„Lobi waarheid nanga vrede”!
„A wortoe foe Jehovah foe den legre ben tan kon na mi, e taki: ’. . . Lobi waarheid nanga vrede.’” — SAKARIA 8:18, 19.
1, 2. (a) Sortoe sani ini a tori foe vrede de bekènti foe a libisma famiri? (b) Foe san ede a grontapoe foe now noiti no sa abi troetroe vrede?
„NOITI grontapoe ben abi vrede. Na a wan noso a tra presi — èn nofo tron na foeroe presi na a srefi ten — feti ben de ala ten.” Na so profesor Milton Mayer foe na universiteit foe Massachusetts, V.S.A. ben taki. Disi na troetroe wan sari sani di a ben taki foe a libisma famiri! A troe taki libisma ben wani vrede. Politieksma proeberi ala sortoe fasi foe meki a vrede tan, èn den ben doe dati nanga a Pax Romana (noso, Vrede foe Rome) na ini a ten foe den Romesma te kon miti a politiek fasi foe handri di den e kari „Mutually Assured Destruction” (noso Wan djaranti taki ala toe sei sa pori makandra) na ini ten foe a Kowroe Orlokoe. Ma te foe kaba, no wan foe den sani di den ben proeberi ben waka boen. Soleki fa Jesaja ben taki foe dati foeroe jarihondro pasa kaba, dan ’den boskopoeman srefi foe vrede bari krei nanga dipi sari’ (Jesaja 33:7). Foe san ede disi de so?
2 Na foe di vrede foe ala ten moesoe kon, foe di sma no abi bita-ati firi gi makandra, èn foe di bigi-ai no de; a moesoe abi en fondamenti na tapoe waarheid. Vrede no kan abi en fondamenti na tapoe lei. Dati meki, di Jehovah ben pramisi Israèl taki den ben sa kon boen baka èn taki den ben sa kisi vrede, a ben taki: „Dja mi de foe meki vrede e kon na en neleki wan liba èn a glori foe den nâsi neleki wan bigi kriki pe a watra e lon abra” (Jesaja 66:12). Satan Didibri, a gado foe a seti foe sani disi, na „wan kiriman”, èn „wan leiman èn a tata foe lei” (Johanes 8:44; 2 Korentesma 4:4). Fa wan grontapoe nanga so wan gado oiti kan abi vrede?
3. Sortoe toemoesi moi presenti Jehovah gi en pipel, ala di den e libi na ini wan grontapoe di lai nanga problema?
3 Ma a de wan moi sani foe si, taki Jehovah e gi en pipel vrede, srefi ala di den e libi na ini a grontapoe foe Satan, pe someni feti de (Johanes 17:16). Na ini a di foe siksi jarihondro b.G.T, a ben meki en pramisi kon troe nanga jepi foe Jeremia èn a ben gi „vrede nanga waarheid” na a spesroetoe nâsi foe en di a ben meki den go baka na a kondre foe den (Jeremia 33:6). Èn na ini den lasti dei disi, a gi „vrede nanga waarheid” na en pipel di de na ini a „kondre” foe den, noso a posisi di den abi na grontapoe na jejefasi, ala di den ben pasa a moro ogri ten foe problema di ben de na a grontapoe disi te nanga now (Jesaja 66:8; Mateus 24:7-13; Openbaring 6:1-8). Te wi e go doro foe taki foe Sakaria kapitel 8, dan wi sa kon warderi moro san na a vrede nanga a waarheid disi di Gado e gi wi, èn wi sa si san wi moesoe doe foe kan tan abi wan prati na dati.
