Gado sa pori grontapoe?
SOLEKI fa paus Johannes Paulus II ben taki, dan libisma kan abi froetrow na ini a ten di e kon. Na ini a heri historia, a ben taki, „libisma ben tan doe sondoe, kande srefi moro bigi sondoe leki den wan di ben skrifi bifo a froedoe”. A paus ben froeklari toe: „Na ini den wortoe foe a froebontoe di Gado ben sroto nanga Noa, wi e froestan now taki no wan sondoe de di kan meki Gado pori grontapoe di ensrefi ben kria.”
A troe taki noiti Gado sa pori grontapoe? Bijbel e taki dati baka a Froedoe, Gado ben taigi Noa: „Noiti moro ala skin sa koti poeroe nanga watra foe wan froedoe, èn noiti moro wan froedoe sa feni presi foe pori grontapoe” (Genesis 9:11). A paus e taki dati nanga den wortoe disi Gado „ben poti a froeplekti na tapoe ensrefi foe no meki [grontapoe] pori”.
Bijbel e sori krinkrin taki a Kriaman no sa gi pasi meki a planeiti foe wi kisi pori. „Grontapoe e tan srefi te ten di no skotoe”, bijbel e taki (Preikiman 1:4). Ma moro de di wi moesoe leri foe a Froedoe — wan sani di a paus no ben taki noti foe en.
Jesus ben taki dati a situwâsi na grontapoe na a ten foe en denoja na ini a ten di e kon, ben sa de „neleki fa den dei foe Noa ben de”, di sma „no ben poti prakseri na tapoe te leki a froedoe ben kon èn ben figi den alamala poeroe” (Mateus 24:37-39). Na a srefi fasi, na apostel Petrus ben skrifi taki neleki fa „a grontapoe foe a ten dati ben kisi pori di watra ben soengoe en”, na so toe „a dei foe kroetoe èn gi a pori di godelowsoe sma” de leki wan kefar na tapoe a disiten grontapoe. — 2 Petrus 3:5-7.
Jesus nanga Petrus ben frigiti a froebontoe di Gado ben abi nanga Noa? Kwetikweti! Neleki fa Gado ben taki na ini a froebontoe di a ben abi nanga Noa, Gado no sa gebroiki froedoewatra foe tjari wan kaba kon na a ogri seti foe sani disi. Na presi foe dati, a sa gebroiki a makti foe a „Kownoe foe den kownoe èn Masra foe den masra”, Jesus Krestes (Openbaring [Apocalyps] 19:11-21). Foe dati ede, soleki fa bijbel e sori, grontapoe no sa pori, ma a „grontapoe” foe na ogri libisma famiri seiker sa kon na wan kaba (Odo 2:21, 22; Openbaring 11:18). Baka dati, „den regtfardiki sma sa abi grontapoe leki a goedoe foe den, èn den sa libi na tapoe foe têgo.” — Psalm 37:29.