Horidoro — Prenspari gi kresten

„Moksi na oen bribi . . . horidoro.” — 2 PETRUS 1:5, 6.

1, 2. Foe san ede wi alamala moesoe horidoro te na a kaba?

NA OPZIENER DI E RÈIS èn a wefi foe en, ben fisiti wan kompe kresten di ben abi moro leki 90 jari. A ben wroko tintenti jari ini a foeroeten diniwroko. Ala di den ben taki nanga makandra, a moro owroe brada ben memre wan toe foe den grani di a ben abi ini den jari di pasa. „Ma”, a ben kragi, ala di watra-ai bigin lon na en fesi, „now mi no man doe foeroe moro”. Na opziener di e rèis, opo en bijbel èn a leisi Mateus 24:13, pe skrifi san Jesus Krestes ben taki: „A sma di e horidoro te na a kaba, en sa kisi froeloesoe.” Ne na opziener loekoe a lobi brada èn a taki: „A lasti toewijzing di wi alamala abi, awansi omeni wi kan doe, na foe wi horidoro te na a kaba.”

² Ija, leki kresten wi alamala moesoe horidoro te na a kaba foe a seti foe sani disi noso te na a kaba foe wi libi. No wan tra fasi de foe kisi a boen foe Jehovah foe a gi wi froeloesoe. Wi de ini wan streilon foe kisi libi èn wi moesoe „lon nanga horidoro” te leki wi doro a kaba (Hebrewsma 12:1). Na apostel Petrus ben poti krakti na tapoe a prensparifasi foe na eigifasi disi, di a ben gi kompe kresten a deki-ati: „Moksi na oen bribi . . . horidoro” (2 Petrus 1:5, 6). Ma san na horidoro, te joe e loekoe en fini?

Horidoro — San a wani taki

3, 4. San a wani taki foe horidoro?

³ San a wani taki foe horidoro? A Griki werkwortoe gi „horidoro”, (hy·po·meʹno) wani taki troetroe „foe go doro sondro foe kenki noso foe tan na ondro”. Tinaseibi tron a de foe feni ini bijbel. So leki fa den skrifiman foe wortoeboekoe, W. Bauer, F. W. Gingrich nanga F. Danker e taki, dan a wani taki „go doro, na presi foe lowe . . . , kánkan, hori fasti”. A Griki zelfstandig naamwortoe gi „horidoro” (hy·po·mo·neʹ) de foe feni ini bijbel moro leki 30 tron. Foe a tori disi, A New Testament Wordbook, di William Barclay skrifi, e taki: „[Horidoro] na a krakti di e meki wan sma man froedrage sani, no soso nanga wan fasi foe saka ensrefi na wan sani ondro, ma nanga wan fajafaja howpoe . . . A de na eigifasi di e meki wan man tanapoe kánkan. A de a krakti eigifasi di kan meki a moro hebi tesi kon tron wan glori, bika boiti a pen a e si a marki di a wani doro.”

⁴ Horidoro, foe dati ede, e meki wi tanapoe kánkan èn wi no e lasi howpoe awansi sortoe sani noso pina de na wi pasi (Romesma 5:3-5). Horidoro e meki sma loekoe na a marki di de na den fesi — a prijs noso presenti foe têgo libi, efoe a de na hemel noso na grontapoe — na presi foe den loekoe a pen di den abi now. — Jakobus 1:12.

Horidoro — Foe san ede?

5. (a) Foe san ede ala kresten „abi horidoro fanowdoe”? (b) Na ini sortoe toe groepoe wi kan prati den tesi foe wi?

⁵ Leki kresten, wi alamala „abi horidoro fanowdoe” (Hebrewsma 10:36). Foe san ede? Ini a fosi presi, bika wi „e miti difrenti tesi”. Den Griki wortoe dja na Jakobus 1:2 e taki foe wan toeka di de onfroewakti noso di wi no ben wani, neleki te wan sma wantronso e kisi foe doe nanga wan foefoeroeman. (Teki gersi Lukas 10:30.) Wi e miti tesi di wi kan prati ini toe groepoe: den tesi di libisma gwenti foe kisi leki wan bakapisi foe sondoe di den kisi foe papa nanga mama èn den tesi di e kon foe di wi gi wisrefi na a dini foe Gado (1 Korentesma 10:13; 2 Timoteus 3:12). San na wan toe foe den tesi disi?

