„Teki prati ini a santa wroko foe a boen njoensoe”
„Gado ben gi mi a no-ferdini boenfasi foe de wan publiki dienstknegti foe Kristus Jezus gi den naatsi, èn teki prati ini a santa wroko foe a boen njoensoe.” — Rom 15:15, 16.
1, 2. Foe san’ede meki den wortoe nanga waka èn libi foe wi de prenspari?
DEN activiteit nanga wortoe foe wan sma e gi en wan bepaalde nen. Foeroetron tra sma e kroetoe en nanga den gronprakseri foe en tapoe a gron foe san den e si a de doe èn san den e jere a de taki. Kownoe Salomo ben skrifi: „Srefi nanga en doe wan jongoeman e meki den sabi en, ofoe en activiteit de soifri èn opregti.” — Spr. 20:11; Matt. 7:16-20.
2 San dati wani taki gi joe efoe joe de wan kristen? A no moe de so, dati tra sma moe si ini wi waka nanga libi nanga wi wortoe dati wi e dini a troe Gado? A bijbel e gi wi a djaranti dati Gado de santa èn soifri èn dati den gronprakseri foe en de regtvaardiki èn e doe boen (Jes. 6:3; Job 34:10; Deut. 32:4). Efoe troetroe na jeje foe Gado soigi go ini wi, sodati wi e sori den égifasi foe Gado, dan disi moe de krin ini wi libi foe si. — Ef. 5:1.
3, 4. (a) Sortoe krakti na anbegi nanga na historia foe Israël ben abi? (b) Sortoe krakti a moe abi tapoe tra sma te den e si na kristendom?
3 Foe di troe anbegi e kon a fesi ini a libi foe sma, dan a kan abi wan boen krakti tapoe tra sma. A so Jehovah wan eri pisiten ben bemoei moro foeroe nanga Israël. A ben taigi den Israëlsma: „Oen moe sori taki oen de santa, bika mi, Jehovah, oen Gado de santa” (Lev. 19:2; teki gersi Exodus 19:5, 6). Den njanjanwèt, den wèt foe de krin, den moreel wèt di Gado ben gi na den Israëlsma, ben sorgoe dati den ben kisi kibri foe foeroe foe den doti fasi foe libi di ben de wan gwenti ini den naatsi di ben lontoe den. Foeroe tra kondre sma ben kan si fa na pasi foe a troe anbegi ben e waka boen èn fa Gado ben tiri èn kibri Israël. Disi ben abi krakti sref-srefi tapoe den èn ben bewégi foeroe sma foe tron densrefi anbegiman foe Jehovah. — 1 Kon. 8:41, 42; 10:1; Ruth 1:16.
4 Te troe kristen e libi wan libi di de akroederi nanga den wèt foe Gado, dan disi abi a srefi boen krakti tapoe wi. Den kenki di kristensma ben tjari kon ini den libi nanga a „toemsi boen waka èn libi” foe den sa tjari son ai-kotoigi so fara „foe gi Gado glori” (1 Petr. 2:12, 15; 3:1, 2; Tit. 2:7, 8; 1 Thess. 4:11, 12). Ma a bijbel e sori dati a kristendom no e poti ensrefi a tapoe soso foe libi wan krin moreel libi nanga na kweki foe wan switi égifasi di e sori a „froktoe foe a jeje” (Gal. 5:22, 23; Ef. 4:22-24). O prenspari den sani disi foe a kristendom kan de toe, tog wan aparti wroko moe doe bifo wan sma kan kari ensrefi wan troe foetoeboi foe Jezus.
„A SANTA WROKO FOE A BOEN NJOENSOE”
5. (a) San de sosrefi toe prenspari gi wi te joe loekoe na eksempre foe Jezus? (b) Foe san ede na activiteit disi de prenspari?
