San Gado e aksi foe wi?
„Disi na san a lobi gi Gado wani taki, dati wi e hori den komando foe en; èn tokoe den komando foe en no de wan hebi lai.” — 1 JOHANES 5:3.
1, 2. Foe san ede a no de wan froewondroe sani taki Gado abi markitiki gi den sma di wani anbegi en na wan fasi di a feni boen?
„MI RELISI boen nofo gi mi!” A no dati sma e taigi wi foeroe tron? Ma foe taki en leti, na aksi moesoe de: „Mi relisi e plisi Gado?” Ija, Gado abi markitiki gi den sma di wani anbegi en na wan fasi di a feni boen. Dati moesoe froewondroe wi? Kwetikweti. Kon meki wi taki dati joe ben abi wan moi oso foe joesrefi, wan oso di no so langa pasa ete joe ben gebroiki foeroe moni foe meki en kon boen baka. Joe ben sa meki iniwan sma go libi drape? A e taki foe ensrefi dati joe no ben sa doe dati! Iniwan sma di o joeroe na oso ben sa moesoe doro den markitiki foe joe.
2 Na so a de toe, taki Jehovah Gado gi a grontapoe oso disi na a libisma famiri. A no sa teki langa moro taki grontapoe sa „meki kon boen baka”, na ondro en Kownoekondre tiri — grontapoe sa kenki kon tron wan moi paradijs. Jehovah o doe disi. A ben teki foeroe foe ensrefi foe gi en wan-enkri gebore Manpikin foe meki disi kan. Seiker, Gado moesoe abi markitiki gi den sma di sa libi drape! — Psalm 115:16; Mateus 6:9, 10; Johanes 3:16.
3. Fa Salomo ben taki sjatoe foe san Gado e froewakti foe wi?
3 Fa wi kan kon sabi san na den markitiki foe Gado? Jehovah ben meki a koni kownoe Salomo taki sjatoe san En e froewakti foe wi. Baka di Salomo prakseri foe ala den sani di a ben feti na den baka — so srefi goedoe, bow wroko, den pokoe di a ben lobi, èn a lobi di wan man nanga wan oema e firi gi makandra — a ben kon froestan disi: „A bosroiti foe a tori, now di sma jere ala sani, de: Frede a troe Gado èn hori den komando foe en. Bika disi na a heri plekti foe libisma.” — Preikiman 12:13.
„Den komando foe en no de wan hebi lai”
4-6. (a) San a Griki wortoe di vertaal nanga „hebi lai” wani taki troetroe? (b) Foe san ede wi kan taki dati den komando foe Gado no de wan hebi lai?
4 „Hori den komando foe en.” Moro foeroe, dati na san Gado e froewakti foe wi. Dati na toemoesi foeroe sani di a e aksi foe wi? Kwetikweti. Na apostel Johanes e froeteri wi foe wan sani foe den komando noso markitiki foe Gado, di e meki wi de korostoe srefisrefi. A ben skrifi: „Disi na san a lobi gi Gado wani taki, dati wi e hori den komando foe en; èn tokoe den komando foe en no de wan hebi lai.” — 1 Johanes 5:3.
5 A Griki wortoe di den vertaal nanga „wan hebi lai”, troetroe wani taki „hebi”. A kan sori go na wan sani di tranga foe doro noso di moeilek foe doe. Na Mateus 23:4, den gebroiki a srefi wortoe foe taki foe den „hebi lai”, den wet nanga gwenti di libisma meki, di den leriman foe Wet nanga den Fariseiman ben poti na tapoe sma. Joe e froestan na sortoe bosroiti na owroe apostel Johanes e kon? Den komando foe Gado no de wan hebi lai, èn den no de toemoesi moeilek toe gi wi foe ondrow den. (Teki gersi Deuteronomium 30:11). Joisti te wi lobi Gado, dan a e meki wi kolokoe te wi e doro den markitiki foe en. Disi e gi wi wan moi okasi foe sori a lobi di wi abi gi Jehovah.