„Meki oen anoe de tranga”
4. Fa Sakaria ben gi Israèl deki-ati foe doe wan sani efoe den ben sa wani kisi vrede?
4 Foe a di foe siksi leisi na Sakaria kapitel 8, wi e jere wan span sani di Jehovah e meki bekènti: „Disi na san Jehovah foe den legre taki: ’Meki oen anoe de tranga, oenoe di e jere den wortoe disi na ini den dei disi di komoto na a mofo foe den profeiti, tapoe a dei di a fondamenti foe na oso foe Jehovah foe den legre ben poti, so taki a tempel ben kan bow. Bika fosi den dei dati no wan pai ben de gi libisma; èn ini a tori foe a pai foe den osometi, so wan sani no ben de; èn gi a sma di ben go na dorosei èn gi a sma di ben kon inisei, vrede no ben de foe a feanti ede, bika mi ben tan soetoe faja foe libisma feti nanga makandra.’” — Sakaria 8:9, 10.
5, 6. (a) Fa a situwâsi ben de na Israèl, foe di den Israèlsma ben lasi-ati? (b) Na sortoe fasi wan kenki ben o kon na Israèl soleki fa Jehovah ben pramisi, efoe den ben o poti na anbegi di den ben anbegi en, na a fosi presi?
5 Sakaria ben taki den wortoe disi di den ben bow a tempel baka na Jerusalem. Na fesi, den Israèlsma di ben drai kon baka foe Babilon, ben lasi-ati èn ben tapoe nanga a wroko foe bow a tempel. Foe di den ben poti den prakseri na tapoe a seti di den ben seti den eigi libi, meki Jehovah no ben gi den no wan blesi èn no wan vrede. Ala di den ben prani sani na ini a kondre foe den èn ben sorgoe gi den droifidjari foe den, tokoe a no ben go boen nanga den (Hagai 1:3-6). A ben de neleki den ben wroko nanga „no wan pai”.
6 Now di den djoe ben bow a tempel baka, Sakaria ben gi den a deki-ati foe „de tranga”, èn foe poti na anbegi di den ben anbegi Jehovah, na a fosi presi sondro foe frede. San ben sa pasa efoe den ben doe dati? „’Now mi no sa de gi den wan di tan abra foe a pipel disi, leki fa mi ben de fositen’, na so Jehovah foe den legre e taki. ’Bika a siri foe vrede sa de; a droifibon srefi sa gi en froktoe, èn a gron srefi sa meki njanjan, èn hemel srefi sa gi a dow foe en; èn troetroe mi sa meki den wan di tan abra foe a pipel disi kisi ala den sani disi. Èn a moesoe pasa taki neleki fa joe ben tron wan floekoe gi den nâsi, ow oso foe Juda nanga oso foe Israèl, na so mi sa gi joe kibri, èn joe moesoe tron wan blesi. No frede. Meki oen anoe de tranga’” (Sakaria 8:11-13). Efoe Israèl ben sa handri nanga wan fasti bosroiti, dan a ben sa go boen nanga en. Na fesi, te den nâsi ben wani kari wan eksempre foe wan floekoe, dan den ben kan sori go na Israèl. Now Israèl ben sa de wan eksempre foe wan blesi. Dati ben de troetroe wan heri boen reide foe ’meki na anoe foe den de tranga’!
7. (a) Sortoe kenki, di ben de wan span sani gi a pipel foe Jehovah, den ben ondrofeni, èn di ben abi en heimarki na ini a dienstjari 1995? (b) Te joe e loekoe a raport foe a jari, dan foe sortoe kondre joe kan si taki den abi wan toemoesi moi nomroe foe preikiman, pionier, nanga gemiddelde joeroe?