5 Leki wan jongoe jongoeman èn bakaten leki wan volmaakti man, Jezus ben gi en hemel Tata grani. Nanga en fasi foe libi èn égifasi a ben gi tra sma wan moi eksempre èn a ben bewégi foeroe sma di ben loekoe foe gi Gado grani (Luk. 2:49, 52). So esi leki Jezus ben dopoe, „a ben bigin nanga en wroko”, aladi a ben span ensrefi ini a ten di a ben waka lontoe èn a ben „préki a boen njoensoe foe a kownoekondre” (Luk. 3:23; Matt. 4:17, 23). A ben leri trawan foe teki prati na a wroko disi èn a ben seni den go foe leri sma (Luk. 10:1, 8, 9). Ini a bigin na leri-wroko disi ben doe soso na mindri djoe èn discipel ben kon soso foe den. Bakaten a ben sa kon moro bigi bikasi soleki Paulus ben tjari kon na krin ini Romeini 15:8, 9, a ben de Gado wani dati ala pipel foe a eri grontapoe ben sa kisi jepi foe gi en grani.
6, 7. Sortoe santa wroko na apostel Paulus ben doe?
6 Paulus srefi ben wroko foe dati fajafaja. Ini Romeini 15:16 a kari ensrefi „wan publiki dinari foe Kristus Jezus . . . gi den naatsi”. San na dienst dati ben de? A ben taki moro fara dati a „ben e teki prati na a santa wroko foe na boen njoensoe foe Gado, sodati na ofrandi, namkoe den naatsi disi, kan de boen.” San disi wani taki?
7 Ini Romeini 15:16 wi e feni na wán enkri presi ini a bijbel pe wan Griki werkwortoe (hierourgounta) de foe feni, di wani taki „wroko na wan santa sani ofoe teki prati na wan santa sani”. Nanga disi soboen Paulus ben taki dati fajafaja a ben teki prati na a santa wroko di ben de a meki bekenti foe a boen njoensoe foe Gado, na kristen boskopoe, gi den sma foe den naatsi. Den sma di ben teki na boskopoe èn ben tron kristensma, ben de leki wan ofrandi, di ben tjari gi Gado, wan ofrandi di Jehovah ben feni boen, èn di a ben blesi nanga en jeje. — Rom. 1:1, 16.
8. Fa Paulus ben doe a wroko disi na mindri den djoe?
8 Fa Paulus nanga trawan ben doe „a santa wroko disi foe a boen njoensoe foe Gado”, na préki foe na kristen boskopoe? A „boen njoensoe” ben kan ferloesoe libi, èn foe dat’ede meki den ben moe proeberi foe miti someni sma leki den kan. Wanwantron a ben luk Paulus, di srefi ben de wan djoe, foe taki nanga djoe di ben konmakandra ini den djoekerki (Tori foe den Apostel 13:14-42; 14:1; 18:4). Ma en nanga tra kristen ben kan foe miti nanga a moro bigi pisi foe den „naatsi”?
9. Sortoe methode den fosikristen ben kan kebroiki foe jepi sma di no ben de djoe?
9 Kristen ben kan taki nanga sma di ben de tapoe publiki presi, soleki wowojo (Tori foe den Apostel 17:17-22). Tog a ben de wan sani di no ben kan dati nanga disi wawan den ben sa miti nanga ala sma. San wi kan taki foe tjari fisiti na den oso, soleki Jezus discipel ben doe di a ben seni den go foe préki ini difrenti foto? (Luk. 9:2-6; Matt. 10:5-13). Den fosi kristen ben kebroiki a methode disi di den ben „teki prati fajafaja na a santa wroko” di ben de ini disi foe panja a kristendom gi ala pipel.
10. Sortoe bewijsi de dati kotoigi ben gi oso foe oso foe feni èn jepi sma di no ben de bribisma ete?
10 Disi wi kan si ini Paulus wortoe di a ben taki gi den man di ben tron owroeman ini a gemeente Efese. Te Paulus e ferteri foe en fositen préki, a ten di a ben tjari a kristendom gi den, a de taki: „Mi no ben libi en na wan sé foe taki nanga oenoe foe den sani di ben de boen gi oenoe sili, èn mi ben leri ini den strati èn oso foe oso. na den djoe leki na den Aramésma (ofoe heidensma) mi gi kotoigi foe berow na Gado èn bribi ini wi Masra Jezus” (Tori foe den Apostel 20:20, foe na Ingrisi vertaling foe George M. Lamsa foe Siria-tongo). Paulus e taki dja krin foe en moeiti foe préki gi sma di den no ben de bribisma ete, sma di ben moe abi berow ete èn di ben moe bribi ini Jezus. Paulus ben go na den oso foe den sortoe bribisma disi. A no ben abi rede foe drai-drai foe préki gi freemde sma, bikasi a ben doe wan „santa wroko” di Gado ben feni boen èn di a ben sa blesi.