6 Efoe wi wani sori a lobi di wi abi gi Gado, dan wi moesoe sabi moro fini san Gado e froewakti foe wi. Meki wi go loekoe now feifi foe den markitiki foe Gado. Te wi e doe dati, dan meki wi hori na prakseri san Johanes ben skrifi: ’Den komando foe Gado no de wan hebi lai.’
Teki sabi foe Gado na ini wi
7. Foe san a froeloesoe foe wi e anga?
7 A fosi markitiki na taki wi moesoe teki sabi foe Gado na ini wi. Meki wi go loekoe den wortoe foe Jesus na ini Johanes kapitel 17. A situwâsi ben de a lasti neti foe Jesus en libi leki wan libisma. Jesus ben gebroiki foeroe ten a neti dati foe sreka den apostel foe en gi a gowe di a ben o gowe. A ben broko en ede nanga a tamara foe den, a têgo tamara foe den. Ala di a ben opo en ai go na hemel, a ben begi gi den. Wi e leisi na ini vers 3: „Disi wani taki têgo libi, foe den e teki sabi na ini den foe joe, a wan-enkri troe Gado, èn foe en di joe ben seni kon, Jesus Krestes.” Ija, a froeloesoe foe den ben anga foe a teki di den ben o „teki sabi na ini” den foe Gado nanga Krestes. Dati abi foe doe nanga wi toe. Foe kisi froeloesoe, dan wi moesoe teki so wan sabi na ini wi.
8. San a wani taki foe ’teki sabi’ foe Gado ’na ini’ wi?
8 San a wani taki foe ’teki sabi na ini’ wi foe Gado? A Griki wortoe di vertaal djaso nanga „teki sabi na ini” wani taki „foe kon sabi, erken”, noso „foe froestan krinkrin”. Loekoe toe, taki a fasi foe vertaal „teki sabi na ini”, e sori taki disi na wan sani di e pasa doronomo. Foe dati ede, efoe wi wani teki sabi foe Gado na ini wi, dan disi wani taki, dati wi moesoe kon sabi en, no frafra, ma foe krosibei, èn taki wi moesoe kweki wan matifasi nanga en pe wi e sori taki wi froestan en. Wan matifasi di wi abi doronomo nanga Gado abi leki bakapisi taki wi e kisi sabi foe en, di e gro ala ten. A sani disi kan go doro foe têgo, bika noiti wi sa leri ala sani foe Jehovah. — Romesma 11:33.
9. San wi kan leri foe Jehovah na ini a boekoe di e taki foe den sani di a meki?
9 Fa wi e teki sabi na ini wi foe Gado? Toe boekoe de di kan jepi wi. A fosiwan na a boekoe di e taki foe den sani di Gado meki. Den sani di Jehovah meki — den sani di abi libi nanga den sani di no abi libi — e gi wi pikinso inzicht foe a sortoe sma di a de (Romesma 1:20). Loekoe wan toe eksempre. A babari foe wan bigi soela, den skwala di e naki tranga na sjoro te wan bigi winti e wai, a si di wi e si den hemel di lai nanga stari na wan krin neti — den sortoe sani disi no e leri wi taki Jehovah na wan Gado di „tranga na ini makti”? (Jesaja 40:26) Wan pikin di e lafoe te a e loekoe fa wan pikin dagoe e soekoe foe graboe en eigi tere noso wan pikin poesipoesi di e prei nanga wan boroe titei — dati no e sori taki Jehovah, „a kolokoe Gado”, abi wan firi gi switi tori? (1 Timoteus 1:11) A tesi foe wan switi njanjan, a switi smeri foe bromki na ini wan wei, den srapoe kloroe foe wan moi kaperka, a babari foe fowroe di e singi na ini lente, a waran brasa foe wan lobiwan — wi no e si na den sortoe sani dati, taki wi Mekiman na wan Gado foe lobi, di wani foe wi njan boen foe a libi? — 1 Johanes 4:8.
