Horidoro di e wini a strei

„Oenoe abi horidoro fanowdoe, foe, baka di oenoe doe na wani foe Gado, oenoe sa kisi na kontroe foe a pramisi.” — HEBREWSMA 10:36.

1. Foe san-ede horidoro na wan sani di ibriwan sma, di e dini Jehovah Gado na ini a ten disi moesoe abi?

A HERI grontapoe disi didon na ini a makti foe wan gado di e meki oproeroe. A tiriman foe en, di sma no kan si, Satan Didibri, e poti ala en moeiti tapoe a gens di a e gens Jehovah èn a feti di a e feti nanga na poti kon reti foe Jehovah universeel soevereiniteit di sa kon nanga jepi foe na Mesias Kownoekondre. Disi e meki taki a moesoe foe pasa taki ibriwan sma di gi ensrefi abra na Gado èn e teki En sei ini a strei foe soevereiniteit, doronomo sa kisi gens foe a grontapoe disi (Johanes 15:18-20; 1 Johanes 5:19). Foe dati-ede, ibriwan foe wi moesoe abi deki-ati foe horidoro te leki a grontapoe disi sa pori krinkrin ini Armagedon. Foe de a mindri den sma foe Gado di wini a strei èn di e wini grontapoe nanga jepi foe a bribi èn a soifri retifasi foe den, dan wi moesoe tan horidoro te na a kaba (1 Johanes 5:4). Fa wi kan doe dati?

2, 3. Fa Jehovah Gado nanga Jesus Krestes na den moro bigi eksempel foe horidoro?

² Ini a fosi presi, wi kan loekoe foe kisi deki-ati foe toe aparti eksempel foe horidoro. Soema na den? Wan foe den na Jesus Krestes, „na fosi geborewan foe ala sani di Gado meki”, di ben horidoro getrow ini a dini foe Gado sensi a ben kisi libi na wan ten di sma no sabi ini a ten di pasa kaba. Ini en horidoro foe dini Gado getrow, Jesus ben tron wan eksempel gi ala mekisani di abi froestan èn di baka ten ben kon a libi na ini hemel èn na grontapoe (Kolosesma 1:15, 16). Ma na moro bigi eksempel foe horidoro na Jehovah Gado, di froedrage wan langa ten kaba na oproeroe di meki nanga en universeel soevereiniteit èn di sa go doro foe doe disi te leki a sa doe wan sani foe koti na strei foe en soevereiniteit foe ala ten.

³ Jehovah ben horidoro na wan fasi di de leki wan eksempel ini afersi pe en wartifasi èn den moro dipi persoonlijk firi foe en ben de ini a tori. A ben dwengi ensrefi na fesi foe bigi tjalensi èn a ben hori ensrefi foe no doe wan sani nanga den sma di ben skempi en — pe Satan Didibri de na ini toe. Wi de grantangi foe na horidoro foe Gado èn foe en sari-ati. Sondro disi, wi no ben sa njanboen foe srefi a moro sjatoe pisiten foe libi. Foe troe, nanga en horidoro, Jehovah Gado ben poti ensrefi aparti na wan fasi di joe no kan teki gersi nanga no wan tra sani.

4, 5. (a) Fa na agersitori foe Paulus foe wan patoe-bakriman e sori na horidoro foe Gado nanga en sari-ati? (b) Fa na sari-ati foe Gado sa sori taki a no de wan sani di ben de foe soso?

⁴ Na apostel Paulus ben sori go na a horidoro èn na a sari-ati foe Gado di a ben taki: „Na patoe-bakriman no abi makti tapoe na tokotoko, foe meki foe na srefi tokotoko wan patoe foe gebroiki gi warti sani èn wan trawan foe gebroiki gi sani di no warti? Efoe Gado now, ala di a wani sori en atibron èn wani meki en krakti bekènti, tokoe ben froedrage nanga foeroe langa pasensi den patoe foe atibron, di ben sreka kon so, taki a fiti foe kisi pori, so taki a ben sa meki na goedoe foe en glori bekènti na tapoe den patoe foe sari-ati, di a ben sreka a fesi gi glori, namkoe wi, di a no ben kari wawan komoto foe den djoe, ma foe den nâsi toe, dan san dan?” — Romesma 9:21-24.

