’Den e hori densrefi na a relisi leri foe den’

WAN oema foe Miami, Florida, Amerkankondre, ben seni a brifi di e kon now go na wan koranti foe a foto: „Tapoe 10 december den ben foefoeroe a portmoni foe mi manpikin na wan boenkopoe wowojo. A ben abi en rijbewijs na ini, en lantikarta, èn so moro, èn so srefi 260 Amerkan dala.

Baka di a ben froeteri a basi foe a boenkopoe wowojo foe a sani di a lasi, a ben kon na oso. Froekoe na mofoneti, wan oemasma di ben e taki Spanjoro ben bèl en, èn a ben taki nanga jepi foe wan sma di e sorgoe gi a telefon èn di ben vertaal gi en, taki a ben feni en portmoni.

Na oema ben gi en na adres foe en. . . . A ben gi en a portmoni di no ben mankeri noti, èn di ben abi so srefi a 260 Amerkan dala na ini.

A ben si di a foefoeroeman ben foefoeroe en portmoni èn ben bari. A foefoeroeman ben meki a portmoni fadon èn ben lon. Na a ten dati a no ben si mi manpikin moro, dati meki a ben teki a portmoni tjari go na oso èn ben bèl.

En nanga en osofamiri na Jehovah Kotoigi. Soleki fa a sori, dan den e hori densrefi na a relisi leri foe den.”

Jehovah Kotoigi no e sori eerlijkfasi so taki den e kisi prèise foe libisma (Efeisesma 6:7). Na presi foe dati, na wan opregti fasi den e angri foe tjari prèise kon gi a hemel Tata foe den, Jehovah (1 Korentesma 10:31). A lobi di den abi gi Gado nanga a sma na den sei e poesoe den foe meki a „boen njoensoe” foe Gado en Kownoekondre bekènti (Mateus 24:14). Gado e pramisi foe kenki grontapoe kon tron wan moi paradijs nanga jepi foe a Kownoekondre. Dan grontapoe no sa de soso wan troetroe moi presi wawan, ma so srefi wan toemoesi boen presi ini a tori foe boen gwenti nanga wet pe eerlijkfasi sa wini foe têgo. — Hebrewsma 13:18; 2 Petrus 3:13.