Tan krosibei fu Yehovah organisâsi

A DISIPEL Yakobus ben skrifi: „Kon krosibei na Gado èn a o kon krosibei na unu” (Yak. 4:8). Iya, aladi wi na sondusma, toku Yehovah no hei tumusi èn a no de tumusi fara fu wi taki a no man yere wi te wi e taki nanga en (Tori 17:27). Fa wi kan kon krosibei na Gado? Wi musu du muiti fu tron bun mati fu Yehovah di e begi en fayafaya (Ps. 39:12). Efu wi abi a gwenti fu studeri Gado Wortu, Bijbel, dan dati o yepi wi fu kon krosibei na en tu. Na a fasi disi wi e kon sabi suma na Yehovah Gado, san a abi na prakseri fu du, èn san a wani gi wi (2 Tim. 3:16, 17). Na so wi e leri fu lobi Yehovah èn wi e kon abi lespeki gi en. Dati o meki taki wi no o wani du sani di a no lobi.​—Ps. 25:14.

² Yesus na a wan-enkri sma di kan yepi wi fu tron bun mati nanga en Tata Yehovah (Yoh. 17:3; Rom. 5:10). En na a moro bun sma di kan yepi wi fu kon frustan fa Gado e denki. A ben sabi en Tata so bun, taki a ben man taki: „Nowan sma sabi a Manpikin, boiti a Tata. Nowan sma sabi a Tata, boiti a Manpikin nanga a sma di a Manpikin wani yepi fu kon sabi a Tata” (Luk. 10:22). Sobun, te wi e studeri den Evangelietori fu kon sabi fa Yesus ben e prakseri èn fa a ben e firi, dan yu kan taki dati wi e kon sabi fa Yehovah e prakseri èn e firi. Te wi e kon sabi den sani disi, dan dati o meki wi kon moro krosibei na a Gado fu wi.

³ Na ondro a tiri fu a Manpikin fu Gado, wi kan tron bun mati fu Yehovah te wi e tan krosibei fu a pisi fu Yehovah organisâsi di de na grontapu. Na den e leri wi fa fu du a wani fu Gado. Soleki fa Mateyus 24:45-47 e taki, dan wi Masra Yesus Krestes ben o poti „a koni srafu di de fu frutrow” fu gi na osofamiri fu Gado „nyanyan na a reti ten”. Na ini a ten disi, a koni srafu e gi wi furu leri di de leki nyanyan. Yehovah e gebroiki a srafu disi fu gi wi a rai fu leisi a Wortu fu en ibri dei, fu go na den Kresten konmakandra doronomo, èn fu preiki a ’bun nyunsu fu a Kownukondre’ fayafaya (Mat. 24:14; 28:19, 20; Yos. 1:8; Ps. 1:1-3). Noiti wi wani si a koni srafu na wan libisma fasi. Aladi den na sondusma, toku wi de seiker taki na Gado e tiri den. Wi musu du muiti fu tan krosibei fu a pisi fu Yehovah organisâsi di de na grontapu èn wi musu du san na organisâsi e taigi wi. Disi o meki wi kon moro krosibei na wi Gado Yehovah. Boiti dati a o tranga wi èn a o kibri wi te wi kisi tesi.

FU SAN EDE WI E KISI TESI MORO NANGA MORO?

⁴ Efu yu de na ini a tru anbegi omeni yari kaba, dan yu sabi san a wani taki fu horidoro te yu e kisi tesi. Ma awinsi yu kon sabi Yehovah no so langa pasa èn yu e moksi nanga en pipel no so langa ete, yu sabi taki Satan Didibri e gens ala sma di e saka densrefi na ondro Yehovah leki a Moro Hei Tiriman (2 Tim. 3:12). Sobun, awinsi omeni tesi yu kisi, yu no abi fu kon frede èn yu no abi fu lasi-ati. Yehovah pramisi taki a o tan horibaka gi yu, a o frulusu yu èn a o gi yu libi na ini a ten di e kon.​—Hebr. 13:5, 6; Openb. 2:10.

