Soekoe troe vrede èn doe moeiti foe kisi en!
„A sma di ben sa lobi en libi èn si boen dei, . . . meki a kaba foe doe ogri èn meki a doe boen; meki a soekoe vrede èn doe moeiti foe kisi en.” — 1 PETRUS 3:10, 11.
1. Sortoe barinen wortoe foe Jesaja seiker sa abi boen bakapisi?
„DEN sa moesoe naki den feti-owroe foe den kon tron proegoe èn den lansri foe den kon tron koti-nefi. Nâsi no sa opo feti-owroe teige nâsi, so srefi den no sa leri feti moro” (Jesaja 2:4). Ala di den barinen wortoe disi de foe si krosibei foe na edekantoro foe den Verenigde Nâsi na New York, tokoe a grontapoe organisâsi dati kwetikweti no ben man meki den wortoe dati kon troe. Ma a froeklari dati, di de wan pisi foe a wortoe foe Jehovah Gado di ala ten e kon troe, no sa tan sondro bakapisi. — Jesaja 55:10, 11.
2. San moesoe „pasa na ini a lasti pisi foe den dei”, soleki fa Jesaja 2:2, 3 e taki?
2 Den wortoe di wi kan feni na Jesaja 2:4, troetroe na wan pisi foe wan toemoesi moi profeititori, wan profeititori foe troe vrede — èn a troetroe e kon troe nownowde leti na ini a ten foe wi. Bifo a profeititori e meki den toemoesi moi froewakti bekènti taki orlokoe nanga fetisani no sa de moro, a e taki: „A moesoe pasa na ini den kaba pisi foe den dei taki a bergi foe na oso foe Jehovah sa poti kon steifi moro hei leki na ede foe den bergi, èn foe troe den sa opo en kon moro hei leki den pikin bergi; èn na en ala den nâsi moesoe go. Èn foe troe, foeroe pipel sa go èn taki: ’Kon, meki wi opo go na a bergi foe Jehovah, na a oso foe a Gado foe Jakob; èn a sa leri wi foe den pasi foe en, èn wi sa waka na tapoe den foetoepasi foe en.’ Bika na Sion a wet sa komoto, èn a wortoe foe Jehovah sa komoto na Jerusalem.” — Jesaja 2:2, 3.
Sma kan tron sma di lobi vrede
3. Fa wan sma di ben lobi feti, kan tron wan sma di lobi vrede?
3 Loekoe taki bifo kan doe moeiti foe kisi wan libi foe vrede, den moesoe kisi leri na ini den pasi foe Jehovah. Te wan sma e gi jesi na a leri foe Jehovah, dan dati kan kenki a fasi fa a sma e denki èn e doe, so taki a sma dati di ben lobi foe feti, e tron wan sma di lobi vrede. Fa a kenki disi e pasa? Romesma 12:2 e taki: „Stòp foe kon de leki a seti foe sani disi, ma kon kenki foe di oenoe e kenki oen prakseri, so taki oenoe kan ondrosoekoe èn si gi oensrefi san na a boen, switi èn volmaakti wani foe Gado.” Wi e kenki a prakseri foe wi, noso e poesoe en go na wan tra sei, foe di wi e foeroe en nanga gronprakseri èn markitiki foe a Wortoe foe Gado. Te wi e studeri bijbel doronomo, dan dati e jepi wi foe kenki na a fasi disi èn a e meki taki wi man boeweisi na wisrefi san na a wani foe Jehovah gi wi, so taki wi kan si krin san na a pasi di wi moesoe waka. — Psalm 119:105.
