So wan bigi wolkoe foe kotoigi
„Foe di wi abi sowan bigi wolkoe foe kotoigi lontoe wi, meki wi waka nanga horidoro na strélon di de na wi fesi.” — HEBREWSMA 12:1.
1, 2. (a) Sortoe agersi achtergrond Paulus ben kan abi na prakseri di a ben skrifi den Hebrew kristen? (b) Foe san-ede Hebrew kompe-bribiman ben abi wan fasti bribi fanowdoe?
KON oen taki dati oen e teki prati na wan strélon ini wan stadion. Joe e lon go a fesi èn span ibri tité someni leki a kon, e hori joe ai leti a tapoe na marki. Ma fa a de nanga den sma di e loekoe? Nono, den dati na soso strélonman di wini kaba! Den no de soso sma di loekoe, ma na ini wortoe èn na ini doe den de leki actief kotoigi ini a tori.
2 Kande na apostel Paulus ben abi sowan agersi sani na ini prakseri di a ben skrifi den Hebrew kristen (wanten foe 61 G.T.). Den ben abi wan fasti bribi fanowdoe (Hebrewsma 10:32-39). Soso nanga jepi foe bribi den kan gi jepi na a warskow di Jezus ben gi foe lon gwe, di Jeruzalem (na ini 66 G.T.) ben lontoe nanga legre di ben poti den kampoe fesi na foto, èn soboen wan toe jari bifo Jeruzalem (ini 70 G.T.) ben kisi pori foe den Romeinsma. Bribi ben sa jepi den te ’foe regtvaardiki ede den ben sa kisi ferfolgoe’. — Mattéus 5:10; Lukas 21:20-24.
3. San de na ini Hebrewsma 12:1 „na sondoe di e kisi oen makriki”, èn kristensma e kisi na dek’ati foe lon nanga horidoro sortoe strélon?
3 Bakadi Paulus (na ini Hebrewsma 11) ben loekoe wan nomroe foe wroko foe bribi foe sma foe den ten bifo Kristus a ben fermane: „Foe di wi abi sowan bigi wolkoe foe kotoigi lontoe wi, meki wi ooktoe poeroe ibri hebi di [foe taki en na jejefasi ben sa kan skotoe wi] èn na sondoe [na mankeri foe bribi] di ben sa kan kisi wi makriki èn waka na strélon di de na wi fesi” (Hebrewsma 12:1). Na overzicht di Paulus e gi foe bribi di de ini wroko e poti prakseri na tapoe difrenti pisi foe dati èn sa de wan jepi gi wi, awinsi wi de salfoe kristen di e waka na strélon foe no dede moro na ini hemel ofoe wi de wan pisi foe na „bigi ipi” di abi a den fesi a marki foe libi sondro kaba tapoe wan Paradijs grontapoe (Openbaring 7:4-10; Lukas 23:43; Romeini 8:16, 17). Ma san na bribi now precies? San de wan toe fasi foe na jeje goedoe disi? Èn fa wi sa doe efoe wi abi bribi? Lési te joe e soekoe den piki a tapoe den aksi disi grantangi den tekst di komoto foe Hebrewsma kapitel 11 èn 12 ini joe persoonlekstudie èn ini a studie nanga a gemeente.
San na bribi?
4. San na bribi?
4 Fosi Paulus e gi wan definitie foe bribi. (Lési Hebrewsma 11:1-3). Bribi de „na séker ferwakti foe sani di wan sma e howpoe a tapoe”. Wan sma di abi bribi abi na djaranti dati ala sani san Gado e bribi de leki den kontroe kaba. Bribi de ooktoe „na krin sori foe troe sani di no de foe si”. Na overtoigi bewijsi foe troe sani di no de foe si de so krakti dati bribi e poti tapoe wan lin nanga na bewijsi materiaal dati.
5. San wi e si nanga jepi foe bribi?
5 Nanga jepi foe bribi „kotoigi ben gi foe man foe owroeten” di ben e plisi Gado. Ooktoe „wi e si [nanga jepi foe bribi] dati na den seti foe sani” — na grontapoe, na son, na moenkenki èn na den stari — „den kon de nanga a wortoe foe Gado sodati san wi e si, komoto foe sani di no de foe si”. Wi abi na overtoigi dati Jehovah de a Mekiman foe den sani dati, aladi wi no kan si en foedi a de wan jeje di no de foe si. — Genesis 1:1; Johannes 4:24; Romeini 1:20.
