Loekoe boen taki joe no e denki takroe foe trawan

WAN BARINEN telefisi-domri ben kroetoe wan kompe domri na wan krakti fasi foe di a ben doe soetadoe. Ma na ini moro mendri leki wan jari, den ben kisi a domri di ben tjari a kragi kon, nanga wan hoeroe-oema.

Na ini wan tra kefal, wan prenspari grontapoemakti ben seni boskopoeman go foe tjari den groepoe di ben feti nanga makandra, kon foe taki foe vrede. Na a srefi ten, a srefi nâsi na wan kibri fasi ben seni den bisnisman foe en di e seri fetisani, go na tra kondre foe seri fetisani di abi a waarde foe foeroe miljard dala.

Foe di hoigrifasi di de krin foe si kon tron so wan aladei sani, a de wan froewondroe sani taki tweifri moro foeroe kon na ini a presi foe a froetrow di sma e froetrow makandra? Gi foeroe sma a denki di den e denki takroe foe trawan, tron wan gwenti.

Wi leki kresten moesoe loekoe boen foe no meki den sortoe fasi dati foe denki abi krakti na tapoe a matifasi di wi abi nanga getrow kompe bribiman. Ala di Jesus Krestes ben gi wi tranga foe de „koni leki sneki” te wi de na mindri den feanti foe wi, tokoe a no ben taki dati wi no moesoe froetrow den troe bakaman foe en (Mateus 10:16). So boen, dan san na den kefar foe denki takroe foe trawan? Tapoe sortoe kontren wi moesoe loekoe boen spesroetoe, foe tan fara foe so wan eigifasi? Èn fa wi kan kibri a warti matifasi di wi abi nanga kompe kresten?

Wan sani di wi kan leri foe a ten di pasa

Te wi e denki takroe foe trawan sondro foe abi wan joisti reide foe dati, dan a de a srefi neleki wi ben sa kroetoe den. A de neleki wi e kroetoe sma toemoesi esi, taki den wortoe noso den doe foe den na soso leitori foe kibri wan bedrigi èn ogri sani. Foeroetron a problema e kon foe di wi abi wan fowtoe fasi foe si den afersi, soleki fa wi kan si dati na a bijbeltori di de foe feni na ini Josua kapitel 22.

Den Israèlsma ben kaba nanga a wini di den ben wini a Pramisi Kondre èn djonsrode den ben kisi den kontren gi den lo foe den. Den lo foe Ruben, Gad nanga afoe foe a lo foe Manase ben bow wan altari na a Jordan liba, „wan bigi altari di ben hari a prakseri foe sma”. Den tra lo ben prakseri na wan fowtoe fasi taki den ben doe disi foe di den ben fadon komoto na bribi. Den ben prakseri taki den dri lo ben o go gebroiki a bigi altari disi di den ben meki, foe tjari ofrandi drape na presi foe go na a tenti foe a konmakandra na Silo, a presi di poti foe anbegi Gado. Wantewante den lo di ben kragi den, ben bigin sreka den sroedati foe go feti. — Josua 22:10-12.

A ben de wan heri boen sani taki den ben seni wan officieel groepoe, di Pinehas ben de na edeman foe den, go esi-esi na den Israèl brada foe den foe taki foe a tori. Di den lo di trawan ben prakseri taki den ben afrontoe Gado, ben jere den kragi taki den no de getrow na Jehovah, taki den ben opo densrefi teige Jehovah èn taki den fadon komoto na bribi, dan den ben tjari kon na krin foe san ede den ben meki a kefalek bigi altari disi. Na presi taki a ben de wan altari foe tjari ofrandi, a ben moesoe „de wan kotoigi” gi a wánfasi foe den lo foe Israèl ini na anbegi di den ben anbegi Jehovah (Josua 22:26, 27). A groepoe ben drai go baka na oso èn ben de tevrede taki no wan sani ben fowtoe nanga den brada foe den. Na so den ben kan wai pasi gi wan feti na mindri borgoe èn a kiri foe foeroe sma.

Fa a e leri wi taki noiti wi no moesoe de esi foe denki takroe foe trawan! Foeroetron a de so, taki san gersi foe de wan troe sani te joe e loekoe en frafra, de heri tra fasi te joe ben sa ondrosoekoe en moro fini. Disi de so nanga foeroe sani na ini a libi foe wan kresten.

