„Du ala sani fu gi Gado glori”

LEKI futuboi fu Gado di gi densrefi abra na en, wi musu sori a glori fu Yehovah na ini ala san wi e taki èn e du. Na apostel Paulus ben taki wan prenspari sani di kan yepi wi fu du dati. A ben skrifi: „Awansi unu e nyan noso unu e dringi, noso awansi san unu e du, du ala sani fu gi Gado glori” (1 Kor. 10:31). Disi wani taki dati wi o abi fu hori wisrefi na den wet fu Yehovah di reti èn di e sori wi fa a de (Kol. 3:10). Leki wan santa pipel, wi musu teki na eksempre fu Gado.​—Ef. 5:1, 2.

² Na apostel Petrus ben sori Kresten taki a sani disi de fanowdu. Dati meki a skrifi: „Un musu de leki pikin di e gi yesi. Den lostu di unu ben abi na a ten di unu no ben sabi noti fu Gado, no musu basi unu moro. Ma neleki fa a sma di kari unu de santa, na so un musu kon santa tu na ini ala san unu e du, bika Gado Buku taki: ’Un musu de santa, bika mi santa’” (1 Petr. 1:14-16). Neleki Israel fu owruten, den wan na ini a Kresten gemeente musu tan sori taki den de krin. Disi wani taki dati den no musu doti densrefi nanga den pori sani fu a grontapu disi. Na a fasi dati den e kon santa fu kan du diniwroko gi Yehovah.​—Eks. 20:5.

³ Wi e tan krin te wi e hori wisrefi na den wet fu Yehovah di skrifi finifini na ini den Santa Buku fu Bijbel (2 Tim. 3:16). Di wi studeri Bijbel wi kon leri sabi Yehovah èn a fasi fa a e du sani. A sani disi meki taki wi kon moro krosibei na en. Den sani di wi leri meki taki wi e poti a Kownukondre fu Gado na a fosi presi na ini wi libi èn taki a wani fu Yehovah tron a moro prenspari sani gi wi (Mat. 6:33; Rom. 12:2). Disi wani taki dati wi musu de sma di e du muiti fu kon abi nyun fasi.​—Ef. 4:22-24.

WI ANBEGI MUSU KRIN ÈN WI MUSU TYARI WISREFI SOLEKI FA GADO WANI

⁴ A no makriki ala ten fu hori wisrefi na den wet fu Yehovah. A gensman fu wi, Satan Didibri, e suku fu meki wi gowe libi a tru anbegi. Na ogri grontapu disi èn wi eigi sondu firi e meki taki a e muilek gi wi son leisi. Dati meki wi musu feti fu tan du san wi pramisi Yehovah di wi gi wisrefi abra na en. Bijbel e leri wi taki wi no musu bruya te wi e kisi frufolgu noso tesi. Wi o abi fu pina fu di wi e du san bun (2 Tim. 3:12). Wi kan de nanga prisiri te wi e kisi tesi, fu di dati e sori taki wi e du a wani fu Gado.​—1 Petr. 3:14-16; 4:12, 14-16.

⁵ Aladi Yesus no ben abi sondu, toku den ogri sani di pasa nanga en ben leri en fa fu gi yesi. Noiti a meki Satan kisi en nanga den tesi fu en èn a no ben suku bigi sani na ini a grontapu (Mat. 4:1-11; Yoh. 6:15). Noiti Yesus prakseri srefi fu du wan sani di Yehovah no feni bun. A ben tan hori ensrefi na den wet fu Yehovah aladi grontapu ben abi bita-ati gi en. Syatu fosi Yesus dede, a warskow den disipel fu en taki grontapu no ben o lobi den tu. Sensi a ten dati, den bakaman fu Yesus ondrofeni furu banawtu, ma den kisi deki-ati fu di den sabi taki a Manpikin fu Gado wini grontapu kaba.​—Yoh. 15:19; 16:33; 17:16.