4. Fa wan sma e weri a njoen persoonlijkheid foe sma di lobi vrede?
4 Bijbel waarheid no wawan e kenki a fasi fa wi e denki, ma so srefi den sani di wi e doe nanga a sma di wi de. A e jepi wi foe doe san na apostel Paulus ben gi tranga foe doe: „Poeroe na owroe sma di oenoe de, di de akroederi a waka nanga libi di oenoe ben abi fosi èn di den bedrigi lostoe foe en e pori en, ma . . . oenoe moesoe meki kon njoen na ini a krakti di e poesoe a prakseri foe oenoe, èn . . . weri a njoen fasi fa wan sma de, di ben meki akroederi a wani foe Gado na ini troetroe regtfardikifasi nanga loyaalfasi” (Efeisesma 4:22-24). A krakti di e poesoe a prakseri, e kon foe inisei. A e kenki èn e kon tranga te a lobi di wi abi gi Jehovah èn gi den wet foe en, e gro, èn a e meki wi tron jeje sma di lobi vrede.
5. Fa a „njoen komando” di Jesus ben gi den disipel foe en, e meki taki vrede e kon na mindri den?
5 Taki a de fanowdoe foe kenki na a fasi disi, wi e si na den sani di Jesus ben leri den disipel foe en na ini den lasti joeroe di a ben de nanga den: „Mi e gi oenoe wan njoen komando, foe oenoe lobi makandra; neleki fa mi ben lobi oenoe, foe oenoe lobi makandra toe. Nanga disi ala sma sa sabi taki oenoe na mi disipel, efoe oenoe abi lobi na oen mindri” (Johanes 13:34, 35). A lobi disi leki di foe Krestes, a lobi di no e prakseri ensrefi nomo, e tai den disipel makandra na ini volmaakti wánfasi (Kolosesma 3:14). Soso den wan di de klariklari foe teki a „njoen komando” disi èn libi akroederi dati sa abi a vrede di Gado e pramisi. Sma de di e doe disi na ini a ten disi?
6. Foe san ede Jehovah Kotoigi abi vrede, tra fasi leki fa a de nanga den sma foe grontapoe?
6 Jehovah Kotoigi e doe moeiti foe sori lobi na ini a bradafasi foe den na heri grontapoe. Ala di den e kon foe ala den nâsi foe grontapoe, tokoe den no e boemoei densrefi nanga a strei di sma na grontapoe e strei, srefi te politiek nanga relisi e poti hebi druk na den tapoe. Leki wan pipel di abi wánfasi, Jehovah e leri den, èn den abi vrede (Jesaja 54:13). Den e tan neutraal ini politiek strei èn den no e teki prati na orlokoe. Son sma di ben doe ogri nanga tranga fosi, tapoe nanga a fasi dati foe libi. Den tron kresten di lobi vrede, èn den e waka baka na eksempre foe Krestes Jesus. Èn nanga den heri ati den e waka baka a rai foe Petrus: „A sma di ben sa lobi en libi èn si boen dei, meki a kibri en tongo gi san ogri èn en mofoboeba gi a taki foe bedrigi sani, ma meki a kaba foe doe ogri èn meki a doe boen; meki a soekoe vrede èn doe moeiti foe kisi en.” — 1 Petrus 3:10, 11; Efeisesma 4:3.
Den sma di e doe moeiti foe kisi vrede
7, 8. Gi eksempre foe sma di ben drai den baka gi orlokoe èn di ben tron sma di e soekoe troe vrede. (Froeteri tra eksempre di joe sabi kande.)
7 Teki foe eksempre Rami Oved, di fosi ben de wan ofsiri ini wan anti-terrorist groepoe di ben kisi spesroetoe sroedati leri. A ben leri foe kiri den feanti foe en. A ben bribi tranga na ini den nationalistisch firi di a ben abi gi Israèl, te leki a dei di a ben kon si taki den rabi no ben wani, taki a trow nanga na oema di a ben lobi, soso foe di na oema ben de foe Asia, wan heidensma. A ben bigin soekoe waarheid na ini bijbel. Baka dati, a ben miti Jehovah Kotoigi. A studeri di a ben studeri bijbel nanga den Kotoigi ben overtoigi en taki a no ben kan de wan fanatiek nationalist moro langa. Kresten lobi ben wani taki foe drai en baka gi orlokoe nanga fetisani èn foe leri lobi sma foe ala ras. A ben froewondroe troetroe di a ben kisi wan switi brifi di ben bigin nanga den wortoe: „Mi brada Rami!” San ben de so wan freimde sani na dati? A sma di ben skrifi a brifi ben de wan oema di ben de wan Kotoigi foe Palestina. „Mi ben denki taki disi ben de wan toemoesi moi sani foe bribi,” Rami e taki, „foe di den Palestiniasma ben de mi feanti, èn now wán foe den ben kari mi ’Mi brada.’” Rami nanga a wefi foe en e doe moeiti now foe kisi troe vrede na Gado fasi.
