Jehovah e gi vrede nanga waarheid pasa marki
„Mi sa meki den kon betre èn mi sa tjari vrede nanga waarheid pasa marki kon na krin gi den.” — JEREMIA 33:6.
1, 2. (a) Sortoe sani de bekènti foe a vrede di den nâsi abi? (b) Sortoe sani Jehovah ben leri Israèl ini a tori foe vrede, na ini 607 b.G.T.?
VREDE! Dati na wan sani di sma wani troetroe, ma tokoe a de wan sani di no ben de foeroe na ini a historia foe libisma! A di foe twenti jarihondro spesroetoe, no ben de wan jarihondro foe vrede. Na presi foe dati, joe ben abi toe foe den moro ogri feti di ben de na ini a historia foe libisma. Baka a fosi grontapoefeti den ben opo a Folkoebontoe foe meki vrede tan na grontapoe. Na organisâsi dati no ben man doe dati. Baka a di foe toe grontapoefeti, den ben opo den Verenigde Nâsi foe doe a srefi sani dati. Wi abi foe leisi koranti nomo foe si fa na organisâsi dati toe krinkrin no man doe dati.
2 A moesoe froewondroe wi taki libisma organisâsi no kan tjari vrede kon? Kwetikweti. Moro leki 2500 jari pasa kaba, Israèl, a pipel di Gado ben froekisi, ben leri wan sani ini a tori disi. Na ini a di foe seibi jarihondro b.G.T., Babilon, a grontapoemakti di ben opo kon, ben soekoe foe pori a vrede foe Israèl. Israèl ben go soekoe jepi na Egipti foe kan kisi vrede. Egipti no ben man tjari vrede kon gi den (Jeremia 37:5-8; Esekièl 17:11-15). Na ini 607 b.G.T., den legre foe Babilon ben naki den skotoe foe Jerusalem broko èn ben bron a tempel foe Jehovah. Na so fasi Israèl ben leri na wan tranga fasi taki a de foe soso foe froetrow tapoe libisma organisâsi. Na presi foe a nâsi njan boen foe vrede, den ben dwengi den foe go na ini katibo na Babilon. — 2 Kroniki 36:17-21.
3. Sortoe sani di ben pasa ini historia leki wan kontroe foe den wortoe di Jehovah ben taki nanga jepi foe Jeremia, ben leri Israèl wan di foe toe leisi wan prenspari sani ini a tori foe vrede?
3 Ma fosi Jerusalem ben fadon, Jehovah ben tjari kon na krin taki en, èn no Egipti ben sa tjari troetroe vrede kon gi Israèl. Nanga jepi foe Jeremia a ben pramisi: „Mi sa meki den kon betre èn mi sa tjari vrede nanga waarheid pasa marki kon na krin gi den. Èn mi sa tjari den katibosma foe Juda nanga den katibosma foe Israèl kon baka, èn mi sa bow den neleki na ini a bigin” (Jeremia 33:6, 7). A pramisi foe Jehovah ben bigin kon troe na ini 539 b.G.T. di den ben wini Babilon èn ben gi den Israèlsma di ben de na ini katibo, na okasi foe kon fri (2 Kroniki 36:22, 23). Na ini a lasti pisi foe 537 b.G.T., wan groepoe Israèlsma ben hori a Wiwirikampoe-fesa na tapoe Israèl gron, fosi tron na ini 70 jari! Baka a fesa, den ben bigin bow a tempel foe Jehovah baka. Sortoe firi disi ben gi den? A tori e taki: „Den ben bari nanga wan tranga babari foe prèise Jehovah foe di a fondamenti foe na oso foe Jehovah ben poti.” — Esra 3:11.
4. Fa Jehovah ben poesoe den Israèlsma foe go doe a wroko foe bow a tempel, èn sortoe pramisi a ben gi ini a tori foe vrede?
