Doe na wroko foe Jehovah tapoe Jehovah fasi
„Meki wi habi dan na srefi jejefasi, someni foe wi di lepi foe dati, en . . . meki wi . . . ini na fasi fa wi ben go na fesi kaba, go doro foe waka na wan ordefasi ini na srefi routine.” — Filippi 3:15, 16.
1, 2. Sortoe wroko di prati na toe Gado e aksi now foe kristen soema di gi demsrefi abra, soleki sortoe tekst e sori dati?
SAN na dem wroko foe Jehovah gi dem soema di ben gi demsrefi abra foe doe hem wani en di wani waka ini dem foetoestap foe hem Manpikin Jezus Kristus? A de wan wroko, di Jezus no ben taki na fesi wawan, ma di a komanderi foe doe en di de ini toe pisi.
2 A ben taki na fesi: „Na boen njoensoe disi foe na kownoekondre sa preeki tapoe na heri grontapoe pe libisoema e libi leki wan kotoigi gi ala naatsi, en dan na kaba sa kon” (Matt. 24:14). Te wan soema teki prati na a preeki foe na boen njoensoe foe na Kownoekondre, dan a habi soboen wan prenspari pisi na a doe foe na wroko foe Jehovah ini disi tem. Dem fositen discipel foe hem, Jezus ben gi moro fara na komando: „Go foe datede en meki discipel foe soema foe ala naatsi, en doopoe dem ini na nem foe na Tata en foe na Pikin en foe na santa jeje, en leri dem foe hori ala dem sani di mi ben komanderi oen” (Matt. 28:19, 20). Kristen soema no moe preeki wawan, ma dem moe leri soema dem sani toe, di demsrefi ben leri. Dem moe jepi tra soema foe doe dem sani, di Jezus ben komanderi hem apostel nanga discipel foe doe na a bigin.
3. San na bijbel e sori foe na fasi fa Jehovah wroko moe doe?
3 Fa na wroko foe Jehovah Gado moe doe? Ibri kristen moe doe na wroko disi soleki hemsrefi wani foe doe hem ofoe ai feni dat so a moe doe? Nono! Na presi foe dati, na Wortoe foe Gado e verteri wi fa wi moe doe hem. Na gronprakseri disi ben kon na fesi kaba ini dem dee foe Mozes, bikasi ini Deuteronomium 12:8 wi e leesi: „Oen no mag doe na ala dem sani di wi doe tide dja, ibri wan soema san de reti ini hem eegi ai.” Na presi foe dati, wi moe doe san Deuteronomium 6:18 e komanderi: „Oen moe doe san de reti en boen ini Jehovah ai, foe a kan waka oen boen.” Na apostel Paulus e sori dati dem gronprakseri disi habi foe doe nanga na kristen gemeente toe: „Now mi e vermane oen, brada . . . dati oen alamala e taki akroederi nanga makandra en dati pratifasi no moe de na oen mindri, ma dati oen de wan makandra ini na srefi memre en ini na srefi fasi foe prakseri” (1 Kor. 1:10). En ini Filippi 3:15, 16 Paulus e sori dati wanfasi ini denki, taki nanga doe, de wan marki foe lepi kristen. Na wanfasi disi foe doe en prakseri de toemsi prenspari foe doe na wroko foe Jehovah Gado tapoe hem fasi.
POTI NA WROKO FOE GADO TAPOE NA FOSI PRESI
4. (a) Sortoe presi na wroko foe Gado moe teki ini wi libi? (b) Sortoe sani nanga reti kan teki abra dem sani di wi habi?
4 Nanga sortoe sani wi habi foe doe nanga dem, foe doe Jehovah wroko tapoe Jehovah fasi? Na a fosi presi wi moe poti hem tapoe na fosi presi ini wi libi. Foe disi Jezus ben gi na tranga: „Tan soekoe dan fosi na kownoekondre nanga hem retidoe” (Matt. 6:33). Wi habi soso someni tem, someni skin en verstan krakti ofoe energie en soso someni foe dem goedoe foe grontapoe disi. Someni. sani de di nanga reti e teki na tem foe wi. Foe eksempel: wan papa moe sorgoe foe hem osofamiri, no wawan ini jejefasi, ma ooktoe ini skinfasi en a moe sorgoe dati dem habi wan seker fasi foe ontspanning. Disi dem e aksi alamala foe hem. — Loekoe 1 Timoteus 5:8.
5. (a) Fa wan kristen soema kan poti Jehovah wroko tapoe na fosi presi te joe loekoe hem grontapoe wroko? (b) Fa wan papa ben si boen foe dati?