10, 11. (a) Sortoe sani foe Jehovah nanga den prakseri foe en wi no kan kon sabi foe a boekoe di e taki foe den sani di a meki? (b) Na tapoe sortoe aksi wi kan kisi wan piki di de na ini bijbel wawan?
10 Ma a boekoe di e taki foe den sani di Gado meki, no kan leri wi ala sani foe Jehovah. Foe eksempre: San na a nen foe Gado? Foe san ede a ben meki grontapoe èn ben poti libisma na en tapoe? Foe san ede Gado è gi pasi meki godelowsoefasi de? San a tamara abi gi wi? Foe kan kisi piki tapoe den sortoe aksi dati, dan wi moesoe go na a tra boekoe di e gi sabi foe Gado — bijbel. Tapoe den bladzijde foe en, Jehovah e tjari sani foe ensrefi kon na krin, so srefi en nen, a sortoe sma di a de, nanga den sani di a abi na prakseri — tori di no wan tra fonten kan leri wi. — Exodus 34:6, 7; Psalm 83:18; Amos 3:7.
11 Na ini den Boekoe foe bijbel, Jehovah e gi toemoesi prenspari sabi toe foe tra sma di wi moesoe teki sabi foe den. Foe eksempre: soema na Jesus Krestes, èn sortoe ròl a e plèi foe meki den sani di Jehovah abi na prakseri, kon troe? (Tori foe den Apostel 4:12) Soema na Satan Didibri? Na sortoe fasi a e kori sma? San wi kan doe foe a no kori wi? (1 Petrus 5:8) Den piki tapoe den aksi disi, di e kibri libi, de foe feni na ini bijbel wawan.
12. Fa joe ben sa tjari kon na krin foe san ede a no de wan hebi lai foe teki sabi foe Gado nanga den prakseri foe en, na ini wi?
12 A de wan hebi foe teki a sabi dati foe Gado èn foe den sani di a abi na prakseri, na ini wi? Kwetikweti! Joe kan memre fa joe ben firi di joe ben kon sabi fosi tron taki a nen foe Gado na Jehovah, taki en Kownoekondre sa meki a Paradijs kon baka na a grontapoe disi, taki a ben gi en lobi Manpikin leki wan loesoe-paiman gi den sondoe foe wi, so srefi tra diri waarheid? A no ben de leki te joe e poeroe wan doekoe di ben tapoe sma foe kon sabi sani èn fosi tron joe ben kon si sani krin? Foe teki sabi foe Gado na ini wi a no wan hebi. A de wan prisiri sani! — Psalm 1:1-3; 119:97.
Doro den markitiki foe Gado
13, 14. (a) Sortoe kenki wi moesoe tjari kon na ini wi libi, efoe wi e teki sabi foe Gado na ini wi? (b) Sortoe doe di no krin, Gado e aksi wi foe tan farawe foe dati?
13 Te wi e teki sabi foe Gado na ini wi, dan heri esi wi e kon froestan taki wi moesoe tjari kenki kon na ini wi libi. Disi e tjari wi go na a di foe toe markitiki. Wi moesoe hori wisrefi na den markitiki foe Gado di abi foe doe nanga a joisti fasi fa wi moesoe tjari wisrefi èn wi moesoe teki a waarheid foe en. San na waarheid? A abi trobi troetroe gi Gado san wi e bribi èn san wi e doe? So leki fa a sori, dan foeroe sma na ini a ten disi no e denki dati. Wan verslag di a Kerki foe Ingrisikondre ben tjari kon na doro na ini 1995, ben gi leki rai taki sma no moesoe si a libi di sma e libi nanga makandra sondro foe trow, leki wan sondoe. „Den wortoe ’libi na ini sondoe’ e tjari sjen kon èn a no e jepi sma”, na so wan biskopoe foe kerki ben taki.
