„Diriston foe waarheid”

„Diriston foe waarheid.” Dati na fa wan brifi di ben seni go na a Nigeria bijkantoro foe Jehovah Kotoigi e taki foe toe spesroetoe tijdschrift. A skrifiman, wan jonkoeman, e froeklari:

„Mi e skrifi wan brifi foe taigi oenoe tangi troetroe gi a moeiti di oenoe e doe foe taki foe pikinmoro ibri pisi foe na aladei libi, na ini den Waktitoren nanga Ontwaakt! tijdschrift.

Mi abi 17 jari. A jari di pasa, wan radio station foe a presi djaso ben seti wan wega pe sma ben moesoe skrifi wan tori nanga a thema ’Lobi wani taki moro leki seks nomo — AIDS de troetroe.’ Ibri tori no ben moesoe teki moro mendri leki fo hondro wortoe. A moro boen tori ben o kisi wan prijs foe 1000 naira [12,50 Amerkan dala]. A no de foe taki, na so den ben taki, dati sma no ben moesoe skrifi foe wini wan prijs nomo, ma na presi foe dati, foe leri wan sani. . . .

Na ini ala toe tijdschrift, mi ben feni bodoi foe AIDS. Wan heri ipi artikel ben de di ben taki foe lobi. Mi ben gebroiki penti foe Ontwaakt! foe 22 november 1978.

Soso toe moen baka di mi ben seni mi tori go, na uitslag ben kon na doro. A ben froewondroe mi taki mi ben de tapoe a fosi presi na ini den distrikt Cross River nanga Akwa Ibom!

Ala den bodoi di mi ben gebroiki ben kon foe den tijdschrift. A de troetroe wan toemoesi moi sani taki Jehovah e gi wi bodoi di e kon na a joisti ten na ini a broeja èn siki grontapoe disi. Wi, leki troe kresten, sabi taki lobi wani taki moro leki seks nomo. Èn, a no de foe taki dati te wi e libi wan krin, moreel libi, dan dati e kibri wi gi siki leki AIDS.

Mi moesoe taigi oenoe tangi foe den diriston disi foe waarheid di oenoe e tjari kon na doro sondro foe weri. Meki Jehovah tan blesi a moeiti foe oenoe, ala di oenoe e tan sorgoe gi den warti tijdschrift disi.”