⁵ So leki fa den wortoe disi e sori, dan na ini a pisiten disi foe en horidoro, Jehovah e go doro nanga en glori prakseri èn e sori sari-ati gi son libisma di de leki patoe. A e sreka den patoe disi gi têgo glori èn e pori na so fasi den ogri-ati prakseri foe en moro bigi gensman, Satan Didibri, èn ala den mati foe Satan. A no na heri libisma famiri ben sori taki den de patoe foe atibron, di e froedini foe kisi pori. Dati e sori heri boen a horidoro, nanga pasensi, foe na sei foe na Almakti Gado. A sari-ati foe en no sa de foe soso. A sa abi leki bakapisi (1) wan glori Kownoekondre famiri na ini hemel na ondro na lobi Manpikin foe Jehovah, Jesus Krestes, èn (2) wan ras foe libisma mekisani di kon boen baka èn di kon de volmaakti na wan grontapoe paradijs, alamala sma di e kisi têgo libi.

Horidoro te na a kaba

6. (a) Foe san-ede kresten no kan lon gi wan tesi foe horidoro? (b) San na Griki wortoe gi „horidoro” wani taki moro foeroe?

⁶ Nanga so wan moi howpoe na wi fesi, den wortoe foe Jesus di e gi deki-ati, dorodoro moesoe de foe jere na ini wi jesi, namkoe: „Na sma di sa horidoro te na a kaba, a wan dati sa kisi froeloesoe” (Mateus 24:13). A de prenspari foe bigin na wan boen fasi foe waka a pasi leki wan kresten disipel. Ma san e teri te foe kaba, na fa wi e horidoro, èn o boen wi e tjari a waka foe a pasi disi kon na wan kaba. Na apostel Paulus ben tjari disi kon a krin di a ben taki: „Oenoe abi horidoro fanowdoe, so taki, baka te oenoe doe na wani foe Gado, oenoe sa kisi na kontroe foe a pramisi” (Hebrewsma 10:36). Na Griki wortoe di den vertaal dja nanga „horidoro” na hy·po·mo·neʹ. Moro foeroe disi wani taki foe abi deki-ati, de kánkan noso foe horidoro nanga pasensi di no e lasi howpoe awansi hendri, froefolgoe, hebi problema nanga tesi de. Efoe wi e howpoe foe kisi froeloesoe te foe kaba, dan wi moesoe saka wisrefi na ondro wan tesi foe horidoro leki wan pisi foe na sreka di de fanowdoe foe kisi na froeloesoe dati.

7. Sortoe bidrigi sani wi moesoe tan farawe foe en, èn sortoe eksempel foe soema sa jepi wi foe horidoro?

⁷ Wi no moesoe kori wisrefi nanga na prakseri di e satisferi wi, taki wi kan pasa na tesi esi-esi. Foe meki na strei foe na universeel soevereiniteit èn na soifri retifasi foe libisma ben kan kisi piki nanga wan fasti bostroiti, meki Jehovah no ben loekoe na ensrefi. A ben horidoro na ondro sani di no ben switi, ala di a ben man foe figi den poeroe wantewante. So srefi Jesus Krestes ben de wan model foe horidoro (1 Petrus 2:21; teki gersi Romesma 15:3-5). Nanga den toemoesi moi eksempel disi a wi fesi, a de seiker taki wi toe de klariklari foe horidoro te na a kaba. — Hebrewsma 12:2, 3.

Wan eigifasi di de fanowdoe

8. Sortoe eigifasi di wi alamala abi fanowdoe na apostel Paulus ben sori?

⁸ No wan foetoeboi foe Gado, srefi ini den moro froekoe ten a fesi, no ben kisi fri foe na fanowdoe foe boeweisi en soifri retifasi nanga jepi foe horidoro. Toemoesi prenspari sma, na ini na bijbel historia, di ben tan getrow te na dede èn di den ben feni boen foe kisi têgo libi na ini hemel, ben moesoe foe boeweisi taki den ben tanapoe kánkán. Foe eksempel, Saulus foe Tarsus, di fosi ben de wan Fariseiman, ben taigi den Korentesma: „Bika na no wan fasi mi ben sori taki [mi] de moro mendri leki den toemoesi boen apostel foe oenoe, awinsi mi de noti. Foe troe, den marki foe de wan apostel ben sori na oen mindri nanga ala horidoro èn nanga marki èn wondroe èn krakti wroko” (2 Korente sma 12:11, 12). Ala di na wroko ben hebi, tokoe Paulus ben warderi en diniwroko so foeroe, taki a ben froedrage foeroe èn ben proeberi fajafaja foe no tjari no wan sjen na a wroko tapoe. — 2 Korentesma 6:3, 4, 9.

9. (a) Fa na salfoe fikapisi ben sori horidoro, èn nanga sortoe bakapisi? (b) San e dini leki wan krakti gi wi foe go doro na wan getrow fasi ini a dini foe Gado?