4 Ma baka di den Israèlsma ben bigin na a prisiri fasi dati, gensman ben meki den lasi ati èn ben meki den tapoe a wroko foe bow a tempel. Wan toe jari baka dati, Jehovah ben meki den profeiti Hagai nanga Sakaria opo kon foe poesoe den Israèlsma meki den kaba a bow-wroko. A ben moesoe foe de wan span sani gi den foe jere Hagai e taki foe a tempel di ben sa bow: „’A glori foe a lasti oso disi sa kon moro bigi leki di foe a fosiwan’, na so Jehovah foe den legre taki. ’Èn na ini a presi disi mi sa gi vrede’”! — Hagai 2:9.
Jehovah e meki den pramisi foe en kon troe
5. San na wan moi sani foe si na a di foe aiti kapitel foe Sakaria?
5 Na ini a bijbelboekoe Sakaria, wi e leisi foe wan lo fisjoen nanga profeititori di ben gi na ondro a krakti foe santa jeje èn di ben tranga a pipel foe Gado na ini a ten dati na ini a di foe siksi jarihondro b.G.T. Den srefi profeititori disi tan gi wi a djaranti taki Jehovah e horibaka gi wi. Den profeititori e gi wi ibri reide foe bribi taki Jehovah sa gi en pipel vrede na ini a ten foe wi toe. Foe eksempre, na ini a di foe aiti kapitel foe a boekoe di abi a nen foe a profeiti Sakaria, a profeiti e gebroiki tin tron den wortoe: ’Disi na san Jehovah taki.’ Ibri leisi den wortoe de a bigin foe wan sani di Gado meki bekènti èn di ben abi foe doe nanga a vrede foe a pipel foe Gado. Wan toe foe den pramisi disi ben kon troe na ini den dei foe Sakaria. Alamala ben kon troe noso moesoe kon troe ete na ini a ten disi.
„Mi sa djaroesoe gi Sion”
6, 7. Na sortoe fasi Jehovah ben ’djaroesoe gi Sion nanga bigi atibron’?
6 Den wortoe de foe feni a fosi leisi na Sakaria 8:2, pe wi e leisi: „Disi na san Jehovah foe den legre taki: ’Mi sa djaroesoe gi Sion nanga bigi djaroesoe, èn nanga bigi atibron mi sa djaroesoe gi en.’” A pramisi di Jehovah ben pramisi taki a ben sa djaroesoe, èn taki a ben sa de nanga faja srefisrefi gi en pipel, ben wani taki dati a ben sa poti spesroetoe prakseri na tapoe a gi di a ben sa gi den vrede baka. A tjari di a ben tjari Israèl go baka na en kondre èn a bow di den ben bow a tempel baka, ben de boeweisi foe a fajafaja fasi dati.
7 Ma san de foe taki foe den sma di ben gens a pipel foe Jehovah? A faja di a ben abi gi en pipel ben sa de a srefi leki a „bigi atibron” di a ben sa abi gi den feanti disi. Te getrow djoe ben sa anbegi Gado na a tempel di den ben bow baka, dan den ben sa man prakseri foe a waka di sani no ben waka boen gi a tranga Babilon, di ben fadon now. Den ben kan go prakseri toe foe san den feanti no ben man doe kwetikweti, di ben proeberi foe tapoe sma foe bow a tempel baka (Esra 4:1-6; 6:3). Èn den ben kan taki Jehovah tangi taki a ben meki en pramisi kon troe. A faja foe en ben meki den wini wan strei!
„A foto foe waarheid”
