Den ’ben bai waarheid’!

„BAI waarheid srefi èn no seri en” (Odo 23:23). Dati ben de a froemane di a koni man Salomo ben gi. Ala di wi kan taki disi foe waarheid ini algemeen, tokoe a de spesroetoe so nanga waarheid di de foe feni na ini bijbel, a Wortoe foe Gado. A waarheid dati kan tjari wi go na têgo libi! (Johanes 17:3, 17) Ma hori na prakseri taki efoe wi wani kisi so wan waarheid, dan dati no e go sondro lasi. Wan sma moesoe de klariklari foe „bai” en, dati wani taki, foe òfer wan sani noso foe libi wan sani so, taki a kan kisi waarheid. (Teki gersi Mateus 13:45, 46.) Moro foeroe sma no de klariklari foe doe disi. Ma na ini foeroe kondre, moro nanga moro deki-ati sma e bai bijbel waarheid — èn nofotron densrefi moesoe lasi boen foeroe.

Teki, foe eksempre, Jehovah Kotoigi foe a kondre Gana na West-Afrika. Juni 1989, den ben abi moro leki 34.000 sma na ini a kondre dati di ben teki a waarheid foe bijbel èn ben prati dati fajafaja nanga tra sma. Ne wet ben tapoe a poebliki preikiwroko. Tokoe, opregti sma ben go doro foe „bai waarheid” — ala di wet ben skotoe den. Na 31 oktober 1991, den ben kisi primisi baka foe doe a preikiwroko, èn mindribere foe 1995, soso dri nanga afoe jari baka di wet ben tapoe den foe doe a preikiwroko, a nomroe foe fajafaja Kotoigi foe Jehovah na Gana ben gro kon tron 46.104! Èn a jari disi a nomroe gro kon tron moro leki 52.800.

San hari sma kon na a waarheid foe Gado Wortoe? Sortoe ofrandi son sma ben abi foe tjari foe kan „bai waarheid”? Foe kisi wan piki na tapoe disi, dan meki wi go loekoe den ondrofenitori foe dri kresten foe Gana.

Bijbel-leri ben hari den

Meki wi go loekoe wan oema fosi di pasa 20 jari. A papa foe en ben de wan pastoroe, tokoe a ben bosroiti foe gowe libi a relisi foe en papa. Foe san ede? A lobi di a ben lobi waarheid.

Wan leisi a ben tjari kon na krin: „Den Kotoigi ben gwenti kon na wi oso te den ben go oso foe oso foe fisiti sma. Baka wan toe takimakandra nanga den, mi ben froestan taki san den ben e leri, ben abi wan boen fondamenti na tapoe bijbel. Mi ben poti aksi gi den foe tori soleki a Dri-wánfasi, hèlfaja, a dede di a sili no man dede, èn spesroetoe foe a begi di sma e begi foe meki trawan kon betre. Mi ben bribi troetroe taki den leri disi ben de foe feni na ini bijbel. Ma den Kotoigi ben jepi mi foe si taki dati no ben de so.” — Efoe joe wani sabi san bijbel e prakseri foe den tori disi, dan grantangi loekoe Markus 13:32; Romesma 6:23; Tori foe den Apostel 10:40; nanga 1 Korentesma 13:8-10.

A jongoe oema ben go doro: „Tokoe mi ben kisi foeroe gens foe mi famiri, spesroetoe foe mi papa. A ben denki taki sma ben kori mi. Ma mi ben sabi taki san mi ben leri foe Jehovah Kotoigi ben de a waarheid. Mi ben proeberi foe meki mi papa kon sabi den sani disi na ini bijbel, ma a no ben wani arki. Foe taki en leti, a gens ben kon moro ogri.