⁹ Ini ten di no pasa so langa ete, a salfoe kresten, di ben dini Gado bifo na fosi grontapoe feti, ben sabi taki 1914 ben marki na kaba foe na Ten foe den Heiden, èn foeroe foe den ben froewakti foe kisi den hemel paiman ini a jari dati di sma sa tan memre. Ma disi no ben pasa. So leki fa den troe tori e sori now, dan someni tenti jari den ben kisi a tapoe. Ini a ten disi foe na onfroewakti kon moro langa foe a libi foe den na grontapoe, dan Jehovah Gado ben krin èn soifri foe a libi foe den (Sakaria 13:9; Maleaki 3:2, 3). Taki den ben tan horidoro, ben abi leki bakapisi taki den ben kon moro boen. Leki foetoeboi foe Jehovah, den ben de nanga prisiri foe de en nen-pipel (Jesaja 43:10-12; Tori foe den Apostel 15:14). Na ini a ten disi, baka di den tjari pasa toe grontapoe feti nanga wan lo pikin feti, den breiti toemoesi taki wan bigi ipi foe tra skapoe di e gro dei foe dei èn di de now moro leki fo miljoen e jepi den foe panja na boen njoensoe. A jeje paradijs di den e njanboen foe en, ben bradi ensrefi na a heri grontapoe, srefi te na den moro farawe èilanti foe na se. Na boen fasi foe handri disi, di wi e warderi moro nanga moro, o moro langa wi e libi, ben dini leki wan krakti foe go doro getrow na ini a dienst foe Gado te leki a wani èn a prakseri foe Jehovah doe dorodoro.

10. San de doronomo fanowdoe, so taki wi no kon swaki?

¹⁰ Foe di a paiman foe wi e anga foe na stanfastefasi foe wi, meki wi abi froemane doronomo fanowdoe ini a prenspari tori disi (1 Korentesma 15:58; Kolosesma 1:23). Foe swakifasi no de a mindri Jehovah pipel, meki wi moesoe kisi deki-ati doronomo foe hori fasti na a waarheid èn a warti grani foe panja na waarheid, neleki fa den njoen gemeente ben kisi disi na ini a fosi jarihondro nanga jepi foe den gobaka foe Paulus nanga Barnabas (Tori foe den Apostel 14:21, 22). Meki a de wi fasti prakseri èn wi fasti bosroiti, so leki fa na apostel Johanes e poti en, taki na waarheid sa tan na ini wi, „èn a sa tan nanga wi foe têgo.” — 2 Johanes 2.

Wakti nanga wan horidoro di no e degedege

11. San, so leki a sori, na a regel di Gado poti gi en foetoeboi, èn fa ini a kefal foe Josef disi e kon a krin?

¹¹ A e teki ten foe meki na tesi di abi foe doe nanga wi kon na wan kaba (Jakobus 1:2-4). Wakti! Wakti! Wakti! ben gersi taki ben de na regel foe Gado gi den foetoeboi foe en foe owroeten, te na fasti bosroiti foe den ben kon ondro tesi foe tan na ini a bribi. Ma na wakti di den ben moesoe wakti te foe kaba, ala ten ben sori taki a abi wan paiman, gi den getrow foetoeboi dati. Josef, foe eksempel, ben abi foe wakti 13 jari leki wan srafoe èn wan strafoeman, ma na ondrofeni ben meki a sma di a ben moesoe de kon moro krin èn soifri. — Psalm 105:17-19.

12, 13. (a) Fa Abraham ben de wan eksempel foe getrow horidoro? (b) Na sortoe fasi na bribi èn na horidoro foe Abraham ben poti leki wan model gi wi?

¹² Abraham ben de 75 jari kaba di Gado ben kari en komoto foe Ur foe den Kaldewsma foe go na a Pramisi Kondre. A ben de wan sani foe 125 jari, di a ben kisi na pramisi foe Gado, di ben poti steifi nanga wan sweri. Disi ben pasa leti baka di Abraham ben sori na krakti foe en bribi, foe di a ben go te so fara foe òfer en lobi manpikin, Isak, èn a ben stòp soso di na engel foe Jehovah ben hori en anoe èn ben tapoe en foe tjari na ofrandi (Genesis 22:1-18). Feifitenti jari ben de wan langa ten gi Abraham foe wakti leki wan wakaman na ini wan freimde kondre, ma a ben hori fasti ete wan tra 50 jari, te leki a ben dede na a libimarki foe 175 jari. Ini ala a ten dati, Abraham ben de wan getrow kotoigi èn profeiti foe Jehovah Gado. — Psalm 105:9-15.