7 San wi kan taki foe a ten disi? We, na ini den jari fosi 1919, a pipel foe Jehovah no ben de so fajafaja. Den no ben de neutraal dorodoro ini a fosi grontapoefeti, èn den ben waka moro na baka wan libisma, leki foe waka na baka a Kownoe foe den, Jesus Krestes. A bakapisi ben de taki wan toe sma ben lasi-ati, foe di gens ben kon foe sma na inisei èn na dorosei foe na organisâsi. Baka dati, na ini 1919, den ben meki na anoe foe den kon tranga nanga a jepi foe Jehovah (Sakaria 4:6). Jehovah ben gi den vrede, èn a ben go heri boen nanga den. Disi wi kan si na san a raport di skrifi foe den, den 75 jari di pasa, e sori èn di abi en heimarki na ini a dienstjari 1995. Leki pipel, Jehovah Kotoigi drai den baka gi nationalisme, a si di sma e si den eigi lo moro hei leki wan tra lo, a desko di sma e desko makandra, nanga ibri tra sani di kan meki bita-ati firi kon (1 Johanes 3:14-18). Den e dini Jehovah nanga troetroe faja na ini en tempel na jejefasi (Hebrewsma 13:15; Openbaring 7:15). Soso a jari di pasa, den ben gebroiki moro leki wan miljard joeroe foe taki nanga tra sma foe a hemel Tata foe den! Ibri moen, den ben hori so wan 4.865.060 bijbel studie. Wan gemiddelde foe 663.521 ben abi wan prati na a pionierwroko ibri moen. Te domri foe krestenhèit wani foe gi wan eksempre foe wan pipel di de nanga faja troetroe na ini na anbegi foe den, dan son tron den e sori go na Jehovah Kotoigi.
8. Fa ibri kresten kan abi wini foe „a siri foe vrede”?
8 Foe di den de nanga faja, meki Jehovah e gi en pipel „a siri foe vrede”. Ibri wan sma di e kweki a siri dati, sa si fa vrede e gro na ini en ati èn na ini en libi. Ibri kresten di de na bribi, èn di e feti foe abi vrede nanga Jehovah èn nanga kompe kresten, abi wan prati na a waarheid èn na a vrede foe a pipel di e tjari a nen foe Jehovah. (1 Petrus 3:11; teki gersi Jakobus 3:18.) Dati a no wan toemoesi moi sani?
„No frede”
9. Sortoe kenki Jehovah ben pramisi taki a ben o tjari kon ini a fasi fa a e handri nanga en pipel?
9 Now wi e leisi wan di foe seibi sani di Jehovah e meki bekènti. San na dati? „Disi na san Jehovah foe den legre taki: ’Neleki fa mi ben prakseri foe tjari wan rampoe kon gi oenoe, bika den fositen tata foe oenoe ben meki mi atibron’, na so Jehovah foe den legre taki, ’èn mi no ben firi sari, na so mi sa abi na prakseri baka na ini den dei disi, foe handri boen nanga Jerusalem èn nanga na oso foe Juda. No frede.’” — Sakaria 8:14, 15.
10. Sortoe sani di de bekènti foe Jehovah Kotoigi e sori taki den no ben frede?
10 Ala di a pipel foe Jehovah ben panja na jejefasi na a ten foe a fosi grontapoefeti, ini den ati den ben wani foe doe san boen. Foe dati ede, Jehovah ben kenki a fasi fa a ben handri nanga den, baka di a ben gi den pikinso tranga leri (Maleaki 3:2-4). Na ini a ten disi, wi e prakseri foe a ten dati baka èn fajafaja wi e taigi en tangi foe san a doe. A troe, taki wi ben de „sani di no wan nâsi no [sa] wani si na ai” (Mateus 24:9). Foeroe foe den, sma ben poti na doengroe-oso, èn wan toe foe den dede srefi foe a bribi foe den ede. Nofo tron wi e kisi foe doe nanga mi-no-kefasi noso ogri di e doe nanga tranga. Ma wi no e frede. Wi sabi taki Jehovah tranga moro iniwan gensman, efoe joe kan si en noso efoe joe no kan si en (Jesaja 40:15; Efeisesma 6:10-13). Wi no sa tapoe foe poti prakseri na tapoe den wortoe: „Howpoe tapoe Jehovah; hori deki-ati èn meki joe ati de tranga.” — Psalm 27:14.
„Taki waarheid nanga makandra”
11, 12. San ibriwan foe wi moesoe hori na prakseri efoe wi wani foe abi wan prati dorodoro na den blesi di Jehovah e gi en pipel?
