Na bosroiti foe wi foe wroko makandra nanga Jehovah
„Teki . . . tide srefi soema joe sa dini, . . . Ma foe na see foe mi nanga mi osofamiri, wi sa dini Jehovah.” — Joz. 24:15.
1, 2. Sortoe bosroiti Elia ben meki hem pipel teki, en nanga jepi foe san?
NA HERI dee dem profeeti foe Baäl ben djompo lontoe wan altari pe wan slagti-ofrandi ben de na tapoe. Dem tranga begi foe dem di dem seni go na dem Gado Baäl foe sori hemsrefi nanga a bron foe na ofrandi nanga jepi foe faja, ben go srefi so fara dati dem koti demsrefi dipi koti nanga nefi. Ma ala dem sani disi no ben jepi!
2 Dan na tem foe na profeeti Elia, na takiman foe Jehovah, ben kon. A bow wan altari en poti oedoe nanga wan slagti meti na tapoe. Baka dati a nati ala sani boen nanga watra en a begi hem Gado Jehovah. En san ben psa? Faja ben komoto foe hemel, di no ben bron wawan na oedoe nanga na slagti-ofrandi, ma srefi dem ston foe na altari. Di dem Israël soema di ben loekoe ben si disi, dem ben bari nanga tranga stem: „Jehovah de na troe Gado! Jehovah de na troe Gado” Jari-langa dem „ben djompo tapoe toe difrenti prakseri”, ma now dem ben teki na bosroiti foe teki Jehovah leki na troe Gado. — 1 Kon. 18:21-40.
3. Foe sainde wi kan taki foe libisoema, dat a habi wan fri wani, en foe sainde a de aparti ini disi?
3 Dati libisoema kan teki boen ofoe ogri en a kan teki na bosroiti foe dini ofoe na troe Gado Jehovah ofoe prisiri demsrefi en falsi gado de wan bewijsi, dati a ben meki na a prenki foe Jehovah Gado en gersi hem en dati a habi wan fri wani (Gen. 1:27). Dem meti no habi so wan moreel vermogen. Joe kan leri wan dagoe foe no go na wan sani, ma joe no kan redeneer nanga hem foe sainde a fowtoe foe foefoeroe. A sari foe taki, dati libisoema ben gebroiki na moreel fri foe dem verkeerti ini so wan siksi doesoen jari, en disi e meki wi verstan foe sainde grontapoe ini na momenti disi de ini moeilijkheid. — Loekoe Deut. 32:5.
4. (a) Soema ben gebroiki na fri disi verkeerti foe na fosi tron, en foe sainde a ben doe disi? (b) Soema de dem soema di ben waka na baka na eksempel foe hem?
4 Na fosi wan di ben gebroiki na vermogen nanga na fri disi foe teki wan see, no ben de no wan tra soema moro leki na soema di ben tron Satan Didibri. A ben teki na bosroiti foe waka baka hem eegi gridi lostoe: foe disi na sondoe foe oproeroe kon, en disi te foe kaba sa tjari hem pori kon (Joh. 8:44; Jak. 1:14, 15). Adam nanga Eva, dem soema ini dem foe Noach bifo na froedoe, dem engel di ben libi na fosi libipresi foe dem, Nimrod nanga dem bakaman foe hem baka na froedoe, dem soema foe Sodom nanga Gomorra nanga foeroe trawan moro ini dem hondro hondro jari di pasa te kon doro ini wi tem — dem alamala ben teki na bosroiti foe waka baka na eksempel foe Satan Didibri foe teki na gridi, fowtoe nanga takroe bosroiti.
