„Meki oen ati kon de stanfaste”
„Oenoe abi horidoro fanowdoe, so taki, baka te oenoe doe a wani foe Gado, oenoe kan kisi a kontroe foe a pramisi.” — HEBREWSMA 10:36.
1, 2. (a) San ben pasa nanga wan toe kresten na ini a fosi jarihondro? (b) Foe san ede a makriki taki a bribi kan kon swaki?
FOE ala den bijbel skrifiman, no wan foe den ben skrifi moro foeroe foe bribi leki na apostel Paulus. Èn foeroetron a ben taki foe den sma di ben abi wan bribi di ben kon swaki noso ben dede. Foe eksempre, Himenei-us nanga Aleksander „ben lasi bika foe a bribi foe den” (1 Timoteus 1:19, 20). Deimas ben gowe libi Paulus bika „a ben lobi a disiten seti foe sani” (2 Timoteus 4:10). Son wan ben ’drai den baka gi a bribi’ foe di den no ben tjari densrefi leki kresten èn den no ben teki den frantiwortoe foe den. Trawan ben meki taki den falsi koni ben kori den èn den „ben fadon komoto na bribi”. — 1 Timoteus 5:8; 6:20, 21.
2 Foe san ede den salfoe kresten dati ben lasi na den fasi disi? We, „bribi na a seiker froewakti foe sani di wan sma e howpoe na tapoe, a krin boeweisi foe troe sani, ma di sma no e si” (Hebrewsma 11:1). Wi abi bribi na ini sani di wi no man si. Wi no abi bribi fanowdoe gi sani di wi man si. A moro makriki foe wroko gi goedoe di wi man si na presi foe wroko gi jeje goedoe di wi no man si (Mateus 19:21, 22). Foeroe sani di sma man si — soleki „a lostoe foe skin nanga a lostoe foe den ai” — na sani di e hari na onvolmaakti skin foe wi srefisrefi èn den kan swaki a bribi foe wi. — 1 Johanes 2:16.
3. Sortoe bribi wan kresten moesoe abi?
3 Tokoe, Paulus e taki, „a sma di e kon na Gado, moesoe bribi taki a de èn taki a e tron a sma di e pai den wan di e soekoe en serjoesoe”. Moses ben abi so wan bribi. A „ben poti ala en prakseri na tapoe a pai di a ben sa kisi” èn „ben tan stanfaste neleki a ben e si a Wan di wi no kan si” (Hebrewsma 11:6, 24, 26, 27). Wan kresten abi a sortoe bribi disi fanowdoe. Soleki fa wi ben taki na ini na artikel na fesi, Abraham ben de wan toemoesi moi eksempre na ini na afersi disi.
Abraham en eksempre na ini bribi
4. Fa a bribi foe Abraham ben abi krakti na tapoe a fasi fa a ben libi?
4 Abraham ben de na ini Ur di a ben kisi a pramisi foe Gado taki a ben o tron papa foe wan siri di ben sa de wan blesi gi sma foe ala nâsi (Genesis 12:1-3; Tori foe den Apostel 7:2, 3). Foe a pramisi dati ede, Abraham ben gi jesi na Jehovah, èn ben froisi fosi go na Haran èn baka dati na Kanan. Drape Jehovah ben pramisi foe gi a siri foe Abraham a kondre (Genesis 12:7; Nehemia 9:7, 8). Ma foeroe sani di Jehovah ben pramisi ben moesoe kon troe na baka di Abraham ben dede. Foe eksempre, noiti Abraham ben abi wan pisi foe Kanan gi ensrefi — boiti a bergi-olo foe Makpela di a ben bai leki wan beripe (Genesis 23:1-20). Tokoe a ben abi bribi na ini a wortoe foe Jehovah. Na tapoe foe dati, a ben abi bribi na ini wan „foto di abi troetroe fondamenti, [a foto] di Gado na a bowman nanga a mekiman foe en” na ini a ten di e kon (Hebrewsma 11:10). So wan bribi ben jepi en, en heri libi langa.
5, 6. Na sortoe fasi a bribi foe Abraham ben kisi tesi na ini a pramisi foe Jehovah?
