Leri foe den fowtoe di wi meki

DEN moreel wet foe wi Kriaman de foe têgo èn den no e kenki. Foe dati ede a gronprakseri di de foe feni na Galasiasma 6:7 e fiti na ini a ten disi: „San wan sma e sai, na dati a sa koti toe.” Foe troe, wan sma kan taki dati a no abi foe gi frantiwortoe na Gado, ma a tirilin di kon foe Gado e tan dorodoro. Te foe kaba, no wan libisma e kisi kibri foe den bakapisi foe den sani di a doe.

Fa a de nanga wan sma di e libi wan tranga-jesi fasi foe libi èn baka dati e kenki èn e tron wan foetoeboi foe Gado? A kan taki tokoe a moesoe libi ete nanga den bakapisi di e kon foe a libi di a ben abi fosi. Ma tokoe, disi no wani taki dati Gado no gi en pardon. Kownoe David di ben libi wan soetadoe libi nanga Batseiba, ben tjari foeroe rampoe kon na ini en libi. A no ben kan lowe komoto foe a sani disi. Ma a ben abi berow, èn a ben kisi pardon foe Gado. — 2 Samuèl 12:13-19; 13:1-31.

Oiti joe lasi-ati foe di joe ondrofeni den bakapisi foe den fowtoe di joe meki? Efoe wi e si en na a joisti fasi, dan a firi di wi e firi sari kan memre wi foe ’loekoe boen so taki wi no drai foe go na ogri’ (Job 36:21). Ija, a firi di wi e firi sari, kan jepi wi foe no doe a srefi fowtoe sani baka. Moro boen srefi, David ben gebroiki na ondrofeni di a ben kisi foe a sondoe di a ben doe, no wawan foe ensrefi feni winimarki, ma foe trawan feni winimarki toe. David ben taki: „Mi sa leri den sma di pasa a wet foe joe, den pasi foe joe, so taki srefi sondari kan drai wantewante kon baka na joe.” — Psalm 51:13.

[Prenki na tapoe bladzijde 7]

David ben leri foe a sondoe foe en nanga Batseiba