¹³ Na bribi èn horidoro foe Abraham poti leki wan model gi ala foetoeboi foe Gado, di wani foe kisi den pramisi blesi nanga jepi foe Jesus Krestes, na Siri foe Abraham (Hebrewsma 11:8-10, 17-19). Ini a tori di abi foe doe nanga en wi e leisi na ini Hebrewsma 6:11-15: „Wi e angri taki ibriwan foe oenoe moesoe sori na srefi faja foe abi te na a kaba na seikerfasi dorodoro foe na howpoe, so taki oenoe no kon de loboso, ma de sma di e waka baka den di nanga jepi foe bribi èn pasensi e kisi den pramisi. Bika di Gado ben gi Abraham en pramisi, a ben sweri na ensrefi, foe di a no ben man sweri na no wan sma di moro bigi leki en èn a ben taki: ’Foe troe, ala di mi e blesi, mi wani blesi joe èn ala di mi e meki kon moro foeroe, mi wani meki joe kon moro foeroe.’ Èn so Abraham ben kisi na pramisi disi, baka di a ben sori pasensi.”

14. Foe san-ede wi no moesoe denki taki na tesi foe horidoro no abi wan kaba èn taki na paiman de wan sani di wi no sa man kisi?

¹⁴ A salfoe fikapisi ben si fa 77 jari ben pasa kaba sensi na kaba foe na Ten foe den Heiden na ini 1914, di wan toe foe den ben froewakti taki na troe kresten gemeente ben sa kisi na glori foe go na hemel. Omeni moro langa na fikapisi moesoe wakti wi no sabi. Wi moesoe degedege foe dati-ede èn prakseri taki na wakti di wi e wakti no e kon na wan kaba èn taki na paiman de wan howpoe di de wan bidrigi sani èn di no sa kon troe noiti? Nôno! Dati noiti ben sa poti na soevereiniteit foe Gado kon reti noso gi en nen grani. A no ben sa kon kisi reti na fesi foe a grontapoe, te a ben sa gi wi na fiktori èn na prijs foe têgo libi di de a bakapisi foe dati. Awansi o langa a ten de, na fikapisi, makandra nanga den getrow kompe foe den, di gersi skapoe, ben teki na fasti bosroiti foe wakti tapoe Jehovah foe a doe wan sani na tapoe en eigi ten. Ini a sori foe so wan toemoesi boen eksempel foe horidoro, den e waka baka na libi nanga waka foe Abraham. — Romesma 8:23-25.

15. (a) San na a waktiwortoe foe wi, èn nanga sortoe ondrofeni Gado ben jepi wi foe wini? (b) Sortoe froemane foe Paulus e fiti te now ete na ini a ten foe wi?

¹⁵ Na waktiwortoe, foe dati-ede, de te now ete foe horidoro sondro foe degedege ini a doe foe na wani foe Gado (Romesma 2:6, 7). Ini a ten di pasa a ben tjari wi pasa hebi tesi, so srefi a poti di sma ben poti wi na ini strafoe-oso èn konsentrâsikampoe, èn a ben tjari wi pasa disi na wan fiktorifasi nanga glori gi en nen èn prakseri.a Na ini na ten di de ete gi na kon na wan kaba foe a tesi foe wi, Jehovah sa go doro foe doe a srefi. Na froemane foe Paulus tan de wan sani di fiti gi wi ten: „Oenoe abi stanfaste pasensi nanga horidoro fanowdoe, so taki oenoe kan doe èn kon klari foe doe na wani foe Gado dorodoro, èn na so fasi kisi èn tjari gowe èn njanboen dorodoro san ben pramisi.” — Hebrewsma 10:36, The Amplified Bible; Romesma 8:37.

16. Foe san-ede wi no moesoe si na gi di wi gi wisrefi abra na Jehovah leki wan sani di de soso foe wan sjatoe pisiten noso leki wan sani di abi kondisi?

¹⁶ So langa Jehovah abi wroko gi wi foe doe a mindri foe na ogri grontapoe disi, dan foe di wi e waka baka na eksempel foe Jesus, meki wi wani foe abi prati ini a wroko dati te leki a klari (Johanes 17:4). Na gi di wi ben gi wisrefi abra na Jehovah no ben abi na ini, taki wi ben sa dini en foe wan sjatoe ten nomo èn baka dati Armagedon ben sa kon. Na gi di wi gi wisrefi abra ben de foe têgo. Na wroko di Gado abi gi wi no sa kaba nanga na feti foe Armagedon. Ma a de soso baka te wi klari a wroko di moesoe doe bifo Armagedon, taki wi sa si den bigi sani di sa kon baka na bigi orlokoe dati. Dan, sei na kolokoe grani foe tan go doro foe doe en wroko, wi sa kisi a paiman nanga den blesi di a ben pramisi èn di wi ben howpoe na tapoe someni langa kaba. — Romesma 8:32.