6. Fa wan Kotoigi ben horidoro di a ben ondrofeni wan siki di ben hati skin srefisrefi?

⁶ Tranga siki. Neleki Timoteus, wan toe kresten moesoe horidoro na ondro „a siki di den e siki someni tron” (1 Timoteus 5:23). Spesroetoe te wi e kisi foe doe nanga wan siki di e tan doronomo èn di kande e hati skin srefisrefi, wi moesoe horidoro, tanapoe kánkan, nanga a jepi foe Gado èn wi no moesoe lasi a kresten howpoe foe wi na ai. Loekoe na eksempre foe wan Kotoigi di ben de ini a bigin foe en 50 jari èn di ben feti wan langa èn hebi feti nanga wan takroe sweri, di ben e gro esi-esi na ini en skin. Na ini toe oparasi, a ben tan tanapoe kánkan ini a fasti bosroiti foe en foe no teki broedoe (Tori foe den Apostel 15:28, 29). Ma a sweri ben kon de foe si baka na ini en ondrobere èn a ben tan gro na sei en bakabonjo. Ala di disi ben pasa, a brada ben ondrofeni wan skin-ati, di joe no man prakseri foe en srefi fa a de èn di no wan dresi ben kan saka. Ma tokoe, a ben tan loekoe na a prijs foe libi ini a njoen grontapoe, na presi foe loekoe na a pen di a ben abi a momenti dati. A ben go doro foe prati a fajafaja howpoe foe en nanga datra, zuster èn den sma di ben e fisiti en. A ben horidoro te na a kaba — a kaba foe en libi. A gosontoe problema foe joe no e tjari joe libi ini kefar kande noso no e hati neleki fa a ben hati a lobi brada dati, ma tokoe a kan de wan bigi tesi foe horidoro.

7. Sortoe pen, horidoro abi na ini gi sonwan foe wi brada nanga sisa na jeje fasi?

⁷ Emotioneel pen. Ten na ten, sonwan foe Jehovah pipel, e ondrofeni „a sari foe na ati” di abi „wan jeje di broko” leki bakapisi (Odo 15:13). A firi foe wan troetroe broko-skin na wan sani di sma gwenti kisi ini den „moeilek ten [disi] di tranga foe pasa” (2 Timoteus 3:1). Science News foe 5 december 1992, ben skrifi: „A nomroe foe sma di e firi troetroe broko-skin, di nofotron e meki a sma no man doe wan sani boen moro, ben gro sensi 1915 ini ibri gesrakti di ben e gebore a wan baka a trawan.” Den sani di e meki sma firi den sortoe broko-skin dati de difrenti, foe bigin nanga sani di abi foe doe nanga a fasi fa a skin e wroko, te nanga hati ondrofeni, di no switi. Gi son kresten, horidoro wani taki toe wan aladei feti foe tanapoe kánkan, ala di den abi emotioneel pen. Ma tokoe den no e broko kindi. Den e tan getrow na Jehovah awansi den ai e lon watra. — Teki gersi Psalm 126:5, 6.

8. Sortoe tesi na monisei wi kan ondrofeni?

⁸ Den difrenti tesi di wi e ondrofeni kan wani taki serjoesoe problema na ekonomia sei toe. Di wan brada na New Jersey, na Amerkankondre, ben lasi en wroko wantronso, wi kan froestan taki a ben broko en ede fa a ben sa sorgoe en osofamiri èn foe no lasi na oso foe en. Ma a no ben lasi a Kownoekondre howpoe na ai. Ala di a ben soekoe wan tra wroko, a ben meki wan boen gebroiki foe na okasi foe dini leki wan jepipionier. Te foe kaba, a feni wan wroko. — Mateus 6:25-34.