Ma mi ben de nanga deki-ati. Mi ben sabi taki soso troetroe sabi e tjari wi go na têgo libi na ini wan paradijs, èn mi ben abi a fasti bosroiti foe hori fasti na dati. Di den Kotoigi foe a kontren ben jere foe den problema di ben miti mi, dan na wan lobi-ati fasi den ben kon jepi mi, ala di den ben gi mi deki-ati èn ben gi mi wan toe sani di mi ben abi fanowdoe troetroe. Disi ben jepi mi foe froestan den wortoe foe Jesus di de foe feni na ini Johanes 13:35, moro betre: ’Nanga disi ala sma sa sabi taki oenoe na mi disipel, efoe oenoe abi lobi na oen mindri.’ Na overtoigi di mi ben abi taki Jehovah Kotoigi e libi akroederi a troe relisi, ben kon moro tranga. Baka ten, di mi papa nanga mama ben kon si taki mi ben kenki mi libi kon moro betre, den ben lobi san den ben si, èn a fasi fa den ben denki èn ben handri nanga mi, ben kenki — na so wan fasi taki mi papa ben aksi den Kotoigi foe studeri nanga mi bigi brada!”

Boeweisi a waarheid na joesrefi

Gi son jongoesma di Kotoigi papa nanga mama kweki, a de wan tjalensi toe foe „bai waarheid”. Son jongoewan wani teki bijbel waarheid leki wan sani di de foe ensrefi so. Efoe den no e meki den waarheid dati kon tron wan pisi foe densrefi, dan a bribi foe den kan kon swaki, leki wan sani di no e go dipi. (Teki gersi Mateus 13:20, 21.) Nathanièl, wan man foe Gana di pasa 30 jari kaba, e froeteri fa a ’ben bai waarheid’ di a ben de wan jonkoeman ete.

„Mi papa nanga mama ben leri mi bijbel sensi a ten di mi ben de wan beibi ete”, a e memre. „Di mi ben gro kon bigi, mi ben go doe a preikiwroko makandra nanga den, ma mi no ben bosroiti troetroe foe tron wan Kotoigi. Baka wan pisi ten, mi ben kon froestan taki mi ben abi foe go ondrosoekoe sani misrefi.

Fosi, mi ben abi foe kisi na overtoigi taki bijbel, èn no wan tra santa relisi boekoe, na a Wortoe foe Gado. Nanga jepi foe persoonlijk studie, mi ben kon sabi taki a de a wan-enkri santa boekoe di abi wan lo krin profeititori di ben kon troe soifri. Mi ben kon sabi toe taki bijbel abi wan lo sabidensi waarheid — foe eksempre, taki grontapoe ’e anga na noti’ (Job 26:7). Den wortoe disi ben skrifi doesoendoesoen jari bifo sabidensiman ben sabi taki wi son sistema de. Soso Gado ben kan meki libisma skrifi den sani dati!a

Baka dati mi ben wani kon sabi sortoe relisi organisâsi e leri èn e libi akroederi den waarheid di bijbel e leri. Moro foeroe relisi e leri sma foe a hèlfaja, a Dri-wánfasi, èn foe wan sili di no man dede. Ma mi no ben man froestan den leri disi. Mi ben prakseri: Wan godelowsoe papa ben o hori na anoe foe en pikin na ini wan patoe nanga watra di e bori foe strafoe en, a no so? Dan fa wan Gado foe lobi ben kan poti den pikin foe en na ini wan faja hèl èn meki den pina? Ma Jehovah Kotoigi e leri sma sani akroederi den bijbeltekst leki Romesma 6:23 di e taki: „A pai foe sondoe na dede” — no wan faja hèl. Disi mi ben man froestan.

Mi ben si toe taki Jehovah Kotoigi wani, taki ala memre moesoe libi akroederi den bijbel markitiki èn taki den e sluit ala sma uit di e libi wan sondoe libi èn di no abi berow foe dati. Nanga ala den sani disi na prakseri, mi ben kon na a bosroiti taki Jehovah Kotoigi abi a waarheid, èn mi ben teki mi eigi bosroiti foe tron wan foe den. Mi ben wroko tranga foe tron wan sma di ben kan teki dopoe leki wan Kotoigi.” — 1 Korentesma 5:11-13.

Na ondrofenitori foe Nathanièl e sori boen taki srefi jongoesma di kresten papa nanga mama kweki, moesoe „bai waarheid”. Den no moesoe go na den gemeente konmakandra nomo sondro taki densrefi e doe wan sani. Neleki den Bereasma foe owroeten, na so den so srefi moesoe ’ondrosoekoe den Boekoe foe bijbel finifini foe si efoe den sani disi de so troetroe’ (Tori foe den Apostel 17:11). Disi e teki ten nanga moeiti, ma a bakapisi kan de wan tranga bribi èn wan tranga overtoigi. — Teki gersi Efeisesma 3:17-19.