11. (a) Fa kristensma e doe a „santa wroko” disi ini disi ten? (b) Foe sanede a de prenspari foe teki prati na a oso foe oso préki?
11 Sosrefi toe ini disi ten, Jehovah kotoigi ben gi fajafaja kotoigi oso foe oso èn den ben si disi leki wan fundament foe miti nanga sma èn préki a waarheid foe Gado. A no de foe taki, dati ibri kristen di e froestan en verprekti nanga grani foe meki na „boen njoensoe” bekenti, sa kebroiki ibri okasi di fiti foe gi kotoigi — na famiri, skoromati, wrokoman, birtisma. nanga freemde sma di den e taki nanga den na okasi. Srefi ini kondre pe ebi gens foe a sé foe boen ogri kerki elementi ofoe foe skowtoe-tiri e meki a de wan sani di no man kwetkweti ofoe wan sani di no de wan froestan sani foe gi kotoigi na publiki, dan kristen soboen a doe ala sani di den kan foe kebroiki den tra fasi foe gi kotoigi. Ma ini ala presi pe den sortoe takroe toestand disi no de, Jehovah Kotoigi e fisiti systematisch ala oso. Disi abi leki bakapisi dati „den e gi wan „finifini kotoigi” èn e kon ini kontakti nanga foeroe sma di na a tra sé no ben sa kisi na okasi foe miti troe kristen èn jere a „boen njoensoe”. — Tori foe den Apostel 4:19, 20; 20:21; teki gersi Ezechiël 9:3, 4.
WAN BOEN FASI FOE GI KOTOIGI
12-14. San e sori taki a oso-foe-oso-préki kan de wan boen fasi?
12 Ma a evangelisatie-methode disi de ete wan boen fasi foe „teki prati na a santa wroko foe a boen njoensoe”? Den bewijsi e bari nanga tranga sten foe Ja! Ini 1977 a tijdschrift Social Compass ben abi wan artikel „Jehovah Kotoigi ini Japan” foe na anoe foe a Ingrisi socioloog Bryan Wilson. A ben skrifi dati den de „moro nanga wan marki na den fesi ini a evangelisatie-wroko leki sortoe trawan foe den njoen religie” ini Japan. Sosrefi toe a ben de fesiman foe wan ondrosoekoe fa sma ben prakseri, di ben tjari disi kon na krin:
„A moro bigi pisi (58,3 procent) foe den sma di ben tron Kotoigi, ben verklari dati a belangstelling foe den ben wiki foe a fosi tron na wan fisiti na den oso” foe wan foe Jehovah Kotoigi.
13 Srefi sma foe den religie di wégri foe teki a leri di abi en fundamenti ini bijbel èn di Jehovah Kotoigi e panja, e erken na boen fasi foe na oso-foe-oso-evangelisatie foe Jehovah Kotoigi. Wi e lési:
„(Den kerki) kande no ben ke sref-srefi foe san ben de joisti na moro prenspari wroko foe den Kotoigi — na fisiti foe den oso, di ben de a methode foe den apostel foe a fosi kerki. Aladi den kerki, a no pikinso okasi, e doe préki soso ini den konmakandrapresi foe den, dan den (Kotoigi) e waka baka a methode foe den Apostel foe go oso-foe-oso.” — „El Catholicismo”, Bogota (Columbia), 14 sept. 1975.
’Katholieksma ben moesoe waka baka Jehovah Kotoigi te joe loekoe a evangelisatie-wroko, a so den sma ben kisi foe jere tapoe a Fosi Nationaal Congres di ben go foe Evangelisatie-wroko.’ — Minneapolis „Tribune”, 29 aug. 1977.