⁶ Efu wi no wani de wan pisi fu a grontapu, dan wi musu hori wisrefi na den wet fu Yehovah, neleki fa Masra Yesus ben du dati. Boiti taki wi no e bumui nanga a politiek fu grontapu èn nanga den sani di sma e du fu tyari kenki kon na ini a libimakandra, wi no musu teki a morsu libi fu den sma fu a grontapu disi abra tu. Wi e si a rai di skrifi na ini Yakobus 1:21 leki wan seryusu sani. Drape skrifi: „Tapu nanga a morsu libi fu unu èn nanga a takrudu di de na ala sei. Na wan safri-ati fasi un musu gi Gado wortu na okasi fu teki rutu na ini un ati, fu di dati kan kibri un libi.” Te wi abi a gwenti fu studeri èn fu go na den konmakandra, dan wi e „gi Gado wortu na okasi fu teki rutu” na ini wi ati nanga wi frustan èn wi no denki srefi fu suku grontapu sani. A disipel Yakobus ben taki: „Unu no sabi taki te wan sma de wan mati fu grontapu, dan a de wan feanti fu Gado? Fu dati ede, iniwan sma di wani de wan mati fu grontapu, e meki ensrefi kon tron wan feanti fu Gado” (Yak. 4:4). Dati meki Bijbel e sori wi krin taki wi musu tan hori den wet fu Yehovah èn taki wi no musu de wan pisi fu grontapu.

⁷ Gado Wortu e warskow wi fu no du hurudu èn fu no libi na wan syen fasi. A e taki: „Un no musu taki srefi fu hurudu, noso fu iniwan sani di no krin, noso fu tori di e sori taki unu abi bigi-ai, bika dati no fiti gi santa sma” (Ef. 5:3). Sobun, wi musu weigri fu prakseri sani di no krin, sani di sma musu syen fu den, noso sani di e pori sma frustan. Wi no o taki den sortu tori disi tu. Na a fasi dati wi e sori taki wi wani hori wisrefi na den wet fu Yehovah di krin èn di reti.

HORI YU SKIN KRIN

⁸ Boiti taki Kresten e frustan taki na anbegi fu den nanga a fasi fa den e tyari densrefi musu krin, den sabi taki a prenspari taki den skin musu krin tu. Na ini Israel fu owruten, a santa Gado fu wi ben wani taki a kampu fu den Israelsma ben musu tan krin. Wi musu de krin tu, so taki Yehovah ’no si nowan morsu sani’ na wi.​—Deut. 23:14.

⁹ Soleki fa Bijbel e sori, dan santafasi nanga a de di wi skin musu de krin, abi fu du nanga makandra. Luku san Paulus ben skrifi: „Lobiwan, . . . meki wi krin wisrefi fu ibri sani di kan doti wi skin nanga wi denki, èn meki a lespeki di wi abi gi Gado meki taki wi kon santa dorodoro” (2 Kor. 7:1). Kresten man nanga uma musu tan hori a skin fu den krin. Dati meki den musu abi a gwenti fu wasi den krosi èn fu wasi den skin. Aladi a situwâsi na ini ibri kondre de tra fasi, toku a de so furu tron taki wi man feni nofo sopo nanga watra fu hori wisrefi krin èn fu sorgu taki den pikin fu wi tan krin tu.

¹⁰ Fu di wi e du a preikiwroko, meki furu sma na ini wi birti sabi wi bun. Te wi oso krin èn te wi e sorgu taki ala sani seti na wan bun fasi na inisei èn na dorosei fu wi oso, dan dati na wan fasi fa wi e sori den birtisma fu wi taki wi e dini Yehovah. Wi heri osofamiri kan wroko makandra fu du disi. Brada musu poti prakseri spesrutu na a oso nanga a dyari fu den, fu di den sabi taki wan dyari nanga wan oso di krin e meki sma taki bun fu den. Osofamiri-edeman sabi taki te den e du disi èn te den e teki fesi na ini na anbegi fu den osofamiri, dan dati e sori taki den e tiri den osofamiri na wan bun fasi (1 Tim. 3:4, 12). Sisa abi a frantwortu fu sorgu gi difrenti sani tu, spesrutu na ini den oso (Tit. 2:4, 5). Pikin di kisi bun leri kan yepi fu hori densrefi krin èn fu hori a kamra fu den krin tu. Na a fasi dati a heri osofamiri e kon abi a gwenti fu hori ala sani krin, so taki den o man libi na ini a nyun grontapu ondro a tiri fu Gado Kownukondre.

¹¹ Furu futuboi fu Yehovah na ini a ten disi e go na den konmakandra nanga den wagi. Na son presi sma no man go na ini a preikiwroko efu den no abi wan wagi. Fu dati ede, a wagi musu bun èn a musu krin. Na oso nanga a wagi fu wi musu sori taki wi de wan pisi fu a krin èn santa pipel fu Yehovah. Na so a musu de tu nanga wi tas èn nanga a Bijbel fu wi.