DEM SOEMA DI BEN TEKI NA JOISTI BOSROITI
5. Soema ben de den wan di ben teki na joisti bosroiti?
5 Na a tra see, joe ben habi Abel, di ben teki na bosroiti foe dini Jehovah Gado en a doe disi nanga na lasi foe hem libi srefi. Baka hem ben kon Henoch, Noach nanga dem famiri-edeman Abraham, Isaak nanga Jakob. Ini dem wortoe foe na apostel Paulus ini Hebreer 11:13-16 wi kan si, dati dem famiri-edeman disi ben teki na joisti bosroiti. Moro fara joe ben habi Mozes. Aladi a ben kweki ini na kownoe-oso foe Farao en dem ben leri hem ala koni nanga sabi foe Egypte, sodati a ben de wan man di ben habi bari-nen, makti nanga goedoe, tog di a ben habi 40 jari a ben si na fanowdoe foe ben teki wan bosroiti. Sortoe see a ben teki? A ben teki na bosroiti foe dem „handri hem takroe makandra nanga a pipel foe Gado, dan foe a ben njan foe wan pisi tem boen foe sondoe, bikasi a ben si na sjen foe Kristus leki wan moro bigi goedoe leki dem goedoe foe Egypte” (Hebr. 11:25; Tori foe 7:20-29) Joe srefi ben sa doe disi?
6. Foe teki sortoe bosroiti Mozes en Jozua ben poti na fesi a pipel?
6 Na a kaba foe langa diniwroko foe hem leki na profeeti foe Jehovah en tjariman foe hem pipel, Mozes ben meki Jehovah pipel kon sabi krin na afersi disi foe teki wan bosroiti: „Mi e teki tide hemel nanga grontapoe leki kotoigi gi oenoe, dati mi ben poti na oen fesi libi nanga dede, na blesi nanga na froekoe; en oen moe teki na libi, foe lobi Jehovah, oen Gado, foe jere hem stem en foe anga na hem” (Deut. 30:19, 20). Na soema di ben teki na presi foe Mozes, Jozua, ben poti na a kaba foe hem langa diniwroko net so wan bosroiti gi na pipel Israël. Hemsrefi ben teki na joisti bosroiti leki na profeeti Elia ben doe disi hondro hondro jari na baka. — Jozua 24:15; 1 Kon. 19:10.
7. (a) Sortoe bosroiti Jezus ben teki di Didibri ben tesi hem? (b) Sortoe bosroiti hem discipel ben teki?
7 Na man Jezus Kristus ben moesoe teki wan bosroiti di Satan Didibri ben pristeri hem ala kownoekondre foe grontapoe efoe a ben sori wan fasi foe aanbegi (Matt. 4:10). Dem fosi discipel foe Jezus ooktoe ben teki na joisti bosroiti: dem ben teki hem leki na Messias, na Pikin foe Gado en dem ben teki hem leki na Tjariman en Kownoe foe dem (Joh. 1:49). Ooktoe Saulus foe Tarsus ben doe disi. Di a ben de na pasi foe go na Damaskus foe vervolgoe kristen soema, Jezus Kristus ben sori hemsrefi gi hem tapoe wan wondroe fasi. Saulus ben aksi: „San mi sa doe, Masra?” Baka di a kisi wan piki, a ben teki na bosroiti foe teki na tiri disi en waka na hem baka, en na so fasi a ben tron wan doopoe kristen. — Tori foe dem Apostel 22:10.
8. (a) Sortoe bosroiti dem soema moe teki leki wan bakapisi foe na preeki foe Gado Kownoekondre? (b) Foe sainde a de tranga fanowdoe foe doe disi?
8 Leki wan bakapisi foe na preeki „foe na boen njoensoe disi foe na kownoekondre”, dan alamala soema di jere na boskopoe disi, e kon na fesi na problema foe teki wan bosroiti. Sortoe bosroiti? Efoe dem sa waka baka wan libi foe retidoe en dem sa dini Jehovah Gado — Na Meki-man foe na universum en di de ooktoe na soema di e sorgoe foe hem en di de Soeverein ofoe dem sa tan waka wan gridifasi foe libi ondro na tiri foe Satan Didibri, na „gado foe na seti foe sani disi”. Na okasi disi foe teki wan bosroiti no sa tan teego, bikasi ai kon krin ini na kon troe foe dem bijbel profétitori, dati wi de libi ini „na bosroiti foe na seti foe sani disi”, ini „dem takroe, moeiliki tem foe dem laatste dee.” Ja, wi de ini na tori. Wi moe teki wan bosroiti, pe wi no kan poeroe wisrefi na ini. — Matt. 24:14; 2 Kor. 4:4; Matt. 13:39; 2 Tim. 3:1.
FOE SAINDE FOE TEKI NA BOSROITI FOE WROKO MAKANDRA NANGA JEHOVAH
9, 10. Sortoe stap wan soema moe doe te a poti prakseri tapoe na preeki foe na „boen njoensoe”?
