’Koloku den sma de di horidoro’
1. Sortu situwâsi di de na grontapu fu sensi 1914 meki Mateyus 24:3-8 kon tru, èn sortu sani di ben taki fu na Folkubontu nanga den Verenigde Nâsi no kon tru?
NA INI en buku The Present Age Robert Nisbet e taki fu „na Seybitenti-na-feyfi yari Feti di fu sensi 1914 go doro èn di pikinmoro noyti ben tapu”. Iya, „feti nanga tori fu feti”, so srefi grontapufeti — dati na san Yeyses ben taki a fesi gi na ten disi fu na kba (Mateyus 24:3-8). Na Folkubontu ben opo na ini 1920 „fu tapu feti fu alaten”. Fa na organisâsi disi ben misi na marki srefisrefi! Sma ben orga Den Verenigde Nâsi na ini 1945 „fu fri den geslakti di e kon fu na krawasi fu feti”. Ma Max Harrelsons buku Fires All Around the Horizon e taki: „Fu sensi na kba fu na di fu Tu Grontapufeti dan wanwantron nomo wan dey ben de, taki feti no ben de na wan presi.”
2. San son sma e aksi fu den grontapu toestand, ma sortu aksi wi ben sa musu aksi?
2 Terrorisme nanga tranga, bidrigifasi nanga pina, takru puyri nanga tabaka nanga pestsiki — ala den sani disi e meki na sari prenki di de kon moro ogri. Son sma kande e aksi: ’Fa na libismafamiri kan tan horidoro na ondro den bruya kondisi disi?’ Ma moro prenspari a de fu wi aksi: ’Fa Gado kan frudragi na fufuru di sma e fufuru sani fu en kriaturu na grontapu? O langa moro a sa gi pasi taki ogri sma ruwineri a grontapu èn poti syen tapu en diri nen?’
3. (a) Sortu aksi na profeyti Yesaya ben aksi èn fu san-ede? (b) Sortu piki Yehovah ben gi, èn san dati e sori fu wi ten?
3 Na profeyti Yesaya ben aksi wan srefi sortu aksi. A ben kisi na wroko fu meki wan boskopu fu Yehovah bekenti na en kondreman. Ma a ben kisi a warskow taki den no ben sa poti prakseri na en èn no na a Gado di ben seni en go. Fu dati-ede Yesaya ben aksi: „O langa, ow Yehovah?” Iya, o langa Yesaya ben sa musu preyki gi na tranga-ede pipri disi èn o langa Yehovah ben sa frudragi na afrontu di den ben e afrontu èn na weygri di den ben e weygri fu poti prakseri na en boskopu? Yehovah ben piki: „Te leki den foto trutru broko tron brokobroko ston, fu de sondro sma di e libi drape, èn den oso de sondro grontapu sma, èn na doti srefi ruwineri tron wan leygi presi” (Yesaya 6:8-11). Na so Gado e tan frudragi na ini na ten disi tu den sortu syen disi te leki en fasti ten doro fu tyari strafu kon na tapu wan grontapu pe na moro prenspari sonduman de na no-kotrow krestenhèyt.
4. San ben de na bakapisi fu na horidoro fu Yob èn sortu dyaranti dati e gi wi na ini na ten disi?
4 Yehovah ben frudragi langa kba den spotu fu Satan. So wan 3600 yari psa kba na kotrow Yob ben horidoro tu, èn ben gi wan piki tapu na tyalensi fu Satan taki a no ben sa kibri en soyfri retifasi na ini tesi. Fa disi ben prisiri Yehovah ati! (Yob 2:6-10; 27:5; Odo 27:11) So leki Yeyses afu brada Yakobus ben taki bakaten: „Luku! wi e prèyse den sma koloku di horidoro. Unu yere fu na horidoro fu Yob èn si fa Yehovah ben meki sani waka, taki Yehovah de tumusi safu na ini lobi èn sari-atifasi.” So srefi a de taki, den sma na ini na ten disi di e horidoro èn e frudragi situwâsi makandra nanga Yehovah, kan de seyker fu wan koloku bakapisi. — Yakobus 5:11.
5. Fa Yeyses e sori taki den ben sa aksi horidoro fu Gado pipri na ini na ten disi, èn te den e du sortu wroko den sa musu horidoro?
