Den hori a fri foe relisi hei na Japan

SOMENI jari kaba na Japan, jongoe studenti di de Jehovah Kotoigi kisi foe doe nanga wan moeilek problema: Den moesoe gi jesi na a konsensi foe den di kisi leri foe bijbel, noso den moesoe gi jesi na wan leriprograma foe skoro di e toeka nanga a konsensi foe den. Foe san ede a moeilek problema de? Bika oefening di e gi foe leri sma feti, de wan pisi foe den gymnastiek lès di a skoro foe den e gi. Den jongoe Kotoigi ben si den sortoe oefening dati leki wan sani di no de akroederi bijbel gronprakseri, soleki a wan di de foe feni na Jesaja kapitel 2, vers 4. Drape wi e leisi: „Den sa moesoe naki den feti-owroe foe den kon tron proegoe èn den lansri foe den kon tron koti-nefi. Nâsi no sa opo feti-owroe teige nâsi, so srefi den no sa leri feti moro.”

Foe di jongoe kresten Kotoigi no ben wani leri a koni foe man feti, san wani taki toe dati den moesoe doe tra sma ogri, meki den ben tjari kon na krin gi den leriman foe den taki a konsensi foe den ben taigi den taki den no ben kan teki prati na feti. Baka di den ben proeberi foe overtoigi den studenti disi taki den ben moesoe teki a leriprograma foe skoro, foeroe leriman di ben froestan a tori te foe kaba, ben agri foe lespeki a konsensi foe den studenti èn den ben sorgoe taki den studenti ben man doe wan tra sani na skoro.

Ma son leriman ben meki a firi foe den tiri den, èn son skoro ben weigri foe gi den jongoe Kotoigi boen cijfer gi gymnastiek. Na ini 1993, den ben weigri foe gi no moro mendri leki neigi Kotoigi na okasi foe go abra na a tra klas èn den ben moesoe gowe libi skoro noso den ben jagi den foe di den no ben wani teki prati na oefening di e gi foe leri sma feti.

A de krin, taki a ten ben doro foe opo taki gi a reti di jongoe kresten abi foe kisi leri sondro taki den moesoe pasa a konsensi foe den. Feifi studenti di den no ben wani den go abra na a di foe toe klas na a Gemeente-Industria Tèknik Skoro (den e kari en sjatoe Kobe Tèk) ben bosroiti foe tjari a tori go na kroetoe.

San ben de a strei?

Na ini a lente foe 1990 di den feifi studenti ben go na Kobe Tèk, den ben tjari kon na krin gi den leriman taki den no ben kan teki prati na kendo (a Japansi fasi foe feti nanga feti-owroe) oefening, foe di den ben si sani leki fa bijbel e si en. Den gymnastiek leriman ben gens den krinkrin èn den ben weigri foe meki den studenti kisi a cijfer gi gymnastiek na wan tra fasi. Te foe kaba, den studenti ben kisi wan lagi cijfer gi gymnastiek èn a bakapisi ben de taki den ben moesoe doe a fosi klas abra (a fosi jari na heiskoro). Na ini april 1991, den ben tjari a tori go na a kroetoebangi foe Kobe foe di den ben taki dati san a skoro ben doe, ben de teige a djaranti di wet e gi sma foe abi a fri foe relisi.a

A skoro ben taki dati efoe den ben o meki den doe wan tra sani, dan dati ben o de a srefi leki foe gi wan bepaalde relisi wan spesroetoe grani èn na so fasi a poebliki skoro no ben o de neutraal. Boiti dati, den ben taki dati den no ben abi den okasi noso den sma foe gi tra sortoe gymnastiek lès.

A bosroiti di kroetoebangi teki, e wroko na tapoe a firi foe den sma di kisi foe jere disi

Ala di a kroetoe ben hori, dan toe foe den feifi studenti agen no ben kisi a cijfer gi gymnastiek foe man go abra, èn nanga foeroe moeiti den dri trawan ben kisi wan boen cijfer èn ben go abra na a tra klas. Den reglementi foe skoro e taki dati den kan jagi studenti di no e wroko boen na skoro èn di toe jari baka makandra e tan sidon na ini a srefi klas. Nanga disi na prakseri, wan foe den toe studenti ben teki a bosroiti foe gowe libi skoro fosi den ben o jagi en, ma a trawan, Kunihito Kobayashi, ben weigri foe gowe. Dati meki den ben jagi en. A moi foe si, taki a gemiddelde foe Kunihito gi ala den vak ben de 90,2 foe den 100, pe gymnastiek ben de na ini toe, di a no ben kisi wan boen cijfer foe disi, bika a ben abi 48 punt. Foe a klas foe en di ben abi 42 studenti, a ben de a moro boen studenti.