9 Te wan soema poti prakseri tapoe na preeki foe „na boen njoensoe” foe na Kownoekondre, a de kisi wan joisti sabi foe Gado Wortoe en a de kisi jepi foe poti na sabi disi ini hem libi. Disi foe hem see kan tjari na soema foe habi opregti berouw foe sortoe fowtoe fasi foe libi ooktoe, di wan soema ben libi, en dan na soema e drai hemsrefi ofoe a de bekeer hemsrefi foe waka wan pasi di e prisiri Jehovah Gado. Na apostel Petrus ben taigi dem djoe ini hem tem: „Habi berouw en drai joesrefi, foe joe sondoe moe figi poeroe.” — Tori foe dem Apostel 3:19.
10 Dem toe stap disi sa tjari wan soema so fara foe bosroiti foe doe Gado wani, foe wroko makandra nanga hem en foe waka ini dem foetoe-stap foe Jezus Kristus. So wan bosroiti moe de wan formele stap di de krin foe si, wan stap di Jezus ben doe di a ben habi dritenti jari, di na tem ben kon, dati a ben sa taki leki wan foe dem profeeti-tori ben skrifi foe hem: „Loekoe! Mi ben kon (ini na lolo foe na boekoe ben skrifi foe mi) foe doe joe wani, o mi Gado” (Hebr. 10:7; Ps. 40:7, 8). Foe waka baka na eksempel disi foe Jezus, wani taki, dati wan soema moe gi hemsrefi abra na Gado foe doe hem wani en na soema sori na gi hem srefi abra disi nanga doopoe ini watra. A de soso wan verstan sani, wan sani di joisti nomo, en di e sori lobi foe doe na stap disi.
11-13. Foe sainde a de (a) soso wan verstan sani, (b) soso wan joisti en boen sani, (c) soso wan lobifasi en wan bewijsi foe sori tangi foe gi joesrefi abra en dopoe?
11 A de troe, dati a de wan verstan sani foe doe disi nomo? Ja, Jehovah Gado sabi san boen gi wi. Hem Wortoe e sori krin krin fa a de wan don sani foe waka wan gridi, onregvaardiki pasi. Foe datede wi e leesi, dati „dini Gado nanga frede . . . de boen foe ala sani, foedi a habi wan pramisi gi na libi foe now en di e kon” (1 Tim. 4:8). Jehovah ben taki foe datede nanga mofo foe profeeti ini owroetem: „Mi, Jehovah, de wan Gado, Na Soema di e leri joe fa foe kisi wini gi joesrefi” (Jes. 48:17). Wi e kisi jepi foe wi kisi wini gi wisrefi te wi e go foe rai na „dem santa boekoe”, dem Boekoe di ben skrifi nanga santa jeje (2 Tim. 3:15-17). Dem e memre wi dati „san wan soema e sai, a so koti toe” (Gal. 6:7). Ja, „na blesi foe Jehovah — dati e meki joe goedoe, en a no e poti sari na tapoe” (Spr. 10:22). Te wan soema teki na bosroiti foe wroko makandra nanga Jehovah, a de waka soboen baka wan verstan fasi foe libi.
12 En ooktoe a de wan joisti en boen sani nomo foe gi wisrefi abra na Jehovah foe doe hem wani. A de troe troe so, dati wi de verplekti foe disi na Jehovah. Foe sainde? Bikasi, foedi Jehovah Gado ben meki ala sani, a de na eeginari foe na grontapoe disi en foe ala sani di de na tapoe. A no ben meki wi wawan foe wi ben sa doe wi eegi afersi, ma ooktoe dati wi dini hem prakseri en ben sa doe hem wani. A no ben meki dem sani wawan na a bigin, ma a de sorgoe ala sani toe, foedi a de gi, foe kari wan toe, son nanga alen. Foe datede wi e leesi: „Joe, Jehovah, ja wi Gado, de warti foe kisi na glori en na grani en na krakti, bikasi joe ben meki ala sani, foe di joe ben wani meki dem de en joe ben meki dem.” — Openb. 4:11.