8 Wan tra eksempre na di foe Georg Reuter, di ben de ini a Doisri legre di ben broko kon na ini Rosiakondre na ini a ten foe a di foe Toe Grontapoefeti. No langa baka dati, a ben lasi a bribi di a ben bribi na ini a bigi plan di Hitler ben abi foe tiri grontapoe. Di a ben komoto na feti go baka na oso, a ben bigin studeri bijbel nanga Jehovah Kotoigi. A ben skrifi: „Te foe kaba, sani ben bigin kon na krin gi mi. Mi ben kon froestan taki Gado no ben de a sma di ben moesoe kisi a fowtoe foe ala broedoe di lon . . . Mi ben kon sabi taki a ben abi na prakseri foe poti wan paradijs na heri grontapoe nanga têgo blesi gi a libisma famiri di e gi jesi. . . . Hitler ben djaf foe en ’Doesoen-jari Tiri’, ma a ben tiri soso 12 [jari] nomo — èn a bakapisi ben de toemoesi ogri! A de Krestes, na presi foe Hitler, . . . di troetroe kan èn sa poti wan doesoen-jari tiri foe tiri grontapoe.” So wan 50 jari kaba, Georg e dini leki wan sma di horibaka gi troe vrede na ini a foeroeten diniwroko.
9. Fa na ondrofenitori foe Jehovah Kotoigi na ini Nazi Doisrikondre e sori taki den abi deki-ati èn tokoe den lobi vrede?
9 A soifri retifasi nanga neutraalfasi foe Jehovah Kotoigi na Doisrikondre na ini a ten foe a Nazi tiri, tan de wan boeweisi foe a lobi di den abi gi Gado èn gi vrede srefi now, moro leki 50 jari na baka. Wan brochure di na United States Holocaust Memorial Museum na Washington, D.C. tjari kon na doro, e taki: „Jehovah Kotoigi ben horidoro na ondro hebi froefolgoe na ondro a Nazi tiri. . . . A deki-ati di moro foeroe foe den ben sori foe di den ben weigri [foe drai den baka gi a relisi foe den], te den ben kisi foe doe nanga skin-ati, a meshandri di sma ben meshandri den na ini konsentrâsi kampoe, èn son leisi te den tanapoe na fesi a kiri di sma ben wani kiri den, ben meki den wini a lespeki foe foeroe sma na ini a ten foe den.” Dan a brochure e taki moro fara: „Na ini a ten di den strafoeman na ini den kampoe ben kon fri, Jehovah Kotoigi ben go doro nanga a wroko foe den, den ben moksi densrefi nanga den sma di ben tan na libi, èn ben meki sma teki a bribi foe den abra.”
Wan kenki di moro bigi
10. (a) Sortoe bigi kenki de fanowdoe foe meki troe vrede kon? (b) Fa disi ben de foe si na ini a boekoe Danièl?
