„Waka nanga bribi, no nanga a si foe sani”
„Wi e waka nanga bribi, no nanga a si foe sani.” — 2 KORENTESMA 5:7.
1. San a wani taki foe „waka nanga bribi”?
ALA leisi te wi e begi akroederi den tirilin di poti na ini a Wortoe foe Gado, dan wi e sori taki awansi fa a no fa, wi abi bribi. Te wi e bigin gi kotoigi na tra sma foe a Kownoekondre foe Gado, dan dati e sori toe taki wi abi bribi. Èn te wi e gi wi libi abra na Jehovah, dan wi e sori taki a de a winsi foe wi foe ’waka nanga bribi’, dati wani taki, foe feti na baka wan libi di bribi abi krakti na en tapoe. — 2 Korentesma 5:7; Kolosesma 1:9, 10.
2. Foe san ede a no abi foe de so, taki a teki di wan sma e teki prati na ini sani di a gemeente e doe, na wan boeweisi taki a sma abi bribi?
2 Efoe troetroe wi e go libi na so wan fasi, dan wi abi bribi fanowdoe di abi wan boen fondamenti (Hebrewsma 11:1, 6). Foeroe sma abi belangstelling gi Jehovah Kotoigi, foe di den e si den hei moreel markitiki nanga a lobi di de na mindri den Kotoigi. Dati na wan boen bigin, ma dati no wani taki dati den sortoe sma dati abi bribi. Trawan abi kande wan trowpatna noso wan papa noso mama di abi wan tranga bribi, èn kande den e teki prati na ini wan toe foe den sani di a sma di den lobi abi wan prati na ini. A de troetroe wan blesi foe abi wan sma na oso di abi so wan krakti tapoe trawan, ma so srefi disi no e kon na ini a presi foe a lobi di wan sma abi gi Gado èn foe a bribi di a sma sori na ini en. — Lukas 10:27, 28.
3. (a) Sortoe overtoigi wisrefi moesoe abi ini a tori foe bijbel, efoe wi wani abi wan bribi di abi wan boen fondamenti? (b) Foe san ede son sma e kisi na overtoigi moro esi leki trawan taki bijbel skrifi nanga jepi foe Gado en santa jeje?
3 Den wan di troetroe e waka nanga bribi abi na overtoigi dorodoro taki bijbel na a Wortoe foe Gado. Boen foeroe boeweisi de taki den Santa Boekoe foe bijbel troetroe na „Gado ben meki sma skrifi [den] nanga jepi foe en santa jeje”a (2 Timoteus 3:16). Omeni foe den boeweisi disi wan sma moesoe go ondrosoekoe bifo a abi na overtoigi? Dati kan anga foe en background. San e gi a wan sma satisfaksi dorodoro kande no e overtoigi wan tra sma. Na ini son kefal a de so, taki, srefi efoe wan sma ben kisi boen foeroe boeweisi di a no kan taki dati a tori no de so, dan tokoe a kan weigri ete foe teki a penti pe den boeweisi e sori go. Foe san ede? Foe lostoe ede di beri dipi na ini en ati (Jeremia 17:9). Dati meki, ala di wan sma e taki kande dati a abi belangstelling gi a sani di Gado abi na prakseri, tokoe en ati kan angri foe feni boen nen na grontapoe. Kande a no wani tapoe nanga wan fasi foe libi di no e kroederi nanga bijbel markitiki. Ma efoe wan sma e angri troetroe foe a waarheid, efoe a de eerlijk nanga ensrefi, èn efoe a abi sakafasi, dan baka wan pisi ten a sa kon froestan taki bijbel na a Wortoe foe Gado.