9. (a) Fa a lasi foe wan lobiwan na ini dede kan meki taki wi moesoe horidoro? (b) Sortoe bijbeltekst e sori taki a no fowtoe foe krei watra-ai foe sari?

⁹ Efoe joe ben ondrofeni a lasi foe wan lobiwan na ini dede, dan joe abi horidoro fanowdoe di e tan, langa baka te den sma di ben de nanga joe, drai go baka na den aladei libi. Joe e feni srefi kande taki a de spesroetoe moeilek gi joe ibri jari na a ten di a lobiwan foe joe ben dede. Foe horidoro na ondro so wan lasi no wani taki dati a no boen foe krei noso foe sari. A de wan natuurlijk sani foe sari foe a dede foe wan sma di wi ben lobi èn disi no e sori kwetikweti taki wi e mankeri bribi ini a howpoe foe opobaka. (Genesis 23:2; teki gersi Hebrewsma 11:19.) Jesus „ai ben lon watra” baka di Lasarus dede, ala di A ben taigi Marta nanga overtoigi: „Joe brada sa opo baka.” Èn Lasarus ben opo baka! — Johanes 11:23, 32-35, 41-44.

10. Foe san ede a pipel foe Jehovah abi horidoro fanowdoe na wan toemoesi aparti fasi?

¹⁰ Boiti taki a pipel foe Jehovah moesoe horidoro na ondro tesi di ala libisma gwenti foe kisi, den abi horidoro fanowdoe na wan toemoesi aparti fasi. „Foe mi nen ede ala nâsi no sa wani si oenoe na ai”, Jesus ben warskow (Mateus 24:9). A ben taki toe: „Efoe den froefolgoe mi, den sa froefolgoe oenoe toe” (Johanes 15:20). Foe san ede sma no wani si wi na ai èn den e froefolgoe wi so? Bika awansi pe wi e libi na a grontapoe disi leki foetoeboi foe Gado, Satan e proeberi foe broko wi soifri retifasi na fesi foe Jehovah. (1 Petrus 5:8; teki gersi Openbaring 12:17.) Te na a dei foe tide, Satan nofotron ben tjari hebi froefolgoe kon, foe poti a horidoro foe wi na ondro wan hebi tesi.

11, 12. (a) Na fesi sortoe tesi foe horidoro, Jehovah Kotoigi nanga den pikin foe den ben kon tanapoe ini den jari baka 1930 èn ini den bigin jari foe 1940? (b) Foe san ede Jehovah Kotoigi no e taigi a simbôl foe kondre odi?

¹¹ Foe eksempre, ini den jari baka 1930 èn froekoe ini den bigin jari foe 1940, Jehovah Kotoigi èn den pikin foe den na Verenigde Staten foe Amerkankondre nanga Kanada, ben tron sma di den ben froefolgoe, bika den no ben taigi a simbôl foe a kondre odi, foe di dati no ben de ini akroederi nanga a konsensi foe den. Den Kotoigi e lespeki a simbôl foe a kondre pe den e libi, ma den e hori densrefi na a gronprakseri di skrifi ini a wet foe Gado ini Exodus 20:4, 5: „Oenoe no moesoe meki wan popki gi oensrefi, di koti nanga anoe noso wan vorm di gersi wan sani na ini hemel na tapoe noso di de na grontapoe na ondro noso di de na ini den watra na ondro grontapoe. Oenoe no moesoe boigi gi den, noso meki sma boeweigi oenoe foe dini den, bikasi mi Jehovah, oen Gado, na wan Gado di e aksi foe sma gi densrefi na a dini foe mi wawan.” Di den ben jagi wan toe skoropikin foe Kotoigi gowe foe skoro, foe di den ben abi a winsi foe gi na anbegi foe den na Jehovah Gado wawan, den Kotoigi ben opo wan Kownoekondre skoro foe gi den pikin leri. Den studenti disi ben drai go baka na den poebliki skoro, di a Hei Kroetoe foe den Verenigde Staten foe Amerkankondre ben erken a posisi foe den leki kerkigroepoe, so leki fa kondre di kisi froelekti e doe ini a ten disi. Ma a deki-ati horidoro foe den jongoewan disi na wan heri moi eksempre, spesroetoe gi kresten jongoewan ini a ten disi di kande e ondrofeni skempi nanga spotoe, bika den e doe moeiti foe libi akroederi den bijbel markitiki. — 1 Johanes 5:21.