⁵ Now di wi e libi na ini den lasti dei fu a grontapu fu Satan, wi alamala kan fruwakti taki wi o kisi moro tesi. Sensi di Gado Kownukondre seti na ini 1914, Satan no kisi primisi fu go baka na hemel pe Yehovah de. Den ben trowe Satan kon na grontapu pe en nanga den ogri engel fu en de te now ete. Sensi 1914, grontapu kon kisi moro bigi problema èn sma bigin frufolgu den futuboi fu Yehovah moro nanga moro. Disi e pasa fu di Satan ati e bron. A sani disi e buweisi tu taki wi e libi na ini den lasti dei fu na ogri-ati tiri fu Satan.​—Openb. 12:1-12.

⁶ Satan ati e bron srefisrefi taki a kisi syen na a fasi disi èn a sabi taki en ten syatu. Dati meki a e gebroiki den ogri yeye fu en fu du ala san a man fu tapu a Kownukondre preikiwroko èn fu pori a wánfasi fu Yehovah en futuboi. Disi e meki taki den futuboi fu Yehovah musu feti wan hebi feti. Bijbel e taki: „Wi no e feti nanga libisma, ma nanga den tirimakti, nanga den wan di abi makti, nanga den tiriman fu a dungru grontapu disi, nanga den ogri yeye na hemel.” Efu wi leki anbegiman fu Yehovah wani wini a feti disi, dan wi no musu gi abra, ma wi musu tan weri den fetisani di Gado gi wi. Wi musu „tanapu kánkan te Didibri e kon nanga den triki fu en” (Ef. 6:10-17). Disi wani taki dati wi musu horidoro.

LERI FU HORIDORO

⁷ Wan sma di e horidoro man pasa bigi problema noso hebi tesi. Bijbel e sori taki wan sma di e horidoro na ini na anbegi fu en e tan du san reti awinsi a e kisi problema, gens, frufolgu, noso iniwan tra sani di kan meki en gowe libi Gado. Wi leki Kresten musu leri fu horidoro. Disi e teki ten. O moro wi e gro, o moro wi man horidoro. Efu na a bigin fu wi Kresten libi kaba, wi e leri fu horidoro te pikinpikin tesi miti wi, dan wi bribi o kon moro tranga, so taki wi man pasa den moro bigi tesi di o kon ete (Luk. 16:10). Wi no kan wakti teleki bigi tesi kon, fosi wi teki a bosroiti fu tanapu kánkan na ini a bribi. Wi musu teki wan bosroiti fosi wi kisi a tesi. Na apostel Petrus ben taki dati te wi e leri fu horidoro, wi musu du muiti fu kon abi tra fasi tu di Gado lobi. A ben skrifi: „Boiti taki unu abi bribi, un musu du ala muiti fu kon abi bunfasi. Boiti taki unu abi bunfasi, un musu kon abi sabi. Boiti taki unu abi sabi, un musu man dwengi unsrefi. Boiti taki unu man dwengi unsrefi, un musu horidoro. Boiti taki unu e horidoro, un musu dini Gado fayafaya. Boiti taki unu e dini Gado fayafaya, un musu lobi un brada. Boiti taki unu lobi un brada, un musu lobi ala sma.”​—2 Petr. 1:5-7; 1 Tim. 6:11.

⁸ Yakobus ben sori o prenspari a de fu leri fu horidoro di a ben skrifi: „Un musu prisiri srefisrefi, mi brada, te ala sortu tesi e miti unu, fu di unu sabi taki a bribi fu unu di kisi tesi na a fasi disi, e meki taki unu man horidoro. Ma un musu tan horidoro te na a kaba, so taki unu kan kon bun dorodoro èn unu kan de sondro fowtu. Dan unu no o mankeri noti” (Yak. 1:2-4). Yakobus e taki dati Kresten no musu lon gi tesi, ma den musu breiti te den e kisi tesi, fu di na so den e leri fu horidoro. Na so yu e si a tori tu? Baka dati Yakobus e sori taki efu wi horidoro te na kaba, dan wi o kisi moi fasi èn Gado o feni wi bun. Iya, ala den difrenti tesi di wi e pasa ibri dei e leri wi fu horidoro. Te wi e horidoro, dan dati e yepi wi fu kon kisi tra moi fasi tu di wi abi fanowdu.

