Den ben feni vrede na ini wan broeja grontapoe

A PRENKI na fesisei foe a tijdschrift disi, e sori wan faja feti di e pasa na ini Bosnia nanga Hersegofina. A kan, taki vrede de na so wan presi? A e gi foe froewondroe, taki a piki na ija. Ala di den libimakandra foe Lomsoe sma, Owstoe Orthodox sma, nanga Moslim sma na ini a kondre dati, pe sani e gi foe sari, e feti foe kisi moro gron, tokoe foeroe sma wani vrede srefisrefi èn son sma feni vrede.

A famiri Djorem ben tan na Sarajevo, èn den ben de Jehovah Kotoigi. Na mindri ala broeja na ini a foto dati, den ben abi a gwenti foe fisiti den birtisma foe den foe prati a boen njoensoe nanga den foe Gado Kownoekondre (Mateus 24:14). Foe san ede? Foe di a famiri Djorem ben sabi taki a Kownoekondre disi de troetroe, taki a seti kaba na hemel, èn taki a de a moro boen howpoe èn a wan-enkri howpoe gi vrede gi a libisma famiri. Dorodoro Jehovah Kotoigi abi a froetrow na ini san na apostel Paulus e kari „a boen njoensoe foe vrede” (Efeisesma 2:17). Wi kan de Bozo nanga Hena Djorem grantangi, taki foeroe sma e feni vrede na Bosnia nanga Hersegofina.

Wan troetroe vrede moesoe kon ete

Moro de foe taki foe den Djorem. Ma tokoe, na a fosi presi, meki wi taki foe wan tra paar di ben kisi a froetrow na ini Gado Kownoekondre. Den nen foe den na Artur nanga Arina. Den nanga den jongoe boi foe den ben libi na ini wan republiek di ben de na ini a kontren foe a Sovjet-Unie foe fosi. Di feti na mindri a pipel ben broko kon, Artur ben feti gi wan foe den sei. Ma tokoe, heri esi, a ben aksi ensrefi: ’Foe san ede mi e feti nanga a pipel disi di ben de mi birtisma?’ A ben gowe libi a kondre èn, baka foeroe problema, a ben doro nanga en jongoe osofamiri na Estonia.

Di Artur ben fisiti St. Petersburg, a ben miti nanga Jehovah Kotoigi, èn den sani di a ben leri foe Gado Kownoekondre ben naki en ati. A wani foe Jehovah na taki, heri esi Gado Kownoekondre sa de a wan-enkri tirimakti di sa tiri libisma (Danièl 2:44). Dan grontapoe sa de wan presi foe vrede, pe sma foe a srefi kondre no sa feti moro nanga makandra èn pe tra kondre no sa meki trobi moro nanga makandra. Jesaja ben taki na fesi foe a ten dati: „Sma no sa doe no wan sortoe ogri èn no sa pori no wan sani tapoe heri mi santa bergi; bika grontapoe seiker sa kon foeroe nanga a sabi foe Jehovah, soleki fa watra e tapoe a se.” — Jesaja 11:9.

Di wan Kotoigi ben sori Artur na ini wan poeblikâsi di e gebroiki gi bijbel studie, a fasi fa wan artiest prenki a tamara foe wan grontapoe nanga vrede, dan Artur ben taki dati a ben libi na so wan presi di ben gersi a prenki. Ma now, a feti di a pipel ben feti nanga densrefi, ben pori a presi. Di Artur drai go baka na Estonia, en nanga en osofamiri e leri moro foe Gado Kownoekondre nanga jepi foe wan bijbelstudie nanga Jehovah Kotoigi.

Vrede na mindri foe broeja

Psalm 37:37 e taki: „Loekoe a sma di no abi fowtoe, èn poti joe ai na tapoe na opregti sma, bikasi a tamara foe so wan man sa de nanga vrede.” Foe taki en leti, a vrede foe wan sma di de sondro fowtoe èn di de opregti na ini Gado ai, no de soso gi a ten di e kon. Nownow kaba a e njan boen foe dati. Fa dati kan? Poti prakseri tapoe san wan man di den kari Paul, ben ondrofeni.

Paul e libi na wan fara loweman kampoe na zuidwestsei foe Etiopia, ala di troetroe a e kon foe wan kondre sei Etiopia. Na ini a kondre pe a gebore, a ben miti wan Jehovah Kotoigi di ben wroko gi wan oli maatschappij, èn a man disi ben gi en wan poeblikâsi foe studeri bijbel: De waarheid die tot eeuwig leven leidt.a Noiti moro Paul ben miti a kotoigi baka, ma Paul ben studeri a boekoe boen. A feti di a pipel ben feti nanga makandra na ini en kondre, ben meki taki a lowe go na wan loweman kampoe na Etiopia, èn drape a ben taki nanga tra sma foe den sani di a ben leri. Wan pikin groepoe ben teki den sani disi leki waarheid. Heri esi den ben preiki den sani di den ben leri gi trawan na ini a kampoe.

