Kweki pikin foe libi akroederi boen gwenti nanga wet — A kan ete na ini a ten disi?

„WI E libi now na ini wan toemoesi frekti libimakandra, wan koeltoeroe di abi someni sei, pe sma no abi wán fasi nomo foe libi akroederi boen gwenti nanga wet”, na so Robert Glossop foe a Vanier Instituut gi osofamiri, na Ottawa, Kanada, e taki. San na a bakapisi? Wan verslag na ini a koranti The Toronto Star e taki: „Moro nanga moro a de so, taki tini e kisi bere, jongoewan e doe ogri nanga tranga, èn tini e kiri densrefi.”

A problema no de na Noord-Amerika wawan. Bill Damon, a driktoro foe a Centrum foe a kweki foe libisma, na a Brown University na Rhode Island, Amerkankondre, studeri den problema disi na Ingrisikondre èn na tra kondre na Europa, èn so srefi na Australia, Israèl, nanga Japan. A sori go na a gi di kerki, skoro, nanga tra instituut no e gi den jongoewan tiri someni moro. A koeltoeroe foe wi, na so a denki, „no sabi moro san pikin abi fanowdoe foe kan kisi wan boen persoonlijkheid nanga nofo bekwaamfasi”. Damon e taki foe sani di koniman e leri tapoe kontren foe a fasi fa papa nanga mama moesoe kweki pikin. Den e leri taki „tranga leri kan de wan kefar gi a gosontoe nanga a tanboen foe pikin-nengre”, èn Damon tan taki dati disi na „wan fasi foe kweki tranga-ede pikin di no e gi jesi”.

San jongoesma na ini a ten disi abi fanowdoe? Doronomo den moesoe kisi leri na wan lobi-ati fasi di e jepi den foe kisi wan soifri prakseri nanga ati. Den difrenti jongoesma abi difrenti sortoe tranga leri fanowdoe. Te sma e gi dati foe di den lobi den, dan nofotron tranga leri kan gi nanga jepi foe taki-go-taki-kon. Dati meki Odo 8:33 e taigi wi foe „gi jesi na tranga leri”. Ma son wan no wani „meki sma gi den leri nanga wortoe nomo”. Gi den, a kan de fanowdoe foe gi den wan strafoe di fiti te den no e gi jesi, ala di a strafoe moesoe gi na a joisti fasi (Odo 17:10; 23:13, 14; 29:19). Te bijbel e gi a rai disi, dan a no e taki dati fonfon moesoe gi na ini atibron noso taki a moesoe gi na so wan ogri fasi taki a pikin kan kisi mankeri (Odo 16:32). Na presi foe dati, wan pikin moesoe froestan foe san ede a e kisi strafoe èn a moesoe si taki disi de foe di a papa noso mama e prakseri a tanboen foe en. — Teki gersi Hebrewsma 12:6, 11.

Na ini a boekoe A sroto gi wan kolokoe osofamiri, den e poti prakseri na tapoe a sortoe praktis èn gosontoe rai dati foe bijbel.