„No kon na ondro wan tjatjari di no de a srefi”

DEN toe mankaw di de djaso tapoe a prenki, tranga srefisrefi, èn dati meki sondro moeiti den kan hari hebi lai. Ma kon wi taki dati sma ben poeroe wan foe den mankaw èn ben poti wan boeriki na ini en presi. Foe di wan boeriki moro pikin èn swaki moro leki wan mankaw, dan sondro tweifri, a boeriki ben sa opo ensrefi teige a sani disi, foe di a ben sa skopoe na den oedoe di e hori en na ondro a tjatjari disi di no de a srefi. So boen, nanga wan boen reide, a wet foe Gado gi Israèl ben taki: „Joe no moesoe ploegoe nanga wan mankaw makandra nanga wan boeriki.” — Deuteronomium 22:10.

Na apostel Paulus ben skrifi wan srefi sortoe sani di abi foe doe nanga libisma. A ben taki: „No kon ondro wan tjatjari di no de a srefi, nanga sma di no de na bribi” (2 Korentesma 6:14). Wi moesoe hori disi na prakseri spesroetoe te wi e teki wan trowpatna. A trow na wan têgo banti na mindri patna, bikasi Jesus Krestes ben taki: „Den disi di Gado ben tjari kon na ondro wán tjatjari, no wan sma moesoe prati” (Mateus 19:6). Foeroe sari e kon te wan trowpaar no abi a srefi bribi, den srefi gronprakseri nanga marki. Foe dati ede a de reidelek foe waka na baka a froemane di bijbel e gi foe trow „soso na ini Masra” (1 Korentesma 7:39). Foe trow nanga wan sma di no abi a srefi bribi leki joe, ben sa gi wan moro bigi problema, leki te joe e poti wan mankaw na ondro a srefi tjatjari nanga wan boeriki.

A difrenti na ini bribi na soso wán penti di ben kan meki taki wan trowpaar de na ondro wan tjatjari di no de a srefi. Sma di abi na prakseri foe trow — srefi te den abi a srefi bribi — ben sa doe boen foe aksi densrefi: ’Wi abi den srefi marki? Pe wi sa tan? Soema sa handri den moni afersi? Wi ala toe sa wroko? Wi sa abi pikin? A de so, taki boenfasi nanga a hori di wi e hori makandra na prakseri, sa tiri a banti na ini a trowlibi?’

Na a wan noso tra fasi, a fasi fa den e taki foe den sortoe sani disi kan sori efoe wan tjatjari sa de a srefi noso no sa de a srefi. A no de foe taki, no wan sma e fiti a trawan dorodoro. Ma moro foeroe a de so, taki efoe toe sma di abi mofo nanga makandra, kan si èn kan loesoe problema makandra, èn efoe den kan abi komunikâsi na wan fri fasi, dan a de pikinmoro seiker taki den no sa kon ondro wan tjatjari di no de a srefi.