5 Ma srefi ini dem sortoe verplekti disi wan kristen soema kan teki wan bosroiti tapoe bepaalde sani. Foe kan gi Gado kownoekondre na fosi presi ini wi libi, dan wi ben sa kan teki foe eksempel na sortoe wroko di sa meki wi habi someni tem abra foe teki prati na a preekiwroko en a meki foe discipel en foe sorgoe foe dem jeje afersi foe wi osofamiri. Wan papa di ben wroko ini wan laboratorium leki analist, libi a wroko dati en a bigin wroko foe hemsrefi en doe ala sortoe pikin wroko, foe a ben kan gi moro tem na a sorgoe foe dem jeje afersi foe hem fo manpikin en hem oemapikin. San ben de na bakapisi? Dem pikin ooktoe ben gro kon de toemsi boen kristen wrokoman.
6. Sortoe bosroiti wi moe teki tapoe na tori foe na gebroiki foe wi tem?
6 Dan wi habi na afersi foe wi fri tem. Wi habi alamala ontspanning fanowdoe, ma omeni? A de kon ini wi libi tapoe na fosi presi? Wi e de so bezig nanga na ontspanning di wi lobi sote, dati wi jeje afersi e go nanga disi na baka? Ofoe wi de poti fosi prakseri na dem jeje fanowdoe foe wi en baka dati, efoe tem de ete, hori wi srefi bezig nanga wan ofoe tra fasi foe ontspanning? Moro foeroe, wan bosroiti moe teki, bikasi gewoonlijk a no de disi EN dati, ma disi OFOE dati. Wi e si na wroko foe Gado foe libi akroederi na „boen njoensoe” en foe panja hem leki na loen foe wi libi en dem tra sani leki na merki sondro loen? Ofoe sondro foe prakseri wi e meki prisiri kon de na loen foe wi tem, wi krakti nanga sani di wi habi, en na wroko foe Gado leki na merki sondro loen? Wi e meki na kragi de troe tapoe wi dati „wi lobi prisiri moro leki wi lobi Gado”? — 2 Tim. 3:4.
BALANS EN TAPOE NA JOISTI TEM
7, 8. (a) Te wi wani doe wroko tapoe Jehovah fasi, san dati e aksi foe wi tapoe dem fasi fa wi e prati na „boen njoensoe” nanga trawan? (b) en tapoe na gebroiki foe na joisti tem?
7 Jezus ben taki dati a no ben doe no wan sani foe hemsrefi. A ben waka soifri baka na tiri foe hem Tata (Joh. 14:10). We doe boen foe studeri na eksempel foe hem e foe doe na preeki foe a „boen njoensoe” tapoe na srefi fasi. Tapoe so wan fasi wi sa doe na wroko foe Jehovah tapoe na fasi foe Jehovah. Jezus no ben wakti te leki soema ben kon na hem, en a no ben preeki soso gi soema di a ben sabi kaba. A ben go „foto foe foto en foe dorpoe foe dorpoe, aladi a ben preeki en meki bekenti na boen njoensoe foe na kownoekondre foe Gado” (Luk. 8:1). Dem discipel foe hem ben waka na hem baka en bigin foe preeki gi tra soema foe na boen njoensoe; dem ben gi kotoigi na groepoe soema tapoe dem wowojo en tra presi pe soema ben konmakandra (Tori foe dem Apostel 16:13-15; 17:17-21). Ini disi tem Jehovah Kotoigi e gebroiki demsrefi gronprakseri. Foe prati na „boen njoensoe” gi trawan demsrefi e bigin foe taki, ofoe dem soema disi de sabiman ofoe vreemde soema gi dem. Ini dem ala dee wroko dem habi contact nanga famiri en birti, soema di dem e doe zaak nanga dem, tra skoropikin, en dem e proberi foe gebroiki dem contacti disi boen foe prati bijbel waarheid nanga trawan tapoe wan fasi di fiti. Ma efoe wi ben sa preeki tapoe dem fasi disi gi soso dem soema disi, dan a no ala soema ben sa jere na „boen njoensoe”. Son soema oen no ben sa miti noiti efoe wi no ben sa go na dem oso wisrefi. Foedi di Jehovah kotoigi habi na sortoe lobi di e go na ala sortoe soema, dem e doe moeiti foe miti ala soema nanga na Kownoekondre-boskopoe. Na prati di joe habi na a wroko disi e sori na kristen balans loekoe foe joe? — Matt. 5:46-48; 1 Tim. 2:3, 4.