14 Na oso-foe-oso-evangelisatiewroko de so aparti gi Jehovah Kotoigi dati wan ososma ini foeroe kondre te den sa opo a doro sa taki: „O, joe na séker wan foe Jehovah Kotoigi.” Wansi wan bijbel takimakandra no kan ori, dan tog wan boen sani ben doe. Na a fasi disi prakseri ben poti tapoe a santa nen foe Gado, di moe kon santa. Èn na ososma ben kisi na prakseri dati Gado dienstknekti ben kon na den doro nanga En boskopoe (Matt. 6:9; Jes. 12:4; Ezech. 33:6-9, 29). Ma soleki ben kon na krin ini den sani di tijdschrift ben taki dja na tapoe sé, dan foeroe moro e doe.
15. Fa a boen-fasi wroko disi ben doe ini son presi pe problema ben de?
15 Foe gi kotoigi na den oso foe na wan sma go na a tra sma de so wan boen fasi foe miti nanga sma, dati den Kotoigi srefi ondro moeiliki omstandigheid e doe foeroe moeiti foe abi wan prati na a wroko disi. Disi ben de so ini wan Afrikankondre pe den tiriman ben stop na activiteit disi di abi en fundamenti ini bijbel. Den kristen foe drape ben sabi dati a evangelisatie-methode disi ben abi warde someni, dati „den moe arki na Gado leki Tiriman moro leki na libisma” èn dati den moe poti Jezus rai ini den libi foe „de so koni leki sneki èn tog sondro falsi leki doifi” (Tori foe den Apostel 5:29; Matt. 10:16, 17). San den ben sa doe?
Den ben seti en so dati wantoe foe den ben prati wan langa strati ofoe gebied akroederi nomroe. Wan sma ben sa abi ala oso di abi a cijfer 2 leki laatste cijfer, (soleki 2, 12, 22, 32 èn so moro fara) èn a ben kan fisiti den fa a ben wani èn oten a ben kan. Wan trawan ben abi oso di a nomroe e kaba nanga 3 (3, 13 èn so moro fara) èn a ben kan fisiti den a wan tra dé. A so fasi wan finifini kotoigi ben kan gi.
Tra fasi ben kan kebroiki toe. Wan kristen ben sa kan abi wan manki nanga eksi ofoe froktoe èn pristeri disi na a ososma foe bai, ma nanga wan prijs di é moro leki di foe wowojo. Pikinso sa seri, ma foeroe takimandra ben kan ori foe den é kostoe, den moeiliki omstandigheden foe libi ini disi ten èn moro fara efoe disi ben sa loekoe boen, foe sori na kon troe foe bijbelprofétitori.
A so toe wan kristen di moe bai groentoe, kan kebroiki na omstandigheid disi foe miti sma ini en „gebied”. Bifo a de go na wowojo, a ben sa kan go na den oso nanga wan groentoe-djari èn a kan aksi ofoe a kan bai groentoe drape. Ofoe dati a de bai ofoe no e bai wan sani, a de foeroetron wan sani di kan foe abi wan takimakandra pe prakseri foe a bijbel kan tjari kon na ini.
Na a fasi disi den kristen foe a kondre ben wai komoto foe a pasi foe politiek man di ben ferferi den prékiman fosten èn di ben poti moeilikheid a den pasi ini na oso-foe-oso-wroko foe den. Sosrefi toe wan finifini kotoigi ben gi ini a gemeenschap.
16. Sortoe tra kenki ben sa kan de fanowdoe, te den Kotoigi ben sa kan tan foe kebroiki a préki-wroko-methode disi tapoe wan boen fasi?
16 A wan tra presi kande tra kenki moe tjari kon foe fiti wisrefi na bepaalde omstandigheid. Ini den jari a fesi kande a ben de wan normaal sani foe fisiti mamanten den oso, foedi foeroe ososma ben de dan na oso. Ma efoe den toestand e kenki èn a moro bigi pisi foe den sma de a den wroko na a pisiten dati, dan disi wani taki dan dati a prékiwroko-methode disi no de moro langa praktisch? Nono, bikasi fa tra fasi ala sma — ini ibri oso èn ibri flat — wi sa miti èn den kisi na okasi foe njan boen foe a „boen njoensoe”? Kande a de wan froestan sani foe tjari fisiti bakadina ofoe mofo-neti, te den memre foe a famiri de na oso. A marki de foe miti someni sma leki a kan èn foe jepi den. — Teki gersi Tori foe den Apostel 16:13.