10 Disi wani taki dati Jehovah Kotoigi e bribi taki den kan tjari vrede kon na heri grontapoe foe di den o kenki heri ipi sma meki den teki wan bribi na ini a kresten neutraalfasi? Nôno! Bika efoe vrede moesoe kon baka na grontapoe, dan wan moro bigi kenki de fanowdoe. San na dati? Libisma tiri di e tjari pratifasi kon, di e kwinsi sma èn di e doe ogri nanga tranga, moesoe komoto na pasi foe meki presi gi a tiri foe Gado Kownoekondre, di Jesus ben leri den disipel foe en foe begi gi dati (Mateus 6:9, 10). Ma fa dati sa pasa? Na ini wan dren di a profeiti Danièl ben kisi foe Gado, a ben si taki na ini den lasti dei, a Kownoekondre foe Gado, leki wan bigi ston di a ’no libisma anoe koti poeroe’, ben sa broko na pisipisi wan boen bigi popki, di e agersi den politiek tirimakti foe libisma na grontapoe. Baka dati a ben meki bekènti: „Na ini den dei foe den kownoe dati, a Gado foe hemel sa opo wan kownoekondre di noiti no sa kisi pori. Èn a kownoekondre srefi no sa gi na no wan tra pipel. A sa broko ala den kownoekondre disi na pisipisi èn tjari wan kaba kon na den, èn ensrefi sa tan te ten di no skotoe.” — Danièl 2:31-44.
11. Nanga san, Jehovah sa gebroiki foe tjari a kenki kon di de fanowdoe gi vrede?
11 Foe san ede a situwâsi disi na grontapoe sa kenki na so wan bigi fasi? Bika Jehovah pramisi taki a sa krin grontapoe foe ala den sma di e doti èn e pori grontapoe (Openbaring 11:18). A kenki disi o kon te Jehovah o feti a regtfardiki orlokoe nanga Satan èn nanga en godelowsoe grontapoe. Wi e leisi na ini Openbaring 16:14, 16: „Te joe loekoe en boen, dan den [dati wani taki, wortoe di no krin èn di taki ondro a krakti foe trawan] de wortoe di e kon foe den ogri jeje èn den e doe wondroe, èn den e go na den kownoe [den politiek tiriman] foe a heri grontapoe pe sma e libi, foe tjari den kon na wán na a orlokoe foe a bigi dei foe Gado na Almaktiwan. Èn den ben tjari den kon na wán na a presi di den e kari Har–Mágedon na ini a Hebrewtongo.”
12. Fa Armagedon sa de?
12 Fa Armagedon sa de? A no sa de wan nucleair apocalyps, noso wan rampoe di kon foe libisma ede. Nôno, a de Gado en orlokoe di sa tjari wan kaba kon na ala orlokoe foe libisma èn poeroe ala den sma di e meki orlokoe kon. A de na orlokoe foe Gado, di sa tjari troe vrede kon gi den sma di lobi vrede. Ija, Armagedon e kon soleki fa Jehovah ben abi na prakseri. A no sa skoifi go na wan tra ten. Gado ben meki en profeiti Habakuk skrifi: „A fisjoen de gi a fasti ten ete, èn a e tan lon go doro te na a kaba, èn a no sa froeteri wan lei. Awansi a ben sa meki oenoe wakti srefi na en tapoe, tan froewakti en; bikasi a sa kon troe sondro foe misi. A no sa kon lati” (Habakuk 2:3). Foe den firi ede di wi leki libisma abi, meki a ben sa kan gersi leki a sa kon lati, ma Jehovah e hori ensrefi na a ten di a poti. Armagedon sa kon na a joeroe di Jehovah poti kaba.