Falsi relisi no meki a froewakti kon troe

Wan man foe Gana di nen Godwin, pikinmoro ben doro 70 jari di a ben gowe libi a Presbiterian Kerki èn wan lôge. „Sani ben pasa na ini a kerki di mi no ben feni boen”, na so Godwin e taki. „Foe eksempre, wan lo memre foe a kerki ben soekoe trobi èn ben feti nanga makandra, èn a e go nanga langa. Son leisi skowtoe ben moesoe kon seti a vrede nanga na orde baka! Mi no ben denki taki a ben de wan joisti sani gi bakaman foe Krestes. Dan wan problema ben kon na mindri mi nanga wan kompe Presbiterian-sma. Wan poebliki kroetoebangi ben handri na afersi èn ben kroetoe a tra man taki a ben fowtoe. Ma na wan oneerlijk fasi, a domri foe a kerki ben teki a sei foe a man disi èn ben proeberi foe kroetoe mi na fesi foe a heri gemeente! Mi ben froeteri en krin san mi ben prakseri foe a tori èn mi ben waka komoto na a kerki — noiti moro mi drai go baka drape.

Wan pisi ten ben pasa, èn Jehovah Kotoigi ben kon na mi oso. Ini a bigin mi ben arki soso foe di mi no ben wani jagi sma gowe di ben taki foe Gado. Ma mi ben bigin si taki ala di mi ben de wan Presbiterian-sma someni tenti jari langa, tokoe wan lo sani ben de di mi no ben sabi foe bijbel. Foe eksempre, noiti mi no ben sabi taki bijbel e taki foe a howpoe dati sma kan libi foe têgo na ini wan Paradijs na grontapoe.b Èn di mi ben bigin go na den konmakandra foe Jehovah Kotoigi, dan a fasi fa den ben tjari densrefi, èn spesroetoe a krosi nanga a krin fasi fa jongoewan na den mindri ben sori, ben naki mi ati troetroe. Den sma disi ben de sma di troetroe ben libi akroederi bijbel markitiki!”

Tokoe, foe „bai waarheid” ben wani taki dati a ben abi foe doe moeiti foe kenki wan toe sani na ini en libi. Godwin e memre: „Mi ben de wan memre foe wan lôge. Èn ala di sma sabi taki a de wan genootschap pe sma e libi leki brada nanga makandra èn taki a e jepi den memre foe en, tokoe mi ben si seremonia pe den ben gebroiki edekrabasi nanga bonjo èn pe den ben kari den jeje. Den ben taki dati den jeje disi ben jepi den sma di ben abi kontakti nanga den foe gro na jejefasi.

Di mi ben studeri, dan a ben jepi mi foe si taki Jehovah Gado e tegoe foe iniwan sani di abi foe doe nanga afkodrei foe di a kan meki wan sma kon na ondro a krakti foe Satan nanga den ogri jeje legre foe en.c Mi ben o tan wan memre foe a lôge nanga ala en dangrafasi, noso mi ben o tapoe nanga disi èn plisi Jehovah? Mi ben teki a bosroiti foe doe a lasti sani. Mi ben broko ala den lôge wrokosani di mi ben abi, srefi a krosi di mi ben gebroiki na den lôge konmakandra. Mi ben ondrofeni a waarheid foe Jesus pramisi di a ben taki: ’Waarheid sa meki oenoe kon fri!’ (Johanes 8:32) Now mi breiti foe prati den sani di mi leri nanga tra sma. A no e hati mi na no wan fasi.”

Foeroe doesoendoesoen opregti sma tjari densrefi sortoe ofrandi dati so taki den ben kan „bai waarheid”. Neleki den dri kresten di wi ben taki foe den dja, a no e hati den taki den ben tjari kenki kon. Bijbel waarheid gi den „wan boen fondamenti gi a tamara, so taki den kan hori a troetroe libi steifi” (1 Timoteus 6:19). A „troetroe libi” nanga ala den blesi di e kon nanga dati, joe kan abi den toe foe têgo efoe joe sa „bai waarheid”.

[Foetoewortoe]

[Prenki na tapoe bladzijde 9]

Nathanièl

[Prenki na tapoe bladzijde 9]

Godwin