Tjari fri na jejefasi gi den wan na ini strafoe-oso

„WI BEN wakti joe.” „Den neti di pasa, mi dren taki joe e kon.” „Grantangi taki joe gi wan sma a wroko foe fisiti wi doronomo.” „Wi wani taki tangi gi ibri wan foe den blesi di wi kisi foe Jehovah nanga en organisâsi, gi a njanjan na jejefasi di gi na a reti ten, sondro taki wi ben froedini en.”

San ben de a reide gi den sortoe wortoe disi foe tangi? Disi na wan toe wortoe foe strafoeman di sroto na ini difrenti strafoe-oso na Meksikow. Den e warderi a belangstelling di den e kisi foe Jehovah Kotoigi, di gi den fri na jejefasi srefi ala di den de na ini strafoe-oso. Na Meksikow 42 strafoe-oso de pe Jehovah Kotoigi e sorgoe doronomo gi den fanowdoe na jejefasi foe den strafoeman. Den e kari den presi disi Centro Readaptación Social (Sociaal Rehabilitatie-centrum). Na ini son wan foe den strafoe-oso disi, den e hori kresten konmakandra doronomo, nanga heri boen bakapisi. Foe eksempre, wan lasti leisi di den ben teri, 380 sma ben fisiti den konmakandra na ini den presi disi. Na a ten dati, wan gemiddelde foe 350 bijbelstudie ben e hori. Dritenti na seibi foe den ben doro den markitiki foe bigin preiki, èn 32 foe den ben gi den libi abra na Jehovah, èn ben simboliseer disi di den ben teki dopoe na ini watra.

Fa a wroko e doe

Fa Jehovah Kotoigi e doe a preikiwroko foe den na ini den presi disi? Den e go fosi na den ambtenari di de basi, foe aksi primisi na tapoe papira foe go na ini a strafoe-oso, èn den Kotoigi e froeklari san na a marki foe den fisiti — foe leri den strafoeman fa foe meki a fasi fa den e libi kon moro boen èn foe dini Gado na wan fasi di a e feni boen.

Na ini ibriwan foe den kefal den tiriman ben gi primisi. Den ambtenari disi e warderi a bijbel leri di den strafoeman e kisi. Den tiriman foe den strafoe-oso si taki Jehovah Kotoigi e hori densrefi na den veiligheidswet di meki gi den presi disi. Den ben meki den bedinari disi di kon fisiti, gebroiki den kantoro, njanjan kamra, èn wrokokamra foe hori den konmakandra foe den. Na ini wan strafoe-oso den Kotoigi ben kisi primisi srefi foe bow wan pikin Kownoekondre zaal, soleki na ondrofenitori disi di wan opziener di e rèis na a Zuid-owstoesei foe Meksikow, ben froeteri.

„Na ini a bigin foe 1991 wi ben bigin fisiti a strafoe-oso na Tehuantepec, Oaxaca, pe wi ben feni foeroe angri na jejefasi. Heri esi wi ben bigin 27 bijbelstudie. Foe di den strafoeman ben abi so foeroe belangstelling, meki wi ben abi feifi gemeente konmakandra na tapoe a schema. Wán foe den strafoeman di ben sori foeroe lobi gi Jehovah, ben teki a bosroiti foe bow wan pikin Kownoekondre zaal na ini a kontren foe a strafoe-oso, so taki den kan abi wan presi foe hori konmakandra. A ben go na a driktoro foe a strafoe-oso èn ben aksi en primisi gi dati, èn den tiriman ben jepi wi heri boen. Na a bigin foe december 1992, siksi strafoeman ben doro den markitiki foe tron preikiman foe a boen njoensoe. Bika foe a gro di ben de foe si, sani ben sreka foe hori a Memrefesa na inisei foe a strafoe-oso. Wi ben aksi a driktoro foe a strafoe-oso primisi foe tjari den simbôl — a brede nanga a win, kon na inisei — èn baka di wi ben taki fo joeroe langa, wi ben kisi primisi.