Bribi nanga na „grontapoe foe owroeten”
6. Foe san-ede Abel ben abi „na seker froewakti dati Jehovah proféti wortoe di e go foe na ’siri foe na oema’ ben sa kontroe?
6 Wan foe den foeroe fasi foe bribi de na erken foe na fanowdoe foe srakti-ofrandi gi sondoe. (Hebrewsma 11:4.) Na ini „a bribi foe owroeten” Abel ben sori bribi na ini wan srakti-ofrandi di ben abi broedoe. Abel ben de na di foe toe pikin foe na fosi libismapaar Adam nanga Eva (2 Petrus 2:5). A no de foe taki dati Abel ben si na ini ensrefi na dedekrakti foe sondoe di a ben kisi (Genesis 2:16, 17; 3:6, 7; Romeini 5:12). A no de foe taki dati a ben si ooktoe dati a kontroe foe Gado bosroiti gi Adam ben tjari kon nanga en hebi wroko èn gi Eva bigi pen leki wan bere oema (Genesis 3:16-19). Soboen Abel ben abi „na séker ferwakti” dati ooktoe tra sani di Jehovah ben taki ben sa tron wan troe sani. Na ini disi joe abi den profétis wortoe di ben taki gi na bigi bedrigiman Satan di Gado ben taigi na sneki: „Mi sa poti féantifasi na mindri joe nanga na oema èn na mindri joe siri èn en siri. En sa masi joe na ini joe ede èn joe sa masi en na ini en baka-iri.” — Genesis 3:15.
7. (a) Fa Abel ben sori dati a ben ferstan na fanowdoe foe wan srakti ofrandi gi sondoe? (b) Tapoe sortoe fasi Jehovah ben gi kotoigi foe den presenti foe Abel?
7 Abel ben sori bribi na ini a pramisi siri foe di a ben pristeri Gado wan srakti-ofrandi foe meti di na agersifasi ben kon ini a presi foe a ègi libi foe Abel. Ma en moro owroe brada Kaïn, di no ben e bribi, ben offer gron njanjan di no ben abi broedoe. Moro fara Kaïn ben trowe Abel broedoe èn na sofasi ben tron wan kiriman (Genesis 4:1-8). Ma Abel ben dede nanga a sabi dati Jehovah ben si en leki wan regtvaardikiwan, „foe di Gado ben gi kotoigi foe en presenti”? Fa? Foedi a ben teki na srakti-ofrandi di Abel ben tjari kon ini bribi. Foe na bribi ede foe Abel èn foe na boenati foe Gado di a ben abi, foe san a tori di ben skrifi nanga jepi foe santa jeje e gi kotoigi foe dati te now ete, „a e taki ete aladi a dede”. A ben erken na fanowdoe foe wan srakti-ofrandi gi sondoe. Joe e poti bribi na ini na ferloesoe ofrandi foe Jezus Kristus, di e go moro fara srefi? — 1 Johannes 2:1, 2; 3:23.
8. (a) San wi e leri foe bribi foe na dek’ati fasi fa Henoch ben gi kotoigi? (b) Fa den ben tjari Henoch „go abra”, sodati a no ben si dede”?
8 Bribi sa bewégi wi foe préki fri èn sondro fredo a boskopoe foe Gado. (Lési Hebrewsma 11:5, 6.) A fositen kotoigi foe Jehovah Henoch ben taki nanga dek’ati na fesi dati Gado sa tjari na kroetoe kon tapoe den goddelowsoesma (Judas 14, 15). A no de foe taki dati den féanti foe Henoch ben proeberi foe kiri en, ma Gado „ben teki en gwe”, sodati a no ben abi wan dedestré (Genesis 5:24). Ma fosi „a ben kisi na kotoigi dati a ben plisi Gado”. Fa so? „Nanga bribi den ben teki Henoch tjari go abra sodati a no ben sa si dede.” Tapoe wan srefi sortoe fasi Paulus ben teki go abra ofoe „ben hari poeroe go te ini na Paradijs” foedi a kisi wan visioen foe a jeje paradijs di boo kon foe a kristen gemeente (2 Korinte 12:1-4). Soboen Henoch ben kisi, èn dati de krin, wan visioen foe a grontapoe paradijs di ben o kon di Jehovah ben meki a sribi ini dede dorosé foe na makti foe den féanti anoe. Foe prisi Gado, wi moe préki netleki Henoch fri èn sondro frede a boskopoe foe Gado (Tori foe den Apostel 4:29-32). Wi moe bribi ooktoe dati Gado de èn „de a sma di e pai trawan di e soekoe en serjoesoe”.