8. Fa Jerusalem ben o tron wan foto foe waarheid na ini den dei foe Sakaria, tra fasi leki fa dati ben de fosi?
8 Wan di foe toe leisi Sakaria e skrifi: „Disi na san Jehovah taki.” San na den wortoe foe Jehovah na a okasi disi? „Mi sa drai go baka na Sion èn tan leti na mindri foe Jerusalem; èn foe troe den sa kari Jerusalem a foto foe waarheid, èn a bergi foe Jehovah foe den legre, a santa bergi” (Sakaria 8:3). Fosi 607 b.G.T., Jerusalem kwetikweti no ben de a foto foe waarheid. Den priester nanga den profeiti foe a foto ben kroeka, èn a pipel foe a foto no ben de getrow (Jeremia 6:13; 7:29-34; 13:23-27). Now a pipel foe Gado ben bow a tempel baka, èn na so fasi den ben sori taki den ben firi froeplekti foe hori densrefi na a soifri anbegi. Na jejefasi Jehovah ben tan baka na Jerusalem. Den ben taki a waarheid foe a soifri anbegi baka drape, so taki den ben kan kari Jerusalem „a foto foe waarheid”. Den ben kan kari a hei presi pe a foto ben de „a bergi foe Jehovah”.
9. Na sortoe aparti fasi „na Israèl foe Gado” ben ondrofeni wan kenki na ini a situwâsi foe den, na ini 1919?
9 Ala di den toe sani disi di ben meki bekènti, ben wani taki wan sani gi Israèl foe owroeten, den wani taki foeroe gi wi toe ala di a di foe twenti jarihondro e doro en kaba. Pikinmoro 80 jari pasa de, na a ten foe a fosi grontapoefeti, den wan toe doesoen salfoewan di na a ten dati ben teki presi gi „na Israèl foe Gado”, ben go ini katibo na jejefasi, neleki fa Israèl foe owroeten ben go ini katibo na Babilon (Galasiasma 6:16). Na profeitifasi, den ben taki foe den leki dedeskin di ben didon na strati. Tokoe den ben abi wan troetroe angri foe anbegi Jehovah „nanga jeje èn nanga waarheid” (Johanes 4:24). Foe dati ede, na ini 1919, Jehovah ben poeroe den na katibo, èn ben opo den baka foe a dede situwâsi di den ben de na ini na jejefasi (Openbaring 11:7-13). Na so fasi Jehovah ben piki nanga wan tranga ija na tapoe a profeiti aksi foe Jesaja: „Den sa meki wan kondre na ini wán dei nanga a pen foe meki pikin? Noso wan kondre sa gebore na ini wán leisi?” (Jesaja 66:8) Na ini 1919 a pipel foe Jehovah ben de ete wan tron leki wan jeje nâsi na ini den eigi „kondre”, noso posisi na jejefasi na grontapoe.
10. Sortoe blesi den salfoe kresten ben kisi na ini a „kondre” foe den, foe sensi 1919?
10 Den salfoe kresten ben de boen na a kondre dati, èn den ben dini na ini Jehovah en bigi tempel na jejefasi. Den ben poti den foe de „a getrow èn koni srafoe”, di ben teki a frantiwortoe foe loekoe den goedoe foe Jesus na grontapoe, wan grani di den abi ete ala di a di foe twenti jarihondro e doro en kaba (Mateus 24:45-47). Den ben leri heri boen taki Jehovah na „a Gado srefi foe vrede”. — 1 Tesalonikasma 5:23.
11. Fa den relisi fesiman foe krestenhèit sori taki den ben de feanti foe a pipel foe Gado?
11 Ma san de foe taki foe den feanti foe na Israèl foe Gado? A faja di Jehovah abi gi en pipel de a srefi leki na atibron di a abi gi den gensman. Na ini a fosi grontapoefeti, den relisi fesiman foe krestenhèit ben tjari toemoesi hebi druk kon na den tapoe, foe di den ben proeberi — èn no ben man doe dati — foe poeroe a pikin groepoe disi foe kresten di e taki waarheid, na pasi. Na ini a di foe toe grontapoefeti, den domri foe krestenhèit ben de na ini wánfasi na ini wán sani nomo: Na ala toe sei foe a feti, den ben gi den tiri tranga foe froefolgoe Jehovah Kotoigi. Srefi na ini a ten disi, na foeroe kondre den relisi fesiman e poesoe den tiri foe skotoe a kresten preikiwroko foe Jehovah Kotoigi noso foe tapoe a wroko dati.
12, 13. Fa Jehovah e sori en atibron gi krestenhèit?
