Weigron gi sma di wi kan gersi nanga skapoe na ini a Navajo kondre

HÓZHÓNÍ, wani taki „moi”, na ini a tongo foe den Navajo-Ingi, èn dati na fa den Navajosma e taki foe den kondre. Sensi 1868 a tirimakti foe Amerkankondre ben gi den Navajo-Ingi wan pisi foe so wan 62.000 fokanti kilometer gron leki reservaat na a noord-owstoesei foe Arizona, lontoe a presi di sma e kari fo oekoe, pe den fo staat Arizona, Colorado, New Mexico, nanga Utah e miti. A Monument Lagipresi di den kawboi kino ben meki kon pôpi, de now leki wan Park foe den Navajo-Ingi èn a e hari toerist kon foe heri grontapoe. A lagipresi e sori kefalek moi monoliet foe redi santiston, di hei 300 meter èn di e tanapoe hei na wan aparti fasi na tapoe den hei woestijngron. A e fiti foe dati ede, taki a wortoe na ini a Navajo-tongo gi a lagipresi wani taki „na olo na mindri den klipston”.

Sma sabi den Navajosma leki sma di abi sakafasi, lobi foe ontfanga sma, èn den abi krosibei banti na ini den bigi famiri foe den. Den 170.000 sma di e libi na ini a reservaat, e libi moro foeroe na ini dorpoe di de farawe, soleki fa den ben gwenti. Wan toe foe den e kweki skapoe ete èn e tan na ini oedoe kampoe di tapoe nanga doti èn di den e kari hogan. Den moimoi sani di den Navajosma e meki èn den anoewroko foe den, kon pôpi na ala sei. Den sani di abi spesroetoe hei waarde na den matamata foe den èn den doekoe di abi foeroe kloroe sani di den meki èn di abi geometrisch vorm noso di den meki na den eigi fasi fa den gwenti, èn di brei nanga a wòl foe skapoe. Tra sani di sma sabi heri boen toe, na den solfroe moimoi sani foe den Navajosma di abi turkoois na tapoe èn tra sani di meki foe sani foe a natoeroe.

Tjari a boen njoensoe gi a Navajo kondre

Gi moro leki 30 jari kaba, Jehovah Kotoigi kon na a Navajo kondre, no soso foe go koiri foe si sani, ma so srefi foe tjari a boen njoensoe foe Gado Kownoekondre go na den sma di e tan na a farawe kontren disi (Mateus 24:14). Gewoon nanga spesroetoe pionier foe Jehovah Kotoigi teki fesi na ini a preikiwroko. Foeroe foe den kon foe di opziener di e rèis èn Kotoigi foe a kontren srefi, ben aksi den foe jepi na presi pe a nowtoe moro bigi. Son wan ben kon foe krosibei gemeente, ala di trawan, so srefi memre foe den difrenti fosi Amerkan lo, kon foe difrenti pisi foe Amerkankondre.

Den man nanga oema disi di ben òfer densrefi, teki a diniwroko foe den gersi nanga wan toewijzing foe wan zendeling. Foe san ede? Fosi reide, den tongo foe a presi drape moeilek kefalek foe leri bika foe den moeilek geluid, stroektoeroe, nanga wortoe foe den. So srefi, foeroe foe den sma di gebore drape, tan hori na den relisi gwenti foe den, den famiri stroektoeroe, èn den abi a gron fanowdoe foe tan na libi. Boiti dati, foe di a moeilek gi den sma di no de ingi foe feni oso nanga wroko, meki a de moeilek gi den wan di froisi kon foe tan djaso. Te foe kaba, soleki fa wi kan froestan, a langa pisi ten di den weti man no ben handri boen nanga den sma disi, ben meki den sma disi no e froetrow den doroseisma so foeroe.a

Na ini a bigin di den Kotoigi ben e go oso-foe-oso èn ben weri jas nanga das, dan den sma ben prakseri na wan fowtoe fasi taki den ben de Mormoon, èn foeroe foe den no ben wani opo den doro. Ma di den ben kenki èn ben weri moro gewoon krosi, dan den ben teki den na inisei, nofotron wan joeroe langa noso moro langa. Now den sma e erken Jehovah Kotoigi, ala di den e gebroiki den jas nanga das baka na ini a diniwroko.