5 Yeyses ben sori krin taki horidoro de wan sani di den e aksi fu Gado pipri na ini wi ten. Di a ben taki a fesi san ben sa de na marki fu „na bosroyti fu na seti fu sani”, a ben taki: „A sma di horidoro te na a kba, de na sma di sa kisi frulusu”. Horidoro na ini na du fu sortu aktiviteit? Den wortu fu Yeyses di e kon leti a baka e gi na piki: „Èn na bun nyunsu disi fu na kownukondre sa preyki na a heri grontapu pe libisma e libi leki wan kotoygi gi ala nâsi” (Mateyus 24:3, 13, 14). Soso dan „na kba sa kon”. — Luku so srefi Markus 13:10, 13; Lukas 21:17-19.
Fu san-ede Yehovah e frudragi sani
6. Fu san-ede Yehovah de wan tumusi aparti eksenpre fu a frudragi fu sani, èn san na wán reyde fu san-ede a frudragi situwâsi so?
6 Na apostru Paulus e tyari kon na krin, taki „Gado. . . , ala di a wani sori en ati-bron èn wani meki en krakti bekenti, toku frudragi nanga furu langa pasensi den patu fu ati-bron, di ben meki kon so taki a fiti fu kisi pori” (Rome sma 9:22). Fu san-ede Yehovah ben frudragi taki ogri sma, den patu disi fu ati-bron, ben tan de? Wan reyde de disi: fu sori taki libisma tiri, aparti fu na Mekiman fu libisma, musu fu fadon (Yeremiya 10:23). Dyonsro Gado soevereiniteit sa poti reti te a e buweysi taki en wwan kan tyari vrede, wánfasi nanga koloku kon gi na libismafamiri nanga yepi fu Yeyses Kownukondre tiri. — Psalm 37:9-11; 45:1, 6, 7.
7. Fu sortu tra reyde Yehovah ben frudragi sani èn sortu winimarki disi tyari kon gi milyunmilyun sma fu sensi den yari 1930?
7 Boyti fu dati, Yehovah frudragi sani „so taki a ben sa kan meki na gudu fu en glori bekenti na tapu den patu fu sari-atifasi” (Rome sma 9:23). Den patu fu sari-atifasi na salfuwan di e kibri den soyfri retifasi èn di „ben bay komoto fu na mindri fu den libisma” fu tiri nanga Krestes Yeyses na ini en heymel kownukondre. Na poti fu wan lakstanpu gi den 144.000 ben go doro fu sensi den ten fu den apostru. A e doro now en kba (Openbaring 7:3; 14:1, 4). Èn luku! Fu sensi den yari fu 1930 dan na frudragi di Yehovah tan frudragi sani ben gi na okasi fu tyari milyunmilyun trawan kon makandra, „wan bigi ipi . . . fu ala nâsi”, di e prisiri na ini na fruwakti fu psa na lasti banawtu libilibi èn kisi têgo libi na tapu wan paradèys grontapu (Openbaring 7:4, 9, 10, 13-17). Yu de wan sma fu na bigi ipi dati? Efu dati de so, yu no breyti taki Yehovah frudragi na de di den patu fu ati-bron de te now ete? Ma yu musu tan horidoro, neleki fa Yehovah frudragi sani.
Horidoro e kisi pay
8. Fu san-ede wi alamala abi horidoro fanowdu, èn sortu eksenpre fu horidoro wi musu poti bun prakseri na tapu?
8 Wi alamala abi horidoro fanowdu fu kisi den pramisi. Bakadi na apostru Paulus tyari den fondamenti waarheid disi kon na krin na ini Hebrew sma 10:36, dan a e fruteri finifini na tumusi bun kwaliteit fu na bribi èn na horidoro fu wan bigi „worku fu kotoygi” fu owruten. Dan a e gi wi na tranga „fu lon nanga horidoro na streylon di de na wi fesi, ala di wi e poti ay bun na tapu na Moro prenspari Wrokoman èn Sma di e meki wi bribi kon bun dorodoro, Yeyses. Fu na prisiri di ben poti na en fesi”, meki Yeyses ben horidoro na ini na diniwroko di a ben du nanga en heri ati, ala di a no ben lasi noyti na payman na ay. Fa na eksenpre fu en e tranga wi fu horidoro tu! — Hebrew sma 12:1, 2.