12 Jehovah ben si ala den sani disi. Baka a fosi grontapoefeti, krestenhèit, makandra nanga a tra pisi foe Babilon a Bigiwan, ben kon fadon (Openbaring 14:8). Di, foe bigin nanga a jari 1922, wan lo plaag na simbôlis fasi ben kanti poeroe na krestenhèit tapoe, sma ben kon si taki a ben fadon troetroe, èn disi ben poeroe a dede situwâsi di a ben de na ini na jejefasi, kon na doro na poebliki èn a ben de wan warskow foe a pori di a ben o kisi (Openbaring 8:7–9:21). Leki boeweisi taki den e go doro foe kanti den plaag disi poeroe, a lezing „A kaba foe falsi relisi de krosibei”, ben hori na heri grontapoe tapoe 23 april 1995, èn baka dati hondrohondro miljoen eksemplaar foe wan spesroetoe uitgave foe Kownoekondre njoensoe ben prati.
13 Na ini a ten disi, krestenhèit de na ini wan sari situwâsi. A heri di foe twenti jarihondro, den memre foe krestenhèit kiri makandra na ini ogri feti di den priester nanga den domri foe en ben blesi. Na son kondre a krakti di krestenhèit abi na tapoe sma pikinmoro no de notinoti. A moesoe kisi pori makandra nanga a tra pisi foe Babilon a Bigiwan. — Openbaring 18:21.
Vrede gi a pipel foe Jehovah
14. Sortoe prenki, den e sori na profeitifasi foe wan pipel di abi vrede?
14 Na a tra sei, na ini a jari disi 1996, a pipel foe Jehovah e njan boen foe vrede pasa marki na ini a kondre foe den di ben kon boen baka, soleki fa den e taki foe dati na ini a di foe dri sani di Jehovah ben meki bekènti: „Disi na san Jehovah foe den legre taki: ’Owroe man nanga owroe oema sa sidon ete na tapoe den poebliki pren foe Jerusalem, ibriwan nanga en tiki na ini en anoe toe, foe den dei di a abi pasa marki. Èn den poebliki pren foe a foto srefi sa kon foeroe nanga boi èn nanga oemapikin di e prei na tapoe den poebliki pren foe en.’” — Sakaria 8:4, 5.
15. Sortoe vrede den foetoeboi foe Jehovah abi, ala di den nâsi de na ini orlokoe?
15 Den prisiri wortoe disi e prenki wan sani di de aparti ini a grontapoe disi di feti e pori so — wan pipel di abi vrede. Sensi 1919 den profeiti wortoe foe Jesaja kon troe kaba: „’Vrede sa de doronomo gi a sma di de farawe èn gi a sma di de krosibei’, na so Jehovah taki, ’èn mi sa meki en kon betre. Ma . . . vrede no de’, a Gado foe mi taki, ’foe den ogriwan ede’” (Jesaja 57:19-21). A no de foe taki, dati a pipel foe Jehovah, ala di den no de wan pisi foe grontapoe, no kan meki taki a broeja di de na ini den kondre, no abi krakti na den tapoe (Johanes 17:15, 16). Na son kondre, den e horidoro na ondro bigi problema, èn wan toe den ben kiri srefi. Tokoe, troetroe kresten abi vrede na toe prenspari fasi. Ini a fosi presi, den abi „vrede nanga Gado nanga jepi foe [den] Masra Jesus Krestes” (Romesma 5:1). Ini a di foe toe presi, vrede de na mindri densrefi. Den e kweki „a koni foe tapoesei”, san de „na a fosi presi soifri, moro fara a lobi vrede” (Jakobus 3:17; Galasiasma 5:22-24). Boiti dati, den e loekoe go na fesi foe njan boen foe vrede dorodoro te „den „safoe-ati sma srefi sa abi grontapoe leki a goedoe foe den, èn den sa feni troetroe switi prisiri na ini a vrede di de pasa marki”. — Psalm 37:11.