8 Na afersi foe teki na joisti tem de krosibee nanga na tori foe balans. Troe troe „wan vaste tem de foe ibri afersi ondro hemel” (Pred. 3:1-8). Te wi de tapoe wan kristen gemeente-konmakandra en wan kristen preekiman e hori wan lezing, dan akroederi nanga na gronprakseri disi wi kan taki dati a no de na tem foe djonko, ofoe taki safri nanga makandra ofoe leesi wan sani di no habi noti foe doe nanga na tori di e taki. Ooktoe a de so, dati dem neti, di konmakandra e hori no de boen tem foe meki gobaka ofoe teki prati na tra kristen wroko, di kan doe net so boen na wan tra tem. Spesroetoe owroeman moe poti prakseri tapoe na doe foe sani tapoe na joisti tem. Kande foeroe tron sani kan kori dem foe go de bezig nanga gemeente afersi leti mindri dem konmakandra. Te dem seti dem tem moro betre, dan dem sani disi kan doe moro boen tapoe wan tra tem.
DOE GADO WROKO NANGA VREDE EN NANGA PRISIRI
9, 10. Foe sainde wi moe doe Jehovah wroko nanga vreede? Foe sainde son tron dati de wan problema?
9 Jezus ben gi hem apostel na rai: „Hori vreede mindri makandra” (Mark. 9:50). Jehovah Gado no de na „Gado foe vreede” en hem Manpikin „na kownoe foe vreede”? (Fil. 4:9; Jes. 9:6). En Jezus no ben taki kolokoe dem soema, di lobi vreede, ofoe di e meki vreede kon? (Matt. 5:9; Nieuwe vertaling foe na Nederlands Bijbelgenootschap). Disi wani taki dati wi moe habi belangstelling en wi moe doe moeiti foe kibri na vreede mindri makandra.
10 Foe sainde a de gi wi problema foe wroko nanga makandra? Wan reden de kande dati wi alamala habi difrenti eegi-fasi. Foe datede, wi no moe hori na prakseri, dati tapoe difrenti fasi joe kan redeneer en doe sani, aladi wi e sori dati wi e verstan dati, na presi dati wi e soekoe fowtoe? Ete wan reden foe sainde son tron a de gi problema foe hori vreede, de dati wi e lostoe tranga dati Gado wroko doe tapoe na moro boen fasi. Kande dati de ooktoe so. Ma son tron moro leki wan fasi de foe doe wan sani. Te dati de so, dan a de moro prenspari, dati wi wroko makandra ini vreede, dan dati wan sani moesoe doe tapoe na moro boen fasi di de.
11. Foe vreede ede, san wan owroeman moe de klari foe doe?
11 Spesroetoe dem owroeman, te dem e kon makandra foe loekoe afersi foe na gemeente, moe hori na prakseri, dati a de prenspari foe hori vreede. Efoe na tori no habi foe doe nanga wan gronprakseri, ma a de soso wan afersi foe fa joe e si na sani ofoe moro bigi ofoe moro pikin kostoe, dan wan verstan soema sa agri nanga na soema di habi wan spesroetoe prakseri tapoe na tori en joe e doe disi soso foe kibri na vreede. Efoe wi e tan tapoe dati sani doe tapoe na fasi foe wi, dan wi kan meki trawan firi demsrefi ferferi en wi kan de srefi frantwortoe dati wi brada kon tron vreemde soema gi wi. Na wini di wi wini sa de waarti foe ala dem sani disi? Kwet-kweti! Foe doe Jehovah wroko tapoe hem fasi wani taki foe datede toe, dati wi e feti foe doe hem tapoe wan vreede fasi, aladi wi e hori ini prakseri Psalm 133:1: „Loekoe! O boen en o switi a de te brada e libi ini wanfasi nanga makandra!”
12. Foe sainde a de wan redelijk sani foe doe Jehovah wroko nanga prisiri?
12 Ete wan tra sani ini na doe foe na wroko foe Jehovah de, dati wi doe hem nanga prisiri. Soleki wan ongolokoe oso-mama e trowe wan takroe leti tapoe hem masra, na so a de gi Gado sjen te wi e dini hem sondro prisiri. Na apostel Paulus e taki heri boen ooktoe: „Prisiri alatem ini Masra. Ete wan tron, mi sa taki: Prisiri joesrefi!” (Fil. 4:4). En omeni reden kristen soema no habi dan foe de nanga prisiri. Na „waarheid meki dem kon fri” troe troe (Joh. 8:32), dem habi pardon foe sondoe (Tori foe dem Apostel 13:38), dem e si dati na sabi foe na waarheid dee foe dee e kon moro foeroe (Dan. 12:4), dem e prisiri ini switi demakandra nanga demsrefi (Rom. 1:11, 12), dem e ondrofeni na moro bigi prisiri di e kon foe gi trawan sani (Tori foe dem Apostel 20:35), dem e njan boen foe dem blesi foe wan jeje paradijs (2 Kor. 12:4) en foedi dem e tan getrouw, dem sabi dati dem e meki na ati foe na bigi Gado Jehovah prisiri. — Spr. 27:11.
