Boen njoensoe foe a paradijs na Tahiti
TAHITI! A nen e meki sma prakseri wan toemoesi moi èn aparti sortoe presi. A ben kisi barinen foe di artist nanga skrifiman leki Paul Gaugin, Robert Louis Stevenson, nanga Herman Melville, di den prenki nanga boekoe foe den di ben taki foe a moi nanga korostoe fasi foe den tropisch èilanti na ini a Zuidzee ben hari a prakseri foe foeroe sma.
Tahiti na a moro bigiwan foe den moro leki 120 èilanti na ini Fransi Polynesia, di de na ini a Stille Zuidzee. Ala di a Zuidzee èilanti disi pikinmoro gersi wan paradijs na ini a prakseri foe foeroe sma, tokoe den sma na Tahiti moesoe jere foe wan tra paradijs ete di sa kon djonsro (Lukas 23:43). Jehovah Kotoigi, di ala nanga ala e teri 1918 sma na Tahiti now, e wroko tranga foe froeteri den 220.000 sma foe a boen njoensoe taki djonsro Gado Kownoekondre sa tjari troetroe paradijs situwâsi kon, no na ini Tahiti wawan ma na heri grontapoe toe. — Mateus 24:14; Openbaring 21:3, 4.
Foeroe jari langa a bijkantoro foe a Waktitoren Genootschap na Fiji, di de so wan 3500 kilometer foe drape, ben tiri a preikiwroko na Tahiti. Foe di a ben de so fara, meki problema ben kon foe disi, èn a gro no ben go so esi. So boen, tapoe 1 april 1975, wan bijkantoro ben opo na Tahiti, èn dati ben tjari wan bigi kenki kon ini a wroko foe troe kresten na ini a gebied disi. San ben meki a bigi kenki disi kon, èn fa a preikiwroko ben bigin na Tahiti?
Wan pikin bigin
A boen njoensoe foe a Kownoekondre ben de foe jere a fosi leisi na Tahiti na ini den jari na mindri 1930 nanga 1940, èn foeroe foe den sma di ben libi na tapoe na èilanti, di abi foeroe lespeki gi bijbel, ben arki nanga foeroe belangstelling. Ma foe di lanti ben tapoe a wroko èn tra skotoe ben poti, meki baka 1955 no wan Kotoigi ben de ete na tapoe na èilanti. Na a ten dati, Agnès Schenck, wan oema di ben gebore na Tahiti èn di ben e libi na Amerkankondre, ben bosroiti foe drai go baka na Tahiti nanga en masra èn nanga en manpikin. A ben tjari kon na krin fa disi pasa.
„Na tapoe a distriktkongres foe 1957 na Los Angelos, brada Knorr [di na a ten dati ben de presidenti foe a Waktitoren Genootschap] ben tjari kon na krin taki boen foeroe Kownoekondre preikiman ben de fanowdoe na Tahiti. Na a ten dati, mi ben dopoe wán jari kaba, èn mi ben bari: ’Dan meki wi go na Tahiti!’ Toe osofamiri, a famiri Neill nanga a famiri Carano, di ben de boen mati foe wi, ben jere san mi ben taki. Den ben taigi wi taki den ben sa wani kon nanga wi, ma wi no ben abi nofo moni. A masra foe mi ben siki wan heri pisi ten kaba, èn a manpikin foe mi ben jongoe ete. So boen, a ben moeilek foe go. Mati na ini den gemeente di ben de krosibei, ben jere san wi ben abi na prakseri, èn den ben seni moni nanga ososani kon gi wi. Dan, na ini mei 1958, wi ben teki boto go na Tahiti, èn wan foe den sani di wi ben abi nanga wi ben de 36 bedikrosi!
