’Neleki fa isri e srapoe isri’

NA A kaba foe a di foe dri jarihondro G.T., wan opregti jonkoeman di ben nen Anthony èn di sma ben si leki wan „Koptisch kresten”, ben go libi aparti foe tra libisma na ini a sabana 20 jari langa, farawe foe libisma. Foe san ede? A ben feni taki disi ben de a moro boen fasi gi en foe dini Gado. En ben de a fosi sma foe krestenhèit di ben abi foeroe krakti na tapoe tra sma èn di go tan aparti foe libisma foe relisi ede.

Na ini a ten disi, krestenhèit abi wan toe sma di e go libi aparti foe tra libisma. Ma moro nanga moro sma e soekoe tra fasi foe no kisi foeroe kontakti nanga sma. Den e weigri foe taki nanga trawan foe relisi, foe di den e feni taki disi e tjari kesekese nanga feti kon. A moro prenspari sani foe na anbegi foe den, na foe no doe a sma na den sei ogri.

A troe, taki efoe joe no e doe a sma na joe sei ogri, dan dati na wan pisi foe a troe anbegi, ma moro de fanowdoe. Wan owroe odo e taki: „Nanga isri, isri srefi e kon srapoe. Na so wan man e srapoe a fesi foe wan trawan” (Odo 27:17). A troe foe a tori de, taki bijbel e gi kresten deki-ati foe kon makandra, no foe go libi aparti srefisrefi foe grontapoe noso foe tra kresten. A e taki: „Meki wi poti prakseri na tapoe makandra foe gi makandra tranga foe sori lobi èn foe doe toemoesi boen wroko, foe no libi den konmakandra” (Hebrewsma 10:24, 25). Jehovah Kotoigi e waka na baka a rai dati. Difrenti leisi na ini wan wiki, den e kon makandra foe ’srapoe a fesi foe makandra’ èn den e bow a bribi foe den kompe bribiman foe den. Den e si taki, foe taki foe bijbel na wan opregti èn na wan eerlijk fasi, no e tjari feti kon. Na presi foe dati, a e tjari wánfasi nanga vrede kon. A de wan toemoesi prenspari pisi foe a troe anbegi.