5 Disi wi kan si spesroetoe na a pramisi taki a siri foe Abraham ben o tron wan bigi nâsi. Foe man meki disi pasa, dan Abraham ben abi wan manpikin fanowdoe, èn a ben wakti wan langa pisiten fosi a ben blesi nanga wan manpikin. Wi no sabi o owroe a ben de di a ben jere a pramisi foe Gado a fosi leisi, ma di a ben teki a langa waka go na Haran, dan Jehovah no ben gi en wan pikin ete (Genesis 11:30). A ben tan langa nofo na Haran foe man ’tjari goedoe kon makandra èn kisi sili’, èn di a ben froisi go na Kanan a ben abi 75 jari èn Sara ben abi 65 jari. Ma tokoe wan manpikin no ben de ete (Genesis 12:4, 5). Di Sara ben tron pikinmoro 75 jari, a ben denki taki a ben owroe toemoesi foe gi Abraham wan pikin. Foe dati ede, akroederi wan gwenti di ben de na a ten dati, a ben gi en oema-srafoe, Hagar, na Abraham, èn Abraham ben meki wan manpikin nanga Hagar. Ma disi no ben de a pikin di Gado ben pramisi. Te foe kaba, den ben seni Hagar nanga en pikin, Ismaèl, gowe. Tokoe di Abraham ben taki gi a boen foe den, Jehovah ben pramisi foe blesi Ismaèl. — Genesis 16:1-4, 10; 17:15, 16, 18-20; 21:8-21.
6 Na Gado en eigi reti ten — wan boen langa ten baka di den ben jere a pramisi a fosi tron — Abraham di ben abi 100 jari èn Sara di ben abi 90 jari ben kisi wan manpikin, Isak. A ben moesoe de wan kefalek moi sani! Gi na owroe trowpaar disi, a ben de pikinmoro leki wan opobaka di den „dede” skin foe den ben meki wan njoen libi (Romesma 4:19-21). Den ben moesoe wakti langa, ma di a pramisi ben kon troe te foe kaba, dan a ben boen taki den ben wakti.
7. Fa bribi abi foe doe nanga horidoro?
7 Na eksempre foe Abraham e memre wi taki bribi no moesoe de gi wan sjatoe pisi ten nomo. Paulus ben sori taki bribi abi foe doe nanga horidoro di a ben skrifi: „Oenoe abi horidoro fanowdoe, so taki, baka te oenoe doe a wani foe Gado, oenoe kan kisi a kontroe foe a pramisi. . . . Wi no de den sortoe sma di e drai baka èn e kisi pori, ma den sortoe sma di abi bribi, meki a sili tan na libi” (Hebrewsma 10:36-39). Foeroe sma wakti wan langa ten gi a kontroe foe a pramisi. Son wan wakti den heri libi langa. A tranga bribi foe den jepi den. Èn leki Abraham, den sa kisi a pai na a reti ten foe Jehovah. — Habakuk 2:3.
Arki Gado
8. Fa wi e arki Gado na ini a ten disi, èn foe san ede dati sa tranga a bribi foe wi?
8 No moro mendri leki fo sani ben tranga a bribi foe Abraham, èn den srefi sani kan jepi wi. Fosi wan, a ben sori a ’bribi foe en taki Gado de’ di a ben poti prakseri te Gado ben e taki. Na so fasi a ben e difrenti foe den djoe na ini a ten foe Jeremia, di ben abi bribi na ini Jehovah, ma di no ben abi bribi na ini den wortoe foe en (Jeremia 44:15-19). Na ini a ten disi, Jehovah e taki nanga wi nanga jepi foe bijbel, en Wortoe di sma skrifi nanga jepi foe en santa jeje, di Petrus ben taki dati a de leki „wan lampoe di e skèin na ini wan doengroe presi . . . na ini oen ati” (2 Petrus 1:19). Te wi e leisi bijbel nanga wi heri prakseri, dan wi e njan „den wortoe foe bribi leki njanjan” (1 Timoteus 4:6; Romesma 10:17). Moro fara, na ini den lasti dei disi „a getrow èn koni srafoe” e gi jeje „njanjan na a reti ten”, dati na tiri foe gebroiki bijbel gronprakseri èn foe froestan den bijbel profeititori (Mateus 24:45-47). A de toemoesi tranga fanowdoe foe arki Jehovah nanga jepi foe den sani disi efoe wi wani abi wan tranga bribi.