9. San de na bakapisi fu disiten eksenpre fu horidoro?
9 Disiten eksenpre fu horidoro de so srefi psa marki. Yu sabi kande brada nanga sisa di de aparti eksenpre fu horidoro. Fa na kotrowfasi fu den e gi wi deki-ati! Èn ibri yari, te Yehovah Kotoygi e seni rapport go na a Wachttorengenootschap fu na aktiviteit fu den na a heri grontapu, dan den e kisi moro fu den span tori fu horidoro èn na kibri fu soyfri retifasi. Na tabel tapu den fo bladzijde di e kon, de wan tyari kon makandra fu na kofarlek bigi wroko di du na ini 1989, fu di den Kotoygi disi ’ben poti horidoro na a bribi fu den’. — 2 Petrus 1:5, 6.
Na moro bun yari fu wi
10. (a) Omeni kondre nanga eylantigrupu ben abi wan prati na ini 1989 na a preyki fu na bun nyunsu fu na kownukondre, èn omeni sma ben teki prati na a wroko disi? (b) Omeni pionier ben gi rapport na ini na heymarki mun, èn san ben de ala nanga ala den yuru di ben gi na ini na velddienst?
10 So leki na tabel a fesi e sori, dan 212 kondre nanga eylanti grupu ben abi wan prati na a preyki fu Yehovah kownukondre di e kon. Lobi Waktitoren leysiman, yu ben abi na grani fu de wan fu den 3.787.188 sma di ben teki prati na a kofarlek bigi wroko disi? Yu ben de wan fu den 808.184 sma di ben seni rapport go leki pionier ini na heymarki mun fu na aktiviteit dati? Awinsi san yu ben du tu fu wi kisi ala nanga ala 835.426.538 yuru di gi na ini velddienst na a heri grontapu na ini 1989, yu abi reyde fu prisiri. — Psalm 104:33, 34; Filipi sma 4:4.
11. (a) Sortu nomru fu fisitiman fu na Memrefesa fu 22 maart fu na yari di psa de wan reyde fu prisiri, èn fu san-ede? (b) Omeni ben teki dopu, èn sortu kondre leki fa na tabel e sori ben abi aparti furu dopu sma?
11 Prisiri so srefi fu na tumusi moy nomru fu 9.479.064 sma di tapu 22 maart fu na yari di psa ben de na a Memrefesa fu Yeyses dede na a heri grontapu! Disi e sori tapu ete wan nomru fu 5.691.876 sma di de ete èn di kan tron Kownukondre preykiman efu den sma disi di abi belangstelling èn di yu kan teki gersi nanga skapu ben kan tyari kon ini na ipi nanga yepi fu furu lobi herder sorgu, fu kan teki alaten baka prati na a dini fu Yehovah. Wi kan yepi den na ini disi? (Yohanes 10:16; Openbaring 7:9, 15) Furu sma e opo du wan sani kba na wan bun fasi, so leki de fu si ini na bigi nomru fu 263.855 nyun Kotoygi di teki dopu ini na dienstyari 1989.
12. San na son sani di na tabel no e sori? (a) ini na tori fu den drukkerij fu na Waktitorengenootschap? (b) ini na tori fu na prati fu tijdschrift nanga abonnement?
12 Son sani de di na tabel no e sori. Na dreywatra fu kisi moro publikâsi — beybri, buku, brochure, tijdschrift — no ben man kowru srefisrefi. Wan bakapisi fu dati ben de taki den Waktitoren-drukkerij na ini New York ben kobroyki 23.581 ton papira fu druk 35.811.000 beybri, buku nanga brochure — wan gro fu 101 procent abra 1988. Tra bigi drukkerij fu na Waktitorengenootschap namku na ini Doysrikondre, Italiya nanga Yapan, ben wroko nanga ekstra ploeg èn ben horibaka na a fasi disi gi „na kotrow èn koni srafu” ini na prati fu yeye ’nnyan na a reti ten’ (Mateyus 24:45). Ini april nanga mei rapport ben gi fu wantu kondre pe bun furu tijdschrift èn abonnement ben prati, nanga spesrutu krakti na tapu na prati fu den Waktitoren-uitgave fu „Babylon na Bigiwan” (Openbaring 17:5). A no de fu taki, taki na ini na mun april di e kon, yepi-pionier nanga tra Kotoygi sa hari go na ini na veld na a heri grontapu, san sa buweysi taki a de wi moro bun kotoygi veldtocht fu na dienstyari 1990. — Teki gersi Yesaya 40:31; Rome sma 12:11, 12.
