Konmakandra na ini bijbel ten

„LEKI na Universeel Soeverein, Jehovah Gado abi a reti foe poti a wet taki den foetoeboi foe en moesoe kon makandra èn a abi a reti foe poti a ten èn a presi foe kon makandra. Na den sortoe fasi disi a e doe sani gi a boen foe den. Den konmakandra foe a pipel foe Gado na ini owroeten, ben difrenti akroederi a marki foe den. Ma seiker den ben jepi foe meki wánfasi de, bika ala sma di ben de drape ben abi na okasi foe jere den srefi sani na a srefi ten. Den sortoe konmakandra disi ben tjari foeroe winimarki na jejefasi kon èn foeroe tron den ben de okasi pe bigi prisiri de.

Algemeen konmakandra

Den algemeen konmakandra na Israèl ben abi relisi fesa, serjoesoe konmakandra (2 Kroniki 34:29, 30; Joèl 2:15), noso okasi di de prenspari srefisrefi gi a heri nâsi; èn son tron den lonman ben tjari komando gi a heri pipel (1 Samuèl 10:17-19; 2 Kroniki 30:6, 13). Na alawiki Sabadei, wan dei foe „rostoe dorodoro, wan santa konmakandra” (Lefitikus 23:3), ben de wan ten foe ondrosoekoe Gado Wortoe, soleki na ini den snoga foe baka ten, pe ’den ben leisi foe Moses ibri Sabadei’ (Tori foe den Apostel 15:21).

Den ben moesoe hori so srefi a fesa foe a njoen moen (Numeri 28:11-15), a dei te den e blo den trompeti (Numeri 29:1-6), na alajari Verzoendei (Lefitikus 16), a Paska (foe memre a froeloesoe di Israèl ben kon froeloesoe foe Egipti; Exodus 12:14), èn baka ten, a Poerimfesa (foe memre a froeloesoe di den djoe ben kon froeloesoe foe a dede di den ben o dede na ini a Persia grontapoemakti; Ester 9:20-24) èn so srefi na Inwijdingfesa (foe memre na inwijding foe a tempel baka, na tapoe 25 Kislef, 165 b.G.T.; Johanes 10:22, 23). Moro fara, dri fesa ben de di den ben moesoe hori ibri jari, „fesa foe Jehovah di e kon baka wan pisi ten”: a Fesa foe den koekoe sondro swa, a Wikifesa (baka ten den ben kari en a Pinksterfesa), èn a Wiwirikampoe-fesa (Lefitikus 23), den fesa gi san Gado ben poti a wet: „Na tapoe dri okasi na ini a jari, ibri mansma foe oenoe sa moesoe kon na fesi a troe Masra, Jehovah” (Exodus 23:14-17).

Foe di den ben si a bigi waarde na jejefasi foe den fesa disi, meki foeroe foe den mansma ben sorgoe taki den heri osofamiri ben fisiti den fesa (Lukas 2:41-45). So srefi, Moses ben taki krinkrin dati baka ibri seibi jari, na a ten foe a Wiwirikampoe-fesa, den mansma, oemasma, pikin-nengre, èn den dorosei-sma di ben libi na Israèl, moesoe kon makandra na a presi di Jehovah ben sori „so taki den kan arki èn so taki den kan leri, foe di den moesoe frede Jehovah, oen Gado, èn moesoe sorgoe foe doe ala den wortoe di a wet disi e taki” (Deuteronomium 31:10-12). So boen, sani ben seti gi den Israèlsma foe kon makandra foeroe tron, foe ondrosoekoe a Wortoe foe Jehovah èn den prakseri foe en.

Bigi groepoe sma di ben kon makandra na a tempel na a ten foe den alajari fesa, ben ondrofeni foeroe prisiri èn winimarki na jejesei (2 Kroniki 30:26).

Wi moesoe taki toe dati orde ben de na den sortoe konmakandra disi foe a pipel foe Jehovah; den sma ben horibaka boen gi den sortoe konmakandra disi.

Kresten konmakandra

Na difrenti okasi, bigi groepoe sma ben kon makandra na fesi Jesus Krestes, foe di den ben froestan taki den ben o kisi foeroe winimarki, soleki ini a kefal foe a Bergitaki (Mateus 5:1–7:29). Ala di den konmakandra disi no ben de leki den konmakandra di ben seti spesroetoe, tokoe son tron den ben tan langa nofo so taki a ben de fanowdoe foe gi njanjan na den ipi sma di ben kon makandra, wan sani di Jesus ben doe di na wan wondroe fasi a ben meki njanjan kon moro foeroe (Mateus 14:14-21; 15:29-38). Nofo tron Jesus ben tjari den disipel foe en kon makandra èn ben gi den leri na jejefasi. Èn na baka a dede foe Jesus den bakaman foe en ben kon makandra, soleki tapoe a dei foe a Pinksterfesa 33 G.T., di a santa jeje ben kanti kon na tapoe den sma disi di ben kon makandra. — Tori foe den Apostel 2:1-4.

Foe san ede a prenspari foe kon makandra

A prensparifasi foe teki foeroe wini foe den sani di Jehovah seti foe kon makandra foe teki winimarki na jejefasi, ben kisi krakti na tapoe na alajari Paska. A fisiti di wan sma no ben fisiti en foe espresi, ben sa sori krinkrin taki a gowe libi Gado. Èn ala di kresten no e hori den sortoe fesa disi, soleki a Paskafesa, tokoe a ben fiti taki Paulus ben gi den a tranga foe no libi a kon di Gado pipel e kon makandra doronomo, di a ben taki: „Meki wi poti ai na makandra, foe gi makandra deki-ati foe sori lobi èn doe boen wroko, foe no libi a kon di wi e kon makandra, soleki fa son wan abi a gwenti foe doe, ma foe gi makandra deki-ati, èn dati moro foeroe, foe di oenoe e si a dei e kon krosibei.” — Hebrewsma 10:24, 25.