Na so a ben pasa taki na tapoe 3 april 1993 (dri dei bifo a Memrefesa), den ben loesoe wan toe strafoeman. Di wan foe den di ben de wan preikiman, ben kisi den papira foe en di e taki dati a loesoe, a ben aksi foe taki nanga a driktoro foe a strafoe-oso foe kisi primisi foe tan ete na a strafoe-oso teleki na baka a Memrefesa. Disi ben froewondroe a driktoro srefisrefi, bika disi a no wan gewoon sani di sma e aksi, ma foe di a si taki a strafoeman ben abi foeroe belangstelling foe fisiti a Memrefesa drape na ini a strafoe-oso, meki a ben gi en san a ben aksi. A Memrefesa ben abi 53 fisitiman, di ben krei foe prisiri na a kaba foe a programa. Wi feni en boen foe kari a groepoe disi a ’Fri Cereso’, bika den de fri na jejefasi.”

Sma e warderi a wroko foe Jehovah Kotoigi srefisrefi na ini den presi disi. Na ini wan foe den strafoe-oso disi, den sma di de basi drape, e rikomanderi krinkrin foe fisiti den konmakandra foe Jehovah Kotoigi, di de leki wan „dresi” foe jepi den strafoeman foe kon boen sma baka.

Wan heri boen programa foe jepi den foe kon boen sma baka

Den sani di Jehovah Kotoigi doe, abi leki bakapisi taki foeroe strafoeman ben kon tron boen sma baka srefisrefi. Ala di a de troe nofo tron taki den wan di ben de na ini strafoe-oso e go libi wan ogri libi baka, na baka te den loesoe, tokoe den wan di teki a boskopoe foe a Wortoe foe Gado troetroe, kenki dorodoro. A kenki di den kenki e meki wi prakseri den wortoe foe na apostel Paulus: „No wan hoeroeman . . . , no wan foefoeroeman, no wan sma di abi bigi-ai, no wan droengoeman, no wan skempiman, no wan bedrigiman sa kisi a kownoekondre foe Gado. Èn tokoe, dati na san son wan foe oenoe ben de. Ma oenoe wasi kon krin, ma oenoe kon santa, ma den froeklari oenoe regtfardiki ini a nen foe wi Masra Jesus Krestes èn nanga a jeje foe wi Gado.” — 1 Korentesma 6:9-11.

A kefalek aparti fasi fa den eigifasi foe den kenki, de krin foe si te den e taki san den e firi. Miguel di de ini a Campeche strafoe-oso na ini a foto Campeche, e taki en na a fasi disi: „Tide mi kan taki nanga prisiri taki mi e si misrefi leki wan foe den tra skapoe di abi a howpoe di skrifi na 2 Petrus 3:13 èn Mateus 5:5.” José di de ini a Koben, a Campeche strafoe-oso, ben taki: „Ala di mi de wan strafoeman èn a kan taki mi ben doe wan serjoesoe ogri, mi e froestan taki Jehovah abi foeroe sari-ati èn taki a e arki den begi èn den tranga begi foe mi. A kan gi mi pardon foe den fowtoe foe mi èn a kan gi mi na okasi foe gebroiki a libi di mi abi ete foe prati a boen njoensoe foe a Kownoekondre foe Gado. Wi de den owroeman foe wi grantangi gi a ten di den teki foe fisiti wi na ini strafoe-oso, so taki wi kan abi wini foe den Kownoekondre pramisi foe Gado. Dati na switi blesi srefisrefi! Mi kan taki dati mi na wan strafoeman? Nôno, Jehovah gi mi a fri na jejefasi di mi ben abi fanowdoe.”

San na a sani di e meki kiriman, sma di abi seks nanga tranga, sma di e bron presi foe espresi, foefoeroeman, nanga tra sma kon tron kresten di e libi boen? Soleki fa den srefi man disi e taki, a de a Wortoe foe Gado di abi a krakti foe meki sma kenki, èn a boen demakandra nanga troetroe opregti sma. A kefal foe Tiburcio, di sroto ini a strafoe-oso na Mazatlán, Sinaloa, e sori den boen bakapisi foe a programa disi foe meki sma kon boen baka. A ben de na strafoe-oso na Concordia, Sinaloa, pe a ben abi problema bika a ben atibron esi-esi. En wefi ben de wan foe den Jehovah Kotoigi, èn a ben abi a gwenti foe handri takroe nanga en, srefi te en wefi ben kon foe fisiti en ini doengroe-oso. A wefi ben abi pasensi èn a ben e tan kon fisiti en, èn so boen a man ben aksi en foe tjari a boekoe Joe kan libi foe têgo na ini wan paradijs na grontapoe kon gi en, èn a ben bigin studeri a boekoe gi ensrefi.a Baka dati a ben aksi meki wan sma kon na a doengroe-oso foe studeri nanga en. A ben bigin gro na jejefasi, èn a banti di a ben abi nanga tra sma ben bigin kenki kon boen. A ben froisi go na a strafoe-oso na Mazatlán pe wan groepoe ben e studeri a bijbel, èn now a de wan preikiman. A e froeteri: „Now, makandra nanga mi wefi èn den pikin foe mi èn den kompe foe mi na strafoe-oso, mi de grantangi srefisrefi taki mi man arki den bijbel waarheid na ini a presi disi, nanga a howpoe taki didjonsro mi sa kon fri èn mi sa man foe fisiti ala den bigi konmakandra èn den gemeente konmakandra.”