⁹ Te wi e horidoro, dan Yehovah e firi prisiri. Dati o meki taki a o blesi wi nanga têgo libi. Yakobus ben taki tu: „Koloku fu a sma di e tan horidoro te tesi miti en, bika te Yehovah feni en bun, dan a o pai en nanga libi di a pramisi den wan di e tan lobi en” (Yak. 1:12). Iya, wi e horidoro fu di wi sabi taki wi o kisi têgo libi. Wi no o man tan dini Yehovah, efu wi no horidoro. Efu wi gi pasi taki den problema fu grontapu tapu wi fu du a wani fu Gado, dan dati o hari wi go baka na ini a grontapu. Efu wi no e horidoro, dan wi no o kisi a yeye fu Yehovah èn wi no o man abi den fasi di a yeye e meki sma kisi.

¹⁰ Efu wi wani tan horidoro na ini den tranga ten disi, dan wi musu kon sabi san na a yoisti fasi fa wi leki Kresten musu si a pina di wi e pina. Memre taki Yakobus ben skrifi: „Un musu prisiri srefisrefi.” Disi a no wan makriki sani fu du, spesrutu te wi abi skin-ati noso te wi frede. Ma hori na prakseri taki wi musu horidoro efu wi wani libi fu têgo. Wan sani di den apostel ben ondrofeni e yepi wi fu si fa wi kan prisiri te sma e pina wi. A tori dati de fu feni na ini a buku Tori fu den apostel pe wi e leisi: „Den kari den apostel kon. Den wipi den èn baka di den taigi den fu no taki moro na ini a nen fu Yesus, dan den lusu den. Fu dati ede den apostel gowe libi a Grankrutu fu den Dyu nanga bigi prisiri, fu di Gado ben feni taki den warti fu kisi syen fu Yesus nen ede” (Tori 5:40, 41). Den apostel ben e frustan taki den sani di ben e miti den ben e buweisi taki den ben e du san Yesus taki èn taki Yehovah ben feni den bun. Baka wan heri pisi ten, di Gado meki Petrus skrifi a fosi brifi fu en, dan Petrus fruteri sortu wini a abi te sma e pina fu di den e du san reti.​—1 Petr. 4:12-16.

¹¹ Bijbel e fruteri tu fu wan sani di Paulus nanga Silas ben ondrofeni. Di den ben e du a zendelingwroko fu den na ini Filipi, sma tyari den go sroto fu di den ben feni taki den ben e tyari dyugudyugu kon na ini a foto èn taki den ben e leri trawan wan lo gwenti di ben de teige den wet fu a kondre. Leki bakapisi fu dati, den kisi hebi fonfon èn sma poti den na strafu-oso. Bijbel e sori taki, aladi Paulus nanga Silas ben de na strafu-oso èn sma no ben luku den soro fu den ete, toku ’na mindrineti, den ben e begi, den ben e singi prèisesingi gi Gado, èn den strafuman ben e arki’ (Tori 16:16-25). Paulus nanga Silas ben e si a pina di den ben e pina leki wan okasi fu sori Gado nanga libisma taki den ben e du san reti. Boiti dati, den ben e si en tu leki wan okasi fu preiki gi den wan di ben wani arki a bun nyunsu. A libi fu tra sma ben de ini a tori. A srefi neti dati a waktiman fu a strafu-oso nanga en osofamiri arki a bun nyunsu èn den tron disipel (Tori 16:26-34). Paulus nanga Silas ben e frutrow tapu Yehovah nanga a makti fu en. Den ben de seiker tu taki a ben wani horibaka gi den na ini a situwâsi dati èn na dati Yehovah du tu.

¹² Na ini a ten disi tu, Yehovah gi wi ala san wi abi fanowdu fu kan pasa den tesi di e miti wi. A wani taki wi horidoro. A gi wi a Wortu fu en, so taki wi kan sabi finifini san a abi na prakseri fu du. Disi e tranga a bribi fu wi. Wi abi na okasi fu abi demakandra nanga tra bribiman èn fu du a santa diniwroko fu wi. Wi abi a grani tu fu de wan bun mati fu Yehovah te wi e taki nanga en na ini begi. A e arki te wi e prèise en èn te wi e begi en fayafaya fu yepi wi fu tyari wisrefi na wan krin fasi (Fil. 4:13). San wi no musu frigiti tu, na a krakti di wi e kisi te wi e teki ten fu prakseri a howpu di wi abi.​—Mat. 24:13; Hebr. 6:18; Openb. 21:1-4.