17. Te wi abi na eksempre foe Paulus a prakseri, fa wi ben kan fiti wisrefi te wi e doe a wroko disi?
17 Na apostel Paulus ben de klari ben fiti en methode nanga aanpak na en publiki. A ben taki: „Mi e doe ala sani foe a boen foe na boen njoensoe, foe kan teki prati nanga trawan a dati” (1 Kor. 9:19-23). Wan srefi fasi leki disi foe fiti joesrefi kan de boen toe ini disi ten. San joe moe doe foe eksempre efi joe e libi ini wan gebied pe a moro bigi pisi foe den sma no abi belangstelling moro gi religie? Joe ben sa kenki a fasi fa joe e go na den soema akroederi nanga disi?
Wan kotoigi ini Belgiakondre e ferteri: ’Mi e abi mi bijbel opo-opo ini mi anoe, ma mi no e taki wantronwantron taki a de na bijbel. Mi e taki: „Di mi ben wakti te leki joe ben sa opo na doro, mi ben loekoe san skrifi djaso . . . ’Kolokoe den safri-ati-sma de, bikasi den sa kisi grontapoe leki wan goedoe foe den’ (Matt. 5:5). Joe e bribi taki te now ete safri-ati-sma de na wi mindri?” Alaten wan takimakandra e bigin èn bakaten moro koemakriki den e teki na bijbel.’
WAN WROKO DI GADO E BRESI
18. Sortoe rede wi abi foe de séker taki Gado abi belangstelling gi na „santa wroko foe a boen njoensoe”?
18 Kristensma ini a eri grontapoe abi bigi belangstelling gi na „santa wroko foe a boen njoensoe”. Sosrefi toe Jehovah Gado. Paulus ben taki dati njoen kristen di nanga a prati di a ben abi na a wroko disi, ben kon ini bribi, ben de leki wan ofrandi, di Gado ben feni boen èn di Gado ben kanti en jeje tapoe den. — Rom. 15:16.
19. Fa a wroko disi kan de wan boen sani srefi te a moro bigi pisi foe den sma no e arki?
19 Gado e tan teki èn bresi a wroko disi, nanga ini disi a prenspari oso-foe-oso-activiteit, pe wi e soekoe sma èn gi den jepi. A so wan dinari e a evangelie di e fisiti gemeente, ben teki wan kari foe ben go makandra nanga wan kristen ini Maryland (Amerkankondre) na wan sma foe ori wan bijbelstudi nanga en. A de taki:
„Mi ben aksi a oso-soema san ben tjari en so fara foe studeri a bijbel nanga Jehovah Kotoigi. A taki dati fositen a ben naki a bijbel opo pe a kisi, poti en finga na wan vers èn bigin lési. Ma pikinso nomo a ben froestan san a ben lési ben wani taki.
Wan dé a ben de nanga toemsi brokoskin foe bigi famiri-problema. A ben opo en bijbel baka èn a ben sori wan vers. A no ben kan froestan en, èn ini a brokoskin foe en a ben bigin foe kré. A ben begi efi Gado ben wani seni wan sma gi en di ben sa kan jepi en foe froestan a bijbel. A no ben kaba foe taki, ofoe wan sma ben naki a doro. Di a ben opo a doro, drape wan Kotoigi ben tanapoe, di ben taki: „Joe ben sa wani foe froestan na bijbel?” A oso-sma ben ari en go na inisé èn wantronwantron wan geregelde bijbelstudi ben bigin.
20-23. Sortoe bresi kan de a bakapisi te joe abi wan moro bigi prati na a prékiwroko oso-foe-oso?
20 Srefi a wansi a gersi leki a moro bigi pisi foe den sma di wi e miti e trowe a „boen njoensoe” di wi e préki, tog boen winimarki kan kon.