4. San de fanowdoe foe a sei foe wan sma so taki a kan kisi bribi?
4 Foeroetron na ini soso wan toe moen nomo, sma di e kisi jepi foe studeri bijbel, e kon si taki den kon sabi moro boeweisi kaba leki de fanowdoe taki bijbel na a Wortoe foe Gado. Efoe a sani dati e boeweigi den foe opo na ati foe den foe kisi leri foe Jehovah, dan safrisafri den sani di den e leri sa kenki den dipi prakseri, den winsi nanga den boeweigi foe ati foe den (Psalm 143:10). Romesma 10:10 e taki dati „nanga na ati” wan sma e sori bribi. So wan bribi e sori fa a sma e denki troetroe, èn a sa de foe si na ini en fasi foe libi.
Noa ben handri tapoe a gron foe wan bribi di abi wan boen fondamenti
5, 6. San ben de a fondamenti foe a bribi foe Noa?
5 Noa ben de wan sma di ben abi wan bribi di ben abi wan boen fondamenti (Hebrewsma 11:7). Sortoe fondamenti a ben abi gi a bribi dati? Noa ben abi a wortoe foe Gado, di no ben skrifi poti na tapoe papira, ma soleki fa Gado ben taki nanga en. Genesis 6:13 e taki: „Gado ben taigi Noa: ’A kaba foe ala skin kon na fesi mi, bika foe den ede meki grontapoe kon foeroe nanga ogri di sma e doe nanga tranga.’ ” Jehovah ben gi Noa a komando foe bow wan ark èn ben gi en finifini bodoi di abi foe doe nanga a bow foe na ark. Dan Gado ben taki moro fara: „Foe mi sei, loekoe, mi e tjari a bigi froedoe kon na tapoe grontapoe foe tjari pori kon na ala skin di abi libikrakti na ini den, na ondro hemel. Ala sani di de na grontapoe, sa hari a lasti bro.” — Genesis 6:14-17.
6 Alen ben de kaba bifo a ten disi? Bijbel no e taki noti foe dati. Genesis 2:5 e taki: „Jehovah Gado no ben meki alen fadon.” Ma disi na a fasi fa Moses, di ben libi foeroe jarihondro baka dati, ben taki foe afersi, no foe den dei foe Noa, ma foe wan ten langa ten bifo den dei dati. Soleki fa Genesis 7:4 e sori, dan Jehovah ben taki foe alen di a ben e taki nanga Noa, èn soleki fa a sori, dan Noa ben froestan san Jehovah ben wani taki. Tokoe a bribi foe Noa no ben gron tapoe san a ben kan si. Na apostel Paulus ben skrifi taki Noa ben „kisi wan warskow foe Gado foe sani di a no ben si ete”. Gado ben taigi Noa taki A ben o tjari „a bigi froedoe”, noso „a hemel se”, kon na tapoe grontapoe, soleki fa wan foetoewortoe na ini a Nieuwe-Wereldvertaling e taki foe dati na ini Genesis 6:17. So wan sani noiti no ben pasa te leki a ten dati. Ma ala kriatoeroe di Noa ben kan si, ben de leki wan krin boeweisi taki Gado troetroe ben kan tjari so wan bigi froedoe kon di e pori sani. A bribi foe Noa ben boeweigi en foe bow na ark.
7. (a) San Noa no ben abi fanowdoe foe man doe san Gado ben komanderi en? (b) Sortoe winimarki wi e kisi te wi e loekoe a bribi foe Noa, èn fa a bribi foe wi kan de wan blesi gi trawan?
7 Gado no ben gi Noa wan dei o ten a Froedoe ben o bigin. Ma Noa no ben gebroiki dati leki wan reide foe teki wan fasi foe wakti èn loekoe fa sani ben o waka, èn foe poti a bow foe na ark nanga a preikiwroko na a di foe toe presi na ini en libi. Boen langa na fesi, Gado ben taigi Noa o ten a ben moesoe go na ini na ark. Na a srefi ten, „Noa ben doe ala san Gado ben komanderi en. A ben doe leti so” (Genesis 6:22). Noa ben waka nanga bribi, no nanga a si foe sani. Wi kan de nanga tangi na ati taki a ben doe dati! Foe en bribi ede meki wi de na libi tide. Na so a de toe na ini wi kefal, taki a bribi di wi e sori kan abi wan bigi krakti, no wawan tapoe san a tamara o tjari gi wi, ma so srefi gi den pikin foe wi èn gi tra sma lontoe wi.