WI MUSU HORIDORO AWINSI SORTU TESI WI KISI

¹³ Den tesi di e miti wi na ini a ten disi, na tesi di miti den fosi disipel fu Yesus Krestes tu. Na ini a ten disi sma di yere tori fu Yehovah Kotoigi di no tru, du ogri nanga den èn den kosi den. Neleki fa a ben de na ini a ten fu den apostel, na so a de tu na ini a ten disi taki son kerkiman e meki taki trawan e frufolgu wi, fu di Gado Wortu e tyari den falsi leri nanga gwenti fu den kon na krin (Tori 17:5-9, 13). Ten na ten, a pipel fu Yehovah feni yepi fu di den gebroiki den reti di lanti gi den (Tori 22:25; 25:11). Ma difrenti tiriman meki ala sortu wet fu pruberi fu tapu a wroko fu wi (Ps. 2:1-3). Na ini den sortu situwâsi dati wi e sori deki-ati neleki den apostel di ben taki: „Fu di Gado na wi tiriman, meki wi musu gi yesi na en moro leki na libisma.”​—Tori 5:29.

¹⁴ Na heri grontapu wi e si taki a lobi di sma abi gi a kondre fu den e kon moro tranga. A sani dati e meki taki moro nanga moro sma e suku fu meki wi tapu nanga a preikiwroko di Gado gi wi fu du. Den futuboi fu Gado kon frustan moro bun san a warskow na Openbaring 14:9-12 wani taki. Drape skrifi san o pasa nanga sma di e anbegi „na ogri meti, nanga a popki di den meki fu en”. Wi e frustan o prenspari den wortu fu Yohanes de, di a taki: „Fu dati ede a de fanowdu taki den santawan horidoro. Disi na den wan di e hori den komando fu Gado èn di tan bribi na ini Yesus.”

¹⁵ Tesi di yu e kisi fu di orloku de, fu di sma e feti fu teki a makti na ini a kondre abra, noso fu di sma e frufolgu wi èn den e tapu a wroko fu wi, kan meki taki a e muilek fu du yu Kresten diniwroko. Kande a gemeente fu yu no man hori konmakandra moro. A kan taki unu no man kisi nowan boskopu fu a bijkantoro. Kande den kring-opziener no man fisiti a gemeente moro noso unu no e kisi nyun buku. Efu iniwan fu den sani disi pasa, dan san yu musu du?

¹⁶ Du ala san yu man èn du so furu leki yu man na ini a situwâsi fu yu. Okasi musu fu de fu tan studeri Bijbel gi yusrefi. Furu tron a de so taki pikin grupu kan kon makandra fu studeri na a oso fu wan sma. Wi kan gebroiki buku di wi ben studeri kaba noso a Bijbel srefi fu hori konmakandra. Ma no bruya èn no frede. Furu tron a de so taki a Tiri Skin sabi fa fu seti sani esi-esi fu kan seni boskopu gi brada di abi frantwortu.

¹⁷ Srefi efu yu de na wan presi pe nowan Kresten brada noso sisa no de, hori na prakseri taki Yehovah nanga en Manpikin Yesus Krestes, de nanga yu. Yu kan tan abi howpu. Yehovah man yere den begi fu yu awinsi pe yu de èn a kan gebroiki a yeye fu en fu gi yu krakti. Na en yu musu go suku yepi. Hori na prakseri taki yu na wan futuboi fu Yehovah èn wan disipel fu Yesus Krestes. Sobun, gebroiki ibri okasi di yu kisi fu preiki gi sma. Yehovah o blesi den muiti fu yu èn a kan taki heri esi tra sma o kon na ini a tru anbegi fu dini en makandra nanga yu.​—Tori 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Efu sma wani kiri yu neleki fa den ben wani kiri den apostel nanga tra sma, dan tan frutrow na tapu „a Gado di e gi dede sma wan opobaka” (2 Kor. 1:8-10). A bribi di yu abi taki a o gi yu wan opobaka kan yepi yu fu horidoro srefi te yu e kisi hebi frufolgu (Luk. 21:19). Krestes Yesus gi wi na eksempre. A ben sabi taki trawan ben o kisi deki-ati fu horidoro te ensrefi ben o horidoro. Na a srefi fasi yu kan gi yu brada nanga sisa deki-ati tu te yu e horidoro.​—Yoh. 16:33; Hebr. 12:2, 3; 1 Petr. 2:21.