9. San sa de a bakapisi te wi e bribi a kresten howpoe troetroe?
9 A bribi foe Abraham ben abi foeroe foe doe nanga a howpoe foe en. „Foe en howpoe ede a ben abi bribi, taki a ben sa kan tron papa foe foeroe nâsi” (Romesma 4:18). Disi na a di foe toe sani di kan jepi wi. Noiti wi moesoe frigiti taki Jehovah na „a sma di e pai den wan di e soekoe en serjoesoe”. Na apostel Paulus ben taki: „Wi e wroko tranga èn e doe tranga moeiti, bika wi poti wi howpoe tapoe wan Gado di e libi” (1 Timoteus 4:10). Efoe wi e bribi a kresten howpoe troetroe, dan a heri fasi fa wi e tjari wi libi sa de wan boeweisi foe a bribi foe wi, soleki fa a ben de nanga Abraham.
Taki nanga Gado
10. Sortoe begi sa tranga a bribi foe wi?
10 Abraham ben taki nanga Gado, èn disi ben de a di foe dri sani di ben tranga en bribi. Na ini a ten disi wi kan taki toe nanga Jehovah, te wi e gebroiki a presenti foe a begi nanga jepi foe Jesus Krestes (Johanes 14:6; Efeisesma 6:18). A ben de baka di Jesus ben froeteri wan agersitori di e sori a fanowdoe di de foe begi doronomo, taki Jesus ben poti na aksi: „Te a Manpikin foe libisma e doro, a sa feni troetroe a bribi na grontapoe?” (Lukas 18:8) Wan begi di e tranga a bribi a no wan begi pe wi no e poti prakseri na tapoe, noso di e kon foe ensrefi. A wani taki wan sani troetroe. Foe eksempre, wan serjoesoe begi de toemoesi prenspari te wi moesoe teki wan prenspari bosroiti noso te wi de na ondro hebi druk. — Lukas 6:12, 13; 22:41-44.
11. (a) Fa Abraham ben kon tranga di a ben opo en ati gi Gado? (b) San wi kan leri foe na ondrofeni foe Abraham?
11 Di Abraham ben e kon owroe èn Jehovah no ben gi en a pramisi siri ete, dan Abraham ben taki nanga Gado foe a broko-ede foe en. Jehovah ben gi en a djaranti foe dati. San ben de a bakapisi? Abraham „ben poti bribi na ini Jehovah; èn a ben teri dati gi en leki regtfardikifasi”. Dan Jehovah ben gi en wan marki foe boeweisi den wortoe foe en di de wan djaranti gi en (Genesis 15:1-18). Te wi e opo wi ati gi Jehovah na ini begi, èn wi e teki den djaranti di Jehovah e gi na ini en Wortoe, bijbel, èn wi e gi jesi na en nanga dorodoro bribi, dan Jehovah sa tranga a bribi foe wi toe. — Mateus 21:22; Judas 20, 21.
12, 13. (a) Fa Abraham ben kisi blesi di a ben gebroiki a tirilin foe Jehovah? (b) Sortoe ondrofenitori sa tranga a bribi foe wi?
12 A di foe fo sani di ben tranga a bribi foe Abraham ben de a jepi di Jehovah ben gi en di a ben gebroiki den tirilin foe Gado. Di Abraham ben go froeloesoe Lot foe den kownoe di ben kon feti nanga den, dan Jehovah ben meki a wini a feti (Genesis 14:16, 20). Ala di Abraham ben libi gi wan sjatoe pisi ten na ini a kondre di en siri ben o kisi, dan Jehovah ben blesi en na materia sei. (Teki gersi Genesis 14:21-23.) Jehovah ben tiri den moeiti di en gran-foetoeboi ben doe foe feni wan joisti wefi gi Isak (Genesis 24:10-27). Ija, Jehovah „ben blesi Abraham na ini ala sani” (Genesis 24:1). A bribi foe Abraham ben de so tranga èn a ben abi so wan krosibei matifasi nanga Jehovah Gado foe dati ede, taki Jehovah ben kari en „mi mati”. — Jesaja 41:8; Jakobus 2:23.