A bribi foe Abraham
8, 9. (a) Na tapoe sortoe fondamenti Abraham ben poti en bribi? (b) Na sortoe fasi Jehovah ben ’sori ensrefi’ na Abraham?
8 Loekoe wan tra eksempre — di foe Abraham (Hebrewsma 11:8-10). Sortoe fondamenti a bribi foe Abraham ben abi? Den sma na ini a kontren pe a ben gro kon bigi na Ur foe den Kaldewsma, ben anbegi kroektoe gado èn ben lobi materia sani. Ma tra sani ben abi krakti na tapoe a fasi fa Abraham ben si sani. Tweifri no de, a ben kan abi demakandra nanga Noa en manpikin Sèm, foe di Sèm ben libi 150 jari na ini a ten foe Abraham. Abraham ben kisi na overtoigi taki Jehovah na „a Moro Hei Gado, a Sma di meki hemel nanga grontapoe doe kon”. — Genesis 14:22.
9 Ete wan tra sani ben abi wan bigi krakti na tapoe Abraham. Jehovah „ben sori ensrefi na . . . Abraham ala di a ben de na Mesopotamia, bifo a ben go libi na Haran, èn a ben taigi en: ’Gowe libi joe kondre nanga joe famiri èn kon na a kondre di mi sa sori joe’ ” (Tori foe den Apostel 7:2, 3). Na sortoe fasi Jehovah ben ’sori ensrefi’ na Abraham? Abraham no ben si Gado langalanga (Exodus 33:20). Ma a kan taki Jehovah ben sori ensrefi na Abraham na ini wan dren, nanga wan froewondroe fasi foe sori en glori, noso nanga jepi foe wan engel di de wan boskopoeman, noso wan sma di e teki presi gi en. (Teki gersi Genesis 18:1-3; 28:10-15; Lefitikus 9:4, 6, 23, 24.) Awansi fa Jehovah ben sori ensrefi na Abraham, a getrow man dati ben froetrow na tapoe, taki Gado ben e poti wan warti grani na en fesi. Abraham ben doe wan sani na tapoe dati na ini bribi.
10. Fa Jehovah ben tranga a bribi foe Abraham?
10 A bribi foe Abraham no ben anga foe a sabi di a ben sabi sani finifini foe a kondre di Gado ben e sori en foe go. A bribi foe en no ben drai lontoe a sabi di a ben sabi o ten a ben sa kisi a kondre dati. A ben abi bribi foe di a ben sabi Jehovah leki Gado, na Almaktiwan (Exodus 6:3). Jehovah ben taigi Abraham taki a ben sa abi bakapikin, ma wanwan leisi Abraham ben aksi ensrefi fa dati ben sa kan. A ben e kon owroe (Genesis 15:3, 4). Jehovah ben tranga a bribi foe Abraham foe di a ben taigi en foe loekoe na den stari èn foe teri den efoe a ben man. „Na so joe siri sa tron”, Gado ben taki. Dati ben naki na ati foe Abraham srefisrefi. A ben de krin foe si taki a Kriaman foe den stari dati na hemel, di e meki sma kisi lespeki frede, ben kan doe san a ben pramisi. Abraham „ben poti bribi na ini Jehovah” (Genesis 15:5, 6). Abraham no ben bribi soso foe di a ben lobi san a ben e jere; a ben abi bribi di ben abi wan boen fondamenti.