9. Fa Noach waka nanga libi ben sori dati a waka soifri na baka den instructie foe Gado de ete wan fasi foe bribi?
9 Hori soifri na den instructie foe Gado de ete wan pisi foe bribi. (Lési Hebrewsma 11:7). Foe di a ben e handri na ini bribi, meki Noach ben doe ’soleki Gado ben taki’ (Genesis 6:22; 7:16). Noach ben kisi „wan warskow foe Gado . . . foe den sani di no ben de foe si ete” èn a ben poti bribi ini Jehovah wortoe dati wan grontapoe froedoe ben sa kon. Ini bribi èn foeroe nanga respeki frede gi Gado Noach „ben bow wan ark foe en osofamiri ben kisi ferloesoe”. Nanga a gi di a ben gi jesi èn nanga regtvaardiki wroko a ben kroetoe foe dat’ede na grontapoe di no ben e bribi foe en goddelowsoe wroko ede, èn ben sori dati a ben ferdini foe kisi pori. — Genesis 6:1-22.
10. Go sortoe tra activiteit Noach ben teki ten, aladi a ben de bezig foe bow na ark?
10 Noach ben de ooktoe wan foe Jehovah kotoigi foedi a ben de „wan prékiman foe regtvaardikifasi” (2 Petrus 2:5). Aladi a ben abi en druk nanga a bow foe na ark, tokoe a ben teki a ten foe préki net soleki Jehovah kotoigi e doe ini a ten disi. Ija, Noach ben taki fri èn sondro frede leki wan barwrokoman foe Jehovah warskow gi den sma dati di ben o dede bifo a froedoe, ma „den no ben poti prakseri a tapoe, te leki a froedoe ben kon èn ben figi den alamala poeroe”. — Mattéus 24:36-39.
A bribi foe den famiri edeman baka a froedoe
11. (a) Fa Abraham ben sori dati bribi ooktoe wani taki foe abi fertrow krinkrin na ini den pramisi foe Jehovah? (b) Sortoe foto Abraham ben froewakti ini bribi?
11 Bribi wani taki ooktoe wan fertrow dorodoro na ini den pramisi foe Jehovah. (Lési Hebrewsma 11:8-12.) Nanga bribi Abraham ben gi jesi na a komando foe Gado èn a ben hari komoto foe Ur foe den Chaldewsma, wan foto di na skinfasi ben abi foeroe foe pristeri. A ben bribi ini Jehovah pramisi dati „ala famiri foe grontapoe” ben sa blesi densrefi nanga jepi foe en èn dati en siri ben sa kisi wan kondre (Genesis 12:1; 15:18-21). Na manpikin foe Abraham Isaak nanga en granpikin Jakob ben de „makandra nanga en erfgenaam . . . foe precies asrefi pramisi”. Nanga bribi Abraham ben tan „leki freemde sma na ini a kondre foe na pramisi leki a ben de ini wan freemde kondre”. A ben loekoe na a „foto di abi troetroe fondamenti, foe sortoe foto Gado de a Bowman èn Mekiman”. Ija, Abraham ben froewakti a hemel kownoekondre foe Gado èn a ben froetrow a tapoe dati a ben sa kisi wan opobaka ondro a kownoekondre dati foe libi a grontapoe. Na kownoekondre e teki sowan prenspari presi na ini joe libi? — Mattéus 6:33.
12. San ben psa foe di Sara ben abi bribi na ini den pramisi foe Jehovah?
12 Ooktoe den trowoema foe den famiri edeman disi di ben frede Gado ben e poti bribi na ini den pramisi foe Jehovah. Nanga bribi Abraham oema Sara, aladi en no ben meki pikin te na a libimarki foe sowan négitenti jari èn „ben pasa na libimarki (foe meki pikin)”, ben kisi foe eksempre krakti „foe de nanga bere, . . . foe di a ben si en [Gado] getrow, di ben gi a pramisi”. Baka wan pisten Sara ben meki Isaak, so te foe baka Abraham di ben abi wanhondro jari, di na makti foe en foe meki pikin „joe kan taki ben dede”, te foe kaba „a ben kisi pikin stari na a hemel ini bigi nomroe”. — Genesis 17:15-17; 18:11; 21:1-7.