Foe go na den sma di e libi na a reservaat foe den Navajosma, de wan troetroe tjalensi kaba. A de wan normaal sani foe rèi foeroe kilometer na tapoe pasi di de na ini wan boesi noso bergi, di kande lai nanga ston, de foegoefoegoe, noso di de wan tokotoko pasi. Soleki fa wi kan froewakti, disi e broko den wagi moro esi èn e weri den sma di e rèi na ini den. Den wagi kan fasi toe, ma den sma di e waka pasa de moro foeroe klariklari foe gi wan anoe. Nofotron a de fanowdoe foe rèi wan toe joeroe go-kon foe man fisiti sma di abi belangstelling, foe go na wan oso-bijbelstudie, noso foe tjari wan sma go na wan kresten konmakandra. Ma den Kotoigi de klariklari foe doe moeiti, èn na so fasi den e sori a lobi di den abi gi den sma foe a kontren. — Teki gersi 1 Tesalonikasma 2:8.

Den Navajosma lobi foe abi takimakandra di abi foe doe nanga bijbel. Moro foeroe den sa tjari a heri famiri kon na makandra — pikin-nengre, papa nanga mama, nanga gran papa nanga gran mama — foe jere a howpoe gi wan paradijs oso gi na libisma famiri, na ini a ten di e kon. Di den ben aksi wan Navajo man fa en ben prakseri taki a Paradijs ben sa de, a ben piki „groen, nanga foeroe skapoe”, èn dati e sori a lobi di den abi gi a gron foe den èn gi den meti foe den. Den e warderi so srefi den bijbel poeblikâsi, èn son tron den e sori dati te den e gi krara, wan pisi sopo, merki na ini kan, èn den sortoe sani disi foe horibaka gi a Kownoekondre diniwroko. Wan spesroetoe pionier ben poti 200 abonnement foe den Waktitoren nanga Ontwaakt! tijdschrift, na ini wán jari, èn a ben poti so srefi toe abonnement gi wan man di ben e rèi na tapoe asi.

Meki wan „presi pe den skapoe kan njan”

Te a zomer e doro, dan a de ten taki wan Navajo skapoeman e tjari den ipi foe en go na wan presi pe den skapoe kan njan. A zomer oso disi gi den skapoe, di den teki foe di a de krosibei foe groen weigron èn boen watra fonten, e jepi na ipi meti foe gro boen. Na wan agersi fasi, wi kan agersi wan Kownoekondre zaal nanga so wan kampoe — wan weigron na jejefasi èn wan fonten foe waarheid watra. Den sma di e kon kan feni njanjan na jejefasi di e meki den gosontoe èn tranga na jejefasi.

Gi wan heri pisi ten kaba den konmakandra ben hori na ini wan skoro klas na ini Kayenta, Arizona. Ne na ini augustus 1992, nanga a jepi foe hondrohondro friwani wrokoman di de Kotoigi èn di kon foe difrenti staat, wan njoen Kownoekondre zaal ben bow na ini Kayenta. A Kownoekondre zaal disi èn difrenti trawan na ini a kontren, e sori den sma di e tan drape taki a preikiwroko foe den Jehovah Kotoigi sa tan doe na ini den kontren. Tra Kownoekondre zaal di e sorgoe gi a bigi kontren disi, na so srefi den wan na ini a foto Tuba nanga Chinle, èn den ala toe de na ini a reservaat, wán na ini Keams Ravijn na ini a kontren foe a Hopi lo, na ini a reservaat foe den Navajosma, èn difrenti trawan na ini den foto di de na a lanki foe a reservaat. San ben de a bakapisi foe dati?