11 Efoe wi wani abi wan prati dorodoro na den blesi foe Jehovah, dan wi moesoe hori wan toe sani na prakseri. Sakaria e taki: „’Disi na den sani di oenoe moesoe doe: Taki waarheid nanga makandra. Doe joe kroetoewroko na ini den portoe foe joe nanga waarheid èn nanga a kroetoe foe vrede. Èn no prakseri na ini joe ati foe tjari rampoe kon gi makandra, èn no lobi no wan falsi sweri; bika ala den sani disi na sani di mi no ben wani si na ai’, na san Jehovah e taki.” — Sakaria 8:16, 17.
12 Jehovah e gi wi a deki-ati foe taki waarheid (Efeisesma 4:15, 25). A no e arki den begi foe den sma di prakseri foe doe ogri sani, di e kibri a waarheid foe densrefi kisi wini foe dati, noso di e taki falsi sweri (Odo 28:9). Foe di a no wani si na ai taki sma e fadon komoto na bribi, meki a wani taki wi tan hori bijbel waarheid boen steifi (Psalm 25:5; 2 Johanes 9-11). Moro fara, neleki den owroe man di ben sidon na ini den foto portoe na Israèl, na so owroeman di e handri kroetoe afersi, moesoe meki a rai nanga den bosroiti foe den abi den fondamenti na tapoe bijbel waarheid, èn no na tapoe a fasi fa den e si sani (Johanes 17:17). Jehovah wani taki den e soekoe wan „kroetoe foe vrede”, foe di den, leki kresten herder, e proeberi foe meki a vrede kon baka na mindri den sma di abi trobi nanga makandra èn foe jepi sondari di abi berow, foe kisi vrede baka nanga Gado (Jakobus 5:14, 15; Judas 23). Na a srefi ten, den e kibri a vrede foe a gemeente, èn sondro foe frede den e jagi den sma poeroe di e pori a vrede dati, foe di foe espresi den e tan doe san no boen. — 1 Korentesma 6:9, 10.
„Wan sani foe breiti pasa marki èn foe de nanga prisiri”
13. (a) Foe sortoe kenki ini a tori foe faste, Sakaria ben froeteri na fesi? (b) Sortoe ten foe faste den ben abi na Israèl?
13 Now wi e jere wan di foe aiti toemoesi prenspari sani di e meki bekènti: „Disi na san Jehovah foe den legre taki: ’A faste foe a di foe fo moen, nanga a faste foe a di foe feifi moen, nanga a faste foe a di foe seibi moen, nanga a faste foe a di foe tin moen sa tron gi na oso foe Juda wan sani foe breiti pasa marki èn foe de nanga prisiri èn foe abi boen fesaten. So boen, lobi waarheid nanga vrede” (Sakaria 8:19). Na ondro a Wet foe Moses, den Israèlsma ben faste tapoe a Verzoendei foe sori taki den ben sari foe den sondoe foe den (Lefitikus 16:29-31). Soleki fa a sori, dan den ben hori den fo ten foe faste di Sakaria ben kari, foe sari foe den sani di ben abi foe doe nanga a wini di den ben wini Jerusalem èn a pori di den ben tjari kon na en tapoe (2 Kownoe 25:1-4, 8, 9, 22-26). Ma now, den ben e bow a tempel baka èn sma ben kon libi baka na Jerusalem. Sari ben kon tron prisiri, èn den ten foe faste ben kan tron ten foe hori fesa.
14, 15. (a) Fa a Memrefesa ben de wan bigi reide foe de nanga prisiri, èn na sortoe sani disi moesoe memre wi? (b) Sortoe kondre ben abi boen foeroe sma di ben kon na a Memrefesa, soleki fa a raport foe a jari e sori?
14 Na ini a ten disi, wi no abi den ten foe faste di Sakaria ben taki foe dati, noso a faste di a Wet ben taigi sma foe den hori densrefi na dati. Foe di Jesus ben gi en libi gi den sondoe foe wi, meki wi e njan boen foe den blesi foe wan moro bigi Verzoendei. Wi e kisi pardon foe den sondoe foe wi, no soso na wan agersi fasi, ma wi sa kisi pardon foe wi sondoe krinkrin (Hebrewsma 9:6-14). Foe di wi e waka na baka a komando foe a Heipriester, Jesus Krestes di de na hemel, meki wi e hori a Memrefesa foe a dede foe en leki a wan-enkri toemoesi prenspari fesa di kresten e hori (Lukas 22:19, 20). A no de so taki wi ’breiti pasa marki èn de nanga prisiri’ te wi e kon makandra ibri jari foe hori a fesa dati?