13, 14. (a) Fa Abraham, Isaak nanga Jakob ben doe aladi den „no ben kisi na kontroe foe den pramisi?” (b) Fa a kan de leki wan wini gi wi foe loekoe na loyaliteit di den famiri edeman ben sori na Jehovah, èn srefi efoe wi no e si na wantewante kontroe foe den pramisi foe en?
13 Bribi sa meki wi tan loyaal na Jehovah, srefi efoe wi no si wantewante na kontroe foe den pramisi foe en. (Lési Hebrewsma 11:13-16.) Den getrow famiri edeman ben dede alamaia sondro foe ben si a kontroe dorodoro foe na pramisi di Gado ben gi den. Ma „den ben si [den pramisi sani] foe farawe èn ben gi odi a den èn na publiki den ben meki bekenti dati den de freemde sma èn wakaman na ini a kondre”. Ija, te na a dede foe den den ben tan hori na bribi, bika famirilo ben hari psa bifo den bakapikin foe Abraham ben kisi na pramisi kondre leki goedoe.
14 Dati Abraham, Isaak nanga Jakob no ben kisi na a libi foe den na kontroe foe den pramisi foe Gado no ben meki den kisi bita-ati èn ooktoe a no ben bewégi den foe fadon komoto na bribi. Den no ben gwe libi Jehovah èn no ben drai go baka na Ur foe go baka krinkrin na ini grontapoe afersi. (Teki gersi Johannes 17:16; 2 Timóteus 4:10; Jakobus 1:27; 1 Johannes 2:15-17.) Nono, den famiri edeman dati ben proeberi foe kisi wan moro betre presi leki Ur, „dati wani taki wan di de foe hemel”. Foe dat’ede ’Jehovah no e sjen foe den kari en na Gado foe den’. Den ben tan hori a bribi foe den na ini a Moro Héwan te na a dede foe den én heri esi den sa kisi wan opobaka foe libi a grontapoe, wan pisi foe na kontren foe na „foto”, na Messias kownoekondre di Gado ben sreka gi den. Ma fa a de nanga joe? Srefi awinsi joe ’ben waka na ini na waarheid’ jari kaba èn joe ben kon owroe na ini Jehovah dienst, dan ete joe moe hori joe fertrow na ini en pramisi njoen seti (3 Johannes 4; 2 Petrus 3:11-13). Fa joe nanga den getrow famiri edeman foe sowan bribi sa kisi wan moi paiman!
15. (a) San ben meki Abraham ben man foe offer Isaak baka? (b) Fa a sani di ben psa na a okasi dati moe abi krakti tapoe wi bribi? (c) San na sani dati di ben psa ben agersi na profétifasi?
15 Gi jesi na Gado sondro kondisi de wan toemsi prenspari pisi f oe bribi. (Lési Hebrewsma 11:17-19.) Foe di Abraham ben gi jesi na Jehovah sondro wan kondisi meki Abraham „ben offer Isaak kaba soboen”, aladi disi ben de en „wan enkri manpikin”, na enkriwan di Sara ben meki. Fa Abraham ben kan doe disi? Foe di a ben kan prakseri dati Gado ben sa kan wiki en (Isaak) srefi komoto foe dede efoe dati ben sa de fanowdoe, foe kan meki a pramisi foe en bakapikin kontroe nanga jepi foe en. Ete wan momenti san na nefi ini Abraham anoe ben sa ben meki wan kaba kon na a libi foe Isaak ma na sten foe wan engel ben tapoe disi. Foe dat’ede meki Abraham ben kisi Isaak baka foe dede „na wan agersifasi”. Sani moe poesoe wi ooktoe foe gi jesi na Gado ini bribi, srefi efoe wi libi ofoe di foe wi pikin de ini kefar foe lasi (1 Johannes 5:3). A de ooktoe wan aparti sani dati Abraham nanga Isaak na ini a ten dati ben agersi na profétifasi fa Jehovah Gado ben man gi en wan enkri Manpikin, Jezus Kristus, leki ferloesoe prijs sodati den sma di e poti bribi na ini en ben sa kisi tego libi. — Genesis 22:1-19; Johannes 3:16.
