Joe kan bribi na ini wan Gado di de wan troetroe sma?
„JOE no abi foe bribi na ini Gado foe de wan kresten . . . Wi de wan pisi foe wan kenki ini relisi idea now, ma na ini a di foe toetenti na wán jarihondro, a kerki sa de sondro wan Gado na a fasi fa sma gwenti”, na so wan owroe kerki tiriman foe na universiteit foe Ingrisikondre ben froeklari. A ben taki gi a Sea of Faith groepoe, gi san no moro mendri leki wán hondro Ingrisi priester e horibaka. Den „kresten atheistsma” disi e froeklari taki relisi na wan sani di libisma meki èn dati, soleki fa wán memre e taki en, Gado na soso „wan idea”. Taki wan Gado nanga wondroefasi de, no e kroederi moro nanga a fasi fa den e denki.
„Gado dede” ben de pôpi wortoe na ini 1960 te go miti 1970. A ben sori a fasi foe denki foe a Doisri filosoof Friedrich Nietzsche foe a di foe tinaneigi jarihondro èn a ben gi foeroe jongoe sma a primisi di den ben wani, foe doe den eigi sani, foe gi densrefi abra na fri seks èn foe gebroiki drug na wan fowtoe fasi sondro foe dwengi densrefi ini a tori foe boen gwenti nanga wet. Ma so wan fri ben tjari den bromkipikin disi, soleki fa sma ben kon sabi den, go na wan kolokoe libi di e gi moro satisfaksi?
Na ini den srefi tin jari disi, na Anglikan biskopoe Johanes A. T. Robinson tjari en boekoe Honest to God kon na doro, di e tjari strei kon. Foeroe foe den kompe kerki tiriman foe en ben kroetoe en foe di a ben denki foe Gado „leki noti moro leki wan fasi foe denki èn foe firi nomo na ini den sani di libisma e ondrofeni”. A profesor foe theologie Keith Ward ben aksi: „Bribi na ini Gado na wan sortoe owroeten kroektoe-bribi di den koniwan trowe nownow?” Ala di a ben piki en eigi aksi, a ben taki: „Na ini a ten disi, no wan sani de moro prenspari ini relisi leki foe kisi wan sabi baka foe na idea di sma ben abi fosi foe Gado.”
Pina èn wan Gado di de wan troetroe sma
Foeroe sma di e bribi na ini wan Gado di de wan troetroe sma, e feni en wan moeilek sani foe meki a bribi foe den kroederi nanga den rampoe nanga pina di den e si. Foe eksempre: na ini maart 1996, 16 jongoe pikin, makandra nanga a skoromisi foe den, ben soetoe kiri na Dunblane, Scotland. „Mi no e froestan a wani foe Gado”, na so wan oema ben taki di lasi-ati krinkrin. A sari foe a rampoe di ben pasa ben sori tapoe wan karta di den ben libi na baka nanga bromki dorosei foe a skoro foe den pikin. A karta ben abi wán wortoe na tapoe: „WHY? [Foe san ede?]” Leki piki a domri foe a katedraal foe Dunblane ben taki: „No wan froeklari no de. Wi no kan gi a piki foe san ede disi ben moesoe pasa.”
Baka ten na ini a srefi jari, na wan ogri-ati fasi den ben kiri wan jongoe kerki tiriman foe na Anglikan Kerki, di foeroe sma ben lobi. A Church Times ben froeteri taki wan gemeente di ben skreki srefisrefi, ben jere na aartsdiaken foe Liverpool taki foe „a naki tranga na tapoe a doro foe Gado nanga den aksi: foe san ede? foe san ede?” A kerki tiriman disi so srefi no ben abi wortoe foe trowstoe di kon foe wan Gado di de wan troetroe sma.
San wi moesoe bribi dan? A de wan koni sani foe bribi na ini wan Gado di de wan troetroe sma. A de a sroto foe gi piki na tapoe den prenspari aksi di opo na tapoesei. Wi e gi joe a kari foe poti prakseri na tapoe a boeweisi di gi na ini na artikel di e kon now.
[Prenki na tapoe bladzijde 3]
A karta ben aksi: „Foe san ede?”
[Sma di abi a reti foe a prenki]
NEWSTEAM No. 278468/Sipa Press