¹² Den krosi fu wi èn a fasi fa wi e moi wisrefi musu de soleki fa den wet fu Gado e sori. Wi no ben o denki srefi fu go na wan heihei sma fu a kondre nanga syabisyabi krosi noso nanga krosi di wi e weri te wi e go koiri. Dati meki wi musu poti moro prakseri na a fasi fa wi e moi wisrefi te wi de na ini a preikiwroko noso na tapu a podium, fu di wi e teki presi gi Yehovah! A fasi fa wi e moi wisrefi èn den sortu krosi di wi e weri kan abi krakti tapu a fasi fa sma e si na anbegi fu Yehovah. A no ben o fiti kwetikweti fu weri krosi di e sori taki wi no abi lespeki gi trawan noso taki wi no e hori den firi fu den na prakseri (Mika 6:8; 1 Kor. 10:31-33; 1 Tim. 2:9, 10). Sobun, te wi e sreka wisrefi fu go preiki, fu go na wan gemeente konmakandra, na wan kring konmakandra noso na wan kongres, dan wi musu hori na prakseri san Bijbel e taki fu a fasi fa wi musu sorgu wi skin èn fu a fasi fa wi musu weri krosi. Wi wani gi grani nanga glori na Yehovah ala ten.

¹³ Wi musu hori den srefi sani disi na prakseri te wi e go na a edekantoro noso na wan fu den bijkantoro fu Yehovah Kotoigi. Memre taki a nen Betel wani taki „Oso fu Gado”. Dati meki den krosi fu wi nanga a fasi fa wi e tyari wisrefi musu de a srefi leki te wi e go na den konmakandra na ini a Kownukondre zaal.

¹⁴ Srefi te wi e go koiri wi wani luku bun san wi e weri èn fa wi e sorgu wi skin. Wi kan aksi wisrefi: ’A fasi fa mi weri ben o meki mi firi syen fu preiki gi wan sma efu mi kisi na okasi?’

PRISIRITEN DI BUN GI WI

¹⁵ A de fanowdu fu rostu èn fu abi prisiriten efu wi wani de gosontu. Wan leisi Yesus ben kari den disipel fu en fu kon nanga en na wan presi pe den ben kan „rostu pikinso” (Mark. 6:31). A bun fu rostu èn fu abi prisiriten di bun gi wi, fu di wi abi en fanowdu. Na a fasi disi wi kan kisi wisrefi baka, so taki wi kan go doro nanga a wroko fu wi.

¹⁶ Fu di someni fasi de fu meki prisiri na ini a ten disi, meki Kresten musu luku bun san den e du. Ala ten den musu sori taki den abi a koni fu Gado. Aladi a fiti fu meki prisiri, toku dati a no a moro prenspari sani na ini a libi. Bijbel e warskow wi taki na ini „den lasti dei” sma ben o „lobi prisiri na presi taki den lobi Gado” (2 Tim. 3:1, 4). Furu sani di sma na ini a ten disi e du fu meki prisiri èn sani di den e luku noso arki no fiti gi sma di wani hori densrefi na den wet fu Yehovah.

¹⁷ Den fosi Kresten ben musu kakafutu gi a pori grontapu fu a ten dati pe sma ben e prakseri soso fu meki prisiri. Na den preigron fu den Romesma sma ben e lobi go luku fa trawan e pina. A pipel ben kan go luku sani di ben abi fu du nanga ogridu, kiri, nanga hurudu. Ma den fosi Kresten ben tan farawe fu den sortu sani dati. Na ini a ten disi furu fu den sani di sma kan luku noso arki fu meki prisiri abi fu du nanga den sortu sani dati tu èn den sani disi abi krakti tapu den sondu firi fu libisma. Wi musu „luku bun” fa wi e tyari wisrefi. Wi musu wai pasi gi den sani disi di kan pori a denki fu wi (Ef. 5:15, 16; Ps. 11:5). Srefi te yu e go luku noso arki sani di bun, a kan taki den sma di o de drape makandra nanga yu no e tyari densrefi na wan fasi di fiti.​—1 Petr. 4:1-4.

¹⁸ Difrenti bun fasi de fa wi leki Kresten kan meki prisiri. Furu sma kisi wini di den gebroiki den moi Bijbel rai di de fu feni na ini den buku fu wi èn di e yepi den fu teki koni bosroiti.