13 Wi kan abi so wan tranga bribi na ini a ten disi? Ija. Leki Abraham, te wi e tesi Jehovah foe di wi e gi jesi na den komando foe en, dan a sa blesi wi toe, èn dati sa tranga a bribi foe wi. Foe eksempre, te wi e loekoe a Raport foe a Dienstjari 1998, dan dati e sori wi taki foeroe sma ben kisi blesi na wan moi fasi di den ben gi jesi na a komando foe preiki a boen njoensoe. — Markus 13:10.
Wan heimarki di abi foe doe nanga bribi na ini a ten disi
14. Fa Jehovah ben blesi a kotoigiwroko nanga Kownoekondre njoensoe nr. 35?
14 Na ini a moen oktober 1997 di pasa, a kotoigiwroko nanga a Kownoekondre njoensoe nr. 35 na heri grontapoe ben abi kefalek moi bakapisi, bikasi foe a faja nanga a prisiri foe miljoenmiljoen Kotoigi. Wan moi eksempre na a sani di ben feni presi na ini Ghana. Pikinmoro 2,5 miljoen eksemplaar ben prati na ini fo tongo, èn pikinmoro 2000 sma ben aksi bijbelstudie leki wan bakapisi foe dati. Na ini Ciprus, toe Kotoigi di ben e prati Kownoekondre njoensoe ben si taki wan priester ben waka na den baka. Baka wan pisi ten, den ben pristeri en wan eksemplaar foe Kownoekondre njoensoe. A ben abi wan eksemplaar kaba èn ben taki: „A boskopoe foe en ben naki mi ati so kefalek taki mi ben wani fristeri den sma di meki en.” Na ini Denemarken, 1,5 miljoen eksemplaar foe Kownoekondre njoensoe ben prati nanga moi bakapisi. Wan oema di abi a wroko foe meki sma froestan a wroko di trawan e doe, ben taki drape: „A traktaat abi wan boskopoe gi ibri sma. A makriki foe froestan, èn a e boeweigi joe, èn e gi joe na angri foe sabi moro. A e taki foe a troetroe problema!”
15. Sortoe ondrofenitori e sori taki Jehovah ben blesi den moeiti di ben doe foe miti sma na ala presi?
15 Na ini 1998 moeiti ben doe foe no preiki gi sma na ini den oso wawan, ma na ala presi. Na ini Ivoorkust wan zendeling trowpaar ben fisiti 322 sipi na a presi pe den sipi e tan. Den ben prati 247 boekoe, 2284 tijdschrift, 500 brochure, nanga hondrohondro traktaat, èn so srefi video gi den botoman, di den kan loekoe te den de na tapoe se. Na ini Kanada wan Kotoigi ben go na wan wrokope pe den e meki den wagi di broko. A sma di abi a wrokope ben abi belangstelling, èn a brada ben tan fo nanga afoe joeroe langa drape, ala di a ten di a ben gebroiki foe preiki ben de pikinmoro wán joeroe te klanti no ben de. Te foe kaba wan studie ben sreka gi 10.00 joeroe na neti. Ma sontron a studie no ben bigin te leki mindrineti èn a ben e tan te leki toe joeroe mamanten. A ten ben de wan tjalensi, ma a ben tjari boen bakapisi. A man ben bosroiti foe tapoe a wrokope foe en na tapoe sonde so taki a kan fisiti den konmakandra. Heri esi en nanga en osofamiri ben go moi na fesi.
16. Sortoe ondrofenitori e sori taki a San Gado e aksi-brochure nanga a Sabi-boekoe na krakti wrokosani na ini a preikiwroko èn na ini a leriwroko?
16 A brochure San Gado e aksi foe wi? nanga a boekoe Sabi di e tjari joe go na têgo libi e tan de boen wrokosani na ini a preikiwroko èn na ini a leriwroko. Na ini Italia wan non di ben e wakti tapoe wan bus ben teki wan eksemplaar foe Kownoekondre njoensoe. A dei na baka, den ben miti en baka èn a ben teki a San Gado e aksi-brochure. Ibri dei na baka dati, a ben abi wan bijbelstudie na a bushalte 10 miniti te go miti 15 miniti langa. Baka wán nanga afoe moen, a ben bosroiti foe gowe libi na oso pe non e tan èn go baka na en kondre, na Guatemala foe go doro nanga en studie. Na ini Malawi, wan sma di ben go fajafaja na kerki èn di nen Lobina no ben breiti srefisrefi di den oemapikin foe en ben bigin studeri bijbel nanga Jehovah Kotoigi. Ma tokoe den pikin ben froeteri den mama a waarheid foe bijbel te den ben man. Na ini juni 1997, Lobina ben si a Sabi-boekoe, èn den wortoe „Sabi di e tjari joe go” ben naki en ati. Na ini juli a ben agri foe abi wan bijbelstudie. Na ini augustus a ben fisiti a distriktkongres èn ben arki a heri programa finifini. Na a kaba foe a moen dati, a ben gowe libi en kerki èn ben doro den markitiki foe tron wan preikiman di no dopoe ete. A ben dopoe na ini november 1997.