11. (a) Di Abraham ben abi pikinmoro 100 jari, san a ben doe na tapoe a pramisi foe Gado taki Sara, di ben kon owroe, ben sa de nanga bere foe wan manpikin? (b) Nanga sortoe bribi Abraham ben tanapoe na fesi a tesi di ben abi foe doe nanga a tjari di a ben moesoe tjari en manpikin go na a bergi Moria foe òfer en leki wan srakti-ofrandi?
11 Di Abraham ben abi pikinmoro 100 jari èn en wefi, Sara, ben abi pikinmoro 90 jari, dan agen Jehovah ben gi a pramisi taki Abraham ben sa kisi wan manpikin èn dati Sara ben sa de a mama. Abraham ben go denki fa a situwâsi foe den ben de troetroe. „Ma foe a pramisi foe Gado ede, meki a no ben degedege taki a no ben abi nofo bribi, ma a bribi foe en ben meki a kon tranga, ala di a ben gi Gado glori èn a ben abi na overtoigi dorodoro taki san En ben pramisi a ben sa man doe toe” (Romesma 4:19-21). Abraham ben sabi taki a pramisi foe Gado no ben kan misi. Baka ten, foe en bribi ede meki Abraham ben gi jesi, di Gado ben taigi en foe teki en manpikin Isak go na a kondre Moria èn foe òfer en leki wan srakti-ofrandi (Genesis 22:1-12). Abraham ben abi ala froetrow taki a Gado di na wan froewondroe fasi ben meki taki a manpikin dati ben gebore, so srefi ben kan tjari en kon na libi baka, so taki a ben kan meki den tra pramisi kon troe di A ben gi ini a tori foe en. — Hebrewsma 11:17-19.
12. O langa Abraham ben tan waka nanga bribi, èn sortoe pai e wakti en nanga memre foe en osofamiri di ben sori taki den ben abi wan tranga bribi?
12 Abraham ben sori taki bribi ben abi krakti na tapoe en no soso na wan toe okasi nomo, ma na ini en heri libi. Na ini en libi, Abraham no ben kisi no wan pisi foe a Pramisi Kondre foe Gado leki wan goedoe (Tori foe den Apostel 7:5). Tokoe Abraham no ben kon weri èn ben drai go baka na Ur foe den Kaldewsma. A ben libi na ini tenti 100 jari langa, te na en dede, na ini a kondre pe Gado ben sori en foe go (Genesis 25:7). Hebrewsma 11:16 e taki foe en nanga en wefi Sara, Isak, a manpikin foe den, nanga Jakob, a granpikin foe den: „Gado no e sjen taki sma e kari en leki a Gado foe den, bika a sreka wan foto gi den.” Ija, Jehovah abi wan presi gi den na ini a grontapoe kontren foe a Kownoekondre foe a Mesias foe en.
13. Soema na mindri den foetoeboi foe Jehovah na ini a ten disi e sori taki den abi bribi leki di foe Abraham?
13 Na ini a ten disi, joe abi na mindri den foetoeboi foe Jehovah den wan di de leki Abraham. Den waka nanga bribi foeroe jari langa kaba. Nanga a krakti di Gado e gi, den man loesoe problema di wi kan teki gersi bergi (Mateus 17:20). A bribi foe den no e degedege foe di den no sabi soifri o ten Gado o gi den a goedoe di a pramisi. Den sabi taki a wortoe foe Jehovah no kan misi, èn den e si en leki wan kefalek bigi grani taki Jehovah e teri den leki den Kotoigi foe en. Joe abi a srefi denki dati?