Wan kefalek boen fasi fa sma ben handri na tapoe a Kownoekondre boskopoe

Na ini Kayenta moro leki twarfoe sma foe a kontren teki dopoe sensi a ten di a Kownoekondre zaal ben bow, èn dati e sori a blesi foe Jehovah na tapoe a presi disi foe troe anbegi. A zaal e boeweisi taki Jehovah Kotoigi de djaso foe tan èn a e gi froetrow na ini a Kownoekondre boen njoensoe di den e preiki. No so langa pasa, a fosi poeblikitaki na ini a Navajo-tongo ben gi drape. Den 40 memre foe a gemeente ben breiti foe abi 245 sma di ben kon arki a lezing di ben taki foe a frantiwortoe di papa nanga mama abi foe kweki den pikin. Nanga ati di e sori warderi, wan famiri di abi aiti memre, ben rèis dri joeroe langa go-kon foe arki a lezing — a fosi fisiti di den ben tjari oiti na wan Kownoekondre zaal.

Wan tra boen wrokosani di Jehovah gi, na a brochure Njan Boen Foe Tégo Foe A Libi Na Grontapoe! na ini a Navajo-tongo. A ben de wan kefalek bigi tjalensi foe vertaal a brochure na ini a Navajo-tongo, wan kefalek moeilek tongo. Ala nanga ala, den vertaler ben gebroiki moro leki 1000 joeroe foe de seiker taki a brochure e froeteri a Kownoekondre boskopoe na wan joisti fasi. Sensi a ben tjari kon na doro na a kaba foe a jari 1995, den Kotoigi foe a kontren ben prati wan toe doesoen eksemplaar foe en, èn dati ben abi leki bakapisi taki kefalek foeroe bijbelstudie ben de nanga sma di e soekoe waarheid.

Moro nanga moro den e gebroiki a Navajo-tongo na ini a diniwroko foe di Kownoekondre preikiman e leri en. Den gemeente na ini a kontren bigin gebroiki a Navajo-tongo na a theokrasia diniwroko-skoro, èn skoro gi a Navajo-tongo e hori foe leri den preikiman a tongo. Boiti dati, a programa na den bigi konmakandra na ini a kontren, e vertaal so srefi na ini a Navajo-tongo. Ala den moeiti disi seiker sa meki moro sma e doe wan sani na ini a reservaat.

Wan sani di wi no moesoe frigiti foe den Kownoekondre froktoe na ini na Ingi reservaat disi, na den heri boen jeje eigifasi di wi Navajo brada e sori. Seibi jari langa, Jimmy nanga Sandra ben tjari den feifi pikin foe den 120 kilometer go-kon foe fisiti den alawiki konmakandra. Na osofamiri e prakseri nanga prisiri foe a singi di den ben singi Kownoekondre singi èn a studeri di den ben studeri bijbel nanga makandra ala di den ben e meki den langa rèis. A lobi èn a faja di a papa nanga mama ben abi gi waarheid, ben boeweigi den pikin foe waka na baka na eksempre foe den foe di den ben kon tron dopoe prèiseman foe Jehovah. Fo foe den e dini now leki gewoon pionier, èn Jimmy na wan owroeman. Wan sani di ben gi a famiri disi moro prisiri, na taki no so langa pasa a sisa foe Jimmy, Elsie, ben kon tron a fosi sma di ben dopoe foe den sma di e taki a Navajo-tongo wawan.

Den skapoeman foe a presi nanga den ipi skapoe foe den e gi wan sortoe vrede foe a weigron na den kefalek bigi ston di e moi a Navajo reservaat. Langaten na fesi, a profeiti Jesaja ben profeteri foe Jehovah: „Leki wan skapoeman a sa wei en eigi ipi. Nanga en anoe a sa tjari den pikin skapoe kon na makandra; èn na en borsoe a sa tjari den. Den wan di de na bobi, a sa tjari nanga koni” (Jesaja 40:11). Nanga jepi foe en Toemoesi Boen Skapoeman, Jesus Krestes, Jehovah e tjari ala den sma na ini a Navajo reservaat di e angri foe jere a Kownoekondre boen njoensoe èn foe abi na okasi foe kisi têgo blesi, kon na ini en weigron na jejefasi.

[Foetoewortoe]

[Prenki na tapoe bladzijde 24]

Navajo oema di e wei skapoe, e jere a boen njoensoe