Kownoekondre preikiman e froeteri
Horidoro e tjari a blesi foe Gado kon na Malawi
JOSEF ben de wan getrow foetoeboi foe Jehovah (Hebrewsma 11:22). A ben de wan man di ben horidoro na wan toemoesi aparti fasi toe. Ala di den eigi brada foe en ben tori en, toe leisi a ben seri leki srafoe, èn baka ten den ben poti en na ini strafoe-oso tapoe a gron foe falsi kragi, tokoe Josef no ben brokosaka. Na presi foe dati, nanga pasensi a ben pina foeroe jari langa èn nanga sakafasi a ben e wakti a blesi foe Jehovah. — Genesis 37:23-28, 36; 39:11-20.
Na so a de toe na ini a ten disi, taki Jehovah Kotoigi na Malawi wakti a blesi foe Gado nanga pasensi. Den kresten Kotoigi disi ben pina foe a tapoe di lanti ben tapoe a wroko, hebi gens, nanga foeroe kefalek takroe ogridoe, 26 jari langa. Ma a hori di den ben horidoro kisi pai!
Di froefolgoe ben bigin na Malawi na a kaba foe 1967, so wan 18.000 Kownoekondre preikiman ben de. Prakseri fa den Kotoigi ben prisiri di den ben jere taki a dienstjari 1997 ben bigin nanga wan njoen heimarki foe 38.393 preikiman — moro leki toe tron leki na ini a bigin di a wroko ben tapoe! Boiti dati, moro leki 117.000 sma ben de na den 13 „Boskopoeman foe a vrede foe Gado”-distriktkongres di ben hori na Malawi. Foe troe, Jehovah blesi a bribi foe den èn a hori di den ben horidoro.
Wan eksempre foe a blesi disi na a ondrofenitori foe wan boi di abi 14 jari di nen Machaka. Di Machaka ben teki a kari foe studeri bijbel nanga den Kotoigi foe Jehovah, dan a papa nanga mama foe en ben mandi srefisrefi. Den ben taki: „Efoe joe wani tron wan Kotoigi, dan joe moesoe froisi gowe foe oso.” Ma a fasi disi foe tapoe skreki gi en, no ben meki a lasi-ati foe go doro nanga en studie. A bakapisi foe dati ben de, taki a papa nanga mama foe Machaka ben teki ala en krosi. Den brada ben doe wan sani na tapoe dati èn ben bai wan toe krosi gi en. Di a papa nanga mama foe Machaka ben kon jere foe a sani dati, dan den ben taigi en: „Efoe den Kotoigi e go sorgoe gi joe, dan joe moesoe gowe èn go libi nanga den.” Baka di Machaka prakseri a tori boen, a gowe libi a oso, èn wan Kotoigi osofamiri foe a gemeente foe en ben teki en na ini na oso foe den.
A papa nanga mama foe Machaka ben mandi so kefalek, taki den ben teki a bosroiti foe froisi gowe foe a kontren, so taki den no abi no wan enkri kontakt nanga den Kotoigi. A no de foe taki dati a sani dati ben meki Machaka brokosaka, ma a ben feni foeroe trowstoe di den brada ben taki nanga en foe Psalm 27:10, di e taki: „Efoe mi eigi papa nanga mi eigi mama ben gowe libi mi, dan Jehovah srefi ben sa teki mi.”
Baka ten, a papa nanga mama foe Machaka ben kon kenki a fasi fa den ben prakseri, èn Machaka ben teki a bosroiti foe froisi go baka na oso. Soleki fa a sori, dan a fasti bosroiti di a manpikin foe den ben teki foe dini Jehovah, ben abi wan tranga krakti na den tapoe, bika den ben wani studeri bijbel nanga Jehovah Kotoigi toe! Den ben de so srefi ala den dri dei na a „Boskopoeman foe a vrede foe Gado”-distriktkongres, di baka dati ben boeweigi den foe froeklari: „Foe troe, disi na a organisâsi foe Gado.”
Ija, gens kan tjari foeroe tesi kon, ma den loyaal boskopoeman foe Gado no e gi abra. Den e go doro nanga deki-ati, foe di den sabi taki „banawtoe e meki horidoro kon; horidoro foe en sei, wan boen posisi” (Romesma 5:3, 4). Jehovah Kotoigi na Malawi kan taki nanga reti dati horidoro e tjari a blesi foe Gado kon.