DOE GADO WROKO NANGA KRIN ANOE
13. Ini sortoe fasi dem Israël soema foe owroe tem ben libi sani foe doe en sortoe gebod disi ben meki kon foe na see foe Jehovah?
13 Efoe wi wani doe Jehovah wroko tapoe hem fasi, dan wan sani foe hem de, dati wi doe hem nanga krin anoe, dati wani taki, boen. Someni soema no ben doe dati. Aladi wi kan de faja faja ini Jehovah wroko, ma efoe wi no libi akroederi nanga dem moreel gronprakseri, foe na bijbel dan a de foe soso. Jehovah Gado ben sori na punt disi krin ini na tori nanga na pipel Israël ini owroetem. A ben verteri dem dati a ben tegoe foe dem difrenti fasi foe aanbegi foe dem en a ben taki moro fara: „Wasi oensrefi, krin oensrefi, poeroe na takroedoe foe oenoe na mi fesi, kaba foe doe ogri.” — Jes. 1:13-16.
14. Fa Paulus ben sori wan libi en waka di ben de wan eksempel en disi ben akroederi nanga sortoe komando di ben gi ini owroetem?
14 Jehovah Gado de wan santa, soifri en regvaardiki Gado, en a de gi komando dati hem foetoeboi de ooktoe santa en soifri. „Oen moe de santa, bikasi mi de santa” (1 Petr. 1:16). Wi alamala de onvolmaakti en foe datede wi moe stree wan troe troe stree foe tan santa en soifri. Son tron wi sa firi wisrefi leki na apostel Paulus di a ben skrifi, dati dem sani di a ben wani doe, a no ben e doe, aladi na a tra see, a ben doe dem sani, di a no ben wani foe doe (Rom. 7:19). Ma a no ben tapoe feti nanga na sondoe di a ben kisi, bikasi a ben skrifi: „Mi de handri tranga nanga mi skin, en mi e tjari hem leki wan srafoe, foe mi no keur af tapoe wan ofoe tra fasi, baka di mi ben preeki gi trawan” (1 Kor. 9:27). Dem djoe di ben drai komoto foe na Babylon foe owroetem ben kisi na komando: „Hori joesrefi krin, oenoe di e tjari dem wrokosani foe Jehovah.” Aladi na komando disi tapoe na fosi presi ben kan habi foe doe nanga na krinfasi na ini na dini foe Gado, tog na gronprakseri disi kan habi foe doe ooktoe tapoe moreel krinfasi. — Jes. 52:11.
15. Sortoe extra reden de foe wi loekoe boen fa wi e waka en libi?
15 A de toemsi boen dati wi tan krin, no wawan foe na krin boskopoe di wi e tjari, ma ooktoe foe no meki trawan naki foetoe fadon. Jezus ben warskow, dati a ben de wan ernstig sani foe meki wan foe dem pikin-wan foe hem naki foetoe fadon (Luk. 17:1, 2). Paulus ben de voorzigti ini na tori disi, soleki e kon na krin ini hem wortoe: „Ini no wan fasi wi e gi reden foe naki foetoe fadon, foe soema no feni fowtoe tapoe na diniwroko foe wi, ma ini ala fasi wi e pristeri wisrefi leki dinari foe Gado: nanga foe verdrage foeroe . . . nanga soifrifasi . . . nanga lobi di fri foe falsi fasi.” Doe Jehovah wroko tapoe Jehovah fasi, wani taki troe troe, dati wi loekoe boen foe doe Jehovah wroko nanga krin anoe, sodati wi no poti sjen tapoe Jehovah nanga hem gemeente en no meki trawan naki foetoe fadon. — 2 Kor. 6:3-10.