¹⁹ Ten na ten, wan brada noso sisa kan kari wan tu osofamiri kon na en oso fu abi wan prisiri ten nanga makandra. A kan tu taki brada nanga sisa e kisi a kari fu go na wan trow-oso noso na wan tra sortu fesa (Yoh. 2:2). Den wan di e kari sma musu sabi taki na den abi a frantwortu fu ala sani di e pasa na a okasi dati. A no de fu taki dati wi musu luku bun fa sani e waka te bigi grupu sma e kon makandra. Son leisi, sma di kon makandra fu meki prisiri na den sortu fesa dati no tyari densrefi na wan fasi di fiti wan Kresten. Sonwan fu den nyan èn dringi tumusi furu èn den du tra bigi ogri srefi. A sani disi meki taki Kresten di e gebroiki den frustan kon si taki a de wan koni sani fu no kari tumusi furu sma èn fu no hori den fesa disi tumusi langa. Efu a de so taki sopi e prati na den fesa disi, dan den musu sorgu taki sma no dringi tumusi furu (Fil. 4:5). Efu wi du ala muiti fu meki den fesa disi waka na wan fasi di fiti èn fu meki den gi sma deki-ati fu tan dini Yehovah, dan nyanyan nanga dringi no o de den moro prenspari sani na den okasi dati.

²⁰ A bun te wan sma lobi kari trawan kon na en oso (1 Petr. 4:9). Te wi e kari sma kon na wi oso fu kon nyan noso dringi wan sani, fu meki prisiri, èn fu kon taki tori pikinso, dan wi wani memre sosrefi fu kari den mofinawan na ini a gemeente (Luk. 14:12-14). Efu wi kisi wan kari fu kon na wan sma oso, dan wi musu tyari wisrefi soleki fa skrifi na Markus 12:31. Ala ten a bun fu sori taki wi e warderi a switifasi di trawan e sori wi.

²¹ Kresten brada nanga sisa e prisiri nanga den someni sani di Gado e gi den èn a e meki den firi bun taki den kan ’nyan, dringi èn prisiri nanga ala a tranga wroko di den e du’ (Preik. 3:12, 13). Te den wan di e kari sma kon na den oso nanga den wan di kisi a kari „du ala sani fu gi Gado glori”, dan den no o frigiti fa den kisi deki-ati na den okasi disi.

SANI DI YU E DU NA SKORO

²² A prenspari taki pikin fu Yehovah Kotoigi go na skoro fu kisi leri. Te den de na skoro, dan den wani leri leisi èn skrifi na wan bun fasi. Tra sani di yonguwan e leri na skoro kan de wan bigi yepi gi den tu te den wani du moro na ini a diniwroko fu Yehovah. Ma srefi te den de na skoro, den wani sori taki den e ’memre den Gran Mekiman’. Den kan du dati te den e poti a diniwroko fu den na a fosi presi na ini den libi.​—Preik. 12:1.

²³ Efu yu na wan yongu Kresten di e go na skoro ete, dan yu musu luku bun fu no moksi nanga grontapu pikin efu dati no de fanowdu. (2 Tim. 3:1, 2). Yehovah seti sani fu kibri yu. Dati meki furu sani de di yu kan du fu no meki taki grontapu sani abi krakti na yu tapu (Ps. 23:4; 91:1, 2). Sobun, gebroiki den sani di Yehovah seti, dan ogri no o miti yu.​—Ps. 23:5.

²⁴ Furu yongu Kotoigi di no wani de wan pisi fu grontapu, teki a bosroiti fu no du sani di a skoro fu den orga te den sani disi no abi fu du nanga a skoroleri di den e kisi. A no ala ten skoromati noso skoromeester e frustan fu san ede den yonguwan no wani du den sani dati. Ma a moro prenspari sani gi wi, na fu du a wani fu Gado. Disi wani taki dati yu o du san yu leri na ini Bijbel èn taki yu o arki yu konsensi. Teki a bosroiti fu no go strei nanga trawan soleki fa grontapusma gwenti te den e go du sport noso tra sani èn no du sani fu gi grani na a kondre (Gal. 5:19, 26). Yonguwan, un kan tan hori den wet fu Yehovah efu unu e arki a Bijbel rai di un Kresten papa nanga mama e gi unu èn efu unu e meki den bun mati di de fu feni na ini a gemeente yepi unu.

GRONTAPUWROKO NANGA DEN SMA NA WROKOPE

²⁵ Bijbel e sori taki osofamiri-edeman abi a frantwortu fu sorgu gi den osofamiri (1 Tim. 5:8). Toku den sabi taki a grontapuwroko fu den no prenspari moro Kownukondre afersi (Mat. 6:33; Rom. 11:13). Te den e dini Gado fayafaya èn te den breiti taki den abi nyanyan nanga krosi, dan den no o feti fu kon gudu èn den no o kisi den broko-ede di sma abi te den e feti baka gudu.​—1 Tim. 6:6-10.

