Den Tin Komando
A BESKOPOE foe Gloucester na Ingrisikondre ben kon sabi taki moro leki afoe foe den kerki tiriman na ini a kontren pe a abi tiri, no ben kan kari den Tin Komando a wan baka a trawan, èn 10 procent foe den no ben sabi pe foe feni den na ini bijbel. Ma dati ben de 450 jari pasa kaba. A situwâsi kon moro boen sensi a ten dati? Kwetikweti — soleki fa wan gewoon ondrosoekoe di Sunday Times doe no so langa pasa na Anglikan kerki tiriman, ben tjari kon na krin.
Foe den 200 kerki tiriman di den ben interview, soso 34 procent ben kan kari ala den Tin Komando. Na mindri den wan di tan abra, wan kerki tiriman ben feni taki toemoesi foeroe sani de di sma no mag doe, èn wan trawan ben weigri foe erken den, foe di den no e fiti gi den disiten problema na a sei foe boen gwenti nanga wet.
Joe sabi den Tin Komando noso joe sabi pe joe kan feni den? Den skrifi poti na ini Exodus, a di foe toe boekoe foe bijbel, den fosi 17 vers foe kapitel 20. Foe san ede joe no ben sa leisi den? Djaso joe abi wan makriki fasi foe poti den ini groepoe. Den fosi fo komando abi foe doe nanga na anbegi di wi e anbegi Gado, a di foe feifi komando e poti krakti na tapoe na osofamiri libi, nomroe siksi te go miti neigi e taki foe a matifasi di wi abi nanga wi kompe libisma, èn a di foe tin na wan apartiwan, foe di a e meki wi ondrosoekoe wi eigi ati, foe ondrosoekoe wisrefi. Djaso wi e kari den sani sjatoe baka fa kresten ben sa kan gebroiki den gronprakseri.
A fosiwan: Wi moesoe gi wisrefi na ini a dini foe wi Kriaman wawan. Di foe toe: Wi no moesoe gebroiki popki na ini wi anbegi. Di foe dri: Ala ten wi moesoe sori lespeki nanga wartifasi gi a nen foe Gado. Di foe fo: Wi moesoe teki ten foe poti prakseri na tapoe jeje afersi, sondro foe sani poeroe wi prakseri. Di foe feifi: Pikin, oenoe moesoe lespeki oen papa nanga mama. Di foe siksi: Wi no moesoe kiri sma. Di foe seibi: Wi moesoe tan farawe foe soetadoe. Di foe aiti: Wi no moesoe foefoeroe. Di foe neigi: Wi moesoe taki a waarheid. Di foe tin: Tan farawe foe bigi-ai.
Den Tin Komando ben de wan pisi foe a wet sistema di Gado ben gi Moses. Ma den gronprakseri di de na ini, de foe têgo (Romesma 6:14; Kolosesma 2:13, 14). Foe a reide disi meki den bakaman foe Jesus ben kari èn ben sori go na den Tin Komando (Romesma 13:8-10). O moro kolokoe — èn o moro seiker — a libi ben sa de na ini a ten disi, efoe ala sma ben lespeki èn ben libi akroederi den gronprakseri disi di Gado ben gi nanga jepi foe en santa jeje!