16. Sortoe eksempre ini a tori foe wi pikin èn ini a bribi foe Gado den famiri edeman ben gi wi?
16 Efoe wi abi bribi, dan wi sa jepi wi bakapikin foe poti den howpoe na tapoe san Gado e pramisi foe a ten di e kon. (Lési Hebrewsma 11:20-22.) So tranga na bribi foe den famiri edeman ben de dati, aladi den pramisi foe Jehovah no ben kontroe krinkrin na ini a ten foe den libi tokoe den ben gi abra na den pikin foe den leki wan diri goedoe. Na so „Isaak ben blesi Jakob nanga Ezau ini a tori foe sani di ben sa kon” èn Jakob ben taki tapoe en dedebedi den blesi di boo kon tapoe Jozef manpikin Efraïm nanga Manasse. Foe di Jozef srefi ben e bribi tranga taki den djoe sma ben sa hari komoto foe Egypte go na a kondre foe pramisi, meki a ben meki en brada sweri dati den ben sa teki en bonjo go nanga den te den boo hari gwe (Genesis 27:27-29, 38-40; 48:8-22; 50:24-26). Joe e jepi joe osofamiri foe kweki net sowan bribi ini san Jehovah ben pramisi?
Bribi e meki dati wi poti Gado tapoe a fosi presi
17. Fa den mama nanga papa foe Mozes ben handri ini bribi?
17 Bribi e poesoe wi foe poti Jehovah nanga en pipel a fesi foe ala sani san a grontapoe disi abi foe pristeri (Lési Hebrewsma 11:23-26.) Di den Israëlsma ben de srafoe di ben moe kisi fri foe na katibo foe Egypte dan Mozes papa nanga mama ben meki bribi tjari den ini a fasi fa den ben doe. ’Den no ben frede na komando foe a kownoe’ di taki foe kiri hebrew manpikin te den ben gebore. Na presi foe dati den ben hori Mozes kibri dri moen langa èn poti en te foe kaba ini wan pikin ark foe papirus a mindri na tjen sésé foe na liba kanti foe a liba Nijl. Di Faroa oemapikin ben feni en a ben ’kweki en leki en égi manpikin’. Ma fosi Mozes mama ben moe gi en bobi èn a ben kisi en jeje kweki ini na oso foe en papa nanga mama, Amram nanga Jochébed. Baka dati a ben kisi leri leki memre foe a osofamiri foe Farao „ini ala koni foe den Egyptesma” èn a ben kon „krakti ini en wortoe én doe”, tranga ini ferstan èn na skin. — Tori foe den Apostel 7:20-22; Exodus 2:1-10; 6:20.
18. Sortoe bosroiti ini a tori foe na anbegi foe Jehovah Mozes ben teki foe en bribi ede?
18 Na kweki foe den Egyptesma èn na moi goedoe foe na kownoe oso no ben meki dati Mozes ben libi na anbegi foe Jehovah èn ben tron wan sma di fadon komoto ini bribi. Kontrari foe dati, „nanga bribi Mozes, di a ben e gro, ben wégri foe den kari en na manpikin foe na oemapikin foe Farao” èn disi ben kon a krin ini en libi nanga waka di a ben opo feti gi wan Hebrew brada (Exodus 2:11, 12). Mozes ben ferkisi „moro foeroe foe den behandel en takroe nanga na pipel foe Gado [kompe-anbegiman foe Jehovah foe den Israëlsma] leki foe njan switi wan pisten foe a prisiri foe sondoe”. Efoe joe de wan dopoe dienstknegti foe Jehovah nanga wan boen achtergrond foe wan boen jeje kweki, joe sa waka dan baka na eksempre foe Mozes èn tanapoe stéfi gi a troe anbegi?
19. (a) San e sori krin dati Mozes ben poti Jehovah nanga en pipel foe en na a fosi presi na ini en libi? (b) Mozes ben loekoe foe kisi na pai foe sortoe paiman?