13. Sortu kondre de tapu na tabel di a yari di psa no ben de na tapu? Tyari disi kon na krin.
13 Luku ete wan tron na tabel. Yu e si wantu kondre a tapu di na nen fu den no ben de a yari a fesi? Iya, fu tru! Hongariya nanga Polen, pe Lanti no so langa psa erken na wroko fu wi. Wi de den tiriman na ini den kondre disi tangi taki den poti now prakseri na Yehovah Kotoygi. Gado ben yere na ini disi den begi fu na bradafasi di de na a heri grontapu, „so taki wi mag libi wan tiri èn korostu libi nanga a gi di wi e gi wi srefi krinkrin na ini na dini fu Gado nanga seryusufasi”. — 1 Timoteyus 2:1, 2.
14. Kari wantu heymarki fu den „Gi yusrefi na ini na dini fu Gado”-distriktkongres na ini Polen.
14 „Gi yu srefi na ini na dini fu Gado”! Den „Gi yu srefi na ini na dini fu Gado”-distriktkongres ben kan hori srefi na ini Polen na ini dri foto na a ten fu augustus! Fa den 91.024 brada fu wi na ini Polen ben sori taki den de sma di lobi teki trawan na oso! (Hebrew sma 13:1, 2, 16) Èn leki wan wondru dan tindusundusun brada — Tyekisi, Doysri, Rosya nanga trawan — ben kisi visum fu kon nanga bus, loko èn srefi nanga futu. Dusundusun trawan ben kon nanga opolani fu Noord- nanga Zuid-Amerika, West-Europa èn srefi fu so farawe presi leki den eylanti na ini na Bigi Se nanga Yapan. Den bun bigi stadion di wi brada ben krin frefrefre, pikinmoro no ben bigi nofo fu teki 65.710 sma na ini Katowice, 40.442 na ini Poznan èn 60.366 na ini Warschaw — wan nomru fu ala nanga ala 166.518 di ben de drape! Na ibri kongres na tafreel fu na dopu ben meki watra-ay fu prisiri kon na ini sma ay. Na ini Poznan wan 9-yari yonguwan èn wan 90-yari owruwan ben teki dopu, èn a mindri na nomru fu ala nanga ala 6093 dopu sma na tapu den dri kongres yu ben abi bun furu tini, di furu fu den ben komoto fu kondre pe den ben taki taki fasi fu anbegi ben sa dede gwe nanga den grani sma. Ma dati no de so nanga na tru fasi fu anbegi di abi en fondamenti tapu na Wortu fu Gado! (Teki gersi nanga Psalm 148:12, 13; Tori fu den apostru 2:41; 4:4.) O moy na horidoro fu wi brada na ini Owstu-Europa ben kisi pay!
Kotrowfasi di e go doro na ondro tesi
15. Fa den Kotoygi na ini Libanon sori horidoro nanga wan fasti bosroyti, èn nanga sortu moy bakapisi?
15 Neleki na apostru Paulus na so den e aksi fu Yehovah Kotoygi fu sori horidoro na ondro ala sortu omstandigheid (2 Korente sma 11:24-27). Na ini Libanon wan borgrufeti e rigeri. Fa wi brada e du nanga feti? Den de nanga stanfastefasi èn nanga fasti bosroyti. Na ini na yari 1989 hebi sutu nanga gon èn furu poti bom fu sutu ben feni presi, so srefi pe disi ben de hebi srefisrefi den brada ben teki na fasti bosroyti no fu du en safrisafri. Wan gemeente na ini Beirut ben fruteri: „Gi ala neti fu na wiki fasti grupu ben de gi na velddienst. Ala di den situwâsi no ben bun toku den brada no ben lasi ati. Wi ben wroko moro gebied leki oyti wan ten a fesi. Ini april wi ben abi wan heymarki na ini na nomru fu pionier. Nyun beybristudi ben bigin, èn moro tijdschrift nanga buku ben prati.”
