Joe e warderi den blesi foe Jehovah troetroe?
KENICHI, wan man di abi wan libimarki na mindri 40 nanga 60 jari, ben go na wan apteiki foe teki dresi gi wan pikin frikowtoe di a ben kisi. Baka di a dringi a dresi, dan a kisi wan alergie di gi en krasikrasi nanga watrablaas na en heri skin. A no de foe froewondroe taki Kenichi ben bigin tweifri efoe na apteikri ben poti nofo prakseri na tapoe den sani di a ben abi fanowdoe.
Son sma ben sa kan prakseri foe Jehovah Gado na a srefi fasi neleki fa Kenichi ben si na apteikri. Den e tweifri taki na almakti Gado, Jehovah, abi troetroe belangstelling gi wi leki aparti sma. Ala di den e erken taki Gado boen, tokoe den no abi na overtoigi taki a e broko en ede nanga wi persoonlijk. Disi de spesroetoe so te sani no e go boen nanga den noso te den e kisi moeilek problema foe di den e hori densrefi na bijbel gronprakseri. Foe di den no abi a koni foe man si sani krin, dan den e si den problema foe den leki den krasikrasi nanga watrablaas di Kenichi ben kisi sondro foe a ben froewakti dati, neleki na a wan noso tra fasi a de wan fowtoe foe Gado. — Odo 19:3.
Wi no kan agersi Jehovah nanga onvolmaakti libisma. Libisma skotoe ini sabi èn ini den sani di den man doe. Den no e si krinkrin san na den sani di trawan abi fanowdoe troetroe, neleki na apteikri foe Kenichi. Heri tra fasi leki libisma, noti no e pasa den ai foe Jehovah sondro foe a si. Foeroetron Jehovah e jepi wi sondro foe wi e si èn e warderi a troe tori dati, bika wi abi wan gwenti foe poti wi prakseri na tapoe sani di wi no abi èn foe loekoe pasa den foeroe blesi di wi abi. Na presi foe de esi foe gi Jehovah a fowtoe foe iniwan problema di wi e ondrofeni, wi moesoe proeberi foe si den blesi di wi e kisi foe Jehovah.
Soleki fa Webster’s Ninth New Collegiate Dictionary e taki, dan wi kan taki foe wan „blesi” leki „wan sani di e meki kolokoe noso tanboen kon”. Joe e froestan taki disi de spesroetoe so nanga den blesi di e kon foe Jehovah?
No wan sma e sorgoe gi sani leki En
Te wan wefi e taki dati en masra na wan sma di e sorgoe boen gi sani, dan foeroetron a wani taki dati a e sorgoe boen gi den sani di na osofamiri abi fanowdoe, a e sorgoe gi nofo njanjan, tanpresi, nanga krosi gi a kolokoe nanga tanboen foe na osofamiri. O boen Jehovah de leki a Sma di e sorgoe gi sani foe wi? Loekoe wi planeiti Grontapoe, a tanpresi foe libisma, moro fini. A de 150.000.000 kilometer foe a son, èn a fara dati na a joisti fasi foe abi a safoe temperatuur di e meki taki libi kan de na grontapoe. A 23,5-grade skoinsi fasi fa wi grontapoe e tanapoe, seti na wan volmaakti fasi, so taki den difrenti ten kan de, di e meki taki wi kan koti bogobogo njanjan. A bakapisi foe dati de, taki grontapoe e sorgoe gi njanjan gi moro leki feifi miljard sma. Jehovah na troetroe wan Sma di e sorgoe gi sani na wan kefalek moi fasi!
Boiti dati, bijbel e gi wi a djaranti taki Jehovah abi kefalek foeroe belangstelling gi wi leki aparti sma èn gi a tanboen foe wi. Prakseri nomo taki Jehovah sabi ibriwan foe den miljardmiljard stari na den nen, èn taki srefi no wan pikin fowroe e fadon na gron sondro a tata sabi dati (Jesaja 40:26; Mateus 10:29-31). O moro foeroe a e broko en ede nanga libisma di lobi en èn di a ben bai nanga a warti broedoe foe en lobi Manpikin, Jesus Krestes! (Tori foe den Apostel 20:28) A ben fiti taki a koni man ben bariwroko: „A blesi foe Jehovah — dati na san e meki sma kon goedoe, èn a no e poti pen na tapoe.” — Odo 10:22.
