loyaal foetoeboi foe Jehovah trow noso de den wawan, tokoe den kan de kolokoe foe di a troe fondamenti foe de kolokoe na foe dini a Mekiman na wan getrowfasi.
„Wan sani di de moro betre leki manpikin èn oemapikin”
14. Sortoe profetis pramisi den euniki, di ben dini Gado ini Israèl foe owroeten ben kisi èn foe san ede disi sori leki a de wan freimde sani?
14 Srefi efoe wan loyaal kresten no e trow noiti, Gado kan meki a kolokoe foe a sma dati de seiker. Wi kan kisi deki-ati foe den wortoe disi di ben taki na profeitifasi gi den euniki na Israèl foe owroeten: „Disi na san Jehovah ben taigi den euniki di e hori den sabat foe mi èn di teki a sani di mi abi prisiri na ini èn di e hori tranga na a froebontoe foe mi: ’Srefi na ini mi oso èn na mindri den skotoe foe mi, mi wani gi den wan sani foe memre den èn wan nen, wan sani di de moro betre leki manpikin nanga oemapikin. Wan nen te ten di no skotoe mi sa gi den, wan di sma no sa koti poeroe’” (Jesaja 56:4, 5). Wan sma ben sa froewakti kande taki Gado ben sa pramisi den sma disi wan wefi nanga pikin foe meki a nen foe den tan foe ala ten. Ma Gado ben pramisi den „wan sani di de moro betre leki manpikin nanga oemapikin” — wan têgo nen, na ini na oso foe Jehovah.
15. San wi kan taki foe a kontroe foe Jesaja 56:4, 5?
15 Efoe wi kan teki den euniki disi leki wan profeitis prenki di abi foe doe nanga „na Israèl foe Gado”, dan den e agersi salfoewan di e kisi wan têgo presi na ini Jehovah en oso na jeje fasi, noso tempel (Galasiasma 6:16). Sondro degedege, a profeititori disi sa kon troe so srefi na wan letterlijk fasi tapoe den euniki foe Israel foe owroeten, di ben gi densrefi foe dini Gado èn di kisi opobaka. Efoe den e teki a froeloesoe-paiman foe Krestes, èn e go doro foe teki a sani di Jehovah abi prisiri na ini, den sa kisi „wan nen foe ten di no skotoe” na ini Jehovah njoen grontapoe. Disi ben sa kan fiti toe tapoe den wan foe den „tra skapoe” ini a ten disi foe a kaba, di ben poti a prisiri foe a trowlibi èn na abi foe pikin na wan sei, so taki den kan gi densrefi moro foeroe na a dienst foe Jehovah (Johanes 10:16). Sonwan foe den sa dede kande sondro foe den trow, èn sondro foe abi pikin. Ma efoe den de getrow, dan den sa kisi na ini na opobaka „wan sani di de moro betre leki manpikin nanga oemapikin” — wan nen „di no sa koti poeroe”, na ini a njoen seti foe sani.
A trowlibi a no na wan enkri sroto foe de kolokoe
16. Foe san ede wi kan taki, dati a trowlibi no e tjari kolokoe ala ten?
16 Son sma e denki, taki kolokoe tai na a trowlibi sondro foe joe kan prati den foe makandra. Ma wi moesoe erken, taki srefi na mindri den foetoeboi foe Jehovah ini a ten disi, a trowlibi no e tjari kolokoe kon ala ten. Trow e loesoe wan toe problema, ma nofotron a e tjari tra problema kon, di kan de moro tranga foe loesoe leki den wan di sma di no trow e ondrofeni. Paulus ben taki, dati a trowlibi e tjari ’banawtoe ini a skin’ kon (1 Korentesma 7:28). Ten de, te wan sma di trow abi „broko-ede” èn „prati”. Man noso oema e feni en nofotron wan moeilek sani foe „dini Masra doronomo, sondro foe sani poeroe en prakseri”. — 1 Korentesma 7:33-35.
17, 18. (a) San wan toe opziener di e rèis ben froeteri? (b) Sortoe rai Paulus ben gi èn foe san ede a de wan boen sani foe doe en?