13. Fa Gado sa handri nanga a troe ogriman, Satan Didibri?
13 A sani disi di o pasa seiker, sa opo pasi gi troe vrede! Ma foe meki troe vrede tan dorodoro, wan tra sani moesoe doe — a sma di e tjari pratifasi, bita-atifasi, nanga strei kon, moesoe poeroe na pasi. Èn dati na soifri san sa pasa baka dati, soleki fa bijbel profeititori taki na fesi — taki Satan sa trowe go na ini wan dipi peti, a sma di e soetoe faja gi feti èn a tata foe lei. Na ini wan profeiti fisjoen, na apostel Johanes ben si a sani disi di pasa, soleki fa a skrifi na Openbaring 20:1-3: „Mi ben si wan engel e saka komoto na hemel nanga a sroto foe a dipi peti nanga wan bigi keti na ini en anoe. Èn a ben graboe a draak hori, a fosi sneki, di de Didibri nanga Satan, èn ben tai en wan doesoen jari langa. Èn a ben fringi en go na ini a peti èn ben tapoe en èn ben sroto en boen na en tapoe, so taki a no ben sa kan kori den nâsi moro te leki den doesoen jari ben kon na wan kaba.”
14. San wi ben sa kan taki foe den sani di Jehovah sa doe foe wini Satan?
14 Disi a no wan dren; a de a pramisi foe Gado — èn bijbel e taki: „Gado no kan lei” (Hebrewsma 6:18). Foe dati ede Jehovah ben kan meki en profeiti Jeremia taki: „’Mi na Jehovah, a Sma di e sori lobi boen-atifasi, retidoe nanga regtfardikifasi na grontapoe, bika na ini den sani disi mi abi troetroe prisiri’, na so Jehovah e taki” (Jeremia 9:24). Jehovah e handri nanga retidoe nanga regtfardikifasi, èn a abi prisiri na ini a vrede di a sa tjari kon na grontapoe.
A Granman foe vrede e tiri
15, 16. (a) Soema Jehovah e teki foe tiri leki Kownoe? (b) San den e taki foe a tiri dati, èn soema sa abi wan prati na dati?
15 Foe gi wi a djaranti taki troe vrede sa kon gi ala den sma di e libi na ondro en Kownoekondre seti, meki Jehovah gi a tiri na a troe Granman foe vrede Jesus Krestes, soleki fa Jesaja 9:6, 7 ben taki disi na fesi: „Wan pikin kon gebore gi wi, wan manpikin den ben gi wi; èn a kownoe tirimakti sa kon na tapoe en skowroe. Èn en nen sa de: Toemoesi Boen Raiman, Tranga Gado, Têgo Tata, Granman foe vrede. Na a kownoe tirimakti di de pasa marki èn na vrede, wan kaba no sa kon . . . A faja foe Jehovah foe den legre sa doe disi.” A psalm singiman ben skrifi toe na ini wan profeititori foe a tiri foe vrede foe a Mesias: „Na ini den dei foe en a regtfardikiwan sa sproiti, èn vrede pasa marki, te leki moen no de moro.” — Psalm 72:7.
16 Boiti dati, 144.000 brada foe Krestes, di kisi salfoe nanga santa jeje, sa tiri nanga en na hemel. Den na den kompe erfgenaam nanga Krestes, di Paulus ben taki foe den: „Foe en sei a Gado di e gi vrede, djonsro sa masi Satan na ondro oen foetoe. Meki a no-froedini boen-atifasi foe wi Masra Jesus de nanga oenoe” (Romesma 16:20). Ija, na hemel, den disi sa abi wan prati na a wini di Krestes sa wini Satan Didibri, a sma di e horibaka gi orlokoe!
17. San wi moesoe doe foe kisi troe vrede?
17 So boen, na aksi de now: San joe moesoe doe foe kisi troe vrede? Troe vrede kan kon soso na a fasi foe Gado, èn foe kisi disi joe moesoe doe positief sani. Joe moesoe teki a Granman foe vrede èn soekoe jepi na en. Disi wani taki dati joe moesoe teki Krestes ini a ròl foe en leki Froeloesoeman èn a Sma di bai a sondoe libisma famiri kon fri. Jesus ensrefi ben taki den barinen wortoe: „Gado ben lobi grontapoe so te, taki a ben gi en wan-enkri gebore Manpikin, so taki ibriwan sma di sori bribi na ini en, no ben sa kisi pori, ma ben sa abi têgo libi” (Johanes 3:16). Joe de klariklari foe sori bribi na ini Krestes Jesus leki a Mindriman foe Gado di sa jari troe vrede nanga froeloesoe kon? No wan tra nen de na ondro hemel di kan meki vrede tan dorodoro èn gi a djaranti foe dati (Filipisma 2:8-11). Foe san ede? Bika Jesus na a Sma di Gado froekisi. En na a moro bigi boskopoeman foe vrede di oiti waka na grontapoe. Joe sa gi jesi na Jesus èn waka baka na eksempre foe en?
