Joe e memre disi ete?
Joe ben feni taki den tijdschrift A Waktitoren foe den moen di pasa, ben abi praktis waarde gi joe? Dan foe san ede joe no e gebroiki den aksi di e kon now foe loekoe san joe e memre ete:
▫ Efoe wan prakseri foe hoeroedoe e kon na ini wi sondro foe wi wani, dan san wi moesoe doe?
Wi moesoe kenki a sani di wi ben prakseri, go koiri, leisi pikinso noso go doe wan wroko ini na oso. Begi na wan spesroetoe krakti jepisani toe ini a tori disi (Psalm 62:8). — 1/4, bladzijde 22.
▫ Foe san ede jongoe sma moesoe loekoe boen ini a tori foe sortoe pokoe den e arki?
Pokoe abi a krakti foe boeweigi sma foe doe wan sani, foe meki den tron wan srafoe foe dati èn foe abi krakti na den tapoe. Foe di foeroe pôpi pokoe abi wan moi nomroe wortoe di e sori go na seks na wan kibrifasi èn wortoe di ben sori leki den no ben taki foe hoeroedoe, a de makriki foe si taki jongoesma moesoe loekoe boen srefisrefi te den e teki plaat, cassette-lolo nanga compact disk. — 1/4, bladzijde 26, 27.
▫ San den wortoe „a denoja foe wi Masra Jesus Krestes” wani taki? (1 Tesalonikasma 5:23)
Den wortoe disi e sori go na a kownoe denoja foe Masra Jesus Krestes leki Kownoe, di sma no man si, sensi èn baka 1914, baka di den ben poti en tapoe kownoestoeroe na hemel (Psalm 110:1, 2). — 1/5, bladzijde 8.
▫ San Jehovah ben abi na prakseri di a ben krin en tempel na jeje fasi? (Maleaki 3:1-4)
Jehovah ben wani taki en tempel ben moesoe de ini wan krin kondisi, so taki te den ben o tjari foeroe nomroe anbegiman nanga wan grontapoe howpoe kon drape, den ben kan feni wan presi pe sma ben e lespeki en universeel soevereiniteit, wan presi pe den e santa a nen foe en leki Gado èn pe den e gi jesi na den regtfardiki wet foe en. — 1/5, bladzijde 13.
▫ San na den „goedoe” di Krestes Jesus ben gi en srafoe di a ben poti na wroko? (Mateus 24:45-47)
Den „goedoe” disi na ala den sani na jeje fasi di kon tron Krestes en eigi goedoe na grontapoe èn di abi foe doe nanga en makti leki hemel Kownoe. Disi ben sa abi na ini toe na ordroe foe meki disipel foe Krestes foe sma foe ala den nâsi (Mateus 28:19, 20). — 1/5, bladzijde 14.
▫ Fa den kresten owroeman e sori ’a wani di den wani’, te den e doe a skapoemanwroko so leki Petrus ben gi a deki-ati foe doe ini 1 Petrus 5:2?
Wan kresten owroeman di e sorgoe den skapoe, sa doe a skapoemanwroko foe en foe di a wani noso nanga en eigi fri wani, ondro a tiri foe a Toemoesi Boen Skapoeman, Jesus Krestes. Foe dini foe di a wani, wani taki toe dati wan kresten skapoeman moesoe saka ensrefi na a makti foe Jehovah ondro èn a moesoe sori lespeki gi a theokrasia seti. — 1/5, bladzijde 30.
▫ San Jesus ben wani taki di a ben taki dati wan sma di e waka na en baka ben moesoe „drai en baka gi ensrefi”? (Mateus 16:24)
Foe ’joe drai joe baka gi joesrefi’ wani taki dati joe moesoe gi a reti di joe abi foe de eiginari foe joesrefi, na Jehovah (1 Korentesma 6:19, 20). A wani taki dati joe no e libi foe plisi joesrefi ma Gado (Romesma 14:8). — 1/6, bladzijde 14.
▫ Foe san ede Jehovah ben gi Abraham pasi foe taki nanga en na so wan fri fasi foe a prakseri di A ben abi na prakseri foe pori Sodom? (Genesis 18:22-32)
Wan reide ben de foe di Abraham ben de a mati foe Gado (Jakobus 2:23). Moro fara Jehovah ben froestan den broeja firi foe Abraham. Gado ben sabi taki Lot, a bradapikin foe Abraham, ben libi na Sodom èn taki Abraham ben broko en ede efoe a libi foe Lot ben de ini kefar efoe no. Foe den reide disi Jehovah ben de klariklari foe piki den aksi di Abraham ben poti ini a tori foe a prakseri di A ben abi na prakseri foe pori Sodom. — 1/6, bladzijde 29.
▫ San na den „goedoe na hemel” di Jesus ben taki foe dati na Mateus 6:20?
Den goedoe dati noiti no e lasi gowe safrisafri, so srefi wan boen nen na Gado èn wan nen foe getrow kresten diniwroko. Disi na wan foe den sani di Jehovah noiti e frigiti (Hebrewsma 6:10). — 1/7, bladzijde 32.
▫ Sortoe eigifasi Petrus e kari leki den moro prenspari sani gi a bribi foe wi? (2 Petrus 1:5-7)
Petrus ben taki dati boenfasi, sabi, a dwengi di wan sma moesoe dwengi ensrefi, horidoro, a gi di wan sma e gi ensrefi na a dini foe Gado, brada lobi nanga lobi moesoe moksi na a bribi foe wi. — 1/7, bladzijde 21.
▫ Sortoe warskow gi den foetoeboi foe Gado de foe feni ini a tori foe a sondoe di David doe nanga Batseiba? (2 Samuèl 11:2-4)
Ala di David ben abi a fri foe njanboen foe prisiri ini en eigi trowlibi, a ben meki seks lostoe di wet ben tapoe, gro. Di a ben e si fa a wefi foe Uria ben moi, a no ben basi en prakseri — èn den doe foe en — ini a tori foe abi prisiri nanga en na wan fasi di de kontrari a wet. A srefi sani kan pasa nanga ibri foetoeboi foe Gado efoe a no e tan farawe foe bigi-ai (Jakobus 1:14, 15). — 1/8, bladzijde 12