17 A trowlibi èn a tan di wan sma e tan en wawan sondro foe trow, ala toe, na presenti foe Gado (Rut 1:9; Mateus 19:10-12) Ma foe abi boen bakapisi na ini ala toe situwâsi, a de prenspari foe go prakseri sani na ondro begi. Opziener di e rèis e froeteri taki foeroe Kotoigi e trow toemoesi jongoe, èn foeroetron e tron papa nanga mama bifo den de klari foe tjari den frantiwortoe di e kon leki bakapisi foe dati. Wan toe foe den sortoe trow disi e broko. Tra paar man kakafoetoe gi den problema foe den, ma a trowlibi foe den no tjari kolokoe gi den. So leki fa William Congreve, wan Ingrisi komedi skrifiman ben skrifi, dan den sma di e trow hastihasti „sa kan abi berow foe disi wan langa ten.”
18 Kringopziener e froeteri toe, taki wan toe jongoe brada ben hori densrefi foe gi den nen gi Betheldienst noso foe gi densrefi na wan fri fasi gi a Bedinari Skoro, foe di den e aksi den foe tan wan toe jari sondro foe trow. Ma na apostel Paulus e gi a rai foe no trow bifo wan sma „pasa na bromki foe en jongoe jari” dati wani taki, foe wakti te leki den fosi sekslostoe ben saka pikinso (1 Korentesma 7:36-38). Den jari di wan sma e libi leki wan bigisma di de en wawan sondro foe trow, e gi wan sma warti ondrofeni èn a froestan foe sani, foe di a e kon ini wan moro boen posisi foe teki wan trowpatna noso foe teki a bosroiti, di a wegi go-kon boen, foe tan en wawan sondro foe trow.
19. Fa wi ben kan si den afersi efoe wi no abi wan troetroe fanowdoe foe trow?
19 Son wan foe wi pasa a bromki foe wi jongoe jari, nanga en tranga lostoe foe abi seks. Wawan leisi wi kan loekoe den blesi foe a trowlibi, ma te joe loekoe en boen joe abi a presenti foe de joe wawan sondro foe trow. Jehovah e si kande taki wi e dini en na wan moro boen fasi, te wi e tan wi wawan èn no abi wan troetroe fanowdoe foe trow, di kan abi leki bakapisi taki wi abi foe saka son grani ini a dienst foe en. Efoe a trowlibi no de wan persoonlijk fanowdoe èn wi no blesi nanga wan patna, Gado abi kande wan tra sani gi wi na prakseri. Meki wi foe dati ede sori bribi taki a sa gi wi san wi abi fanowdoe. A moro bigi kolokoe e kon foe di wi e teki, nanga sakafasi, san sori taki a de a wani foe Gado gi wi, neleki den djoe brada ’di ben teki sani leki fa den de èn ben gi Gado glori’ foe di den ben froestan taki a ben gi den heidensma okasi foe abi berow, so taki den ben kan abi libi. — Tori foe den Apostel 11:1-18.
20. (a) Sortoe rai ini a tori foe tan den wawan den e gi dja na jongoe kresten? (b) Sortoe fondamenti penti di abi foe doe nanga kolokoe de troe?
20 Foe dati ede, a trowlibi, kan de a sroto foe de kolokoe, ma a man opo a doro toe foe joe kisi problema. Wan sani de seiker: A trowlibi a no a wan enkri fasi foe feni kolokoe. Efoe wi go prakseri ala den sani disi, dan a ben sa de foe dati ede wan koni sani, spesroetoe gi jongoe kresten, foe proeberi foe meki presi gi wan toe jari foe tan wawan sondro foe trow. Den jari dati kan gebroiki boen foe dini Jehovah èn foe go na fesi na jeje fasi. Ma awasi a libijari noso a go-a-fesi na jeje fasi, a fondamenti penti disi e tan troe gi ala den sma di gi densrefi abra na Gado sondro foe hori wan sani na baka: Troe kolokoe de foe feni ini getrow dienst gi Jehovah.
Fa joe ben sa piki?
◻ Foe san ede den foetoeboi foe Jehovah de kolokoe?
◻ Foe san ede a trowlibi a no a sroto foe kisi a moro bigi kolokoe?
◻ Sortoe markitiki ini a tori foe teki wan a trowpatna de fanowdoe gi a pipel foe Jehovah?
◻ Foe san ede a de wan sani di wi kan froestan, foe bribi taki kresten di e tan den wawan, sondro foe trow, kan de kolokoe?
◻ San wi kan taki foe a trowlibi èn kolokoe?