Troe vrede — Foe sortoe fonten?
„[Jehovah] e meki feti kon na wan kaba te na a moro farawe presi foe grontapoe.” — PSALM 46:9.
1. Sortoe toemoesi moi pramisi foe vrede wi e feni na ini a profeititori foe Jesaja?
„A WROKO foe troetroe regtfardikifasi moesoe tron vrede èn a diniwroko foe troetroe regtfardikifasi, tirifasi nanga seikerfasi te ten di no skotoe. Èn mi pipel moesoe tan na ini wan presi pe vrede de èn na tanpresi pe sma abi dorodoro froetrow na ini èn na rostoepresi pe sma no e kisi no wan broko-ede” (Jesaja 32:17, 18). Dati na wan moi pramisi troetroe! A de wan pramisi foe troe vrede di Gado tjari kon.
2, 3. Froeteri san na troe vrede.
2 Ma san na troe vrede? Na soso a de di orlokoe no de? Noso na soso wan pisi ten na ini san den nâsi e sreka densrefi gi wan tra orlokoe? Troe vrede na soso wan dren? Dati na aksi di wi moesoe kisi piki na tapoe di wi kan froetrow. Na a fosi presi, troe vrede de moro leki wan dren. A vrede di Gado ben pramisi, e pasa iniwan sani di a grontapoe disi ben sa kan prakseri (Jesaja 64:4). A no wan vrede gi wan toe jari noso gi wan toe tenti jari. A e tan foe têgo! Èn a no wan vrede gi soso wan toe sma di e kisi a grani — a de gi hemel nanga grontapoe, gi engel nanga libisma. A e doro sma foe ala nâsi, ras, tongo, nanga kloroe. No wan marki, no wan skotoe, no wan fowtoe di meki, sa poeroe a vrede foe wan sma. — Psalm 72:7, 8; Jesaja 48:18.
3 Troe vrede wani taki vrede ala dei. A wani taki, dati joe e wiki ibri mamanten sondro foe prakseri foe orlokoe, sondro taki joe moesoe broko joe ede nanga a tamara foe joe, a tamara foe den pikin foe joe, noso srefi a tamara foe den granpikin foe joe. A wani taki wan jeje di korostoe dorodoro (Kolosesma 3:15). A wani taki, no wan takroedoe moro, no wan ogri moro di e doe nanga tranga, no wan osofamiri moro di prati, no wan sma moro di no abi wan presi foe tan, no wan sma moro di e dede foe angri noso di kowroe e naki, èn no wan lasi-ati nanga broko-ede moro. Moro betre ete, a vrede foe Gado wani taki wan grontapoe sondro siki, pen, sari, noso dede (Openbaring 21:4). Fa wi abi wan kefalek moi howpoe foe njan boen foe troe vrede foe têgo! A no disi na a sortoe vrede nanga kolokoe di wi alamala e angri foe en? A no disi na a sortoe vrede di wi moesoe begi gi en èn wroko foe kan kisi en?
Den moeiti di libisma meki, ben de foe soso
4. Sortoe moeiti den nâsi meki foe tjari vrede kon, èn nanga sortoe bakapisi?
4 Foeroe jarihondro kaba, sma nanga nâsi taki foe vrede, den haritaki foe vrede, den poti den nen na ondro hondrohondro kroederi foe vrede. San ben de a bakapisi? Te joe loekoe en boen, dan na ini den lasti 80 jari, noiti wan momenti ben de pe wan nâsi noso groepoe no ben feti. A de krin, taki a libisma famiri no ben man kisi vrede. So boen, na aksi de: Foe san ede ala den moeiti di sma meki foe tjari internationaal vrede kon, ben de foe soso, èn foe san ede sma no man tjari troe vrede kon di o tan?
5. Foe san ede a moeiti di libisma e meki foe tjari vrede kon, ibri leisi baka ben de foe soso?
5 A sempel piki de, taki libisma no go na a joisti fonten foe troe vrede. Na ondro a krakti foe Satan Didibri, sma opo organisâsi di e kisi foe doe nanga den eigi swakifasi nanga porifasi — a bigi-ai èn na ambisi foe den, a lostoe foe den foe kisi makti nanga biginen. Den go na hei skoro èn opo stichting nanga organisâsi pe spesroetoe koniman e ondrosoekoe sani, nomo foe go denki moro fasi fa foe kwinsi èn pori sma. Na sortoe fonten den tjari libisma go? O pe den loekoe go?
