Foe san ede wan toe sma e kenki a relisi foe den

Gi foeroe sma, relisi de soso wan nen nomo. Relisi ben sa kan sori pe wan sma e go wawan leisi na tapoe sonde, pe a e trow, èn pe a sa beri. Ma a relisi no e sori sortoe sma a sma de noso san a sma sabi èn san a e bribi. Foe eksempre, wan ondrosoekoe ben tjari kon na krin taki 50 procent foe den sma di e taki dati den na kresten, no ben sabi soema ben de a sma di ben taki a Bergitaki. Ija, srefi a barinen tiriman foe India, Mohandas Gandhi, wan hindoesma ben sabi dati!

A DE wan froewondroe sani taki so foeroe sma e drifi komoto foe relisi te so foeroe foe den no sabi foeroe foe a bribi foe den? Nôno, dati no de wan froewondroe sani. Ma tokoe, a no de wan sani toe di ala ten moesoe de so. Den wan di teki jepi foe leri bijbel, foeroetron e froewondroe foe si o foeroe winimarki dati e tjari gi den. Bijbel srefi e taki: „Mi, Jehovah, na joe Gado, a Sma di e leri joe foe gi joesrefi wini, a Sma di e meki joe waka na tapoe a pasi di joe moesoe waka.” — Jesaja 48:17.

San den sma moesoe doe di no man tapoe a jeje angri foe den? Den no moesoe tapoe foe dini Gado! Na presi foe dati, den moesoe loekoe na ini bijbel èn si san Gado srefi sreka gi den.

Den piki tapoe moeilek aksi

Di Bernd ben abi seibi jari, a ben si fa en mama dede.a A heri pisi ten di a ben de wan pikin-nengre, a ben aksi ensrefi: ’Pe mi mama de? Foe san ede mi moesoe gro kon bigi sondro mi mama?’ Leki wan tini, Bernd ben de wan memre foe kerki di e wroko gi a kerki. Foe di Bernd ben broko en ede nanga a pina di libisma e pina, meki a ben howpoe foe tron wan sma di e go na wan pôti kondre foe jepi sma. Tokoe, a ben abi aksi di ben trobi en èn di a kerki foe en no ben man piki tapoe wan boen fasi.

Baka dati Bernd ben taki nanga wan skoromati di ben de wan Jehovah Kotoigi. A jongoewan disi ben sori Bernd komoto foe bijbel taki Bernd en mama no ben sabi notinoti, taki a ben sribi ini dede. Bernd ben leri foeroe bijbel vers di ben tjari a sani disi kon na krin, soleki Preikiman 9:5: „Foe a sei foe den dedewan, den no sabi notinoti.” So boen, Bernd no ben abi no wan-enkri reide foe broko en ede efoe en mama ben pina ini wan sortoe vagevuur — noso moro ogri. Ala di a leri disi foe wan sili di no man dede e leri na ini foeroe foe den relisi, tokoe Bernd ben si na ini bijbel taki a libisma sili na soso wan sma. Te a sma e dede, dan a sili e dede. „A sili di e sondoe, ensrefi sa dede.” — Esekièl 18:4.

Bernd ben leri so srefi foe a toemoesi moi howpoe gi den dedewan. Bernd srefi ben leisi na ini a bijbel boekoe Tori foe den Apostel: „Wan opobaka o de foe den regtfardikiwan nanga den onregtfardikiwan.” (Tori foe den Apostel 24:15) Fa a ben naki en ati srefisrefi di Bernd kon sabi taki na opobaka disi ben sa feni presi djaso na grontapoe, wan grontapoe di Gado sa meki kon tron wan paradijs baka! — Psalm 37:29; Openbaring 21:3, 4.

Heri esi a jeje nowtoe foe Bernd ben feni satisfaksi nanga jepi foe soifri bijbel sabi. Bernd no ben tapoe nanga relisi. Na presi foe dati, a ben gowe libi a kerki di no ben man tapoe na angri foe en èn a ben teki wan fasi foe anbegi di ben gron steifi na tapoe bijbel. A e taki: „Dati ben de 14 jari pasa, èn noiti mi ben sari taki mi gowe libi mi fosi kerki. Now mi sabi taki a Kriaman no e tjari pina kon. Satan na a gado foe a seti foe sani disi, èn en na a sma di abi a fowtoe gi den situwâsi di de lontoe wi. Ma a no langa moro, dan Gado sa poeroe ala ogri di grontapoe foe Satan doe. So srefi mi mama sa kon baka na ini na opobaka. Fa dati o de wan prisiri sani!”

