A ben tan wan njoenwenke na ini a trowlibi?

FOE DI foeroe skedreiman nanga popki mekiman proeberi foe kroederi a sani di sma taki dati Maria ben tan wan njoenwenke ala di a ben trow nanga Josef, meki den prenki Josef leki wan man di ben owroe kaba. Den ben taki dati Josef ben de moro foeroe wan sma di ben e sorgoe Maria, leki a ben de wan masra. Ma no so langa pasa ete, paus Johanes Paulus II ben kon nanga wan tra fasi foe si a tori. A ben taki dati Josef „no ben de wan owroe man na a ten dati”. Na presi foe dati „a ben de a volmaakti di a ben de volmaakti na inisei, a froktoe foe boen-atifasi di a kisi foe Gado, di ben meki en abi wan trowlibi nanga Maria pe den ben lobi makandra sondro taki den ben firi foe abi seks”.

Efoe Maria ben abi na prakseri foe tan wan njoenwenke foe têgo, dan foe san ede a ben meki mofo foe trow? „Wi ben sa kan taki”, na so a paus e piki, „dati na a ten di Maria nanga Josef ben meki mofo foe trow, den ben meki wan kroederi nanga makandra ini a tori foe na abi di den ben abi na prakseri foe [Maria] tan wan njoenwenke.”

Ma bijbel e taki tra fasi foe a tori. A tori foe Mateus e taki dati Josef „no ben abi seks nanga en te leki a ben kisi wan manpikin”. (Matthew 1:25, Katolik New American Bible, na wi skrifi den wortoe skoinsi.) Baka di Jesus ben gebore, a trowlibi foe Josef nanga Maria kwetikweti no ben de wan trowlibi pe Maria ben tan wan njoenwenke. Wan boeweisi foe disi de, taki na wan tra presi na ini na Evangelie tori, den e sori taki Jesus ben abi brada nanga sisa. — Matthew 13:55, 56.

So boen, ala di bijbel e taki dati Maria ben de wan njoenwenke di a ben kisi Jesus, tokoe no wan reide no de foe taki dati a ben tan wan njoenwenke, a tra pisi foe en libi nanga Josef.