17, 18. Fan den video foe a Genootschap sori foe de wan jepi foe man jepi sma foe „si” jeje sani?
17 Den video foe a Genootschap jepi foeroe sma foe „si” jeje sani. Na ini Mauritius wan man ben gowe libi en kerki bika a ben si taki wánfasi no ben de drape. Wan zendeling ben sori en a wánfasi di Jehovah Kotoigi abi, di a ben gebroiki a video Verenigd door Goddelijk onderwijs. Foe di a ben naki en ati, a man ben taki: „Oenoe Jehovah Kotoigi de na ini paradijs kaba!” A ben teki wan bijbelstudie. Wan sisa na ini Japan ben sori en masra di no de na bribi a video Jehovah’s Getuigen — De organisatie achter de naam èn dati ben boeweigi en foe abi wan doronomo bijbelstudie. Baka di a ben loekoe Verenigd door Goddelijk onderwijs, a ben wani tron wan foe den Kotoigi foe Jehovah. De bijbel — Een boek met feiten en profetieën di abi dri pisi ben jepi en foe gebroiki den bijbel gronprakseri na ini en libi. Te foe kaba, Jehovah’s Getuigen — Standvastig onder nazi-terreur ben sori en taki Jehovah e tranga En pipel te Satan wani doe den ogri. A man ben teki dopoe na ini oktober 1997.
18 Disi na soso wan toe foe den boen foeroe ondrofenitori di ben de na ini a dienstjari di pasa kaba. Den e sori taki Jehovah Kotoigi abi wan fajafaja bribi èn taki Jehovah e tranga a bribi dati nanga a blesi di a e blesi den wroko foe den. — Jakobus 2:17.
Kweki bribi na ini a ten disi
19. (a) Na sortoe fasi wi de na ini wan moro boen situwâsi moro leki Abraham? (b) Omeni sma ben konmakandra a jari di pasa foe memre na ofrandi dede foe Jesus? (c) Sortoe kondre ben abi kefalek foeroe sma di ben fisiti a Memrefesa a jari di pasa? (Loekoe a boksoe na tapoe den bladzijde 12 te go miti 15.)
19 Na foeroe fasi wi na ini a ten disi de na ini wan moro betre situwâsi leki di foe Abraham. Wi sabi taki Jehovah ben meki ala en pramisi gi Abraham kon troe. Den bakapikin foe Abraham ben kisi Kanan troetroe, èn den ben tron wan bigi nâsi troetroe (1 Kownoe 4:20; Hebrewsma 11:12). Boiti dati, so wan 1971 jari baka di Abraham ben gowe libi Haran, dan wan bakapikin foe en, Jesus, ben teki dopoe na ini watra nanga jepi foe Johanes a Dopoeman èn baka dati na ini santa jeje nanga jepi foe Jehovah srefi foe tron a Mesias, a troetroe Siri foe Abraham, na wan jeje fasi (Mateus 3:16, 17; Galasiasma 3:16). Na tapoe 14 Nisan 33 G.T., Jesus ben òfer en libi leki wan loesoe-paiman gi den wan di ben sa sori bribi na ini en (Mateus 20:28; Johanes 3:16). Miljoenmiljoen sma ben kan kisi blesi now gi densrefi nanga jepi foe en. A jari di pasa, 13.896.312 sma ben kon makandra na tapoe 14 Nisan foe memre a kefalek moi fasi disi foe sori lobi. A ben de wan heri moi fasi foe regtfardiki Jehovah, a Bigi Sma di e Hori den pramisi foe en!