19 Mozes ben tai ensrefi na na lot foe Jehovah pipel „foe di a ben si a sjen foe a Kristus wan moro bigi goedoe leki den goedoe foe Egypte”. Seker a ben de so dati na „sjen” di Mozes ben si „wan moro bigi goedoe leki den goedoe foe Egypte” ben de ini disi dati a ben mag de wan froekoe prenki foe Kristus, ofoe Gado salfoewan. Leki memre foe na kownoe-oso a ben kan njan boen ini Egypte foe goedoe nanga barnen. Ma a ben sori bribi èn „ben hori en ai tapoe na paiman” — tego libi nanga jepi foe wan opobaka na grontapoe ini Gado pramisi njoen seti.
20. Sortoe pisi foe na ondrofeni foe Mozes e meki wi si dati bribi e meki wi leki dienstknegti foe Jehovah de sma di no e frede?
20 Bribi e meki wi de sondro frede foedi wi abi na fertrow dati Jehovah de wan ferloesoeman. (Lési Hebrewsma 11:27-29.) Di Farao ben kon sabi dati Mozes ben kiri wan Egyptesma a ben proeberi foe kiri en. „Ma Mozes ben lon gwe gi Farao sodati a ben sa kon libi na ini na kondre Midian” (Exodus 2:11-15). Soboen agersi taki Paulus e poti prakseri tapoe na hari komoto foe den Hebrewsma, di bakaten ben feni presi, te ai taki: „Nanga bribi en [Mozes] ben gwe libi Egypte, ma sondro foe frede na atibron foe na kownoe (di ben tapoe skreki gi en nanga dede foe di a ben teki presi gi Gado foe na boen foe Israél), bika a ben tan stanfaste leki a ben si a Wan di no de foe si” (Exodus 10:28, 29). Aladi Mozes te joe loekoe en boen noiti ben si Gado, tokoe a fasi fa Gado ben e lolo nanga en ben de sowan troe sani dati a ben handri leki a ben si „a Wan di no de foe si” (Exodus 3:20). Na fertrow foe joe nanga Jehovah de so tranga? — Psalm 37:5; Odo 16:3.
21. San psa „nanga jepi foe bribi” di Israël ben hari komoto na Egypte?
21 Let bifo Israël ben hari komoto foe Egypte, Mozes „nanga bribi ben hori a fesa foe Pasha èn a ititi nanga na broedoe sodati na poriman no ben sa doe den fosi geborewan foe den [dati wani taki foe den Israëlsma] ogri”. Ija, bribi ben de fanowdoe foe hori na fesa foe na Pascha ini na overtoigi dati den fosi gebore manpikin foe Israël ben sa tan a libi aladi den di foe den Egyptesma ben sa dede, èn a bribi disi ben kisi pai (Exodus 12:1-39). A pipel foe Israël „ooktoe nanga bribi ben hari psa na Rede Se leki tapoe dre gron, ma di den Egyptesma ben proeberi en ooktoe, den watra ben swari den”. Fa Jehovah ben bewijsi dati a de wan kefarlek bigi ferloesoeman! Èn foe na ferloesoe disi ede meki den Israëlsma „ben kisi frede gi Jehovah èn ben poti bribi ini Jehovah èn ini Mozes, en dienstknegti”. — Exodus 14:21-31.
22. Sortoe aksi di abi foe doe nanga bribi wi e go loekoe now?
22 A bribi foe Mozes èn den famiri edeman de foetroe wan eksempre gi Jehovah Kotoigi ini a ten disi. Ma san ben psa leki wan bakapisi foe a bemoei di Gado bemoei morofara nanga den bakapikin foe Abraham leki wan natie di ben organiseer tapoe wan theokratis fasi? San wi kan leri morofara foe den wroko foe bribi foe owroeten?
Fa joe ben sa piki disi?
◻ San na bribi?
◻ San na eksempre foe hemel e leri wi foe bribi?
◻ Fa den famiri edeman di ben abi frede gi Gado ben sori dati bribi ooktoe wani taki fertrow krinkrin ini den pramisi foe Jehovah?
◻ Sortoe doe foe Abraham e sori dati gi jesi na Gado sondro kondisi de wan toemsi prenspari pisi foe bribi?
◻ Sortoe doe foe Mozes e sori dati bribi wani taki poti Jehovah nanga en pipel moro hé gi ala sani san na grontapoe abi foe pristeri?