¹⁹ Boiti taki sma kan frufolgu yu noso gens yu, dan tra problema kan miti yu tu pe yu o abi fu horidoro. Son brada nanga sisa lasi-ati fu di furu sma na ini a kontren pe den e preiki no wani arki a boskopu. Tra brada nanga sisa kon siki. Sonwan fu den abi siki di abi krakti tapu den firi fu den. Trawan no man du son sani moro fu di a skin fu den kon swaki. Na apostel Paulus ben abi fu horidoro tu di a kisi fu du nanga so wan tesi di ben e meki taki a diniwroko fu en no ben makriki gi en son leisi (2 Kor. 12:7). Epafroditus, wan Kresten brada fu a foto Filipi, ben ’lasi-ati fu di den mati fu en ben yere taki a kon siki’ (Fil. 2:25-27). A sondu fasi fu wi èn den sondu fu trawan kan meki taki wi kisi problema di e meki en moro hebi gi wi fu horidoro. Fu di ala sma de tra fasi, meki wi kan kisi pikinpikin trobi nanga wi Kresten brada nanga sisa noso nanga famiriman srefi. Ma te wi gi yesi na den rai di skrifi na ini a Wortu fu Yehovah, dan wi man horidoro èn wi kan pasa den sortu tesi dati nanga bun bakapisi.​—Esek. 2:3-5; 1 Kor. 9:27; 13:8; Kol. 3:12-14; 1 Petr. 4:8.

TEKI A BOSROITI FU TAN DINI YEHOVAH

²⁰ Ala ten wi musu tan gi yesi na Krestes Yesus, a sma di Yehovah poti leki Edeman fu a gemeente (Kol. 2:18, 19). Wi musu tan wroko nanga „a koni srafu di de fu frutrow” èn nanga den wan di den poti fu teki fesi (Hebr. 13:7, 17). Te wi e hori wisrefi na ala den sani di Gado seti èn te wi e tan wroko makandra nanga den wan di e teki fesi, dan disi o meki taki wi orga bun fu man du a wani fu Yehovah. Ala ten wi musu gebroiki a grani di wi abi fu begi. Memre taki wi man taki nanga wi lobi hemel Tata awinsi wi de na strafu-oso èn awinsi wi sroto wi wawan na wan presi. Nowan sma no man pori a wánfasi di wi abi nanga den trawan di e anbegi Gado makandra nanga wi.

²¹ Meki wi teki a bosroiti fu horidoro èn meki wi du ala san wi man fu du a preikiwroko. Meki wi no gi abra fu du san Yesus Krestes di kisi wan opobaka, ben taigi den bakaman fu en fu du. A ben taki: „Go na sma fu ala kondre èn meki den tron disipel. Dopu den na ini a nen fu a Tata, fu a Manpikin, èn fu a santa yeye. Leri den fu du ala san mi taigi unu fu du” (Mat. 28:19, 20). Meki wi horidoro neleki Yesus. Meki wi no frigiti a howpu di a Kownukondre e gi wi nanga a têgo libi di wi o kisi (Hebr. 12:2). Leki disipel fu Krestes di dopu kaba, wi abi a grani fu yepi meki Yesus profeititori di abi fu du nanga „a kaba fu grontapu”, kon tru. Yesus ben taki: „A bun nyunsu disi fu a Kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mat. 24:3, 14). Efu nownow kaba wi e du ala muiti fu du a wroko dati nanga wi heri ati, dan wi o kisi bigi prisiri te wi o libi fu têgo na ini a nyun grontapu fu Yehovah pe retidu o de!