14 So boen, „libi na ini sondoe” no de wan sondoe moro? Nanga wortoe di e taki a tori krin, Jehovah e froeteri wi fa a e denki foe so wan fasi fa sma e tjari densrefi. En Wortoe, bijbel, e froeklari: „Meki a trowlibi de krin na mindri ala sma èn a trowbedi sondro flaka, bika Gado sa kroetoe hoeroeman nanga soetaman” (Hebrewsma 13:4). Kerki tiriman nanga kerkisma, di abi wan fri denki, no e si seks bifo a trow leki wan sondoe kande, ma a de wan serjoesoe sondoe na ini na ai foe Gado! Èn na so a de toe nanga soetadoe, seks na mindri famiriman, nanga homo-sekslibi (Lefitikus 18:6; 1 Korentesma 6:9, 10). Gado e aksi taki wi e tan farawe foe den sortoe doe dati, di a e si leki sani di no krin.
15. Fa den markitiki foe Gado abi foe doe nanga a fasi fa wi e handri nanga trawan èn nanga san wi e bribi?
15 Ma a no nofo foe tan farawe foe den doe di Gado e si leki sondoe. Den markitiki foe Gado abi foe doe toe nanga a fasi fa wi e handri nanga tra sma. A e froewakti taki a masra nanga a wefi na ini na osofamiri abi lobi nanga lespeki gi makandra. Gado e aksi foe papa nanga mama taki den moesoe sorgoe gi den sani di den pikin foe den abi fanowdoe na materia sei, na jejefasi èn na emotioneel sei. A e taigi pikin taki den moesoe gi jesi na a papa nanga mama foe den (Odo 22:6; Kolosesma 3:18-21). Èn fa a de nanga den sani di wi e bribi? Jehovah Gado wani, taki wi e tan farawe foe bribi nanga gwenti di e kon foe falsi relisi noso di de kontrari den krin waarheid di bijbel e leri sma. — Deuteronomium 18:9-13; 2 Korentesma 6:14-17.
16. Tjari kon na krin foe san ede a no de wan hebi lai foe doro den markitiki foe Gado di abi foe doe nanga a joisti fasi fa wi moesoe tjari wisrefi èn foe teki a waarheid foe en.
16 A de wan hebi gi wi foe hori wisrefi na den markitiki foe Gado di abi foe doe nanga a joisti fasi fa wi moesoe tjari wisrefi èn foe teki a waarheid foe en? No te wi e loekoe den winimarki — trowlibi pe a masra nanga a wefi lobi èn e froetrow makandra, na presi foe trowlibi di broko foe di den no de getrow na makandra; osofamiri pe den pikin e firi taki a papa nanga mama foe den lobi den èn wani den, na presi foe osofamiri pe den pikin e firi taki den papa nanga mama no lobi den, e poti den na wan sei, èn no wani den; wan krin konsensi nanga wan boen gosontoe, na presi foe abi a firi taki joe fowtoe èn wan skin di pori foe AIDS ede noso wan tra siki di sma kisi foe seks ede. Den markitiki foe Jehovah seiker no e poeroe no wan sani di wi abi fanowdoe foe njan boen foe a libi! — Deuteronomium 10:12, 13.
Sori lespeki gi libi nanga broedoe
17. Fa Jehovah e si libi nanga broedoe?
17 Te joe e meki joe libi de akroederi den markitiki foe Gado, dan joe e kon froestan o diri a libi de troetroe. Meki wi go taki now foe wan di foe dri markitiki foe Gado. Wi moesoe sori lespeki gi libi nanga broedoe. Libi na wan santa sani gi Jehovah. A moesoe de so, bika en na a Fonten foe libi (Psalm 36:9). Ija, srefi a libi foe wan pikin di no gebore ete èn di de na ini en mama bere, na wan diri sani gi Jehovah! (Exodus 21:22, 23) Broedoe e teki presi gi libi. Foe dati ede broedoe na wan santa sani toe na ini na ai foe Gado (Lefitikus 17:14). Dati meki, a no moesoe de wan froewondroe sani taki Gado e froewakti foe wi taki wi moesoe si libi nanga broedoe na a fasi fa en e si den.
