Krinfasi e gi Jehovah grani

WAN toe Hebrew wortoe nanga Griki wortoe e taki foe sani di krin èn di soifri èn so srefi foe a fasi fa sani e kon soifri, dati wani taki a kon di wan sani e kon boen baka èn e kon de sondro flaka, fri foe iniwan sani di kan doti en, di kan poeroe a soifrifasi foe en, noso di kan pori en. Den wortoe disi no e taki wawan foe krinfasi na skinfasi, ma foeroetron foe krinfasi na moreel sei èn na jejefasi. Nofotron krinfasi na skinfasi èn na ceremonia sei e kroederi na wan toe presi. A Hebrew werkwortoe ta·herʹ (de krin; krin) e taki moro foeroe foe krinfasi na ceremonia sei noso na moreel sei. Wan Hebrew wortoe di wani taki a srefi leki ta·herʹ na ba·rarʹ, èn na ini den difrenti fasi foe en a wani taki „wai poeroe; piki poeroe; hori krin; a sori di wan sma e sori foe de krin; krin” (Esekièl 20:38; Preikiman 3:18; Psalm 18:26; Jeremia 4:11). A Griki wortoe ka·tha·rosʹ, di wani taki „krin; soifri”, e gebroiki na ini tori foe skin, moreel èn relisi afersi (Mateus 23:26; Mateus 5:8; Titus 1:15). ’A krin di wan sma no krin’ vertaal foe a Hebrew wortoe ta·meʼʹ nanga a Griki wortoe a·ka·thar·siʹa. — Lefitikus 5:3; Mateus 23:27; Galasiasma 5:19.

Krinfasi na skinfasi

Den persoonlijk gwenti foe den ben meki a nâsi Israèl de wan gosontoe pipel te joe teki den gersi tra pipel, ala 40 jari langa di den ben froisi foe a wan presi go na a trawan na ini a gran sabana. Den wet foe Gado di ben abi foe doe nanga a libi foe den na ini kampoe, so srefi nanga a fasi fa den ben kan kon sabi sortoe siki wan sma abi noso foe dresi wan siki, seiker ben de a reide gi disi. A prensparifasi foe krin watra ben de wan sani pe den ben poti krakti toe na tapoe na ini a seti disi. A no ala meti ben krin foe njan. Wet di ben moesoe sorgoe taki sani no pasa, ben taki foe a fasi fa den ben moesoe handri èn ben moesoe poeroe dedeskin. A abi di siki sma no ben mag abi kontakti nanga tra sma gi wan pisi ten ben moesoe sorgoe taki siki di kan go abra esi-esi na tapoe tra sma no ben panja ensrefi. A wet, taki den ben moesoe beri koenkoen, ben de wan wet foe hori sani krin èn di ben de toemoesi fara gi a ten dati (Deuteronomium 23:12-14). Den wet, taki den ben moesoe wasi foeroetron èn taki den ben moesoe wasi den krosi, ben de so srefi seti di ben abi wini na ini a wet sistema foe a nâsi dati.

Foeroetron den Boekoe foe bijbel e gebroiki krinfasi na skinfasi leki wan simbôl noso wan prenki foe krinfasi na jejefasi. Foe eksempre, a e taki foe „brenki, krin, fini linnen”, èn a e taki dati den e prenki „den regtfardiki sani di den santawan doe” (Openbaring 19:8). Jesus ben taki toe foe wan gronprakseri foe krinfasi na skinfasi di a ben taki foe a krin di den Fariseiman no ben krin na jejefasi èn foe a hoigrifasi foe den. A bedrigifasi fa den ben tjari densrefi ben teki gersi a krin di wan sma ben sa krin na dorosei foe wan beker noso wan skotriki sondro foe doe a srefi sani dati na inisei (Mateus 23:25, 26). Jesus ben gebroiki wan srefi sortoe agersitori na a ten foe a lasti Paska di a ben taki nanga den disipel foe en èn di Judas Iskariot ben drape toe. Ala di den ben wasi kaba èn a Masra foe den ben wasi den foetoe kaba, èn foe dati ede den ben „krin srefisrefi” na skinfasi, tokoe na jejefasi Jesus ben taki „a no oen alamala [krin]”. — Johanes 13:1-11.

Bijbel e kari so wan 70 sani di kan meki wan sma no de krin na skinfasi èn doti na ceremonia sei. Son wan foe den na: kontakti nanga dede skin (Lefitikus 11:32-40; Numeri 19:11-19); kontakti nanga sma noso sani di no krin (Lefitikus 15:4-12, 20-24; Numeri 19:22); gwasi siki (Lefitikus 13:1-59); den sani di den sjenpresi e poeroe, so srefi a kon di skiti e kon na doro te sma abi seks (Lefitikus 15:1-3, 16-19, 32, 33); te wan pikin gebore (Lefitikus 12:1-5); te den e njan fowroe, fisi, noso meti di no krin (Lefitikus 11:41-47). Den priester ben de spesroetoe froeplekti foe de krin na skin èn ceremonia sei te den e dini na fesi foe Jehovah (Exodus 30:17-21; Lefitikus 21:1-7; 22:2-8). Na wan noso tra spesroetoe fasi, a kondre ben kan pori te den ben kiri wan trawan èn te den ben e anbegi kroektoe gado. — Numeri 35:33, 34; Esekièl 22:2-4; 36:25.