¹² Den difrenti tesi di wi e ondrofeni — di libisma gwenti foe kisi èn di wi e ondrofeni foe a kresten bribi foe wi ede — e sori foe san ede wi abi horidoro fanowdoe. Ma fa wi kan horidoro?

Horidoro te na a kaba — Fa?

13. Fa Jehovah e gi horidoro?

¹³ Gado pipel abi wan bigi wini tapoe den sma di no e anbegi Jehovah. Foe kisi jepi wi kan begi „a Gado di e gi horidoro” (Romesma 15:5). Ma fa Jehovah e gi horidoro? Wan fasi di a e doe disi de nanga jepi foe den eksempre foe horidoro di skrifi na ini en Wortoe, bijbel (Romesma 15:4). Te wi e prakseri dipi foe den eksempre disi, dan no wawan wi e kisi a deki-ati foe horidoro, ma wi e leri foeroe toe foe a fasi fa wi moesoe horidoro. Loekoe toe toemoesi aparti eksempre — a deki-ati horidoro foe Job èn a hori di Jesus Krestes ben horidoro sondro foe meki wan fowtoe. — Hebrewsma 12:1-3; Jakobus 5:11.

14, 15. (a) Na ondro sortoe tesi Job ben horidoro? (b) Fa Job ben man horidoro na ondro den tesi di a ben ondrofeni?

¹⁴ Sortoe situwâsi ben poti a horidoro foe Job na wan tesi? A ben pina foe problema na ekonomia sei, di a ben lasi moro foeroe foe den goedoe foe en. (Job 1:14-17; teki gersi Job 1:3.) Job ben firi a pen di a ben lasi ala den tin pikin foe en, di wan tranga winti ben kiri den (Job 1:18-21). A ben ondrofeni wan tranga siki di ben hati en skin srefisrefi (Job 2:7, 8; 7:4, 5). En eigi wefi ben poti druk na en tapoe foe a drai en baka gi Gado (Job 2:9). Krosibei kompe foe en ben taki sani di ben hati en, di no ben switi èn di no ben troe. (Teki gersi Job 16:1-3 nanga Job 42:7.) Ma nanga ala den sani disi, Job ben tanapoe kánkan èn ben hori en soifri retifasi (Job 27:5). Den sani di a ben horidoro na den ondro, de a srefi leki den tesi di Jehovah pipel e miti ini a ten disi.

¹⁵ Fa Job ben man horidoro na ondro ala den tesi disi? Wán sani di ben jepi Job moro foeroe, ben de howpoe. „Gi wan bon srefi howpoe de”, a ben taki. „Efoe sma e koti en trowe, a sa sproiti baka èn en eigi taki no sa dede” (Job 14:7). Sortoe howpoe Job ben abi? So leki fa skrifi ini wan toe vers na baka, dan a ben taki: „Efoe wan man di tranga na skin fasi, dede, a kan libi baka? . . . Joe sa kari èn misrefi sa piki joe. Gi wroko foe joe anoe joe sa abi wan tranga lostoe [noso angri gi]” (Job 14:14, 15). Ija, Job ben loekoe moro fara leki soso a pen di a ben abi na a momenti dati. A ben sabi taki den tesi foe en no ben sa tan foe ala ten. A moro langa di a ben sa moesoe horidoro ben sa de te na en dede. A froewakti di a ben abi èn di ben de nanga howpoe, ben de taki Jehovah, di na wan lobifasi wani foe opo den dede sma baka, ben sa tjari en kon na libi baka. — Tori foe den Apostel 24:15.