Blesi di e meki wi kon goedoe
Wi abi, na ini den sani di wi abi, wan sani di abi bigi waarde èn di wi moesoe de nanga tangi srefisrefi gi dati. San na a sani dati? Bijbel e sori san na a sani te a e taki: „A wet foe joe mofo boen gi mi, moro leki doesoendoesoen pisi gowtoe nanga solfroe” (Psalm 119:72; Odo 8:10). Awansi o warti gowtoe foe hei kwaliteit kan de, tokoe a wet foe Jehovah na wan sani di wi wani moro srefisrefi. Wan soifri sabi foe en wet makandra nanga na inzicht nanga a koni foe man si sani krin di Jehovah e gi opregti sma di e soekoe a waarheid, na sani di wi moesoe warderi. Den e meki taki wi man kibri wisrefi, man kakafoetoe gi moeilek situwâsi, man handri problema nanga boen bakapisi èn na so fasi de tevrede èn kolokoe.
Disi de so nanga srefi den wan di jongoe srefisrefi ete. Loekoe fa wan jongoe oemapikin ben loesoe den problema foe en foe di a ben waka baka a wet foe Jehovah. Na oemapikin, Akemi, e libi krosibei foe Tokyo. A papa nanga mama foe en ben gebroiki bijbel gronprakseri foe gi en leri èn nanga den sani di den ben taki èn nanga na eksempre foe den, den ben jepi na oemapikin foe den foe kweki lobi gi Jehovah èn gi a sma na den sei. Foe di den ben si den problema na fesi kaba di a ben sa miti na skoro, meki den ben proeberi foe sreka en na a moro boen fasi leki fa den man. Ma di Akemi ben bigin go na a josi-josi skoro, son pikin na ini en klas ben si en leki wan sma di de „tra fasi”, bika a ben begi fosi a ben njan èn na wan opregti fasi a ben tan fara foe son aktiviteit di no ben kroederi nanga bijbel. No langa baka dati, a ben tron wan sma di wan groepoe fetiman ben trobi èn baka skoro, den ben e lontoe en èn ben e naki en na ini en fesi, ben e drai en anoe, èn ben e spotoe nanga en.
A jongoe Akemi no ben teki refensi èn a no ben kikbak toe foe di a ben frede den sma di ben e pina en. Na presi foe dati, a ben proeberi foe gebroiki san a ben leri. A bakapisi foe a moi fasi fa a ben tjari ensrefi èn foe en deki-ati ben de taki a ben wini a lespeki foe foeroe foe den kompe leerling. Den ben tjari na afersi na ondro a prakseri foe a leriman, èn sensi a dei dati, den no ben meshandri Akemi moro na skoro.
San ben jepi Akemi foe handri wan moeilek situwâsi nanga boen bakapisi? A soifri sabi, inzicht nanga koni foe Jehovah di en papa nanga mama ben stampoe go na en ini. A ben sabi boen fa Jesus ben horidoro, èn dati ben boeweigi en foe waka baka na eksempre foe en. Bijbel ben jepi en foe si taki son sma e doe fowtoe sani foe di den no sabi san den e doe, èn a sani dati ben gi en a deki-ati foe no wani si a fowtoe na ai di den fetiman dati ben doe, na presi foe no wani si den sma srefi na ai. — Lukas 23:34; Romesma 12:9, 17-21.
A no de foe taki dati no wan papa nanga mama ben sa wani si taki sma spotoe nanga a pikin foe den èn meshandri en. Tokoe, joe kan prakseri fa a ben plisi a papa nanga mama foe Akemi srefisrefi di den ben jere a fini foe san ben pasa. Den sortoe pikin dati troetroe na wan blesi foe Jehovah. — Psalm 127:3; 1 Petrus 1:6, 7.
Wakti Jehovah nanga pasensi
Ma bifo joe e kisi den blesi foe Jehovah, sontron joe moesoe wakti en ten foe handri. Jehovah sabi joe situwâsi èn e sorgoe gi ibri sani di joe abi fanowdoe te a sani sa gi joe a moro boen winimarki (Psalm 145:16; Preikiman 3:1; Jakobus 1:17). Kande joe lobi froktoe, ma fa joe ben sa prakseri foe wan sma di gi joe froktoe foe njan fosi a lepi? Awansi na wan apra, wan apresina noso wan tra sani, joe ben sa lobi en te a froktoe lepi, safoe èn soekroe. Na a srefi fasi a de so, taki Jehovah e sorgoe gi san joe abi fanowdoe na a reti ten — no toemoesi froekoe èn no toemoesi lati.