Tapoe 22 februari 1993, a kroetoebangi foe Kobe ben teki wan bosroiti gi a boen foe Kobe Tèk èn ben taki: „Den sani di a skoro ben doe no ben broko a wet”, ala di den ben moesoe erken taki „den no ben gi a kragiman a fri dorodoro foe bosroiti san a wani ini a tori foe relisi foe di a skoro ben aksi foe en taki a moesoe abi prati na den kendo oefening.”

Neleki na apostel Paulus na ini a fosi jarihondro, na so den kragiman ben bosroiti foe tjari a tori go na moro hei wet tirimakti (Tori foe den Apostel 25:11, 12). Na afersi ben go na a Osaka Hei Kroetoe.

Den kragiman no ben prakseri soso densrefi

Wan barinen sabiman, profesor Tetsuo Shimomura foe a Tsukuba universiteit ben agri foe froeklari sani na fesi Osaka Hei Kroetoe leki wan kotoigi di ben sabi sani heri boen. Leki wan sabiman tapoe a kontren foe a leri di sma e gi èn foe wet, a ben poti krakti na tapoe taki san a skoro ben doe, troetroe no ben hori den firi foe den studenti na prakseri. Na fesi kroetoe, Kunihito Kobayashi ben taki san a ben firi, èn na opregti fasi foe en ben boeweigi na ati foe den sma di ben de drape na a kroetoe. Moro fara, tapoe 22 februari 1994, den afkati foe Kobe ben froeklari taki san a skoro ben doe, ben pori a fri di Kunihito abi foe anbegi èn a reti di a abi foe kisi leri, èn den ben gi a skoro a rai foe teki en baka na skoro.

Ala di a ten ben doro taki na Osaka Hei Kroetoe ben o meki a bosroiti bekènti, dan ala den jongoe kresten di ben abi foe doe nanga a tori ben wani foe abi prati na a feti te na a kaba. Den ben si disi leki wan legaal feti di den ben feti foe a boen foe doesoendoesoen jongoe Kotoigi di e kisi foe doe nanga a srefi strei na skoro na ini heri Japan. Ma foe di den no ben jagi den gowe foe skoro, meki a ben de so taki pikinmoro seiker kroetoebangi no ben o teki a kroetoe-afersi foe den. Èn den ben kan si taki efoe den ben o hari a kragi foe den poeroe, dan na onreidelekfasi foe a skoro foe jagi Kunihito foe skoro ben o kon na krin moro. So boen, ala den studenti boiti Kunihito ben bosroiti foe hari densrefi poeroe foe a kroetoe-afersi.

Tapoe 22 december 1994, a Gran Kroetoeman Reisuke foe na Osaka Hei Kroetoe ben meki wan bosroiti bekènti di ben kenki a bosroiti foe a kroetoebangi foe Kobe. A kroetoebangi ben kon si taki a reide di Kunihito ben abi foe no wani teki kendo oefening ben de opregti èn taki a takroe bakapisi di a ben kisi foe a bribi foe en ede, bigi srefisrefi. A skoro, na so Gran Kroetoeman Shimada ben taki, ben moesoe sorgoe taki a ben man doe wan tra sani. A toemoesi boen bosroiti disi ben de wan boen sani na ini na ai foe den wan di e broko den ede nanga den reti di libisma abi. Ma a skoro ben tjari na afersi go na a Moro Hei Kroetoe foe Japan, èn na so fasi, Kunihito no ben kan teki leri ete wan jari.

Go na a Moro Hei Kroetoe

Wan prenspari artikel na ini a koranti Kobe Shimbun ben taki baka ten: „A momenti dati [baka a bosroiti foe na Osaka Hei Kroetoe], den skorobasi foe Kobe nanga a skoro ben moesoe teki masra Kobayashi na skoro baka. . . . A fasi foe den taki den wani toeka nanga sma sondro taki disi de fanowdoe, meki wan man lasi wan prenspari pisi foe en jongoe jari.” Tokoe Kobe Tèk no ben wani broko kindi na ini na afersi disi. Wan bakapisi ben de, taki a ben tron wan tori di njoensoe ben taki foe en na ini a heri kondre. Leriman nanga tiriman foe skoro ini a heri kondre ben poti prakseri na tapoe a tori, èn wan bosroiti foe a moro hei kroetoe foe a kondre, ben o de leki wan eksempre di abi foe doe nanga wet gi den srefi sortoe afersi disi di ben o kon ete.