Paul ben skrifi na edekantoro foe a Waktitoren Genootschap èn a ben aksi den foe jepi en. Wan dinari di ben seni kon foe Addis Abeba ben froewondroe foe si taki 35 sma ben wakti en, klariklari foe leri moro foe Gado Kownoekondre. Sani ben seti foe gi jepi dorodoro.

Fa wi kan taki dan dati sma soleki Paul e njan boen foe vrede? Den no abi en makriki na ini a libi foe den, ma den abi bribi na ini Gado. Te den e kisi foe doe nanga a broeja foe a grontapoe disi, dan den e fiti a bijbel rai: „No broko oen ede nanga noti, ma meki Gado kon sabi den faja begi foe oenoe na ini ala sani nanga jepi foe begi nanga tranga begi makandra nanga tangi.” Leki bakapisi foe dati, den abi wan tevrede fasi di pikinmoro no de foe si nojaso. Den wortoe di na apostel Paulus ben skrifi gi a gemeente na Filipi, e fiti gi den sortoe sma disi: „A vrede foe Gado, di e pasa ala prakseri, sa kibri oen ati nanga oen krakti foe denki nanga jepi foe Krestes Jesus.” Foe troe, den e firi wan krosibei matifasi nanga Jehovah, „a Gado foe vrede”. — Filipisma 4:6, 7, 9.

Wan sortoe vrede nojaso

A Kownoe foe Gado Kownoekondre di e sidon na tapoe en Kownoestoeroe nojaso, na Jesus Krestes, di den e kari na ini bijbel „Kownoe foe Vrede” (Jesaja 9:6). Den fositen profeiti ben taki foe Jesus: „Foe troe a sa taki foe vrede nanga den nâsi; èn a tirimakti foe en sa de foe se te kon miti se èn foe a Liba te na a kabapisi foe grontapoe” (Sakaria 9:10). Den wortoe disi di skrifi nanga jepi foe santa jeje, ben abi bigi krakti na tapoe a libi foe wan man di nen José.

Wan leisi, José ben de na ini doengroe-oso. José ben de wan terrorist èn den ben tjari en gowe foe sroto, ala di a ben sreka sani foe soetoe wan bom foe panja wan skowtoe oso. José ben prakseri taki soso ogridoe di doe nanga tranga, ben sa kan dwengi lanti foe den meki sani kon moro boen na ini en kondre. Di José ben de na doengroe-oso, dan Jehovah Kotoigi ben bigin studeri bijbel nanga a wefi foe en.

Baka di den ben loesoe José, dan en toe ben bigin studeri bijbel, èn heri esi den wortoe foe Psalm 85:8 ben bigin fiti gi en: „Mi sa jere san a troe Gado Jehovah sa taki, bikasi a sa taki foe vrede nanga en pipel, èn nanga den loyaalwan foe en.” Ma tokoe, a vers dati e tapoe nanga wan warskow: „Ma meki den no drai go baka foe froetrow tapoe densrefi.” Foe dati ede, wan sma di e soekoe a vrede foe Jehovah no sa proeberi foe doe sani aparti foe a wani foe En noso foe handri teige a wani foe En.

Nownowde, José nanga en wefi na kresten dinari. Den e tjari sma go na Jehovah Kownoekondre leki a wan-enkri loesoe gi den problema di José ben proeberi foe loesoe fosi nanga bom di ensrefi ben meki. Den wani foe froetrow bijbel, di e taki: „Jehovah foe en sei, sa gi san boen” (Psalm 85:12). Foe troe, no so langa pasa, José ben fisiti den skowtoe oso di a ben wani pori. Foe san ede a ben tjari a fisiti? Foe taki nanga den osofamiri drape foe Gado Kownoekondre.

Wan pipel di de na ini vrede

Na Psalm 37:10, 11, bijbel e taki: „Èn ete wan sjatoe ten èn na ogriwan no sa de moro; èn joe sa loekoe pe a de, èn a no sa de. Ma den safri-ati sma sa abi grontapoe, èn foe troe den sa feni switi prisiri na ini vrede pasa marki.” Dati na wan toemoesi moi sani di wan sma kan froewakti!

Ma loekoe, taki a vrede foe Jehovah na soso gi „den safri-ati sma”. Kande den sma di e soekoe vrede moesoe leri foe libi na ini vrede. Disi ben de a kefal nanga Keith, di e libi na Njoen Zeeland. Sma ben taki foe Keith taki „en skin ben bigi, a ben abi wan krakti persoonlijkheid, a ben lobi foe feti, èn foe hari-taki”. A ben de wan memre foe wan ogri groepoe èn a ben libi na ini wan oso di ben de wan troetroe fortresi, pe dri dagoe ben loekoe a djari foe loekoe taki sma no kon inisei sondro foe den kisi wan kari. A wefi foe en, a mama foe den siksi pikin foe en, ben broko-trow nanga en.