16. (a) San wi e leri foe horidoro ini na eksempre foe Job? (b) O troe a Kownoekondre howpoe moesoe de gi wi èn foe san ede?

¹⁶ San wi e leri foe a hori di Job ben horidoro? Efoe wi wani horidoro te na a kaba, dan noiti wi moesoe lasi wi howpoe na ai. Memre toe taki a djaranti foe a Kownoekondre howpoe wani taki dati iniwan pina di wi e ondrofeni, de „foe wan sjatoe ten”, te joe e teki en gersi nanga tra sani (2 Korentesma 4:16-18). A diri howpoe foe wi abi wan steifi fondamenti na tapoe Jehovah en pramisi foe wan ten di de krosibei na wi fesi, te „a sa figi ala watra poeroe na wi ai èn dede no sa de moro, no wan krei, no wan babari, no wan pen no sa de moro” (Openbaring 21:3, 4). A howpoe dati, di „no e meki wi kisi sjen”, moesoe kibri wi denki (Romesma 5:4, 5; 1 Tesalonikasma 5:8). A moesoe de wan troetroe sani gi wi — so wan troetroe sani taki nanga jepi foe wi ai foe bribi, wi kan si wisrefi ini a njoen grontapoe — wi no e feti moro langa nanga siki èn broko-skin, ma wi e wiki ibri dei nanga wan boen gosontoe èn nanga wan krin denki; wi no e broko wi ede moro nanga serjoesoe ekonomia druk, ma wi e libi ini seikerfasi; wi no e sari moro foe a dede foe lobiwan, ma wi e ondrofeni a span firi foe si den e opo baka foe dede (Hebrewsma 11:1). Sondro so wan howpoe den tesi di wi abi now kan moro wi so foeroe, taki wi e gi abra. Fa wi abi wan kefarlek moi deki-ati makandra nanga a howpoe foe wi, foe tan feti èn foe tan horidoro langalanga te na a kaba!

17. (a) Na ondro sortoe tesi Jesus ben horidoro? (b) Foe sortoe troe tori wi kan si kande taki Jesus ben horidoro na ondro hebi pina? (Loekoe foetoewortoe.)

¹⁷ Bijbel e gi wi a deki-ati foe „tan loekoe ala ten” na Jesus èn ’hori ai boen na en tapoe’. Ondro sortoe tesi a ben horidoro? Wan toe foe den ben kon foe a sondoe nanga na onvolmaaktifasi foe trawan. Jesus ben horidoro no wawan na ondro „genstaki foe sondari”, ma na ondro den problema toe di ben kon na mindri den disipel foe en, san ben abi na ini toe den kesekese foe den ibritron baka foe soema ben de a moro bigiwan. Moro ete, a ben ondrofeni wan tesi tapoe en bribi, na wan fasi di no abi en speri. A „ben horidoro na wan pina-oedoe” (Hebrewsma 12:1-3; Lukas 9:46; 22:24). A moeilek foe tjari srefi kon na wi prakseri, a pina na froestan sei èn na skin fasi di ben abi foe doe nanga a pen foe a spikri di den ben spikri en na wan postoe èn a sjen foe di den ben kroetoe en leki wan man di lei gi Gado.a

18. Sortoe toe sani ben jepi Jesus, so leki fa Paulus e taki?

¹⁸ San ben meki Jesus ben man foe horidoro te na a kaba? Na apostel Paulus e kari toe sani di ben jepi Jesus: ’tranga begi èn djeme’ èn „a prisiri di ben poti na en fesi” toe. Jesus, a volmaakti Manpikin foe Gado, no ben sjen foe aksi jepi. A ben begi „nanga tranga babari èn watra-ai” (Hebrewsma 5:7; 12:2). Spesroetoe di a moro prenspari tesi foe en ben kon moro krosibei, a ben feni en fanowdoe foe begi ibritron baka èn serjoesoe foe kisi krakti (Lukas 22:39-44). Leki wan piki na tapoe den tranga begi foe Jesus, Jehovah no ben poeroe a tesi, ma a ben gi Jesus krakti foe horidoro na ondro a tesi. Jesus ben horidoro toe, bika na presi foe a loekoe na a pina-oedoe, a ben loekoe na a paiman di ben de na en fesi — a prisiri di a ben sa abi foe di a ben abi wan prati na a regtfardiki foe Jehovah nen èn a froeloesoe di a ben sa froeloesoe a libisma famiri poeroe foe dede. — Mateus 6:9; 20:28.