DOE JEHOVAH WROKO SONDRO GRIDIFASI
16. San kownoe David ben aksi Gado foe wani doe gi hem en san disi ben wani taki?
16 En boiti dati, a sa de so, dati na doe foe na wroko foe Jehovah no sa tjari wini gi wi srefi srefi te wi no doe hem nanga lobi, sondro gridifasi en nanga wan soifri ati. David ben verstan o prenspari disi ben de, en foe datede a ben begi: „Leri mi, o Jehovah, foe na pasi foe joe. Mi sa waka ini joe waarheid. Tjari mi ati kon na wan foe frede joe nem” (Ps. 96:11). Foe doe diniwroko nanga toe ati, ben sa wani taki, dati wan soema e meki gridifasi pasa go ini hem ati. A ben sa kan sori, dati a habi tra prakseri. Foe datede wi e kisi na komando foe lobi Jehovah Gado nanga wi heri ati, wi heri sili, wi heri verstan en wi heri krakti. — Mark. 12:29-31.
17. Foe sainde a no makriki foe loekoe boen tapoe dem beweegi foe wi ati?
17 A no de wan makriki sani foe doe disi. Dem Israëlsma alatem ben misi foe doe disi. Foe sainde? Foe di na onvolmaakti libisoema ati de toemsi bidrigi en nanga korifasi, soleki ini Jeremia 17:9 wi kan leesi. En soleki Jeremia e sori moro fara, dan na Jehovah Gado kan verstan wawan krin krin na ati. Foe datede meki wan studi foe hem Wortoe sa jepi wi foe leri sabi dem gridi lostoe ofoe plan foe wi en jepi wi foe stree tapoe wan boen fasi nanga dem. Ja, leki wan bakapisi foe dem fadon lostoe foe wi ati, alatem na gevaar de, dati dem boen wroko foe wi no habi krakti en kan pori. Gridi beweegi foe ati ofoe tra prakseri ben de na oorzaak foe dem moeilijkheid foe dem kerki edeman ini Jezus dee en dati ben de na reden foe sainde dem ben kaka foetoe gi Jezus. Na srefi sani wi kan taki foe dem kerki-leriman foe na kristenheid ini disi tem. Agersi leki dem e dini Gado, ma efoe joe loekoe hem boen, dan dem e broko dem ede moro foeroe nanga dem eegi afersi foe dem. — Matt. 23:13-33.
18. Fa na apostel Paulus e sori krin dati wi moe dini Jehovah Gado sondro gridifasi?
18 O krin na apostel Paulus e sori na prensparifasi foe joisti beweegi foe ati: „Wans mi ben taki dem tongo foe libisoema nanga di foe dem engel, ma mi no habi lobi, dan mi de leki na sten foe wan pisi kopro ofoe leki wan gengen di e lui. En wans mi habi na gave foe profeetitaki en mi sabi ala kibritori en ala sabi, en wans mi habi ala bribi, sodati mi kan opo bergi poeroe na dem presi, ma mi no habi lobi, dan mi no de noti. En wans mi gi ala mi goedoe foe gi trawan njanjan en wans mi gi mi skin abra foe kan meki bigi, ma mi no habi lobi, dan a no de tjari wini gi mi kwet-kweti!” — 1 Kor. 13:1-3.
19. Sortoe rai moro fara na bijbel e gi foe na sortoe lobi di wi moe sori?
19 Nanga reti Paulus e gi na rai foe datede: „Meki ala joe afersi go makandra nanga lobi” (1 Kor. 16:14). Ma Paulus kaba nanga disi? Nono, bikasi a de verstan sortoe korifasi na fadon ati foe wi habi en a de taki: „Joe lobi moe de sondro falsifasi” (Rom. 12:9). O makriki a de foe sori lobi di no komoto foe wan ati nanga wan joisti beweegreden! Foe datede Paulus ben feni hem prenspari foe pristeri na lobi foe hem di de „fri foe falsifasi” leki wan dinari foe Gado (2 Kor. 6:6). Ja, na lobi foe wi moe de „lobi, di komoto foe wan krin ati”, en soleki na apostel Petrus e taki hem, den na lobi foe wi moe de wan „brada lobi sondro korifasi”. — 1 Tim. 1:5; 1 Petr. 1:22.
20. San ai aksi foe wi efoe wi loekoe hem sjatoe foe doe Jehovah wroko tapoe Jehovah fasi, en sortoe winimarki disi sa tjari gi wi?
20 A wani taki foeroe sani foe doe Jehovah wroko tapoe Jehovah fasi! Jehovah Gado e aksi foe wi dati wi poti hem na a fosi presi ini wi libi, dati wi doe hem tapoe wan verstan, vreede en prisiri fasi, en dati wi doe hem nanga krin anoe en wan soifri ati. Te wi doe so, den wi kan abi now foeroe prisiri en ini na njoen seti foe sani, di de so krosbee, wi kan kisi hem boen ati en teego libi.