Lobi gi Gado e jepi wi foe horidoro

17, 18. (a) San sa jepi wi foe horidoro ini ten foe banawtoe èn foe meki Gado feni wi boen? (b) San sa jepi wi foe kisi na wini, èn san wi no e taki foe na ten di tan abra?

¹⁷ Kande wi kan aksi wisrefi, ini ten di lai nanga broko-ede: ’Fa wi kan horidoro moro langa?’ Na piki? Te wi e lobi Gado nanga wi heri ati, froestan, sili èn krakti. „Lobi abi langa pasensi nanga switifasi. Lobi no e djaroesoe, a no e soekoe foe prodo, a no e skepi. A e froedrage ala sani, e bribi ala sani, e howpoe ala sani, e horidoro na ondro ala sani. Lobi no e fadon noiti” (1 Korentesma 13:4, 7, 8). Efoe a no de taki wi e horidoro foe di wi lobi Gado, dan na horidoro foe wi no e teri. Ma efoe wi no e lasi deki-ati na ondro hebi tesi, foe di wi e gi wisrefi ini a dini foe Jehovah, dan a horidoro foe wi sa abi leki bakapisi taki wi e meki a lobi foe wi gi en kon moro dipi. Lobi gi Gado, en Tata, ben meki Jesus ben man horidoro (Johanes 14:30, 31; Hebrewsma 12:2). Efoe lobi gi Gado, wi Tata, na a troe boeweigi foe wi ati, dan san de dan di wi no man tjari?

¹⁸ A de a lobi foe wi di no e degedege gi Jehovah Gado di ben meki taki wi man tan wini na grontapoe na ini den moro moeilek ten disi foe tesi. Èn Jehovah, nanga jepi foe Jesus Krestes, sa go doro foe gi wi na jepi di wi abi fanowdoe awinsi omeni moro langa na owroe seti foe sani disi e kisi pasi foe tan (1 Petrus 5:10). A no de foe taki, dati wi no e taki a fesi omeni ten de ete, èn wi no e poti no wan spesroetoe dei. Wi e libi dati gi Jehovah Gado, a Sma di sabi fa foe hori ai tapoe na ten. — Psalm 31:15.

19, 20. (a) Fa wi moesoe si ibri dei di wi e horidoro? (b) Foe sortoe don sani wi wani tan farawe foe en, èn foe san-ede?

¹⁹ Ma na geslakti di den ben taki a fesi foe en taki a ben sa de kotoigi èn ben sa ondrofeni „na bosroiti foe na seti foe sani”, de boen fara kaba ini jari (Mateus 24:3, 32-35). Meki foe dati-ede wi no frigiti noiti taki ibri dei di wi e horidoro, na wan dei moro mendri gi Satan nanga den ogri jeje foe en foe doti na universum nanga a de di den de èn a de wan dei moro krosibei foe na ten di Jehovah no sa froedrage moro langa, na de foe „patoe foe atibron di ben sreka kon so, taki a fiti foe kisi pori” (Romesma 9:22). Heri esi, te na langa pasensi foe Jehovah sa kon na wan kaba, a sa bro en atibron na tapoe man nanga oema di no e bribi ini Gado. Na so fasi A sa tjari kon a krin taki a no e feni a fasi fa den e doe na ini den libi, boen, awansi a ben gi den pasi foe go doro a heri pisiten disi.

²⁰ A sa de wan toemoesi don sani gi wi foe no go doro nanga den lobi moeiti foe wi foe kisi na glori prijs di poti a wi fesi nanga jepi foe Jesus Krestes. Na presi foe dati, wi moesoe de nanga a fasti bosroiti foe go doro na wan getrow fasi leki Kotoigi foe Jehovah ini a moro prenspari ten disi pe Jehovah de so fara foe poti en nen kon reti leki Universeel Soeverein.

[Foetoewortoe]

Fa joe ben sa piki?

◻ Foe san-ede wi no kan tan farawe foe meki a horidoro foe wi kisi tesi?

◻ Foe sortoe bidrigi sani wi wani foe tan farawe?

◻ San wi abi fanowdoe, foe wi no kon swaki?

◻ San na a waktiwortoe foe wi?

◻ San sa jepi wi foe horidoro na ini a ten foe broko-ede?

[Prenki na tapoe bladzijde 9]

Na pipel foe Gado ben de ala ten klariklari foe wakti tapoe Jehovah, neleki den Kotoigi disi na ini Port of Spain, Trinidad