6, 7. (a) Sortoe nen a Folkoebontoe ben meki gi ensrefi? (b) San sma sabi foe den Verenigde Nâsi?
6 Na ini 1919, den nâsi ben poti a howpoe foe den tapoe a Folkoebontoe foe meki vrede kon di e tan. A howpoe dati ben lasi gowe di den legre foe Mussolini ben broko kon na ini Etiopia na ini 1935 èn di borgoe foe Spanjorokondre ben bigin wan orlokoe na ini 1936. Na ini 1939 di a di foe Toe Grontapoefeti ben bigin, a Folkoebontoe no ben wroko moro. A so-kari vrede, no ben tan 20 jari srefi.
7 Fa a de nanga den Verenigde Nâsi? A gi troetroe howpoe taki vrede o tan na heri grontapoe? Kwetikweti. Sma feti moro leki 150 orlokoe nanga strei pe den gebroiki fetisani, sensi di den VN opo na ini 1945! A no de foe froewondroe taki Gwynne Dyer, wan sabiman foe Kanada di e ondrosoekoe orlokoe èn fa a e bigin, ben taki dati den VN na „wan groepoe foefoeroeman foe meti, di tron opzichter di e loekoe taki ontiman no feni pasi foe go onti meti, den no de wan groepoe foe santa sma”, èn a de „wan swaki organisâsi pe den e taki foeroe, na presi taki den e doe”. — Teki gersi Jeremia 6:14; 8:15.
8. San den nâsi doe, ala di den e taki foe vrede? (Jesaja 59:8)
8 Ala di den nâsi e taki foe vrede, tokoe den e go doro foe sidon denki fa foe meki njoen fetisani. Nofotron, den kondre di e pai den kostoe foe den konmakandra gi vrede, na den srefi kondre di e teki fesi ini a meki foe fetisani. A bigi winst di bisnis e meki na ini den kondre disi e poesoe a meki foe fetisani di e kiri sma, so srefi den ogri-ati sortoe landmijn di ibri jari e kiri noso e malengri so wan 26.000 borgoe, bigisma nanga pikin-nengre. Bigi-ai nanga kroeka na krakti di e poesoe sma foe doe disi. A gi di tjoekoe e gi, na wan prenspari pisi foe na internationaal bisnis ini fetisani. Son politiekman e meki densrefi kon goedoe na a fasi disi.
9, 10. San koniman foe grontapoe taki foe orlokoe nanga a moeiti di libisma e meki?
9 Na ini december 1995, Joseph Rotblat foe Polen, natuurkundeman nanga winiman foe a Nobelprijs foe vrede, ben begi den nâsi foe tapoe nanga a strei foe abi moro fetisani. A ben taki: „A wan-enkri fasi foe tapoe pasi gi [wan njoen strei foe abi moro fetisani], na foe poeroe orlokoe krinkrin.” Joe denki taki disi na san o pasa kande? Sensi 1928, 62 nâsi ben feni a Kellogg-Briand Kroederi boen, èn na so den no ben wani teki orlokoe leki wan fasi moro foe koti trobi. A di foe Toe Grontapoefeti ben sori krin taki a kroederi no ben abi no wan waarde.
10 Tweifri no de, taki doronomo orlokoe de wan sani di ben de tapoe a pasi foe a historia foe a libisma famiri. Soleki fa Gwynne Dyer ben skrifi, dan „orlokoe na wan prenspari seti na ini a libisma libimakandra, èn a historia foe en owroe a srefi leki a libisma libimakandra”. Ija, pikinmoro ibri libimakandra nanga ibri grontapoemakti ben abi den lespeki sroedati trangaman foe en, den feti-legre foe en di a ben kan gebroiki ala ten, den barinen feti foe en di a ben feti, en toemoesi santa sroedati akademia foe en, nanga en maksin nanga fetisani. Ma orlokoe ben marki a jarihondro foe wi moro leki ala jarihondro, nanga a pori di a tjari kon èn a lasi di sma lasi den libi.