13 Boiti dati, a de wan sani pe wi de sori lobi nanga tangi te wi de gi wi srefi abra na Jehovah foe doe hem wani en disi nanga jepi foe doopoe ini watra. Te wi prakseri ala lobi di Jehovah Gado ben kanti trowe pasa marki tapoe libisoema foe meki dem kan libi en dati a kan de wan prisiri wan (Tori foe 17:17), te wi prakseri na pasensi di a ben sori libisoema ini dem siksi doesoen jari di pasa (2 Petr. 3:8, 9) en te wi prakseri, dati a lobi wi sote, dati a ben gi hem wan-enkri lobi Pikin foe de wi Jepiman en Verloesoeman (Joh. 3:16) dan na sortoe bosroiti wi moe kon dan? Na moro pikin sani di wi kan doe foe hori wi respeki, de foe wi gi wisrefi abra na wi lobi hemel Tata foe kan doe hem wani en sori dati wi gi wisrefi abra foe teki doopoe ini watra.
GI JOESREFI ABRA EN DOOPOE DE TRANGA FANOWDOE
14, 15. (a) Sortoe aksi son soema ben sa kan aksi foe na fanowdoe foe gi demsrefi abra en doopoe? (b) Sortoe eksempel ini bijbel e sori, dati a de fanowdoe foe gi wisrefi formeel abra foe doe Gado wani?
14 Ma wi no ben kan prisiri Jehovah Gado en wi no ben kan kisi na paiman foe teego libi, soso foe libi wan krin libi, en bribi ini Gado nanga Jezus Kristus en de makandra nanga Gado pipel, en foe verteri trawan na „boen njoensoe”, sondro dati wi gi wisrefi formeel abra na Gado foe doe hem wani en meki dem doopoe wi? Son soema, a sori, e prakseri troe troe so, foedi dem e frigiti foe gi demsrefi abra na Jehovah en meki dem doopoe dem, aladi dem de doe dem tra sani disi. Ma ini disi dem fowtoe.
15 Te wi wani Jehovah Gado pai wi, dan wi moe sori bribi ini hem en lobi hem so, dati wi gi wisrefi abra na Gado foe doe hem wani, en go waka ini dem foetoe-stap foe Jezus Kristus. Tapoe na bergi Sinaï Jehovah Gado ben gi na naatsi Israël foe eksempel dem wet foe hem en a ben verteri sortoe paiman dem ben sa kisi te dem ben sa jere hem wet. Dem Israël soema ben agri formeel ini na doe foe na wani foe Gado, foe dem ben sa kisi na tiri, na kibri nanga na blesi foe Gado. Dem foetoeboi foe hem ini disi tem moe meki ooktoe so wan verbontoe (Ex. 19:3-8). Dem moe poti prakseri tapoe na komando foe Jezus, dati dem soema di wani hori hem komando, foe bigin, moe meki dem doopoe hem. — Matt. 28:19, 20.
16, 17. (a) Sori fa dem soema di wani dini Gado sondro foe doopoe de inconsequent? (b) Fa wi kan tjari Romeini 10:9, 10 kon tapoe na tori disi? (c) Fa wi kan agersi na mankeri foe opregtifasi foe son sma di e drai drai foe doopoe?
16 Wi ben sa kan agersi na tori so: wan seker man di e waka tapoe wan boiti-pasi, e si wan bigi groepoe soema makandra e koti aleesi. Ai firi tranga dati a moe go wroko makandra nanga dem, en foe datede a de wroko someni dee nanga dem, te leki ala aleesi koti. Ma a kan verwakti, te a tem doro dati dem wrokoman kisi dem moni, dati dem sa pai hem moni toe? Nono, bikasi dem no ben teki hem na wroko. A no ben meki wan kontrakt nanga na basi foe na wroko foe kisi wan pai. A no ben kon ondro na normale regeling, di e meki wan wrokoman kisi pai. Na so a de nanga dem soema di wani tron foetoeboi foe Gado. Foe datede Romeini 10:9, 10 no e kon so maar troe tapoe ibri bekenti nanga mofo ini publiki, ma dem tekst disi e kon troe tapoe wan formeel bekenti nanga mofo ini publiki, soleki te wan soema gi hemsrefi abra na Gado foe doe hem wani en a doopoe. „Bikasi, efoe joe meki bekenti ini publiki na ’wortoe dati ini joe eegi mofo’, dati Jezus Kristus de Masra en joe e sori bribi ini joe ati, dati Godo ben opo hem baka foe dede, joe sa kisi libi. Bikasi nanga ati wan soema e sori bribi foe kon regvaardiki, ma nanga na mofo wan soema en meki bekenti na publiki foe kisi libi.” Nanga na bekenti disi na publiki wan soema e sori krin, dati a ben teki na bosroiti foe wroko makandra nanga Jehovah Gado. Ja, wi no kan verwakti dati Jehovah sa pai wi nanga teego libi, efoe wi e poti na wan see foe meki wan verbontoe officieel foe wroko makandra nanga hem.