Di wi ben doro Tahiti, mi ben firi misrefi leki wan freimdesma, foe di mi ben gowe foe na èilanti so wan 20 jari kaba. Wi ben bigin preiki, ma wi ben moesoe loekoe boen foe di lanti ben tapoe a kresten wroko foe wi. Wi ben moesoe kibri den tijdschrift, èn wi ben gebroiki bijbel wawan. Ini a bigin, wi ben gi kotoigi soso na den sma di ben abi abonement foe A Waktitoren nanga Ontwaakt! kaba.
Baka na internationaal kongres na New York City na ini 1958, Clyde Neill nanga David Carano, makandra nanga den osofamiri foe den, ben kon jepi wi. Wi ben preiki makandra èn ben aksi sma foe kon arki den lezing di ben e gi na ini den oso foe den brada. Safrisafri wi ben orga sani, èn wi ben bigin wan bijbelstudie groepoe nanga 15 sma. Baka dri moen, a famiri Neill nanga Carano ben moesoe gowe foe di a visum foe den ben kaba. Dati meki den brada ben bosroiti taki fosi den ben o gowe, den ben o dopoe ala den sma di ben abi belangstelling èn di ben doro den markitiki. Mi ben kisi a grani foe de a vertaler foe a fosi dopoe lezing. Na a okasi disi, aiti sma foe na èilanti ben sori nanga a dopoe taki den ben gi densrefi abra na Jehovah. Baka dati a famiri Neill nanga Carano ben go baka na Amerkankondre.
A preikiwroko ben go doro. Wi ben orga wisrefi na ini pikin groepoe èn ben go na den sma na neti joeroe. Nofotron wi ben taki te leki mindrineti nanga sma di ben abi belangstelling. Son leisi, srefi Protestant domri ben kon na den takimakandra toe. Na ini 1959, a fosi gemeente ben opo. Dan na ini 1960, wi ben prisiri troetroe taki lanti ben erken a genootschap foe Jehovah Kotoigi. Den fosi jari dati, ben de jari di ben foeroe nanga prisiri èn nanga heimarki na jejefasi. Foe troe Jehovah ben blesi a bosroiti di wi ben teki foe froisi go na wan presi pe a nowtoe ben de moro bigi.” Sisa Schenck abi 87 jari now, èn te now ete a e dini Jehovah getrow na ini a gemeente foe en.
A wroko ben go doro
Na ini 1969, toe Kotoigi foe Fransikondre, Jacques nanga Paulette Inaudi, ben seni kon na Tahiti leki spesroetoe pionier. Jacques e memre: „Di wi ben doro Tahiti, joe ben abi soso 124 preikiman, wán gemeente na ini Papeete, nanga toe spesroetoe pionier na ini Vairao, na tapoe a schier èilanti.” Wan pisi kontren de leki wan konèksi na mindri a schier èilanti nanga Tahiti. A ten ben doro taki a „Vrede na grontapoe” internationaal kongres ben o hori. „Dati ben de a fosi leisi di mi ben ondrofeni fa foe orga wan kongres,” na so Jacques e go doro. „Wi ben moesoe sreka sani gi wan programa na ini Ingrisitongo gi den internationaal fisitiman, wi ben moesoe soekoe pokoeman foe plèi den Kownoekondre singi, èn oefen toe drama. Ala a wroko disi ben doe nanga soso 126 preikiman. Mi sabi seiker taki Jehovah ben doe a moro bigi pisi foe a wroko.” A ben de wan prisiri sani gi den sma foe na èilanti foe si taki 488 sma ben kon. Gi foeroe foe den, a ben de a fosi leisi taki den ben miti kompe Kotoigi foe tra kondre.
Sjatoe baka dati, Jacques Inaudi ben kisi a toewijzing leki kring-opziener. Te a ben go na den difrenti èilanti, dan a ben si taki foeroe belangstelling ben de, ma taki wan toe Kownoekondre preikiman ben de nomo foe meki a belangstelling gro. „Dati meki mi ben gi foeroe osofamiri deki-ati foe froisi go na den èilanti disi foe dini pe a nowtoe ben de moro bigi”, na so Jacques e tjari kon na krin. „So boen, safrisafri, a boen njoensoe ben panja na tapoe den èilanti groepoe disi.” Brada Inaudi ben dini leki wan kring opziener foe 1969 te leki 1974, èn now a de wan owroeman na ini wan foe den gemeente na Tahiti.