So srefi Conrado de grantangi srefisrefi gi den kenki di a ben man tjari na ini en libi. A ben abi so kefalek problema na ini en trowlibi taki en wefi ben gowe libi en. Foe dati ede a ben soekoe trowstoe na ini drug. Baka ten a ben tron wan drug bisnisman. Skowtoe ben hori en èn den ben seni en na strafoe-oso bika a ben tjari marwana nanga coca nanga en. Na ini strafoe-oso wan groepoe ben de di ben e studeri a bijbel nanga Jehovah Kotoigi, èn a ben kisi wan kari foe studeri makandra nanga den. A ben taki fa a e firi na a fasi disi: „Na ordefasi fa den konmakandra ben hori, a fasi fa den ben ondrosoekoe bijbel nanga jepi foe den poeblikâsi, èn taki ala sani ben abi en gron tapoe bijbel, ben doe mi wan sani. Wantewante mi ben aksi foe abi wan bijbelstudie èn mi ben bigin fisiti den konmakandra.” Dati ben de na ini januari 1993. Now Conrado no de na strafoe-oso moro èn a e tan gro na ini a kresten gemeente.

Den Islas Marías

Na Meksikow wan strafoe-oso de di sma e frede kefalek, di de fo èilanti di den e kari den Islas Marías. Den strafoeman kan waka lontoe na tapoe den strafoe èilanti disi pe den de na strafoe. Son wan foe den e libi drape nanga den wefi èn den pikin foe den.

Wan pikin gemeente seti drape. Dri brada foe Mazatlán e rèis go drape wán leisi ibri moen, èn den e jepi foe hori konmakandra, den e sorgoe gi poeblikâsi, èn den e gi deki-ati. Son leisi a kring-opziener e abra go drape foe fisiti den. A gemiddeld nomroe fisitiman de na mindri 20 nanga 25. Fo preikiman di dopoe nanga toe preikiman di no dopoe, de drape. Na opziener di e rèis e froeteri taki „son wan foe den e waka 17 kilometer foe fisiti den konmakandra na tapoe sonde èn den abi foe gowe esi-esi foe den konmakandra foe man doro baka biten, so taki den de na ini den cel te den nen sa kari foe si efoe den de na inisei. Srefi te den e waka esi, a e teki moro leki toe joeroe foe doro baka”. No so langa pasa, wán foe den brada di ben leri a waarheid na ini a strafoe-oso dati, ben taki: „Fositen mi ben wani loesoe heri esi foe a strafoe-oso, ma now a kan de awansi oten Jehovah wani, ma awansi fa a de, mi abi wan lo wroko foe doe djaso na ini strafoe-oso.”

Wi breiti foe si taki a waarheid e gebroiki en krakti foe fri opregti sma di e soekoe wan fasi foe plisi Jehovah. Moro leki twarfoe foe den wan disi di ben leri waarheid na ini strafoe-oso, ben loesoe, ben teki dopoe, èn now den e libi wan krin libi leki foetoeboi foe Gado, èn wan toe foe den tron gemeente owroeman srefi. A krakti di bijbel abi foe dresi ati èn foe kenki sma kon boen baka, ben sori na wan kefalek boen fasi. So esi leki den man disi di ben de na strafoe foe di den ben doe sani di no boen, e bigin waka a pasi foe a leti foe a Wortoe foe Gado, dan den e ondrofeni a troe fri di Jesus ben pramisi di a ben taki: „Oenoe sa sabi waarheid, èn waarheid sa meki oenoe kon fri.” — Johanes 8:32; Psalm 119:105.

[Foetoewortoe]

[Prenki na tapoe bladzijde 23]

Foeroe sma ben kisi winimarki foe a kresten waarheid di den ben leri na ini strafoe-oso