11. Sortoe prenspari sani grontapoe tiriman frigiti na ini a moeiti di den meki foe tjari vrede kon?
11 A de krin, taki den fesiman foe grontapoe no poti prakseri tapoe a fondamenti koni foe Jeremia 10:23: „Mi sabi heri boen, o Jehovah, taki a no de na a sma foe grontapoe foe a bepaal en pasi. A no de na wan man di e waka srefi foe bepaal pe foe poti en foetoe na pasi.” Efoe den no e poti prakseri tapoe Gado, dan troe vrede no kan de. Ala den sani disi wani taki, dati orlokoe na wan sani di moesoe de na ini wan libimakandra di kisi boen kweki? A wani taki, dati vrede — troe vrede — na wan dren di no kan?
Feni a moro prenspari reide
12, 13. (a) San bijbel e tjari kon na krin foe a moro prenspari reide di wi no kan si, taki orlokoe de? (b) Fa Satan poeroe a prakseri foe libisma foe a troetroe loesoe foe den problema foe grontapoe?
12 Efoe wi wani piki den aksi dati, dan wi moesoe froestan san meki orlokoe de. Bijbel e taki krin taki na oproeroe engel, Satan, na a fosi „kiriman” nanga „leiman” èn taki „a heri grontapoe e didon na ini a makti foe a godelowsoewan” (Johanes 8:44; 1 Johanes 5:19). San a doe foe horibaka gi den sani di a abi na prakseri? Wi e leisi na 2 Korentesma 4:3, 4: „Efoe now, te joe loekoe en boen, wan doekoe de di e tapoe a boen njoensoe di wi e meki bekènti, dan a tapoe en gi den wan di e kisi pori, di na den mindri a gado foe a seti foe sani disi breni a froestan foe den sma di no e bribi, so taki a krin leti foe a glori boen njoensoe foe Krestes, di de a prenki foe Gado, no ben sa skèin kon doro.” Satan e doe ala san a man foe poeroe a prakseri foe libisma foe a Kownoekondre foe Gado leki a wan-enkri loesoe gi den problema foe grontapoe. A e breni sma èn e poeroe a prakseri foe den nanga sociaal, politiek èn nanga relisi afersi di e tjari prati kon, so taki a gersi leki den sani disi de moro prenspari leki a tiri foe Gado. A nationalisme di no so langa pasa ete opo ede kon na heri grontapoe, na wan eksempre foe disi.
13 Satan Didibri, e poesoe a firi foe sma gi nationalisme èn a tranga lobi gi wan lo, a bribi di sma e bribi taki wan nâsi, ras, noso lo hei moro trawan. Bita-atifasi di sidon dipi na ini sma èn di den ben man dwengi foeroe jarihondro langa e opo kon baka, san e tjari moro orlokoe nanga kesekese kon. Federico Mayor, driktoro-generaal foe UNESCO, ben warskow gi a situwâsi disi: „Srefi drape pe sma ben gwenti foe froedrage makandra, a e kon moro krin foe si taki sma e frede freimdesma, èn moro nanga moro wi e jere sma e taki sani di e sori taki den lobi a kondre noso a ras foe den pasa marki, èn disi na sani di sma ben denki taki den no ben de moro.” San ben de a bakapisi? A kiri di den kiri ipi-ipi sma na wan ogri-ati fasi na ini san ben de Joegoslafia fosi, èn a kiri di lo kiri makandra na Rwanda, na soso toe foe den sani disi di kon na ini bigi njoensoe.
14. San Openbaring 6:4 e froeteri foe orlokoe èn a bakapisi di a abi na ini a ten foe wi?
14 Bijbel ben taki na fesi, taki na ini a ten foe a kaba foe a sistema disi, wan redi asi, di e agersi orlokoe, ben sa lon na tapoe heri grontapoe. Wi e leisi na ini Openbaring 6:4: „Wan trawan ben kon, wan redi asi; èn a sma di ben sidon na tapoe ben kisi primisi foe poeroe a vrede foe grontapoe, so taki den sa slakti makandra; èn a ben kisi wan bigi feti-owroe.” Wi si taki sensi 1914, na agersi asi-tjariman disi „poeroe a vrede”, èn den nâsi ben tan feti èn ben de ini orlokoe.
15, 16. (a) San ben de a prati di relisi ben abi na ini orlokoe èn na ini a kiri di sma kiri makandra? (b) Fa Jehovah e si den sani di relisi doe?