20, 21. Fa sma foe ala nâsi ben blesi densrefi nanga jepi foe a Siri foe Abraham na ini a fosi jarihondro, èn fa den e blesi densrefi na ini a ten disi?
20 Na ini a fosi jarihondro, foeroe sma foe ala nâsi — di bigin nanga Israèl na skinfasi — ben sori bribi na ini a Siri disi foe Abraham èn ben tron salfoe manpikin foe Gado, memre foe wan njoen, jeje „Israèl foe Gado” (Galasiasma 3:26-29; 6:16; Tori foe den Apostel 3:25, 26). Den ben abi wan seiker froewakti foe kisi jeje libi na ini hemel sondro foe man dede, leki kompe tiriman na ini Gado Kownoekondre. Soso 144.000 sma ben sa kisi blesi na a fasi disi, èn wan toe foe den nomo tan abra (Openbaring 5:9, 10; 7:4). A jari di pasa, 8.756 ben boeweisi taki den e bribi taki den ben de foe a groepoe disi di den ben gebroiki den simbôl na a Memrefesa.
21 Pikinmoro ala den Kotoigi foe Jehovah na ini a ten disi de na ini a „bigi ipi” di ben profeteri na ini Openbaring 7:9-17. Bika den e blesi densrefi nanga jepi foe Jesus, den abi a howpoe foe têgo libi na tapoe wan paradijs grontapoe (Openbaring 21:3-5). Den 5.888.650 sma di ben doe a preikiwroko na ini 1998, de wan boeweisi taki na ipi disi „bigi” troetroe. A ben span srefisrefi foe si taki Rosia èn so srefi Oekraini ben abi moro leki 100.000 preikiman gi a fosi tron. Wan moi sani ben de so srefi a raport foe Amerkankondre — 1.040.283 preikiman na ini augustus! Disi ben de nomo dri foe den 19 kondre di ben abi moro leki 100.000 preikiman a jari di pasa.
Heri esi a howpoe sa kon troe
22, 23. (a) Foe san ede wi moesoe meki wi ati kon stanfaste na ini a ten disi? (b) Fa wi kan sori taki wi de leki Abraham, èn no leki den sma di Paulus ben kari èn di no ben abi bribi?
22 Den sma di ben fisiti a Memrefesa ben kisi foe jere o langa den pramisi foe Jehovah e kon troe kaba. Na ini 1914, Jesus ben poti leki Kownoe foe Gado en hemel Kownoekondre, èn dati ben de a bigin foe en denoja na ini Kownoekondre makti (Mateus 24:3; Openbaring 11:15). Ija, a Siri foe Abraham e tiri now na ini hemel! Jakobus ben taigi den kresten foe en ten: „Hori pasensi; meki oen ati kon de stanfaste, foe di a denoja foe Masra kon krosibei” (Jakobus 5:8). We, a denoja dati de wan troetori now! Wi abi moro foeroe reide foe meki wi ati kon stanfaste!
23 Meki a froetrow foe wi na ini den pramisi foe Gado kon njoen doronomo te wi e studeri bijbel doronomo èn te wi e begi na wan fasi di wani taki wan sani. Meki noiti wi tapoe foe ondrofeni den blesi foe Jehovah te wi e gi jesi na en Wortoe. Dan wi sa de leki Abraham, no leki den sma di ben abi bribi di kon swaki èn dede, di Paulus ben kari. Noti sa prati wi foe wi moro santa bribi (Judas 20). Wi e begi dati disi de so gi ala den foetoeboi foe Jehovah na ini a dienstjari foe 1999 èn gi ala ten.
Joe sabi disi?
◻ Fa wi kan arki Gado na ini a ten disi?
◻ Sortoe wini kan kon te wi e begi Gado na wan fasi di wani taki wan sani?
◻ Te wi e gebroiki a tirilin foe Jehovah ala di wi e gi jesi, dan fa a bribi foe wi sa kon tranga?
◻ Sortoe pisi foe a jari raport (bladzijde 12 te go miti 15) joe ben feni spesroetoe moi?
[Raportoe na tapoe bladzijde 12-15]
1998 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 16]
Efoe wi e arki a Wortoe foe Jehovah, dan wi froetrow na ini den pramisi foe en sa kon njoen baka
[Prenki na tapoe bladzijde 18]
A bribi foe wi e kon tranga te wi abi wan prati na a diniwroko