15 A jari di pasa, 13.147.201 sma ben kon makandra foe hori a Memrefesa, 858.284 sma moro leki na ini 1994. Dati na troetroe wan bigi ipi sma! Prakseri foe a prisiri di ben de na ini den 78.284 gemeente foe Jehovah Kotoigi, di wan boen bigi nomroe foe sma ben kon makandra na ini den Kownoekondre zaal foe den gi a fesa. Foe troe, ala den sma di ben de drape ben kisi a firi foe „lobi waarheid nanga vrede” di den ben memre a dede foe a Sma di de „a pasi nanga a waarheid nanga a libi” èn di e tiri now leki Jehovah en bigi „Kownoe foe vrede”! (Johanes 14:6; Jesaja 9:6) A fesa dati ben wani taki wan spesroetoe sani gi den sma di ben hori en na ini kondre pe bigi broeja de èn pe den e feti. Wan toe foe wi brada ben si boen ogri sani na ini 1995. Tokoe ’a vrede foe Gado, di e pasa ala prakseri, ben kibri na ati foe den nanga a krakti foe denki nanga jepi foe Krestes Jesus’. — Filipisma 4:7.
’Kon meki wi safoe a fesi foe Jehovah’
16, 17. Fa sma foe den nâsi kan „safoe a fesi foe Jehovah”?
16 Ma pe ala den miljoenmiljoen sma disi di ben de na a Memrefesa ben komoto? A di foe neigi sani di Jehovah e meki bekènti, e tjari kon na krin: „Disi na san Jehovah foe den legre taki: ’A sa pasa ete taki pipel nanga den sma di e libi na foeroe foto sa kon; èn den sma foe wan foto troetroe sa go na den wan di de foe trawan foto, e taki: „Kon meki wi go serjoesoe foe safoe a fesi foe Jehovah èn soekoe Jehovah foe den legre. Misrefi sa go toe.” Èn foeroe pipel nanga tranga nâsi troetroe sa kon foe soekoe Jehovah foe den legre na Jerusalem èn foe safoe a fesi foe Jehovah.’” — Sakaria 8:20-22.
17 Sma di ben de na a Memrefesa ben wani foe „soekoe Jehovah foe den legre”. Foeroe foe den ben de foetoeboi foe en di ben gi densrefi abra na en èn ben teki dopoe. Miljoenmiljoen trawan di ben de na a fesa, no ben de so fara ete. Na son kondre a nomroe foe sma di ben de na a Memrefesa ben de fo noso feifi leisi moro a nomroe foe Kownoekondre preikiman. Den foeroe sma disi di abi belangstelling abi jepi fanowdoe foe tan go na fesi. Meki wi leri den foe prisiri nanga a sabi di den sabi taki Jesus dede gi wi sondoe èn e tiri now ini Gado en Kownoekondre (1 Korentesma 5:7, 8; Openbaring 11:15). Èn meki wi gi den deki-ati foe gi densrefi abra na Jehovah Gado èn foe saka densrefi na ondro en Kownoe di a poti na wroko. Na a fasi disi den sa „safoe a fesi foe Jehovah”. — Psalm 116:18, 19; Filipisma 2:12, 13.
„Tin man foe ala tongo foe den nâsi”
18, 19. (a) Soema na ini a ten disi, na „wan djoe”, leki wan kontroe foe Sakaria 8:23? (b) Soema na ini a ten disi na den „tin man” di „graboe hori a mofokanti foe a krosi foe wan man di de wan djoe”?