17 Ofoe, foe wi gebroiki wan tra agersi tori: wan jonkoeman e tan go loekoe wan meisje. A de taki dati a lobi hem tranga. Ai teki hem tja go njan, a de go nanga hem na kino en a de gi hem kado. Tra soema e prakseri dati ai sori dati a lobi hem, ma noiti a de taki na tori foe trow. Joe kan taki dati a lobi na meisje? A meisje kande seker e prakseri na wan trow. Ma hem foe hem see, no wani lasi hem fri; a no wani tai hemsrefi na hem. Ala dem sani di ai taki dati a lobi hem, de foe dat-ede leegi, dem no de opregti. Na srefi de so gi wan soema di taki dati a lobi Jehovah Gado en dati ai waarderi ala san Jehovah doe gi hem. Efoe a no gi hemsrefi abra na Gado ini wan redelijk pisi tem en nanga dati waka ini dem foetoestap foe Jezus, dan ala san a de taki de soso sani, dem sani di ai taki e sori dati a mankeri lobi, vertrouw nanga bribi ini Jehovah Gado en kan de troe troe no opregti.
18. San 1 Petr. 3:21 e sori foe na fanowdoe foe doopoe?
18 Boiti dati, na doopoe de troe troe fanowdoe foe habi wan boen konsensi na fesi foe Gado. Na apostel Petrus e meki na punt disi kon krin ini 1 Petrus 3:21: „Ooktoe now joe libi e kibri nanga na sani di e akroederi nanga disi, (dati wani taki, na froedoe ini Noach dee), da foe taki, na doopoe (no soso na poeroe foe na doti foe skin, o prenspari dati kan de ooktoe, ma a aksi na Gado foe wan boen konsensi), nanga na krakti foe na opobaka foe Kristus.”
19. (a) Fa na agersifasi foe doopoe fiti? (b) Sortoe practisch see de na hem?
19 Na doopoe de wan toemsi boen marki, dati wi ben teki na bosroiti foe wroko makandra nanga Gado foe gi wi srefi abra na hem foe doe hem wani, aladi wi de waka baka dem foetoestap foe Jezus Kristus. Agersi dem e beri wi, te wi go ini na watra en dem saka wi go na ondro. Wi e dede gi na fositem fasi foe libi foe wi; na doopoe de wan marki foe na gridifasi foe libi foe wi, di wi ben teki na bosroiti foe doe san WI ben feni boen. Na opo wi kon na tapoe foe na watra e agersi boen, dati wi kon na libi foe doe na wani foe Gado, foe wi kan waka „ini na njoenfasi foe libi”. Wi kan taki toe dati na doopoe ini watra habi wan practisch see toe, foedi wan soema ben sa kan frigiti dati a ben akroederi nanga Gado foe doe hem wani, ofoe dati a ben sa kan frigiti srefi dati a ben skrifi hem nem na ondro wan papira pe disi ben skrifi! Foer sani wi no e frigiti di wi ben taki ofoe skrifi! Ma wan soema kan frigiti, dati wan tron, baka di a ben jere na doopoe-lezing, en ben begi makandra nanga ala tra soema, ben kenki hem krosi foe weri wan swen-krosi en dati a ben doopoe ala di foeroe soema ben de leki kotoigi? Dati no kan! Baka te wan soema doe so wan stap, a de verplekti foe libi akroederi nanga dati en wroko makandra nanga Gado. San alamala de ini na tori disi, wi sa si ini na tra artikel, di wi e go loekoe now.