16. Fa wi brada na ini Colombiya sori horidoro fu di den tyari na bun nyunsu go na foto pe no wan Kotoygi ben de ete?
16 Colombiya ben kon na ini na nyunsu fu na reyde fu drug bisnis nanga tranga ogri-du. Ma na kotrow horidoro fu kresten drape warti netso bun wi prakseri. No so langa psa kba, dan pisiten spesrutu-pionier ben seni go na 31 foto fu 10.000 ofu moro sma, pe Kotoygi no ben de. Na ini wàn foto di den sma, di ben kisi belangstelling nyunnyun, ben kon sabi taki den pionier ben de drape soso fu wan tu mun, den ben begi tranga efu den pionier no ben kan tan. Na ini wan tra foto, 18 sma di ben abi belangstelling ben poti den nen na ondro wan brifi pe den e fruteri fu den warderi gi na yeye yepi di den ben kisi ini na ten fu den dri mun di den pionier ben de na den èn den ben aksi fu kisi yepi moro fara. „Disi na wan seryusu afersi”, den ben skrifi. A no de fanowdu fu fruteri taki na ini ala tu tori sani ben seti fu tan sorgu gi na belangstelling. Fu meki sani gro na ini na sortu farawe gebied disi e aksi horidoro, ma na tranga wroko fu den pionier di e du dati, e kisi furu blesi.
17, 18. (a) Na ondro sortu omstandigheid Yehovah Kotoygi horidoro na ini Italiya? (b) Fa a go nanga den Kotoygi ala di ley di ben taki fu den ben panya?
17 Na ini Italiya Yehovah Kotoygi kon tanapu na fesi hebi gens fu na sey fu kerkifesiman, ma na ini Yehovah krakti den horidoro. Na ini den difrenti kontren, den kerkifesiman ben prati sticker di ben musu plak na tapu den doro fu den kerkiman fu den fu fruteri Yehovah Kotoygi fu no klòp drape. Furu pristri meki yongu boy plak den sticker disi na tapu ala doro ini bepaalde gebied — srefi na den oso pe Yehovah Kotoygi e libi! Ma sma no kan tapu skreki so makriki gi den kotoygi, èn furutron den e kobroyki den sticker fu bigin wan takimakandra. Boyti fu dati, dan koranti nanga nationaal telefisi ben poti prakseri na a tori, pe den ben krutu na fasi fu kerki fu no man frudragi tra kerki èn ben sori taki den sortu taktik disi te yu luku en bun de wan marki fu swakifasi fu na sey fu kerki. Wan hey leriman fu na hey skoro ben naki futu so tranga na a suku trobi teyge-Kotoygi-sticker, taki a ben teki wan abonnement tapu Na Waktitoren nanga Ontwaakt!
18 Na Katolik Kerki na ini Italiya e kobroyki srefi sma di fadon komoto na bribi fu panya ley di e go fu Yehovah pipri, ma disi tu no e wroko, fu di 172.382 preykiman sma sabi bun èn e respeki den. Wàn man ben fruteri Kotoygi di ben kon na en doro taki a ben leysi takru nyunsu fu wi na ini lektuur di sma di no de Kotoygi moro ben skrifi. Fu dati-ede a ben de teyge srefisrefi, di en brada ben tron wan Kotoygi fu Yehovah. Ma baka wan pisiten a ben si na bun bakapisi di na kenki di en brada kenki teki wan tra fasi fu anbegi ben abi tapu en. A ben aksi ensrefi: ’Fa a kan taki wan sani di de so takru kan tyari den sortu bun froktu disi kon?’ A ben aksi fu dati-ede den Kotoygi di ben fisiti en fu kisi beybristudi. — Teki gersi Kolose sma 3:8-10.
Kakafutu gi mi-no-ke-fasi
19, 20. (a) Sortu situwâsi aksi horidoro fu a sey fu den Kotoygi na ini Finland, èn fa trutru wan kerki-ondrosuku ben wani taki furu? (b) Sortu ondrofeni e sori na prensparifasi fu horidoro na ini na preyki fu na bun nyunsu?
19 Na ini kondre pe Kotoygi e kon furutron na den doro, dan nofotron wan mi-no-ke-fasi gi na bun nyunsu de na ala sey. Disi de seyker so na ini Finland. Na kerki na ini na kondre dati du wan ondrosuku èn ben kon si taki 70 procent fu den sma di e libi na ini na kondre no e lobi fu den Kotoygi fisiti den na den oso. Ma 30 procent no e kakafutu so tranga, èn fu den disi 4 procent ben taki, taki te yu e luku en bun den lobi Yehovah Kotoygi. Disi na wan nomru di wani taki wan sani. Fo procent fu den sma di e libi na ini Finland de 200.000 sma. Teki disi gersi nanga na nomru fu preykiman di de now fu 17.303!