16, 17. (a) Fa „owroe man nanga owroe oema” èn „boi nanga oemapikin”, kisi krakti foe na organisâsi foe Jehovah? (b) San e sori a vrede di a pipel foe Jehovah abi?
16 „Owroe man nanga owroe oema” de ete na mindri a pipel foe Jehovah, salfoewan di e memre a wini di na organisâsi foe Jehovah ben wini strei fositen. Sma e warderi troetroe a getrowfasi foe den nanga a hori di den e horidoro. Den salfoewan, di ben de moro jongoe na a ten dati, ben teki fesi na ini den span ten dati foe den jari 1930, èn na a ten foe a di foe Toe Grontapoefeti, so srefi na ini den span jari di ben waka baka dati, pe gro ben de. Moro fara, spesroetoe sensi 1935, a „bigi ipi” foe „tra skapoe” sori ensrefi (Openbaring 7:9; Johanes 10:16). Ala di den salfoe kresten kon owroe èn kon moro mendri, den tra skapoe doe a preikiwroko èn bradi en na heri grontapoe. Na ini den jari di no pasa so langa ete, den tra skapoe ben kon na ini a kondre foe Gado leki wan skwala. Ija, soso a jari di pasa wawan, 338.491 foe den ben teki dopoe leki wan simbôl foe a gi di den ben gi densrefi abra na Jehovah! A no de foe taki dati den njoen sma dati jongoe srefisrefi, te joe e taki en na jejefasi. Sma e warderi a krakti troetroe di den abi leki jongoewan nanga a faja foe den, ala di den e meki a groepoe foe sma kon moro bigi di e singi prèisesingi foe tangi ede „gi wi Gado, di sidon na tapoe a kownoestoeroe, . . . èn foe a Pikin Skapoe”. — Openbaring 7:10.
17 Na ini a ten disi, ’den poebliki pren foeroe nanga boi èn nanga oemapikin’ kotoigi di abi krakti foe jongoesma. Na ini a dienstjari 1995 wi ben kisi raport foe 232 kondre nanga èilanti ini a se. Ma den no e feti makandra, ala di den de foe difrenti kondre, bita-ati firi no ben de na mindri den lo, no wan djaroesoe firi di no fiti, ben de na mindri den salfoewan nanga tra skapoe. Den alamala e gro makandra na jejefasi, ala di den de wán na ini lobi. A bradafasi foe Jehovah Kotoigi di de na heri grontapoe, troetroe de wan aparti sani na grontapoe. — Kolosesma 3:14; 1 Petrus 2:17.
Toemoesi moeilek gi Jehovah?
18, 19. Sortoe sani Jehovah doe, sensi den jari 1919, di kande ben gersi wan toemoesi moeilek sani, te joe e loekoe en na a fasi fa libisma e si sani?
18 Na ini 1918 di a salfoe fikapisi ben abi soso wan toe doesoen sili di ben lasi-ati èn di ben de na katibo na jejefasi, no wan sma ben kan si na fesi fa sani di ben pasa, ben o waka. Ma tokoe, Jehovah ben sabi — soleki fa a di foe fo profeititori di a ben meki bekènti, e sori: „Disi na san Jehovah foe den legre taki: ’Ala di a ben sa moesoe gersi wan toemoesi moeilek sani ini na ai foe den wan di tan abra foe a pipel disi na ini den dei dati, a moesoe gersi wan toemoesi moeilek sani toe ini mi ai?’ na san Jehovah foe den legre taki.” — Sakaria 8:6.
