Moeilek ten gi den owroe sma
MAMA ONIYAN, di abi 68 jari, e libi na ini wan bigi foto foe West-Afrika. Di a ben de moro jongoe, a ben prakseri foe njan boen foe den owroe jari foe en na wan tiri fasi, nanga den pikin nanga granpikin foe en na en sei. Na presi foe dati, a e gebroiki den dei foe en foe seri kowroe dringiwatra na ondro a tropisch son. A pikinso moni di a e froedini e jepi en foe tan na libi. Den toe manpikin foe en e libi na ini wan tra kondre di de farawe. A de wan langa ten pasa di den ben seni moni kon gi en.
Fositen, den owroe sma na ini Afrika ben kisi foeroe lespeki. Den ben lespeki den foe den ondrofeni èn a sabi foe den, makandra nanga a koni èn a koni foe man si sani krin di nofotron e kon nanga dati toe. Den ben jepi foe kweki den granpikin. Jongoe sma ben aksi den rai èn ben wani meki den feni den boen. Sma ben libi akroederi a bijbel rai: „Joe moesoe opo tanapoe gi weti wiwiri, èn joe moesoe sori taki joe e hori na owroe man [noso, oema] na prakseri.” — Lefitikus 19:32.
A ten kon kenki. Pôtifasi, a lasi di moni e lasi waarde, a de di sma de sondro wroko, èn a froisi di ipi-ipi sma e froisi go na den foto, meki taki foeroe foe den owroe sma moesoe sorgoe gi densrefi sondro a jepi foe tra sma. A driktoro foe HelpAge Kenia, Camillus Were, e taki: „A gwenti di sma ben abi foe horibaka èn foe sorgoe gi den owroe sma, kon swaki moro nanga moro.”
A no de foe taki, dati a swaki di famiri banti e swaki, no de wan sani di e pasa na ini den Afrikan kondre wawan. A Guardian Weekly e froeteri foe Japan: „A gi di den pikin ben gi densrefi na den papa nanga mama, ben de a prenspari sani na tapoe san wan sistema foe markitiki na ini Japan ben rostoe, di den ben kisi abra foe a Confucianisme, ma a ben gowe di sma ben froisi go na den foto èn di den famiri banti ben kon swaki; na ini a ten disi, 85 procent foe den Japansma e dede na ini ati-oso noso na ini oso gi owroe sma.”
Awansi fa a situwâsi de, den sma di wani plisi Gado troetroe, e doe moeiti foe gi grani na den papa nanga mama foe den. Den e gi jesi na a rai foe bijbel: „Gi grani na joe papa nanga joe mama . . . so taki a kan go boen nanga joe èn joe kan tan wan langa ten na grontapoe” (Efeisesma 6:2, 3). Ala di a no de makriki ala ten foe gi grani na wi owroe papa nanga mama èn foe sorgoe gi den, tokoe a kan tjari bigi wini kon.