A fasi fa wi e si den owroeman

Sontron den owroeman e feni taki a de fanowdoe foe gi rai na difrenti sma na ini a gemeente te den e doe a frantiwortoe di den abi „foe wei a gemeente foe Gado” (Tori foe den Apostel 20:28). Foe eksempre, fa wi e handri te wan owroeman e taki nanga wi foe den pikin foe wi ini a tori foe afersi soleki takroe kompe noso foe a fasi fa den e tjari densrefi nanga wan boi noso meisje na wan fasi di no fiti? Wi e go denki taki na owroeman abi wan takroe prakseri èn e taki ini wisrefi: ’Noiti a ben lobi na osofamiri foe wi’? Efoe wi e gi pasi meki den sortoe denki dati abi krakti na wi tapoe, dan baka ten wi ben kan firi sari taki wi ben abi a denki disi. A kan taki a gosontoe na jejefasi foe den pikin foe wi de na ini kefar, èn wi moesoe warderi bijbel rai di kan jepi wi. — Odo 12:15.

Meki a de so, taki te wan gemeente owroeman e gi wi rai, wi no e soekoe wan takroe denki na en. Na presi foe dati, meki wi aksi wisrefi efoe wan fasi de foe kisi wini foe den rai di a e gi èn di gron tapoe bijbel. Na apostel Paulus ben skrifi: „A troe taki no wan tranga leri na wan prisiri sani na a momenti di wi e kisi en, ma a e gi sari; tokoe, baka ten a e meki froktoe foe vrede gi den wan di oefen densrefi nanga dati, namkoe regtfardikifasi” (Hebrewsma 12:11). Foe dati ede, meki wi de nanga tangi èn prakseri foe afersi soleki fa den de troetroe. Prakseri taki foeroetron a de wan moeilek sani gi den owroeman foe gi wi rai, neleki fa a de wan moeilek sani gi wi foe teki a rai.

A fasi fa pikin e denki foe papa nanga mama

Te son jongoewan e kisi foe doe nanga son skotoe di a papa nanga mama foe den e poti gi den, dan den e bigin tweifri na a reide foe san ede a papa nanga mama foe den e doe dati. Son jongoewan ben sa kan taki: ’Foe san ede mi papa nanga mama e meki someni wet? A moesoe de so taki den no wani dati mi e njan boen foe a libi.’ Ma na presi foe kon na so wan bosroiti, jongoewan moesoe ondrosoekoe a situwâsi soleki fa a de troetroe.

Den papa nanga mama sorgoe gi den pikin foe den foeroe jari kaba. Foe doe dati, a aksi foeroe òfer foe den na materia sei èn na tra fasi. Wan reide de dan foe kon na a bosroiti taki nownow den wani pori a libi foe den tini pikin foe den so taki den no de kolokoe? A no de moro reidelek foe denki taki lobi e boeweigi den papa nanga mama disi foe kibri den pikin foe den èn foe sorgoe gi den? A no ben sa de so, taki a srefi lobi e poesoe den foe poti son skotoe gi den pikin foe den di nownow e ondrofeni njoen tjalensi na ini a libi? Den pikin troetroe no ben sa sori switifasi èn no ben sa de nanga tangi efoe den e denki takroe foe lobi-ati papa nanga mama! — Efeisesma 6:1-3.

A fasi fa wi e denki foe kompe kresten

Foeroe sma gwenti foe kroetoe trawan na fesi èn abi ala ten wan fasti fasi foe denki foe den èn fa den o tjari densrefi. Fa a de efoe wisrefi abi so wan fasi foe denki èn no e froetrow son sma? A fasi di grontapoe sma abi ben sa kan abi krakti na wi tapoe ini a tori disi?

Foe eksempre, kon meki wi taki dati wan foe den brada foe wi na jejefasi abi wan moi oso nanga wan diri wagi. Wi moesoe kon na a bosroiti dan taki a de wan materialist di no e poti Kownoekondre afersi tapoe a fosi presi na ini en libi? Son kresten kan bai moi sani kande, ma dati no wani taki dati den abi takroe prakseri noso no e ’soekoe a kownoekondre fosi’. A kan taki den abi foeroe foe doe nanga wroko di abi foe doe nanga jeje afersi èn e gebroiki foeroe foe den goedoe foe den foe horibaka gi Kownoekondre afersi, kande na wan fasi sondro foe hari a prakseri foe trawan. — Mateus 6:1-4, 33.