18. San a fasi fa Jehovah e si libi nanga broedoe, e aksi foe wi?
18 San a wani taki gi wi foe abi lespeki gi libi nanga broedoe? Wi leki kresten, no e poti a libi foe wi ini kefar sondro foe a de fanowdoe, soso foe a span firi ede. Wi e hori a tanboen foe sma na prakseri èn dati meki wi e sorgoe taki den oto nanga den oso foe wi de na so wan fasi taki den no de wan kefar gi sma (Deuteronomium 22:8). Wi no e gebroiki tabaka, e kaw pinangnoto, noso e gebroiki drug di e broeja sma froestan, foe prisiri ede (2 Korentesma 7:1). Foe di wi e arki Gado te a e taki foe ’tan farawe foe broedoe’, meki wi no e teki broedoe na ini wi skin (Tori foe den Apostel 15:28, 29). Ala di wi lobi libi, tokoe wi no sa proeberi foe kibri a libi foe wi nownow, èn pasa a wet foe Gado èn na so wan fasi e tjari a froewakti foe wi foe libi foe têgo, kon ini kefar! — Mateus 16:25.
19. Tjari kon na krin fa wi e kisi wini te wi e sori lespeki gi libi nanga broedoe.
19 A de wan hebi gi wi foe handri libi nanga broedoe leki santa sani? Kwetikweti! Prakseri foe disi. A de wan hebi foe no kisi fokofoko kanker di e kon foe a smoko foe tabaka? A de wan hebi foe no tron wan srafoe na froestan sei èn na skin sei foe drug di e doe ogri? A de wan hebi foe no kisi AIDS, hepatitis, noso wan toe tra siki foe wan broedoe transfusie ede? A de krin taki, te wi e tan farawe foe den sortoe gwenti nanga doe dati di e doe sma ogri, dan a de gi a boen foe wi. — Jesaja 48:17.
20. Fa wan osofamiri ben kisi wini foe di den si a libi leki fa Gado e si libi?
20 Loekoe na ondrofenitori disi. Wan toe jari pasa, wan oema di de wan Kotoigi èn di ben abi bere foe so wan dri nanga afoe moen, wan neti ben bigin lasi foeroe broedoe èn den ben tjari en go na ati-oso esi-esi. Baka di wan datra ondrosoekoe en, a ben jere a datra taigi wán foe den zuster taki den ben sa moesoe poeroe a bere. Foe di na oema ben sabi a fasi fa Jehovah e si a libi foe wan pikin di no gebore ete, meki a ben weigri tranga foe poeroe a bere, èn ben e taigi a datra: „Efoe a de na libi, libi en drape!” A ben tan lasi broedoe wanwan leisi, ma wan toe moen na baka, a ben kisi wan gosontoe boi di ben gebore toemoesi froekoe èn di abi 17 jari now. A ben froeklari: „Wi ben froeteri a manpikin foe wi ala den sani disi, èn a ben taki dati a breiti taki den no ben trowe en na doti-ipi. A sabi taki foe di wi e dini Jehovah, dan dati na a wan-enkri reide meki a de srefi na libi tide. Seiker, foe si a libi leki fa Gado e si en, no ben de wan hebi gi na osofamiri disi!
Dini makandra nanga Jehovah en pipel di orga
21, 22. (a) Soema Jehovah e froewakti taki wi dini en makandra nanga den? (b) Fa sma kan kon sabi soema na Gado en pipel di orga?
21 A no wi wawan e tjari kenki kon di de fanowdoe foe meki a libi foe wi de akroederi den markitiki foe Gado. Jehovah abi wan pipel na a grontapoe disi, èn a e froewakti taki wi e dini en makandra nanga den. Disi e tjari wi go na a di foe fo markitiki. Wi moesoe dini Jehovah makandra nanga en organisâsi di a e tiri nanga en santa jeje.
