Vrede kan kon?

ALA TEN wan orlokoe sa de wan presi. Dati na a sari troe foe a libisma famiri.” No so langa pasa, a negatief fasi disi foe si sani, ben de foe si na ini wan brifi foe wan leisiman na ini a tijdschrift Newsweek. Joe e agri nanga a sani disi? A de so, taki wi no man wai pasi gi orlokoe èn taki vrede no kan? Efoe wi e loekoe san historia e taki, dan a de wan moeilek sani foe no piki nanga ija tapoe den toe aksi disi. So langa leki sma e skrifi foe sani di pasa, ala tron, libisma ben abi foe doe nanga a wan orlokoe baka a trawan, èn den feti disi ben kon moro ogri foe di libisma ben kon feni moro boen fasi foe kiri makandra.

A no ben de tra fasi na ini a di foe twenti jarihondro. Foe troe, sma ben si den orlokoe pe moro broedoe ben fadon leki iniwan tra ten, ma den ben si wan njoen sani toe. Feifi tenti jari pasa, den Verenigde Staten ben opo a nucleair jarihondro foe di den ben trowe toe atoombom na tapoe Japan. Na ini den feifi tenti jari sensi a ten dati, den nâsi bow boen bigi maksin nanga nucleair fetisani di ben sa man pori a libisma famiri moro foeroe leisi leki wán tron nomo. A de di den nucleair fetisani disi de, te foe kaba sa meki taki libisma sa kon frede foe bigin nanga orlokoe? Den sani di pasa troetroe e gi a piki tapoe na aksi dati. Sensi 1945 foeroe miljoenmiljoen sma dede na ini orlokoe — ala di te leki now no wan nucleair bom no trowe moro.

Foe san ede libisma lobi feti so? Na Encyclopedia Americana e kari wan toe sani foe a historia, di ben meki taki sma go feti orlokoe. Wan toe foe den sani disi na a froedrage di sma no e froedrage a relisi foe wan trawan, a lobi di sma lobi foe poti a wan ras moro hei leki a trawan, a difrenti na ini koeltoeroe, difrenti na ini sociaal nanga politiek idea (soleki komunisme nanga kapitalisme), nationalisme èn a leri taki a soevereiniteit foe a wan kondre hei moro di foe wan trawan, situwâsi na ekonomia sei, èn a pôpi fasi fa sma e teki den fasi nanga den prakseri foe sroedati. Te joe e leisi den sani di kari djaso, dan joe e si wán sani di sa kenki na ini a ten di e kon? A sa de so, taki den nâsi no sa hori den soevereiniteit so hei moro? A de so, taki libisma no sa poti a wan ras so hei moro leki a trawan? A sa de so taki fondamentalistsma foe bribi, no sa abi so wan don faja moro gi a bribi foe den? A no sori so.

We dan, howpoe no de srefisrefi taki wán dei, sani sa kon moro boen èn vrede sa kon di sa tan gi ala ten? Ija, howpoe de. Ala di a grontapoe disi broeja, tokoe a kan, taki srefi ini a ten disi, sma feni vrede. Miljoenmiljoen sma doe so kaba. Meki wi froeteri joe foe wan toe foe den sma disi èn loekoe san na ondrofenitori foe den kan wani taki gi joe.

[Sma di abi a reti foe den prenki na tapoe a kafti]

Background prenki foe fesisei nanga bladzijde 32: Reuters/Bottmann

[Sma di abi a reti foe a prenki na tapoe bladzijde 3]

Reuters/Bettmann