A fosi jarihondro kresten gemeente ben abi ala sortoe sma na ini — goedoewan nanga pôtiwan (Tori foe den Apostel 17:34; 1 Timoteus 2:3, 4; 6:17; Jakobus 2:5). Gado no e ondrosoekoe sma tapoe a gron foe a posisi foe den na moni sei, èn wi no moesoe doe dati toe. Wi moesoe lobi den getrow kompe bribiman foe wi di kisi tesi, „èn foe no doe no wan sani nanga partèifasi na prakseri”. — 1 Timoteus 5:21.

Na ini a grontapoe disi di e didon na ini a makti foe Satan, na abi di sma abi ala ten wan fasti fasi foe denki foe trawan èn fa den o tjari densrefi èn a froetrow di sma no e froetrow trawan, de foe si na difrenti fasi. Foe eksempre, den kan taki dati wan sma ogri noso lobi materia goedoe toemoesi soso foe en background ede. Ma leki kresten wi no moesoe teki den sortoe fasi foe denki dati abra. Na ini Jehovah en organisâsi, presi no de gi a kroetoe di sma e kroetoe trawan sondro reide èn a froetrow di sma no e froetrow makandra. Ala troe kresten moesoe waka baka na eksempre foe Jehovah Gado, bika na en „no wan onregtfardikifasi no de . . . noso taki a e teki partèi”. — 2 Kroniki 19:7; Tori foe den Apostel 10:34, 35.

Meki lobi boeweigi wi

Den Boekoe foe bijbel e taki krin dati „den alamala sondoe èn no e doro a glori foe Gado” (Romesma 3:23). Foe dati ede, wi moesoe si den kompe anbegiman foe wi leki sma di de ini wánfasi nanga wi ini a moeiti di wi e meki foe doe diniwroko gi Jehovah di a feni boen. Efoe wi e gi pasi meki den sani soleki a froetrow di wi no e froetrow trawan noso tra takroe prakseri abi krakti na tapoe a matifasi di wi abi nanga wan brada noso sisa na jejefasi, dan meki wi begi foe kisi a jepi foe Gado foe feti nanga so wan fasi foe denki, so taki wi no e fadon ini na anoe foe Satan (Mateus 6:13). A ben overtoigi Eva taki Jehovah ben abi takroe prakseri, taki A no ben broko en ede nanga a boen foe Eva, èn ben e hori sani na baka gi en di ben sa meki en troetroe kolokoe (Genesis 3:1-5). Te wi e denki takroe foe den brada foe wi, dan wi e doe a sani di Satan abi na prakseri. — 2 Korentesma 2:11; 1 Petrus 5:8.

Efoe wi e feni taki wi abi a gwenti foe denki takroe foe trawan, dan wi moesoe prakseri foe na eksempre foe Jesus Krestes. Ala di a ben de a volmaakti Manpikin foe Gado, tokoe a no ben soekoe foe denki takroe foe den disipel foe en. Na presi foe dati, Jesus ben soekoe den boen sani na ini den. Di den disipel foe en ben strei foe kisi wan hei posisi, a no ben prakseri taki den ben abi takroe denki èn poti 12 njoen apostel na ini a presi foe den (Markus 9:34, 35). A de di den ben de onvolmaakti ben meki kande taki a koeltoeroe foe a djoe relisi di fadon komoto na bribi, èn di ben poti krakti na tapoe heimemre fasi èn di ben si a wan sma moro betre leki wan trawan, ben abi krakti na wan fasi na den tapoe. Jesus ben sabi taki a fondamenti sani di ben boeweigi na ati foe den bakaman foe en, ben de a lobi di den ben abi gi Jehovah. Den ben kisi foeroe pai foe di den ben e sori so wan lobi èn ben e tai hori na Jesus. — Lukas 22:28-30.

Efoe wi no e froetrow den getrow kompe bribiman foe wi, dan a ben sa de neleki wi e loekoe sani nanga wan lens di e sori den sani tra fasi. No wan sani ben sa sori soleki fa a de troetroe. Meki a de so foe dati ede, taki wi e loekoe nanga a lens foe lobi. Foeroe boeweisi de taki loyaal kompe kresten abi lobi gi wi èn den warti foe wi hori den na prakseri na wan switi fasi (1 Korentesma 13:4-8). So boen, meki a de so, taki wi e sori den lobi èn loekoe boen foe no denki takroe foe den.

[Prenki na tapoe bladzijde 26]

Fa joe e si trawan di na wan getrow fasi e anbegi Gado?

[Prenki na tapoe bladzijde 27]

Froetrow nanga lespeki e meki taki Jehovah Kotoigi na wán kolokoe osofamiri