A bribi di ben boeweigi na ati foe Moses
14. Fa a fondamenti foe a bribi foe Moses ben poti?
14 Wan tra eksempre foe bribi na Moses. San ben de a fondamenti foe a bribi foe en? A fondamenti dati ben poti na ini en pikin-nengreten. Ala di na oemapikin foe Farao ben feni Moses na ini wan papirus kisi na ini a Nijl liba èn ben teki en leki en manpikin, tokoe Moses en eigi Hebrew mama, Jokebed, ben gi a boi bobi èn ben kan sorgoe gi en na ini en jongoe jari. Soleki fa a sori, dan Jokebed ben gi en boen leri, a ben stampoe a lobi gi Jehovah èn warderi gi den pramisi di A ben gi Abraham, go na ini en. Baka ten, leki wan memre foe na osofamiri foe Farao, Moses ben „kisi leri na ini ala koni foe den Egiptisma” (Tori foe den Apostel 7:20-22; Exodus 2:1-10; 6:20; Hebrewsma 11:23). Ma awansi Moses ben abi wan boen posisi, tokoe en ati ben de nanga a pipel foe Gado di ben de na ini katibo.
15. San a ben wani taki gi Moses foe meki sma kon sabi en leki wan sma di de na a sei foe a pipel foe Jehovah?
15 Di Moses ben abi 40 jari, a ben naki wan Egiptisma kiri foe fri wan Israèlsma, di na Egiptisma dati ben e handri na wan onregtfardikifasi nanga en. A sani disi di ben pasa ben sori fa Moses ben si a pipel foe Gado. Ija, „nanga bribi Moses, di a ben kon bigi, ben weigri foe den kari en a manpikin foe na oemapikin foe Farao”. Na presi foe a hori tranga na „a prisiri foe sondoe di ben de foe wan pisi ten nomo” leki wan memre foe na Egipti kownoe-oso, a bribi foe en ben boeweigi en foe meki sma kon sabi en nanga a pipel foe Gado di den ben e meshandri. — Hebrewsma 11:24, 25; Tori foe den Apostel 7:23-25.
16. (a) Sortoe komando Jehovah ben gi Moses, èn fa Gado ben jepi en? (b) Fa Moses ben sori bribi di a ben doe a komando di a ben kisi?
16 Moses ben de fajafaja foe doe wan sani foe tjari froelekti kon gi en pipel, ma a ten foe Gado no ben kon ete foe fri den. Moses ben moesoe lowe komoto foe Egipti. So wan 40 jari baka dati fosi, Jehovah ben gebroiki wan engel foe gi Moses a komando foe go baka na Egipti foe tjari den Israèlsma komoto na a kondre dati (Exodus 3:2-10). San Moses ben doe na tapoe dati? A no ben sori taki a ben tweifri efoe Jehovah ben man fri Israèl, ma a ben firi taki a no ben de bekwaam nofo gi a ròl di Gado ben poti na en fesi. Jehovah ben gi Moses na wan lobi-ati fasi a deki-ati di a ben abi fanowdoe (Exodus 3:11–4:17). A bribi foe Moses ben kon tranga. A ben go baka na Egipti èn ibri tron baka a ben warskow Farao, di a ben miti persoonlek, gi den plaag di ben o kon na tapoe Egipti, foe di a tiriman dati no ben wani meki Israèl go foe anbegi Jehovah. Moses no ben abi a makti ensrefi foe meki den plaag dati kon. A ben waka nanga bribi, no nanga a si foe sani. A ben abi bribi na ini Jehovah nanga en wortoe. Farao ben tapoe skreki gi Moses. Ma Moses ben horidoro. „Nanga bribi a ben gowe libi Egipti, ma a no ben frede na atibron foe a kownoe, bika a ben tan stanfaste neleki a ben e si a Wan di wi no kan si” (Hebrewsma 11:27). Moses no ben de volmaakti. A ben meki fowtoe (Numeri 20:7-12). Ma baka di Gado gi en a komando, a meki bribi abi krakti na tapoe en heri libi.
17. San ben de a bakapisi foe di Noa, Abraham, nanga Moses ben waka nanga bribi, ala di den no ben libi foe si a njoen grontapoe foe Gado?