19, 20. Fa na eksempre foe Jesus e jepi wi foe abi wan troetroe boen loekoe na tapoe san horidoro wani taki?

¹⁹ Foe na eksempre foe Jesus, wi e leri wan lo sani di e jepi wi foe abi wan troetroe boen loekoe na tapoe san horidoro wani taki. A waka nanga libi foe horidoro a no wan makriki sani. Efoe wi e feni en wan moeilek sani foe horidoro na ondro wan spesroetoe tesi, dan trowstoe de foe di wi sabi taki a ben de wan moeilek sani gi Jesus toe. Efoe wi wani horidoro te na a kaba, dan ibritron baka wi moesoe begi foe kisi krakti. Te wi de na ondro tesi, dan sontron wi kan firi leki wi no warti foe begi. Ma Jehovah e kari wi foe kon lekti wi ati na en ’bika a lobi wi’ (1 Petrus 5:7). Èn foe den sani ede di Jehovah ben pramisi ini en Wortoe, a e firi ensrefi froeplekti foe gi „krakti di e pasa san de normaal” na denwan di e kari en ini bribi. — 2 Korentesma 4:7-9.

²⁰ Sontron wi moesoe horidoro nanga watra-ai. Gi Jesus a pen foe a pina-oedoe srefi no ben de wan reide foe abi prisiri. Na presi foe dati, a prisiri ben de ini a paiman di ben poti na en fesi. Ini wi kefal wi no moesoe froewakti taki ala ten wi sa firi prisiri èn breiti te wi de na ondro tesi. (Teki gersi Hebrewsma 12:11.) Ma foe di wi e loekoe na a paiman di de na wi fesi, wi sa man foe „si en leki soso prisiri”, srefi te wi e miti den moro moeilek situwâsi (Jakobus 1:2-4; Tori foe den Apostel 5:41). A moro prenspari sani de taki wi tan kánkan — srefi te a moesoe de nanga watra-ai. Te joe e loekoe en boen, Jesus no ben taki: ’A sma di e krei pikinso watra-ai nomo, sa kisi froeloesoe’, ma: „A sma di e horidoro te na a kaba, en sa kisi froeloesoe.” — Mateus 24:13.

21. (a) San wi moesoe moksi na wi horidoro, so leki fa 2 Petrus 1:5, 6 e gi wi a deki-ati foe doe? (b) Sortoe aksi wi sa go loekoe ini a tra artikel?

²¹ So boen, horidoro prenspari foe kisi froeloesoe. Ma ini 2 Petrus 1:5, 6, wi e kisi a deki-ati foe moksi na wi horidoro, a gi di wi e gi wisrefi na a dini foe Gado. Ma san na a gi di wan sma e gi ensrefi na a dini foe Gado? Fa a abi foe doe nanga horidoro èn fa joe kan kisi dati? Den aksi disi wi sa go loekoe ini a tra artikel.

[Foetoewortoe]

Fa joe ben sa piki?

◻ San a wani taki foe horidoro?

◻ Foe san ede Jehovah pipel abi horidoro fanowdoe na wan toemoesi aparti fasi?

◻ San ben meki Job man horidoro?

◻ Fa na eksempre foe Jesus e jepi wi foe si san na horidoro troetroe?

[Prenki na tapoe bladzijde 24]

Den ben opo Kownoekondre skoro foe gi leri na kresten pikin di den ben jagi gowe foe skoro, foe di den ben gi na anbegi foe den na Jehovah wawan

[Prenki na tapoe bladzijde 26]

Foe di Jesus ben abi a fasti bosroiti foe gi grani na en Tata, a ben begi foe kisi krakti foe horidoro