15 San wi no moesoe frigiti na a ròl foe relisi na ini den orlokoe disi nanga a kiri di sma e kiri makandra. Moro foeroe na foe di falsi relisi kori sma, meki a historia foe libisma foeroe nanga someni kiri. A Katolik theoloog Hans Küng ben skrifi: „Tweifri no de taki, na wan negatief fasi di e tjari pori kon, [den relisi] ben abi wan bigi prati na orlokoe èn te now ete a de so. Den de frantiwortoe gi someni feti, strei pe sma kiri makandra na wan ogri-ati fasi, ija, ’orlokoe foe relisi ede’; . . . èn den de [frantiwortoe] toe gi den toe grontapoefeti.”
16 Fa Jehovah Gado e denki foe a prati di falsi relisi abi na a kiri foe sma èn na orlokoe? A kroetoe di Gado gi falsi relisi, soleki fa dati skrifi na ini Openbaring 18:5, e taki: „Den sondoe foe en kon tron leki wan ipi di hei te na hemel, èn Gado tjari den onregtfardiki fasi foe en kon na prakseri.” A prati di falsi relisi abi na disi, makandra nanga den politiek tiriman foe grontapoe, tjari someni broedoe paiman, nanga someni sondoe kon, taki Gado no kan tapoe en ai gi disi. Djonsro a sa poeroe a bigi ston disi krinkrin di e meki sma naki foetoe fadon, so taki troe vrede kan kon. — Openbaring 18:21.
A pasi di e tjari go na vrede
17, 18. (a) Foe san ede a no soso wan dren di no man kon troe, foe bribi taki têgo vrede kan? (b) San Jehovah doe kaba foe gi wi a djaranti taki troe vrede sa kon?
17 Efoe libisma, nanga jepi foe den organisâsi soleki den Verenigde Nâsi, no kan tjari troe vrede kon di e tan, dan foe sortoe fonten troe vrede o kon dan, èn fa? A de soso wan dren di no man kon troe, foe bribi taki vrede foe têgo kan? No efoe wi e go na a joisti fonten foe vrede. Èn soema na dati? Psalm 46:9 e gi a piki foe di a e taigi wi taki Jehovah „e meki feti kon na wan kaba te na a moro farawe presi foe grontapoe. A e broko a bo èn a e koti a lansri troetroe na pisipisi; a e bron den wagi na ini faja.” Èn Jehovah bigin kaba foe tjari wan kaba kon na orlokoe èn foe meki troe vrede kon. Fa? Foe di na ini 1914, a poti Krestes Jesus na tapoe en Kownoekondre kownoestoeroe di a abi reti na tapoe, èn foe di a e meki sma doe a moro bigi wroko na ini a historia foe libisma, foe leri trawan vrede. Den wortoe foe Jesaja 54:13 di taki na ini wan profeititori, e gi wi a djaranti: „Ala den manpikin foe joe sa de sma di Jehovah gi leri, èn a vrede foe den manpikin foe joe sa de pasa marki.”
18 A profeititori disi e sori a gronprakseri di abi foe doe nanga a reide foe san ede wan sani e pasa èn a bakapisi foe disi — dati wani taki, ibri bakapisi abi wan reide. Djaso, a leri di Jehovah e gi — a reide — e kenki sma di ben lobi feti, kon tron sma di lobi vrede èn di abi vrede nanga Gado. A bakapisi de taki na ati foe sma e kenki èn dati e meki den tron sma di lobi vrede. A leri disi di e kenki sma ati nanga froestan, den e panja en srefi now na heri grontapoe, foe di miljoenmiljoen sma e teki na eksempre foe a „Granman foe vrede”, Jesus Krestes. — Jesaja 9:6.
19. San Jesus ben leri sma foe troe vrede?
19 Èn san Jesus ben leri sma foe troe vrede? A no ben taki foe vrede na mindri nâsi wawan, ma foe vrede na mindri sma ini a fasi fa den de nanga makandra èn foe a vrede di de na ini wan sma foe di a abi wan boen konsensi. Na ini Johanes 14:27 wi e leisi den wortoe di Jesus ben taigi den bakaman foe en: „Vrede mi e libi gi oenoe, mi e gi oenoe a vrede foe mi. Mi no e gi oenoe en soleki fa grontapoe e gi dati. No meki oen ati kon broeja èn no meki a krempi foe frede ede.” Fa a vrede foe Jesus ben de tra fasi leki a di foe grontapoe?