Di Keith ben miti nanga Jehovah Kotoigi, dan a boen njoensoe ben abi bigi krakti tapoe en. Heri-esi en nanga den pikin foe en ben fisiti den konmakandra foe den Kotoigi. A ben koti a boen langa wiwiri foe en di ben langa te kon miti en bere èn a ben bigin taki nanga den kompe foe en foe fosi, foe Gado Kownoekondre. Wan toe foe den disi ben bigin foe studeri bijbel toe.

Neleki miljoenmiljoen reti-ati sma na heri grontapoe, Keith ben bigin fiti den wortoe foe na apostel Petrus na ini en libi: „A sma di ben sa lobi en libi èn si boen dei, . . . meki a kaba foe doe ogri èn meki a doe boen; meki a soekoe vrede èn feti baka dati” (1 Petrus 3:10, 11). A fosi wefi foe Keith ben agri foe trow baka nanga en, èn Keith e leri now foe „soekoe vrede èn feti baka dati”.

A vrede foe Jehovah de wan sani di kibri foeroe sma libi, so srefi toe gi wan man di ben de wan atleet fosi èn di ben gebore na a Sovjet-Unie foe fosi. A man disi ben wini medaille na den Olympis wega, ma den froewakti foe en no ben kon troe èn a ben bigin gebroiki drug nanga sopi. A ben begi Gado foe jepi en foe feni wan troetroe marki na ini a libi, èn dati a ben doe baka 19 jari pe foeroe sani ben pasa nanga en soleki kisi strafoe foe wroko dri jari na ini wan strafoe-man kampoe na Siberia, a kibri di a ben kibri ensrefi na ini wan sipi di ben go na Kanada, èn toe leisi di a misi foe dede foe den drug di a ben gebroiki. Wan bijbel studie nanga Jehovah Kotoigi di ben taki a Rosiatongo, ben jepi en foe feni piki tapoe den aksi foe en. Neleki miljoenmiljoen tra sma, nownowde a man disi feni vrede nanga Gado èn nanga ensrefi.

A howpoe foe na opobaka

Te foe kaba, meki wi drai go baka na Bozo nanga Hena Djorem na Sarajevo. A trowpaar disi ben abi wan oemapikin foe feifi jari di ben abi leki nen Magdalena. Na ini a moen juli di pasa, di den dri sma disi ben libi den oso foe go preiki baka, dan den ben kon lasi den libi foe di wan bom ben panja. Fa a de nanga a vrede di den ben preiki gi trawan? A ben de so, taki a bom di teki den libi e sori taki san den ben preiki no ben de wan troetroe vrede?

Kwetikweti! Na ini a seti foe sani disi, den sortoe sari sani disi e pasa. Sma e lasi den libi foe di tra sma e soetoe bom di e panja èn e kiri den. Tra sma e dede foe siki noso tra kefalek sani di e miti den. Foeroe sma dede te den kon owroe. Den sani disi abi krakti toe tapoe den sma di e njan boen foe a vrede foe Gado, ma foe di den sani disi kan pasa, dan dati no e meki taki den no abi howpoe moro.

Jesus ben pramisi en mati Marta: „Mi na a opobaka nanga a libi. A sma di e sori bribi na ini mi, sa kon na libi, awinsi a dede” (Johanes 11:25). A famiri Djorem ben bribi disi, neleki fa ala Jehovah Kotoigi e bribi disi. Èn a famiri Djorem ben bribi taki efoe den ben o dede, dan den ben sa kisi wan opobaka na wan grontapoe di ben sa de wan troetroe presi foe vrede na ini a ten dati. Jehovah Gado „sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba”. — Openbaring 21:4.

Sjatoe bifo Jesus dede, a ben taigi den bakaman foe en: „Mi e gi oenoe a vrede foe mi. . . . No meki oen ati kon broeja” (Johanes 14:27). Wi e prisiri nanga a famiri Djorem di ben abi a vrede dati èn di seiker sa njan moro boen foe a vrede dati na ini na opobaka. Wi de kolokoe nanga ala den sma di e anbegi Jehovah, a Gado foe vrede. Den sortoe sma disi abi wan vrede foe a jeje. Den e njan boen foe vrede nanga Gado. Den e kweki vrede nanga trawan. Èn den abi a froetrow na ini wan tamara pe vrede sa de. Ija, den feni vrede, ala di den e libi na ini wan grontapoe di broeja srefisrefi. Foe troe, ala den sma di e anbegi Gado nanga jeje èn nanga waarheid, e njan boen foe vrede. Meki a de so, taki joesrefi toe feni so wan sortoe vrede.

[Foetoewortoe]

[Prenki na tapoe bladzijde 7]

Ala di den e libi na ini wan broeja grontapoe, tokoe den feni vrede