Wan foe den sma di ben handri akroederi a deki-ati di brada Inaudi ben gi, ben de Auguste Temanaha, di ben de wan foe den aiti sma di ben teki dopoe na ini 1958. A e froeteri san ben pasa. „Na ini 1972 a kring-opziener, Jacques Inaudi, ben gi wi deki-ati foe loekoe efoe wi ben kan froisi foe go dini na Huahine, wán foe den Leeward Èilanti di de wan pisi foe den Gezelschaps èilanti. Mi ben tweifri pikinso bika mi ben doe soso a bijbel leisipisi na ini a gemeente èn mi no ben feni taki mi ben de bekwaam foe kisi a frantiwortoe disi. Ma tokoe brada Inaudi ben tan taigi mi: ’No broko joe ede, joe kan doe en!’ Baka wan pisi ten wi ben teki wan bosroiti. So boen, na ini 1973 wi ben seri ala sani èn nanga den dri jongoe pikin foe wi, wi ben froisi go na Huahine.
Di wi ben doro drape, wi ben kon si taki mi ben moesoe bigin nanga ala sani — a Waktitoren-studie, a Theokrasia diniwroko-skoro, èn go so doro. A no ben de makriki, ma wi ben ondrofeni taki Jehovah ben kibri wi èn ben jepi wi. Na difrenti okasi a ben jepi wi foe feni wan presi foe tan. Baka dati, di wan groepoe gensman ben proeberi foe jagi den Kotoigi foe na èilanti, wan politiekman foe drape ben opo taki gi wi. Foe troe, Jehovah ben loekoe wi a heri pisi ten dati.” Now toe gemeente de na Huahine — wan Fransitongo gemeente nanga 23 preikiman èn wan Tahititongo gemeente nanga 55 preikiman.
Na ini 1969, Hélène Mapu ben kisi a toewijzing foe wroko leki spesroetoe pionier na tapoe a schier èilanti. „Foeroe belangstelling ben de na tapoe a schier èilanti, èn na ini wan sjatoe pisi ten, mi ben bigin nanga foeroe bijbelstudie”, Hélène e taki. Sjatoe baka dati, wan pikin gemeente ben opo na ini Vairao, ma owroeman ben de fanowdoe. Baka wan pisi ten, Colson Deane, di na a ten dati ben libi 35 kilometer foe drape na ini Papara, ben man gi jepi. „Wi ben moesoe orga sani boen foe kan dini na ini Vairao”, brada Deane e froeteri. „Mi ben wroko na ini Faaa, di ben de 70 kilometer foe Vairao na a tra sei foe na èilanti. Baka wroko joeroe, mi ben moesoe hasti misrefi go na oso, teki mi osofamiri, èn dan go doro na Vairao. Baka ten wi ben moesoe froisi go na Faaa foe a wroko foe mi ede. Wi ben sa man jepi a Vairao gemeente ete? Wi ben wani jepi den brada drape troetroe, dati meki wi ben bosroiti foe go doro. A no foeroe leisi wi doro oso bifo mindrineti, na neti di wi ben abi konmakandra, bika wi ben moesoe rèi foeroe leisi foe tjari den sma di no ben abi oto, go na oso. Wi ben doe disi feifi jari langa. Now a de wan prisiri foe si taki fo gemeente de na ini a pisi disi foe na èilanti, èn wi abi switi memre foe den dei dati.”