22 Ma fa sma kan kon sabi soema na Gado en pipel di orga? Soleki fa den markitiki di den e taki foe dati na ini bijbel e sori, dan den abi troetroe lobi na den mindri, den abi dipi lespeki gi bijbel, den e gi grani na a nen foe Gado, den e preiki foe en Kownoekondre, èn den no de wan pisi foe a godelowsoe grontapoe disi (Mateus 6:9; 24:14; Johanes 13:34, 35; 17:16, 17). Soso wán relisi organisâsi de nomo na a grontapoe disi di abi ala den marki disi foe troe krestendom — Jehovah Kotoigi!
23, 24. Fa wi kan gi wan eksempre di e sori taki a no de wan hebi lai foe dini Jehovah makandra nanga en pipel di orga?
23 A de wan hebi foe dini Jehovah makandra nanga en pipel di orga? Nôno, kwetikweti! Kontrari foe dati, a de wan moi grani foe abi a lobi nanga a jepi foe wan famiri foe kresten brada nanga sisa na heri grontapoe (1 Petrus 2:17). Kon meki wi taki dati joe tan na libi di a sipi pe joe ben de na ini soengoe, èn joe de na ini a watra, e meki tranga moeiti foe no soengoe. Te joe e firi taki joe no man horidoro moro langa, dan wan sma na ini wan boto di den gebroiki foe poeroe sma na watra, e langa en anoe gi joe. Ija, tra sma de di tan na libi! Na ini a boto dati, joe nanga den tra sma, ibriwan foe oenoe e teki en na den tapoe foe jepi foe lo a boto go na sjoro, èn na pasi oenoe e piki tra sma di tan na libi, poeroe den na watra.
24 Wi no de na ini wan srefi sortoe situwâsi? Den hari wi poeroe na ini a kefalek „watra” foe a godelowsoe grontapoe disi, poti wi na ini a „boto di den gebroiki foe poeroe sma na watra” foe Jehovah en organisâsi na grontapoe. Na ini na organisâsi, wi e dini skinskin, ala di wi de na pasi e go na den „sjoro” foe wan regtfardiki njoen grontapoe. Efoe den banawtoe foe a libi ben sa meki wi kon weri na pasi, dan fa wi de nanga tangi foe a jepi nanga a trowstoe foe troe kresten kompe! — Odo 17:17.
25. (a) Sortoe plekti wi abi na den wan di de ete na ini den „watra” foe na ogri grontapoe disi? (b) Foe sortoe markitiki foe Gado wi sa taki na ini na artikel di e kon?
25 Ma fa a de nanga tra sma — opregti sma di de na ini a „watra” ete? Wi abi wan plekti foe jepi den kon na ini Jehovah en organisâsi, a no so? (1 Timoteus 2:3, 4) Den abi jepi fanowdoe foe kon sabi san Gado e aksi. Disi e tjari wi go na a di foe feifi markitiki foe Gado. Wi moesoe de sma di e meki Gado Kownoekondre bekènti na wan loyaal fasi. San disi wani taki wi sa taki na ini na artikel di e kon.
Joe e memre disi ete?
◻ Foe san ede den komando foe Gado no de wan hebi?
◻ Fa wi e teki sabi foe Gado na ini wi?
◻ Foe san ede a no wan hebi lai foe doro den markitiki foe Gado di abi foe doe nanga a joisti fasi fa wi moesoe tjari wisrefi èn foe teki a waarheid foe en?
◻ San a fasi fa Gado e si libi nanga broedoe, e aksi foe wi?
◻ Soema Gado e froewakti taki wi e dini en makandra nanga den, èn fa sma kan kon sabi soema na den?
[Prenki na tapoe bladzijde 18]
Wi e leri foe Jehovah na ini a boekoe di e taki foe den sani di a meki èn na ini bijbel
[Sma di abi a reti foe a prenki]
Kaiman: Nanga a primisi foe Australian International Public Relations; beer: Safari-Zoo foe Ramat-Gan, Tel Aviv