17 Meki a de so, taki a bribi foe joe sori foe de leki di foe Noa, Abraham, nanga Moses. A troe taki den no ben si a njoen grontapoe foe Gado na ini a ten foe den (Hebrewsma 11:39). A no ben de a fasti ten foe Gado ete; tra sani ben de di abi foe doe nanga en prakseri èn di ben moesoe kon troe ete. Tokoe a bribi di den ben abi na ini a wortoe foe Gado no ben degedege, èn den nen foe den de na ini Gado en boekoe foe libi.
18. Foe san ede a de fanowdoe taki den wan di kisi kari foe go libi na hemel, waka nanga bribi?
18 „Gado ben si wan moro boen sani gi wi na fesi”, na so na apostel Paulus ben skrifi. Dati wani taki, Gado ben si wan moro boen sani na fesi gi den wan di, neleki Paulus, kisi a kari foe libi na hemel makandra nanga Krestes (Hebrewsma 11:40). Den disi na den wan di Paulus ben abi spesroetoe na prakseri di a ben skrifi den wortoe di skrifi na ini 2 Korentesma 5:7: „Wi e waka nanga bribi, no nanga a si foe sani.” Di den wortoe dati ben skrifi, no wan foe den ben kisi a pai foe den ete foe libi na hemel. Den no ben kan si a sani dati nanga den troetroe ai foe den, ma a bribi di den ben abi na ini, ben abi wan boen fondamenti. Krestes ben opo baka na dede, a fosi froktoe foe den wan di kisi blesi nanga libi na hemel. Èn moro leki 500 kotoigi ben si en bifo a ben opo go na hemel (1 Korentesma 15:3-8). Den ben abi boen foeroe reide foe meki a bribi dati abi krakti na tapoe a heri libi foe den. Wi abi boen reide toe foe waka nanga bribi.
19. Nanga jepi foe soema Gado taki nanga wi, soleki fa Hebrewsma 1:1, 2 e sori?
19 Na ini a ten disi, Jehovah no e taki nanga en pipel nanga jepi foe wan engel, neleki fa a ben doe nanga Moses na a boesiboesi di ben e bron. Gado taki nanga jepi foe en Manpikin (Hebrewsma 1:1, 2). Gado ben meki den sani di A ben taki nanga jepi foe Jesus, skrifi poti na ini bijbel, di vertaal na ini den tongo di sma e taki na heri grontapoe.
20. Fa a situwâsi foe wi moro boen leki di foe Noa, Abraham, nanga Moses?
20 Wi abi moro leki san Noa, Abraham, nanga Moses ben abi. Wi abi a heri Wortoe foe Gado — èn foeroe foe en kon troe kaba. Nanga ala den sani na prakseri di bijbel e taki foe man nanga oema di ben boeweisi taki den ben de getrow kotoigi foe Jehovah te den ben kisi ala sortoe tesi, meki Hebrewsma 12:1 e gi a tranga: „Meki wi poeroe so srefi ibri hebi nanga a sondoe di e kisi wi makriki, èn meki wi horidoro foe lon a streilon di poti na wi fesi.” A bribi foe wi no de wan sani di wi moesoe si leki wan sani di e kon foe ensrefi. „A sondoe di e kisi wi makriki” na a mankeri foe bribi. A de fanowdoe foe feti tranga efoe wi moesoe tan „waka nanga bribi”.
[Foetoewortoe]
a Loekoe De bijbel — Gods woord of dat van mensen?, di a Watchtower Bible and Tract Society of New York, Inc. tjari kon na doro.
San joe e piki?
◻ San a wani taki foe „waka nanga bribi”?
◻ Fa wi kan kisi wini foe a fasi fa Noa ben sori bribi?
◻ Fa a fasi fa Abraham ben sori bribi e jepi wi?
◻ Foe san ede bijbel e sori go na Moses leki wan eksempre foe bribi?
[Prenki na tapoe bladzijde 10]
Abraham ben waka nanga bribi
[Prenki na tapoe bladzijde 10]
Moses nanga Aron ben sori bribi di den ben tanapoe na fesi Farao