²⁶ Ala Kresten di e du grontapuwroko musu hori Bijbel rai na prakseri. Wi musu sorgu wisrefi na wan fasi di fiti, dati wani taki dati wi no musu du sani di den wet fu Gado noso den wet fu lanti e krutu (Rom. 13:1, 2; 1 Kor. 6:9, 10). Wi e hori na prakseri tu sortu takru bakapisi a kan abi te wi e moksi nanga sma di no e du san bun. Leki srudati fu Krestes, wi no o du bisnis di e pasa den wet fu Gado, di e meki taki wi e teki sei na ini politiek noso tra grontapu sani, noso di kan swaki wi bribi (Yes. 2:4; 2 Tim. 2:4). Wi no e moksi tu nanga „Babilon a Bigiwan” di de a feanti fu a tru anbegi fu Gado.​—Openb. 18:2, 4; 2 Kor. 6:14-17.

²⁷ Te wi e hori wisrefi na den wet fu Gado di bun, dan wi no o gebroiki den Kresten konmakandra fu wi fu du bisnis noso fu suku wini gi wisrefi. Wi e kon makandra nanga trawan na den gemeente konmakandra fu wi, na den kring konmakandra èn na den kongres fu anbegi Yehovah. Te wi de na den konmakandra, dan Gado e gi wi leri èn wi man „gi makandra deki-ati” (Rom. 1:11, 12; Hebr. 10:24, 25). Te wi de nanga wi brada nanga sisa wi musu poti prakseri na a anbegi fu Gado.

KRESTEN MUSU LIBI NA INI WÁNFASI NANGA MAKANDRA

²⁸ Te wi wani hori wisrefi na den wet fu Yehovah, dan wi musu ’libi bun nanga makandra èn wi musu du ala muiti fu tan abi a wánfasi di wi kisi nanga yepi fu a santa yeye’ (Ef. 4:1-3). Na presi fu denki wisrefi nomo, dan ibriwan fu wi musu du muiti fu du bun gi trawan (1 Tes. 5:15). A no de fu taki dati na so sma e tyari densrefi tu na ini yu gemeente. Wi alamala e hori wisrefi na den srefi wet awinsi sortu ras wi de, sortu kondre wi komoto, efu wi na prenspari sma noso mofinasma, gudusma noso pôtisma, èn awinsi o furu skoroleri wi kisi. Srefi sma di no de na ini na organisâsi fu wi kon si taki na so a pipel fu Yehovah de.​—1 Petr. 2:12.

²⁹ Na apostel Paulus ben wani sori fa a du kon taki a wánfasi disi de di a skrifi: „Wán skin de èn wán yeye de, neleki fa unu ben kisi wán howpu di unu kisi a kari. Wán Masra, wán bribi, nanga wán dopu de. Wán Gado de di de Tata fu ala sma èn di hei moro ala sma. A e wroko nanga ala sma èn na ini ala sma” (Ef. 4:4-6). Disi wani taki dati wi musu de wán na ini a fasi fa wi e frustan den moro prenspari leri fu Bijbel nanga den moro dipi tori di skrifi na ini. Na so fasi wi e sori taki wi sabi taki Yehovah na a Moro Hei Tiriman fu hemel nanga grontapu. Yehovah gi a pipel fu en a soifri tongo di e meki taki den man dini en makandra leki wán man.​—Sef. 3:9.

³⁰ A no de fu taki dati a wánfasi nanga a freide na ini a Kresten gemeente, na wan sani di e gi deki-ati na ala sma di e dini Yehovah. Wi si fa a pramisi fu Yehovah kon tru. A ben taki: „Mi o meki den de wán leki wan ipi skapu na ini wan pen” (Mika 2:12). Fu di wi wani tan abi a freide nanga a wánfasi dati, meki wi e tan hori den wet fu Yehovah.

³¹ Koloku fu den wan di kisi na okasi fu tron wan pisi fu a gemeente fu Yehovah di krin! Nowan muiti di wi e du fu de sma di e tyari a nen fu Yehovah, de fu soso. Wi wani du muiti fu tan mati fu Yehovah, fu di dati na wan tumusi warti sani gi wi. Wi wani wroko tranga fu hori den wet fu en di bun èn wi wani gi tra sma deki-ati fu du dati tu.​—2 Kor. 3:18.