Wan meisje di ben de wan tini ben wroko wan séker satra-bakadina ini wan pikin dorpoe ini Zuid-Afrika oso-foe-oso. A ben miti pikinso belangstelling, foedi wan kerki organisatie ini a gemeenschap ben soetoe faja gi sma tegen den boen kristen moeiti foe Jehovah Kotoigi. A wán doro baka a trawan, ben nakitapoe esi a wi fesi. A gersi leki a wroko no ben de fanowdoe.
Ma sondro dati a meisje ben sabi, boemoei ai foe wan fensre na a tra sé foe a strati ben loekoe a meisje. Wan owroe misi ben si fa a Kotoigi ben oridoro aladi den sma no ben sori switifasi. A kristen meisje disi ben de tra fasi leki tra jongoewan, dati ben de krin foe si.
Di a ben de na a oso foe en now, a owroe frow ben kari a Kotoigi kon na inisé. Aladi a meisje ben taki moro foeroe Ingrisi tongo èn a frow Afrikan tongo, tog den ben kan kenki prakseri foe a prenspari bijbel boskopoe foe wi ten. Bakaten wan prékiman di e taki Afrikan tongo ben go baka foe wiki a belangstelling moro fara, èn a owroe misi nanga prisiri ben teki wan geregelde studi foe a Wortoe foe Gado.
21 A bresi foe Gado tapoe „a santa wroko foe a boen njoensoe” de troetroe ini foeroe fasi foe si. Wan opziener di e waka lontoe, fisiti den gemeente ini a gebied foe New Orleans, Louisiana (Amerkankondre), ben skrifi: „A evangeliesatie-geest e kon moro krakti. Den laatste 8 ofoe 9 gemeente di wi ben fisiti, ben gi foeroe moro ten na a préki-activiteit. Leki wan bakapisi foe den moro foeroe moeiti disi, moro sma e feni di abi belangstelling gi a „boen njoensoe”. Èn foedi den brada nanga sisa e doe moro ini a meki bekenti foe a „boen njoensoe”, dan troetroe moro krin wan geest foe vréde nanga prisiri e go de ini den gemeente.”
22 So wan vréde nanga prisiri e kon sosrefi toe moro ini a persoonlek nanga famirilibi foe den kristen di e préki a „boen njoensoe” fajafaja èn di e froestan a fanowdoe foe Gado bresi. O, ini a libi alaten ete bepaalde problema nanga sorgoe sa de. Wi e sabi dati den disi sa tan solanga wi de onvolmaakti èn na disiten ogri seti foe sani de ete. Ma o moro wan kristen e go de moro nanga faja nanga a „santa wroko foe a boen njoensoe” di Gado ben poti, dan en libi sa kon de moro foeroe èn goedoe èn kolokoe (Tori foe den Apostel 20:35). Disi no de soso theorie. A de wroko ini a praktijk. Na apostel Paulus ben ondrofeni disi. Miljoen miljoen Kotoigi foe Jehovah e ondrofeni disi ini disi ten. Joe toe sa ondrofeni disi.
23 Tra sma sosrefi toe sa kan si sortoe kristen joe de. Den sa si dati joe abi wan prati na a meki bekenti foe a „boen njoensoe”. Den sa si sortoe vréde nanga prisiri a de gi joe foe de bézig nanga a wroko disi nanga tra kristen activiteit. Den sa si den foeroe fasi di joe e sori na kresten égifasi nanga a „froktoe foe a jeje” (Ef. 4:24; Gal. 5:22, 23). Ja, joe sa sori gi foeroe tra sma dati tapoe wan boen fasi joe e dini wan santa Gado.
24. Sortoe firi a kan gi joe te joe e teki prati dorodoro na a wroko disi?
24 Baka di Paulus ben taki den wortoe foe a „teki prati na a santa wroko foe a boen njoensoe”, a ben taki den wortoe disi moro a tapoe: „Foe dat’ede meki mi abi rede foe prisiri ini Kristus Jezus, te a de kon tapoe den sani di abi foe doe nanga Gado” (Rom. 15:17). Meki wi leki kristen alamala wroko so dati wi toe kan prisiri wisrefi na so fasi ini Kristus Jezus.