Tapoe 17 januari 1995, so wan wiki baka di a skoro ben tjari na afersi go na a Moro Hei Kroetoe, a gronseki na Kobe ben kisi a foto Ashiya, pe Kunihito nanga en famiri ben libi. Na wan ten foe arfoe feifi mamanten, wan toe miniti bifo a gronseki ben kisi a kontren, Kunihito ben gowe libi en oso foe go doe a pisi ten wroko foe en. A ben rèi en baisigri na tapoe a pasi di e pasa na ondro a Hanshin Expressway, èn di a gron ben seki, dan a ben doro a pisi di ben saka kon na gron. Wantewante a ben drai go baka na oso èn ben si taki a fosi sodro foe na oso foe en ben broko gowe krinkrin. Kunihito ben si taki makriki a ben kan lasi en libi na ini a gronseki èn a ben taigi Jehovah tangi foe di A ben gi pasi taki a ben de na libi. Efoe a ben dede, dan kande a kendo afersi ben o kon na wan kaba sondro a bosroiti foe a Moro Hei Kroetoe.

Nofo tron a Moro Hei Kroetoe foe Japan e ondrosoekoe kroetoe-afersi na tapoe papira nomo èn e loekoe efoe den bosroiti di den lagi kroetoe teki, ben boen. Ma efoe wan prenspari reide no de foe kenki a bosroiti foe a lagi kroetoebangi, dan den no e ondrosoekoe a tori. A Hei Kroetoe no e taigi den sma di de ini a tori, o ten den sa teki wan bosroiti. Dati meki Kunihito ben froewondroe a mamanten foe 8 maart 1996 di den ben taigi en taki a mamanten dati den ben o meki a bosroiti bekènti. A ben prisiri srefisrefi foe jere, taki a Moro Hei Kroetoe ben horibaka gi a bosroiti foe na Osaka Kroetoe.

Fo kroetoeman, di ben abi kroetoeman Shinichi Kawai leki fesiman, ben bosroiti alamala taki „akroederi den markitiki di a libimakandra abi na sociaal sei, dan sma ben moesoe si a sani di a skoro ben doe, leki wan sani di krinkrin no ben joisti, èn a ben de kontrari den reti di sma abi foe handri na a fasi fa den wani èn foe dati ede a sani disi ben de kontrari a wet”. Kroetoebangi ben erken na opregtifasi foe Kunihito foe weigri foe doe kendo oefening èn ben taki: „A reide di a kragiman ben abi foe weigri foe teki prati na den kendo oefening ben de opregti èn ben abi foeroe foe doe nanga a fondamenti foe en bribi.” A Moro Hei Kroetoe ben kon na a bosroiti taki a skoro ben kan èn ben moesoe sorgoe taki a ben kan doe tra sani, so taki den ben sa kan lespeki a relisi foe a kragiman.

A abi foeroe bakapisi

A bosroiti disi sondro tweifri sa de wan moi eksempre gi a boen foe a fri foe anbegi na den skoro. The Japan Times ben taki: „A bosroiti na a fosiwan di a Moro Hei Kroetoe teki ini a tori foe a leri di sma moesoe kisi èn a fri foe relisi.” Ma a bosroiti no e poeroe a frantiwortoe di ibri jongoe studenti abi foe teki en eigi bosroiti tapoe a gron foe en konsensi, te a e kisi foe doe nanga tesi tapoe en bribi.

Profesor Masayuki Uchino foe a Tsukuba universiteit ben taki dati wán foe den reide taki den kroetoeman ben meki Kunihito wini, ben de taki a ben de „wan serjoesoe studenti di ben abi toemoesi moi cijfer”. Bijbel e gi kresten di e kisi foe doe nanga tesi tapoe a bribi foe den, a rai disi: „Tan tjari oensrefi na wan boen fasi na mindri den nâsi, so taki ini den sani di den e taki foe oenoe leki oenoe na ogri sma, leki wan bakapisi foe den boen wroko foe oenoe, di den ben si nanga den eigi ai, den kan gi glori na Gado na a dei te a sa ondrosoekoe sani” (1 Petrus 2:12). Getrow jongoe kresten kan sori taki a posisi di den abi tapoe a gron foe bijbel warti a lespeki di sma e gi den, foe di den e libi den heri libi akroederi den bijbel markitiki.

Baka a bosroiti foe a Moro Hei Kroetoe, Kunihito Kobayashi ben kan go na Kobe Tèk baka. Moro foeroe foe den studenti di ben go na skoro makandra nanga Kunihito ben kaba a skoro kaba. Kunihito e sidon now nanga studenti di jongoe feifi jari moro en. Soleki fa foeroe sma foe grontapoe e si en, dan feifi diri jari foe en jongoejari gersi foe lasi gowe. Ma a soifri retifasi foe Kunihito warti na ini den ai foe Jehovah Gado, èn na òfer di a ben tjari kwetikweti no de foe soso.

[Foetoewortoe]

[Prenki na tapoe bladzijde 19]

Kroektoesei: Na oso foe Kunihito baka a gronseki

Ondrosei: Kunihito now