Krinfasi foe kresten

Kresten no de na ondro a Wet èn na ondro den wet di abi foe doe nanga a krin di sma ben moesoe de krin, srefi ala di a Wet disi èn den gwenti foe en ben abi krakti ete na ini den dei di Jesus ben de na grontapoe (Johanes 11:55). A Wet ben „abi wan skaduw foe den boen sani di moesoe kon ete”; „a troe sani na foe Krestes” (Hebrewsma 10:1; Kolosesma 2:17). Foe dati ede, Paulus ben skrifi foe den afersi disi di abi foe doe nanga a krin di wan sma moesoe krin ensrefi: „Ija, pikinmoro ala sani e kon krin nanga broedoe akroederi a Wet [Moses ben natinati a boekoe, a pipel, a tenti, èn den prapi nanga broedoe], èn efoe broedoe no trowe, dan no wan pardon no de. Foe dati ede a ben de fanowdoe taki den soifri prenki foe den sani na ini hemel ben moesoe krin nanga jepi foe den sani disi.” „Bika efoe a broedoe foe bokoboko èn foe mankaw èn na asisi foe wan jongoe oemakaw, di den e gebroiki foe trowe dati na tapoe den wan di ben kon doti, e meki sani kon santa na so wan fasi taki a e krin a skin, dan o moro betre a broedoe foe Krestes, di ben òfer ensrefi sondro fowtoe na Gado nanga jepi foe wan têgo jeje, sa krin wi konsensi foe dede wroko so taki wi kan doe santa diniwroko gi a libilibi Gado?” — Hebrewsma 9:19-23, 13, 14.

So boen, a de a broedoe foe Masra Jesus Krestes di e krin kresten foe ala sondoe èn onregtfardikifasi (1 Johanes 1:7, 9). Krestes „ben lobi a gemeente toe èn ben gi ensrefi abra gi en, so taki a ben sa kan santa en èn krin en nanga a wasi di a wasi en nanga watra, nanga jepi foe a wortoe”, so taki a moesoe de sondro flaka, de santa, èn de sondro doti, „wan pipel di sa de gi en wawan, èn di de fajafaja gi toemoesi boen wroko” (Efeisesma 5:25-27; Titus 2:14). Foe dati ede, ibri memre foe a kresten gemeente disi no moesoe „kon frigiti taki a ben kon krin foe den sondoe di a ben doe someni langa pasa”, ma moesoe go doro foe sori den froktoe foe a jeje foe Gado (2 Petrus 1:5-9), èn hori na prakseri taki „ibri sma di e meki froktoe, a [Gado] e krin, so taki a kan meki moro froktoe”. — Johanes 15:2, 3.

Foe dati ede, kresten moesoe tan abi hei markitiki foe krinfasi na skinfasi, moreel sei, èn jejefasi, èn kibri densrefi teige „ibri dotifasi foe skin nanga jeje” (2 Korentesma 7:1). Te wi e prakseri san Jesus ben taki, taki a ’no san e go na ini wan sma, ma san e kon foe wan sma, e doti en’, dan den winimarki disi foe a broedoe foe Krestes di man krin sma, e poti krakti moro foeroe na tapoe krinfasi na jejefasi. Den e tan hori „wan krin ati” nanga „wan boen konsensi” na fesi foe Gado (Markus 7:15; 1 Timoteus 1:5; 3:9; 2 Timoteus 1:3). Gi den sortoe sma disi di abi wan boen konsensi „ala sani krin”, kontrari foe den sma di no de getrow èn di doti na ini den konsensi foe den, gi soema „noti no krin” (Titus 1:15). Den sma di wani tan krin èn soifri na ini den ati, e gi jesi na a rai foe Jesaja 52:11 di e taki: „No fasi no wan sani di no krin; . . . oen tan krin, oenoe di e tjari den wrokosani foe Jehovah” (Psalm 24:4; Mateus 5:8). Te den e doe disi, dan na wan agersifasi den „anoe” foe den de krin (Jakobus 4:8), èn Gado e handri nanga den leki sma di krin. — 2 Samuèl 22:27; Psalm 18:26; loekoe so srefi Danièl 11:35; 12:10.

Na wán okasi na apostel Paulus, ala di a no ben de moro na ondro a Wet, ben doe den sani di a Wet ben aksi di a ben krin ensrefi na ceremonia sei na ini a tempel. Disi ben wani taki dati a no ben tan hori ensrefi na wán sani? Paulus no ben feti teige a Wet noso teige a fasi fa sani moesoe doe akroederi a wet; a ben sori nomo taki Gado no ben aksi foe kresten taki den ben moesoe gi jesi na a Wet. Te a fasi fa sani moesoe doe akroederi a Wet no ben de kontrari a njoen kresten waarheid, dan no wan troetroe problema ben de nanga a doe di wan sma wani doe den sani di Gado ben kari na ondro a Wet. Paulus ben doe a sani di a ben doe so taki a no ben sa kan hendri den djoe foe arki a boen njoensoe foe Jesus Krestes, sondro dati ben de fanowdoe (Tori foe den Apostel 21:24, 26; 1 Korentesma 9:20). Nanga a srefi sani dati na prakseri, na apostel Paulus ben taki dati njanjan srefi kan de krin, ma efoe a njan di a ben e njan ben o meki en brada naki foetoe, dan a no ben o njan moro (Romesma 14:14, 15, 20, 21; 1 Korentesma 8:13). Nanga ala den sani disi, Paulus ben sori taki a e broko en ede srefisrefi foe froeloesoe tra sma èn a ben doe ala sani di a man foe doe dati toe. Foe dati ede a ben kan taki: „Mi krin foe a broedoe foe ala libisma.” — Tori foe den Apostel 20:26; 18:6.