Tahiti e kisi wan bijkantoro
Na ini 1974, a nomroe Kownoekondre preikiman na Tahiti ben kon tron 199. A jari baka dati, di N. H. Knorr nanga F. W. Franz, di na a ten dati ben de presidenti nanga ondro-presidenti foe a Waktitoren Genootschap, ben fisiti Fransi Polynesia, den ben si taki a ben o de moro praktis foe tiri a preikiwroko di ben doe na ini Fransi Polynesia, na Tahiti, èn no na Fiji, di ben de moro leki 3500 kilometer foe drape. So boen, 1 april 1975, den ben opo a bijkantoro na Tahiti, èn den ben poti a kring-opziener Alain Jamet na wroko leki bijkantoro opziener.
Wan toe jari pasa, brada Jamet, ben man froeteri foe den bigi blesi foe Jehovah. „Sensi 1975, foeroe moeiti ben doe foe tjari a boen njoensoe go na ala èilanti nanga èilanti groepoe na ini a gebied foe wi, wan kontren di bigi leki a westsei pisi foe Europa. Den boen bakapisi di wi kisi, e gi prisiri. Na ini 1983, a nomroe foe preikiman ben gro kon tron 538. Na ini a jari dati, den ben bow wan presi gi a bijkantoro nanga a Bethel-oso na Paea. Now joe abi so wan 1900 preikiman di panja na ondro den 30 gemeente na tapoe den Gezelschaps èilanti, na Austral èilanti joe abi wán gemeente nanga wán groepoe di sma no man fisiti so makriki, na tapoe den Markis-èilanti joe abi wán gemeente nanga toe groepoe di sma no man fisiti so makriki, èn na tapoe den èilanti Tuamotu nanga Gambier joe abi difrenti groepoe di sma no man fisiti so makriki. Foeroe njoen Kownoekondre zaal e bow — dri na tapoe den Markis èilanti èn seibi na Tahiti — foe sorgoe gi a nomroe foe njoen sma di e kon na den konmakandra, di e gro nomonomo. Na ini den 20 jari di pasa, Jehovah troetroe blesi a moeiti di wi doe foe meki a wroko na ini a kontren na Tahiti gro.”
Foeroe de foe doe ete
Den abi moi froewakti ini a tori foe a gro di a wroko sa gro na ini Fransi Polynesia. So wan 5376 sma na ini heri Fransi Polynesia ben kon makandra nanga Jehovah Kotoigi foe memre a dede 23 maart 1997 foe Jesus Krestes. Foe kan sorgoe gi a jeje nowtoe foe den sma disi di abi belangstelling, meki den bijbel poeblikâsi foe wi de foe kisi na ini wan toe tongo foe den èilanti drape. Boiti taki wi meki boekoe na ini Tahititongo, wi sreka boekoe toe na ini Paumotu, san den e taki na tapoe a Tuamotu èilanti groepoe, èn na ini a Noord-Markistongo nanga Zuid-Markistongo.
A moi gro nanga den moi ondrofenitori jepi den Kownoekondre preikiman na Tahiti foe abi moro warderi gi a lobi nanga pasensi foe Jehovah, „di wani taki ala sortoe sma moesoe kisi froeloesoe èn kon kisi wan soifri sabi foe waarheid”, srefi na tapoe den farawe èilanti na ini a Zuidzee (1 Timoteus 2:4). Jehovah Kotoigi na Tahiti èn na tra èilanti foe Fransi Polynesia e bribi dorodoro na ini a pramisi foe Jehovah: „Na tapoe mi den èilanti srefi sa howpoe, èn den sa wakti na anoe foe mi.” — Jesaja 51:5.
[Karta na tapoe bladzijde 26]
(Efoe joe wani si pe den sani disi skrifi, loekoe a tijdschrift)
A bijkantoro foe Tahiti e sorgoe foe den sani di Fransi Polynesia abi fanowdoe
AUSTRALIA
[Prenki na tapoe bladzijde 25]
Foe a kroektoe-anoesei go na a reti-anoesei: Alain Jamet, Mary-Ann Jamet, Agnès Schenck, Paulette Inaudi nanga Jacques Inaudi
[Prenki na tapoe bladzijde 27]
A bijkantoro foe Tahiti