20. Sortoe sani Jesus sa gebroiki foe tjari troe vrede kon?
20 Na a fosi presi, a vrede foe Jesus ben abi foeroe foe doe nanga en Kownoekondre boskopoe. A ben sabi taki a regtfardiki hemel tiri, di abi Jesus nanga 144.000 kompe tiriman na ini, ben sa tjari wan kaba kon na orlokoe èn na sma di e horibaka gi orlokoe (Openbaring 14:1, 3). A ben sabi taki disi ben sa tjari a paradijs situwâsi kon pe vrede wawan de, di a ben pristeri na ogriman di dede na en sei. Jesus no ben pristeri en wan presi ini a Kownoekondre na hemel, ma a ben taki: „Foe troe, mi e taigi joe tide: Joe sa de nanga mi na ini a Paradijs.” — Lukas 23:43.
21, 22. (a) Sortoe toemoesi moi howpoe di e gi deki-ati, troe vrede abi na ini toe? (b) San wi moesoe doe foe kan si a blesi dati?
21 Jesus ben sabi toe taki a Kownoekondre foe en ben o tjari trowstoe kon gi ala den sma di e sari, ma di e sori bribi na ini en. A vrede foe en wani taki toe a toemoesi moi howpoe foe na opobaka, di e gi deki-ati. Memre en wortoe di e gi deki-ati, di de foe feni na Johanes 5:28, 29: „No froewondroe foe disi, bika a joeroe e kon pe ala sma di de na ini den memre-grebi, sa jere en sten èn sa kon na doro, den wan di ben doe boen sani, foe go ini wan opobaka foe kisi libi, den wan di ben doe tegoe sani, foe go ini wan opobaka foe kisi kroetoe.”
22 Joe e loekoe go na a ten dati? Joe lasi lobiwan na ini dede? Joe angri foe si den baka? Dan teki a vrede di Jesus e pristeri. Abi wan bribi neleki di foe Marta, a sisa foe Lasarus, di ben taigi Jesus: „Mi sabi taki a sa opo baka na a opobaka na a lasti dei.” Ma loekoe a prisiri piki di Jesus ben gi Marta: „Mi na a opobaka nanga a libi. A sma di e sori bribi na ini mi, sa kon na libi, awinsi a dede; èn ibriwan sma di e libi èn e sori bribi na ini mi, kwetikweti no sa dede noiti. Joe e bribi dati?” — Johanes 11:24-26.
23. Foe san ede soifri sabi foe a Wortoe foe Gado de prenspari foe kan kisi troe vrede?
23 Joe toe kan bribi na ini a pramisi dati èn abi wini foe dati. Fa? Foe di joe e kisi soifri sabi foe Gado Wortoe. Loekoe fa na apostel Paulus ben sori na wan krakti fasi o prenspari soifri sabi de: „Wi no ben tapoe foe begi gi oenoe èn foe aksi taki oenoe sa kon foeroe nanga a soifri sabi foe a wani foe en ini ala koni nanga froestan foe sani na jejefasi, so taki oenoe kan waka na wan fasi di warti gi Jehovah, foe kan plisi en dorodoro, ala di oenoe e tan tjari froktoe ini ibri boen wroko èn tan gro ini a soifri sabi foe Gado” (Kolosesma 1:9, 10). A soifri sabi disi sa overtoigi joe taki Jehovah Gado na a fonten foe troe vrede. Disi sa froeteri joe toe san joe moesoe doe now so taki joe kan taki makandra nanga a psalm singiman: „Na ini vrede mi wani didon èn sribi toe, bika joe, ija, joe wawan, o Jehovah, e meki mi tan na ini seikerfasi.” — Psalm 4:8.
Joe kan tjari disi kon na krin?
◻ Foe san ede a moeiti di libisma meki foe tjari vrede kon, ibri leisi baka ben de foe soso?
◻ San na a moro prenspari reide taki orlokoe de?
◻ Foe san ede vrede di e tan, no de wan dren di no man kon troe?
◻ San na a fonten foe troe vrede?
[Prenki na tapoe bladzijde 8]
Troe vrede a no wan dren. A de a pramisi foe Gado
[Prenki na tapoe bladzijde 10]
Sensi 1914, na agersi asi-tjariman foe a redi asi, poeroe vrede na grontapoe
[Prenki na tapoe bladzijde 11]
Relisi nanga den VN kan tjari vrede kon?
[Sma di abi a reti foe a prenki]
VN fowtow