Eerlijkfasi — Soso te tra fasi no de, noso foe di joesrefi teki a bosroiti?
„ALA DI foe misrefi mi no de eerlijk, tokoe son leisi mi de eerlijk te tra fasi no de.” Na so a bidrigiman Autolycus na ini The Winter’s Tale foe William Shakespeare e taki. Disi e meki wan prenspari swakifasi na ini libisma kon na krin — a firi di wi abi foe doe ogri, di e kon foe wan ’feradelek ati’ (Jeremia 17:9; Psalm 51:5; Romesma 5:12). Ma disi wani taki dati wi no man doe noti na a tori? A de so, taki wi e tjari wisrefi na wan boen fasi soso te tra fasi no de? Kwetikweti!
Bifo den manpikin foe Israèl ben go na ini a Pramisi Kondre, Moses ben taki nanga den, di den ben seti kampoe na tapoe den sabana foe Moab. A ben pristeri den toe krin bosroiti di den ben moesoe teki. Den ben kan gi jesi na den komando foe Gado èn kisi en blesi, noso den ben kan weigri foe doe den èn kisi den takroe froktoe foe sondoe (Deuteronomium 30:15-20). Na den ben moesoe teki a bosroiti san den ben wani.
Leki sma di abi wan fri wani, wi so srefi kan teki wan bosroiti san wi wani. No wan sma — so srefi Gado — no e dwengi wi foe doe boen noso foe doe ogri. Ma nanga reti son sma ben sa kan aksi: ’Efoe wi ati abi a firi foe doe ogri, dan fa wi kan doe san boen?’ We, wan tifidatra e loekoe den tifi boen so taki a kan feni wan pori tifi noso wan tifi di e go na baka, bifo a pori toemoesi. So srefi, wi moesoe ondrosoekoe na agersi ati foe wi boen foe feni swakifasi èn a go di a e go na baka na moreel sei. Foe san ede? Foe di „ogri prakseri, kiri, soetadoe, hoeroedoe, foefoeroe, falsi kotoigi nanga blasfemia, e kon foe na ati”, na so Jesus ben taki. — Mateus 15:18-20.
Efoe wan tifidatra wani meki wan tifi tan, dan a moesoe poeroe ala pori di a feni. So srefi, a de fanowdoe foe abi a fasti bosroiti foe doe wan sani foe poeroe „ogri prakseri” èn takroe lostoe na ini na ati. Te wi e leisi bijbel, Gado Wortoe èn e prakseri foe disi, dan no wawan wi e kon sabi den pasi foe wi Kriaman, ma wi e leri toe foe doe san boen. — Jesaja 48:17.
Kownoe David foe Israèl ben meki gebroiki foe wan tra jepisani di de fanowdoe na ini a feti foe doe san boen. A ben begi: „Kria na ini mi, srefi wan soifri ati, o Gado, èn poti na ini mi wan njoen jeje, wan di de stanfaste” (Psalm 51:10). Ija, te wi e froetrow tapoe Jehovah Gado na ondro begi, dan wi so srefi kan wini a firi di wi abi foe doe san ogri, èn kan kweki wan „njoen jeje” foe doe san boen. Na a fasi disi, wi no sa de eerlijk soso te tra fasi no de. A sa de wan bosroiti di wisrefi teki foe doe dati.
[Prenki na tapoe bladzijde 21]
Neleki fa a ben de nanga David, na so a kan jepi wi foe doe boen, te wi e begi Jehovah