Prakseri na ondrofenitori foe Josef. Sondro taki a ben sondoe, a ben de na ini wan Egipti doengroe-oso. Wan kompe strafoeman, a sma di ben kanti win gi Farao, ben howpoe foe kon fri èn a ben pramisi foe tjari na afersi foe Josef na ondro a prakseri foe Farao. Ma baka di a kon fri, a frigiti Josef srefisrefi. A ben gersi taki den ben frigiti Josef. Ma toe heri jari baka dati a ben kon fri foe doengroe-oso te foe kaba èn baka ten den ben meki a tron a di foe toe tiriman na ini Egipti. Na presi foe no abi pasensi, Josef ben wakti Jehovah. Foe a sani dati ede a ben kisi blesi na wan fasi di ben wani taki dati a libi foe Israèlsma nanga Egiptisma ben kisi kibri. — Genesis 39:1–41:57.
Masashi ben de wan owroeman na ini wan gemeente na noordsei foe Japan. A no ben de na ini wan doengroe-oso, ma a ben moesoe wakti Jehovah. Foe san ede? Sensi a Bedinari Skoro, wan skoro foe gi leri na kresten bedinari di doro den markitiki, ben seti na Japan, a ben poti en leki wan fajafaja marki foe go na a skoro. A ben begi tranga foe a grani. En pionier patna ben kisi wan kari, ma ala di Masashi ben wani dati fajafaja, a no ben kisi wan kari. A sani dati ben meki a lasi-ati srefisrefi.
Ma tokoe a ben doe sani foe kakafoetoe gi den firi foe en. A ben studeri bijbel nanga den poeblikâsi di a Waktitoren Genootschap tjari kon na doro, èn a ben e poti prakseri na tapoe den sortoe tori leki na abi di wan sma moesoe abi sakafasi èn a basi di wan sma moesoe basi en firi. A ben kenki en fasi foe denki èn na so fasi a ben kisi moro satisfaksi na ini en toewijzing. Ne, di a no ben froewakti srefisrefi, a ben kisi wan kari foe go na a skoro.
Foe di a ben kweki den sortoe eigifasi leki pasensi nanga sakafasi, meki a ben kisi moro foeroe wini foe a skoro. Baka ten, Masashi ben kisi a grani foe dini den brada foe en leki wan opziener di e rèis. Ija, Jehovah ben sabi san Masashi ben abi fanowdoe èn A ben gi en na a joisti momenti pe a ben sa doe a moro boen gi en.
Soekoe foe kisi den blesi foe en
Dati meki Jehovah no de leki na apteikri. Ala di kande wi no e si a sorgoe nanga broko-ede foe Jehovah, tokoe den boenfasi foe en e kon na difrenti fasi — na ten èn na fasi di sa doe wi moro boen. Foe dati ede, tan soekoe foe kisi den blesi foe en. Prakseri taki joe abi foeroe reide kaba foe san ede joe moesoe de nanga tangi. Joe blesi nanga den fondamenti sani di joe abi fanowdoe foe tan libi na grontapoe. Joe kisi sabi foe Jehovah èn foe den volmaakti pasi foe en. Joe kisi inzicht. Èn joe kisi a koni foe man si sani krin. Ala den sani disi e meki taki joe tan boen èn de kolokoe.
Foe man ondrofeni srefi a blesi foe Jehovah dorodoro, go doro foe studeri bijbel doronomo. Begi Jehovah tranga foe jepi joe foe froestan èn gebroiki den leri di de leki diri ston na ini en Wortoe di skrifi nanga jepi foe en santa jeje. Den sa meki joe kon goedoe na jejefasi troetroe, so taki joe no sa mankeri noti. Ija, den sa wani taki dati joe de kolokoe èn tevrede now èn sa kisi libi nanga sani pasa marki na ini a njoen grontapoe di moesoe kon ete. — Johanes 10:10; 1 Timoteus 4:8, 9.
[Prenki na tapoe bladzijde 23]
A blesi foe Jehovah warti moro leki gowtoe