20 Wan preykiman en prakseri ben poti na tapu na ondrosuku disi di a ben de na ini na preykiwroko èn den ben aksi en: „Yu no sabi taki 70 procent fu wi no e feni a kon fu yu switi? Fu san-ede yu e tan kon na wi doro dan?” Na preykiman ben piki: „Iya, ma na srefi ondrosuku dati ben sori tu taki 4 procent fu unu lobi wi. Wi e proberi fu feni den sma dati. Srefi efu soso 1 procent den ben de, dan ete wi ben sa go oso-fu-oso ini wan muyti fu feni den.” Na oso sma ben prakseri wan momenti èn ben taki: „Na boskopu fu yu de so prenspari gi den?” Na preykiman ben piki nanga na aksi: „Yu ben sa wani yere en?” Heri-esi na oso sma disi ben bigin sori belangstelling gi na bun nyunsu.
San a ten di e kon o tyari
21. (a) Sortu strey wi musu strey na ini na seti disi èn fu san-ede? (b) San wi e kisi kande fu frudragi èn san Habakuk profeytitori e dyaranti wi?
21 Fa a de now nanga wi alamala? Wi e teki na fasti bosroyti fu horidoro makandra nanga Yehovah nanga Krestes Yeyses te na a kba? Kande a no sa tan so langa moro, ma wi musu horidoro! Na ini na sistema fu Satan wi alamala musu tan feti wan hebi feti gi na bribi, fu di hurudu, bidrigifasi nanga ogri-ati firi fu na grontapu e lontu wi fu ala sey (Yudas 3, 20, 21). Wi sa musu frudragi kande frufolgu fu na wan ofu tra sortu. Srefi na a momenti disi dusundusun fu wi brada e nyan pina na ini strafu-oso, èn son wan den ben naki na wan ogri-atifasi. Den wan disi de grantangi fu den begi fu wi (2 Tesalonika sma 3:1, 2). Heri-esi na disiten seti fu sani no sa de moro! Habakuk e fruklari: „Na fisyun de ete gi na fasti ten, èn a e tan hari go na a kba, èn a no sa fruteri wan ley. Srefi awinsi a ben sa meki yu wakti a tapu, dan luku na en nanga furu fruwakti; bika sondro fu misi a sa kon tru. Èn a no sa kon tumusi lati.” — Habakuk 2:3.
22. Sortu bakapisi wi kan fruwakti nanga frutrow efu wi sori na pasensi fu den profeyti èn na horidoro fu Yob?
22 Na disipri Yakobus e fruteri wi na wan lobifasi: „Un brada, teki leki wan moderi fu na nyan pina fu ogri nanga na sori fu pasensi den profeyti, di ben taki na ini na nen fu Yehovah.” Wi di e taki na ini na ten disi na ini na nen fu Yehovah, kan de sma di e kibri den soyfri retifasi ini na ten fu hebi tesi, so leki Yesaya, Yeremiya, Daniyel nanga trawan. Neleki Yob wi kan horidoro. Fa na horidoro fu en ben kisi pay na wan moyfasi. Yehovah sari-atifasi nanga lobi bunfasi sa tyari pay kon gi wi, di no abi en speri — efu wi horidoro te na a kba. Èn meki den wortu fu Yakobus kontru tapu ibriwan fu wi: „Luku! Wi e prèysi den sma koloku di horidoro.” — Yakobus 5:10,11; Yob 42:10-13.
Fa yu ben sa piki?
◻ Tapu sortu fanowdu fu horidoro Yeyses ben poti krakti?
◻ Fu sortu reyde ede Yehovah frudragi sani?
◻ San na wantu fu den heymarki fu na kofarlek bigi wroko di du na ini 1989?
◻ Fa na horidoro fu wi brada na ini Polen kisi bigi blesi?
◻ Fa den Kotoygi na ini Libanon, Colombiya nanga Italiya sori kotrowfasi na ondro tesi?
[Raportu na tapu bladzijde 18-21]
1989 DINIWROKO RAPORTU FU YEHOVAH KOTOIGI NA HERI GRONTAPU
(Luku a tijdschrift)