18. San wi moesoe doe tapoe den wortoe foe Jesus di skrifi na Johanes 17:3?
18 „Disi wani taki têgo libi,” Jesus ben taki, „foe den e teki sabi na ini den foe joe, a wan-enkri troe Gado, èn foe en di joe ben seni kon, Jesus Krestes” (Johanes 17:3). Now a de a ten foe teki soifri sabi na ini joe foe di joe e go doronomo na den konmakandra foe Jehovah Kotoigi na a Kownoekondre zaal. Den konmakandra disi pe joe e kisi leri, sa poesoe joe foe prati a sabi nanga howpoe foe joe nanga tra sma. Joe so srefi kan tron wan boskopoeman foe a vrede foe Gado. Joe kan abi vrede now, foe di joe e froetrow tapoe Jehovah Gado, soleki fa a New International Version e taki na Jesaja 26:3: „Joe sa hori a sma di en jeje de stanfaste, ini volmaakti vrede, bika a e froetrow tapoe joe.” Soema joe moesoe froetrow? „Froetrow tapoe Jehovah, oen pipel, foe ala ten, bika na ini Jah Jehovah na a Klipston foe ten di no skotoe.” — Jesaja 26:4.
19, 20. San e wakti den wan di e soekoe vrede na ini a ten disi èn e doe moeiti foe kisi en?
19 Bosroiti now foe libi foe têgo na ini a njoen grontapoe foe Gado pe vrede de. Na Openbaring 21:3, 4 a Wortoe foe Gado e gi a djaranti: „Loekoe! A tenti foe Gado de na libisma, èn a sa tan nanga den, èn den sa de en pipel. Èn Gado srefi sa de nanga den. Èn a sa figi poeroe ala watra na den ai, èn dede no sa de moro, no wan sari, no wan babari, no wan pen no sa de moro. Den fositen sani pasa kaba.” Dati a no a tamara foe vrede di joe e angri foe en?
20 Dan memre san Gado pramisi. „Den safri-ati sma sa abi grontapoe, èn foe troe den sa feni switi prisiri na ini vrede pasa marki. Loekoe a wan di no abi fowtoe, èn poti joe ai na tapoe na opregtiwan, bikasi a tamara foe a man dati sa de nanga vrede” (Psalm 37:11, 37). Meki a de so, taki te a kolokoe dei dati kon, wi e taki nanga foeroe tangi: „Troe vrede te foe kaba! Tangi foe Jehovah Gado, a fonten foe troe vrede!”
Joe kan tjari disi kon na krin?
◻ San kan jepi wan sma foe kenki na ini denki èn na ini doe?
◻ Fa Jehovah Kotoigi, ibriwan sma aparti èn leki wan groepoe, ben sori a lobi di den lobi troe vrede?
◻ San Jehovah sa doe nanga ala den sma di e horibaka gi a si di sma no wani si trawan na ai èn nanga orlokoe?
◻ San a tiri foe a Granman foe vrede sa doe gi a libisma famiri?
[Prenki na tapoe bladzijde 14]
A no a VN e meki den wortoe foe Jesaja kon troe, ma na den wan di e doe wan sani na tapoe a leri di Jehovah e gi
[Prenki na tapoe bladzijde 15]
Den toe sma disi ben kenki foe man doe moeiti foe kisi vrede
Rami Oved
Georg Reuter
[Prenki na tapoe bladzijde 16]
Troe vrede o tan na ondro a tiri foe a Granman foe Vrede