18 Foe a lasti leisi na ini a di foe aiti kapitel foe Sakaria, wi e leisi: „Disi na san Jehovah foe den legre taki.” San na a lasti sani di Jehovah e meki bekènti? „A sa de na ini den dei dati, taki tin man foe ala tongo foe den nâsi sa graboe hori, ija, foe troe den sa graboe hori a mofokanti foe a krosi foe wan man di de wan djoe, èn taki: ’Wi wani go nanga oenoe, foe di wi jere taki Gado de nanga oenoe’” (Sakaria 8:23). Na ini den dei foe Sakaria, a troetroe Israèl ben de a nâsi di Gado ben froekisi. Ma na ini a fosi jarihondro, den ben drai den baka gi Jehovah en Mesias. Foe dati ede, a Gado foe wi ben froekisi „wan djoe” — wan njoen Israèl leki en spesroetoe pipel, „na Israèl foe Gado” di abi djoe na jejefasi na ini (Galasiasma 6:16; Johanes 1:11; Romesma 2:28, 29). A nomroe foe den te foe kaba ben moesoe de 144.000, di ben teki poeroe foe a libisma famiri foe tiri nanga Jesus na ini en Kownoekondre na hemel. — Openbaring 14:1, 4.
19 Moro foeroe foe den 144.000 sma disi dede kaba ala di den ben tan getrow, èn den go na hemel pe den kisi a pai foe den (1 Korentesma 15:51, 52; Openbaring 6:9-11). Wan toe de ete na grontapoe èn den e prisiri foe si taki den „tin man” di ben froekisi foe go makandra nanga a „djoe” foe troe na „wan bigi ipi . . . di komoto na ala nâsi nanga lo nanga pipel nanga tongo”. — Openbaring 7:9; Jesaja 2:2, 3; 60:4-10, 22.
20, 21. Fa wi kan tan abi vrede nanga Jehovah, ala di a kaba foe a grontapoe disi e kon krosibei dei foe dei?
20 Ala di a kaba foe a grontapoe disi sondro misi e kon moro krosibei, krestenhèit de neleki Jerusalem na ini a dei foe Jeremia: „Den ben howpoe foe kisi vrede, ma no wan boen no ben kon; èn foe wan ten foe kon betre, èn, loekoe! bigi frede!” (Jeremia 14:19) A bigi frede dati sa doro wan heimarki te den nâsi sa drai den baka gi falsi relisi èn tjari en kon na wan kaba nanga ogri di doe nanga tranga. Sjatoe baka dati, den nâsi srefi sa kisi pori na ini Armagedon, a lasti feti foe Gado (Mateus 24:29, 30; Openbaring 16:14, 16; 17:16-18; 19:11-21). Dati sa de troetroe wan ten foe bigi broeja!
21 Te ala den sani disi e pasa, dan Jehovah sa gi kibri na den sma di lobi waarheid èn di e kweki „a siri foe vrede” (Sakaria 8:12; Sefanja 2:3). So boen, meki wi tan na ini a kondre foe en pipel, ala di wi e kisi kibri, e prèise en fajafaja na poebliki èn e jepi someni sma leki wi kan foe „safoe a fesi foe Jehovah”. Efoe wi e doe dati, dan foe ala ten wi sa njan boen foe a vrede foe Jehovah. Ija, „Jehovah srefi troetroe sa gi krakti na en pipel. Jehovah srefi sa blesi en pipel nanga vrede”. — Psalm 29:11.
Joe kan tjari disi kon na krin?
◻ Fa a pipel foe Gado ’ben meki na anoe foe den de tranga’ na ini a ten foe Sakaria? Èn na ini a ten disi?
◻ San wi e doe te wi e kisi foe doe nanga froefolgoe, ogri di doe nanga tranga, èn mi-no-ke-fasi?
◻ Sortoe sani de ini a tori te wi ’e taki waarheid nanga makandra’?
◻ Fa wan sma kan „safoe a fesi foe Jehovah”?
◻ Sortoe bigi reide foe abi prisiri de foe si na ini a kontroe foe Sakaria 8:23?
[Prenki na tapoe bladzijde 18]
A jari di pasa, Jehovah Kotoigi ben gebroiki 1.150.353.444 joeroe foe taki nanga sma foe a Kownoekondre foe Gado