19 Na ini 1919, a jeje foe Jehovah ben gi en pipel njoen krakti baka foe doe a wroko di ben e wakti den. Tokoe bribi ben de fanowdoe foe tan nanga a pikin organisâsi foe anbegiman foe Jehovah. Den no ben de nanga foeroe, èn foeroe sani den no ben froestan krin. Ma pikinsopikinso Jehovah ben jepi den foe orga sani moro boen èn ben gi den wrokosani foe doe a kresten wroko foe preiki a boen njoensoe èn foe meki disipel (Jesaja 60:17, 19; Mateus 24:14; 28:19, 20). Safrisafri a ben jepi den foe si krin den sortoe prenspari tori leki foe tan neutraal èn na universeel soevereiniteit. A ben de toemoesi moeilek gi Jehovah foe doe en wani nanga jepi foe a pikin groepoe dati foe Kotoigi? Nanga ala seikerfasi wi kan taki dati a piki na nôno! Disi e kon na krin tapoe bladzijde 12-15 foe a tijdschrift disi, di e sori a wroko di Jehovah Kotoigi doe na ini a dienstjari 1995.
„Misrefi sa tron a Gado foe den”
20. O bigi a wroko foe tjari a pipel foe Gado kon na makandra ben o de, soleki fa profeititori e taki?
20 A di foe feifi sani di ben meki bekènti, e sori moro fara a kolokoe situwâsi di Jehovah Kotoigi de na ini na ini a ten disi: „Disi na san Jehovah foe den legre taki: ’Dja mi de foe kibri mi pipel gi a kondre pe son e opo èn gi a kondre pe son e dongo. Èn foe troe mi sa tjari den kon na ini, èn den moesoe tan leti na mindri foe Jerusalem; èn den moesoe tron mi pipel, èn misrefi sa tron a Gado foe den ini waarheid èn ini regtfardikifasi.’” — Sakaria 8:7, 8.
21. Na sortoe fasi den ben meki a vrede tan di Jehovah en pipel abi pasa marki, èn fa den ben bradi en?
21 Na ini 1996 wi kan taki sondro foe tweifri taki a boen njoensoe preiki na heri grontapoe, foe „a kondre pe son e opo” te na „a kondre pe son e dongo”. Den ben meki disipel foe sma foe ala nâsi, èn den ben kon si a kontroe foe a pramisi foe Jehovah: „Ala den manpikin foe joe sa de sma di Jehovah gi leri, èn a vrede foe den manpikin foe joe sa de pasa marki” (Jesaja 54:13). Wi abi vrede foe di wi e kisi leri foe Jehovah. Nanga disi na prakseri, den tjari boekoe kon na doro na ini moro leki 300 tongo. Soso a jari di pasa wawan, 21 tra tongo ben kon na tapoe foe dati. A tijdschrift A Waktitoren e tjari kon na doro now na a srefi ten na ini 111 tongo, èn Ontwaakt! na ini 54 tongo. Kongres di ben hori gi sma foe a srefi kondre èn gi sma foe difrenti kondre, ben sori na poebliki a vrede di a pipel foe Gado abi. Alawiki konmakandra e tjari wi kon na wán èn den e gi wi a deki-ati di wi abi fanowdoe foe tanapoe kánkan (Hebrewsma 10:23-25). Ija, Jehovah e gi en pipel leri „na ini waarheid èn na ini regtfardikifasi”. A e gi en pipel vrede. Wi blesi troetroe taki wi abi wan prati na a vrede dati di de pasa marki!
Joe kan tjari disi kon na krin?
◻ Fa Jehovah ben ’djaroesoe nanga wan bigi atibron’ gi en pipel, na ini a ten disi?
◻ Fa a pipel foe Jehovah e njan boen foe vrede, srefi na kondre pe orlokoe de?
◻ Na sortoe fasi ’den poebliki pren foeroe nanga boi èn nanga oemapikin’?
◻ Sortoe sani ben seti so taki a pipel foe Jehovah kan kisi leri foe en?
[Raportoe na tapoe bladzijde 12-15]
1995 DINIWROKO RAPORTOE FOE JEHOVAH KOTOIGI NA HERI GRONTAPOE
(Loekoe a tijdschrift)
[Prenki na tapoe bladzijde 8, 9]
Na ini a di foe siksi jarihondro b.G.T., den getrow djoe di ben bow a tempel baka, ben leri taki Jehovah ben de a wan-enkri fonten di sma ben kan froetrow na tapoe foe tjari vrede kon