Boiti dati, Bernd doro en marki foe wroko na dorosei kondre foe jepi tra sma. A e wroko ini wan dorosei kondre pe a e jepi trawan foe leri foe Gado Kownoekondre, a troetroe loesoe gi ala den nowtoe foe den. Neleki Bernd, miljoenmiljoen sma leri taki heri esi Gado sa tjari wan kaba kon na a pina di libisma e pina. A e naki den ati srefisrefi foe sabi taki wan relisi de di e satisferi den sani di sma abi fanowdoe na jejefasi. — Mateus 5:3.

San na a marki foe a libi?

Now di den kondre foe a heri Westsei pisi foe grontapoe, moro nanga moro e meki taki relisi no abi krakti moro na den tapoe, dan foeroe sma e aksi: ’San na a marki foe a libi?’ A piki tapoe na aksi de foe feni na ini bijbel, soleki fa Maikel ben kon si. Na mindri foe 1970 te nanga 1979, Maikel ben wani go na ini wan terrorist groepoe. Wán sani a ben wani doe nomonomo ini en libi — foe feti foe tjari problema kon gi den sma di en ben si leki sma di de frantiwortoe gi den onregtfardiki sani foe a kapitalist seti foe sani. „Noiti mi ben gowe libi mi oso sondro mi gon”, a e taki. „San mi ben wani doe na foe kiri someni heihei politieksma nanga kapitalistsma leki mi kan. Mi ben sa gi mi libi srefi gi a sani disi.”

Maikel ben go na kerki, ma no wan sma ini a kerki foe en ben man tjari kon na krin gi en san na a marki foe a libi. So boen di Jehovah Kotoigi ben naki na a doro foe en oso èn ben sori en den piki foe bijbel tapoe den aksi foe en, Maikel ben poti ala en jesi arki. A ben bigin fisiti den konmakandra gi anbegi na a Kownoekondre zaal foe Jehovah Kotoigi drape pe a ben tan.

Den mati foe Maikel ben wani sabi moro foe a belangstelling di Maikel ben kisi gi bijbel. „Kon na a konmakandra a sonde disi”, na so Maikel ben gi den tranga. „Tan wan pisi ten. Efoe joe no lobi san joe e jere, dan go na oso.” Na so a ben pasa taki baka wan 45-miniti lezing di ben abi en gron tapoe bijbel, moro foeroe foe den mati foe en ben gowe libi a zaal. Ma wán foe den — Susan — ben tan. A sani di a jongoe oema disi ben jere, ben moi kefalek gi en. Baka ten Maikel nanga Susan ben trow èn den ben teki dopoe leki Jehovah Kotoigi. „Now mi sabi foe san ede wi de djaso na grontapoe”, Maikel e taki. „Jehovah ben kria wi. A troetroe marki foe wi ini a libi na foe kon sabi En èn doe a wani foe En. Dati na a sani di e gi troetroe satisfaksi!”

Miljoenmiljoen sma abi a srefi overtoigi di Maikel abi. Na wan serjoesoe fasi, den e teki den wortoe foe bijbel: „A bosroiti foe a tori, now di sma jere ala sani, de: Frede a troe Gado èn hori den komando foe en. Bika disi na a heri plekti foe libisma.” — Preikiman 12:13.

Fa foe handri nanga den problema foe a libi

Wi alamala e ondrofeni a kontroe foe a profeititori di de foe feni na 2 Timoteus 3:1: „Na ini den lasti dei moeilek ten sa kon, di tranga foe pasa.” No wan sma kan lowe gi den problema foe den „moeilek ten” disi. Ma bijbel e jepi wi fa foe handri nanga den.

Loekoe Steven nanga Olivia, wan trowpaar. Di den ben bigin foe studeri bijbel nanga Jehovah Kotoigi, neleki foeroe tra sma den ben abi problema ini a trowlibi foe den. „Wi ben e dribi komoto foe makandra safrisafri”, na so Steven e tjari kon na krin. „Wi ben abi difrenti marki èn den afersi di ben hari wi, ben difrenti.” San ben jepi den foe tan nanga makandra? „Jehovah Kotoigi ben sori wi fa wi ben kan fiti bijbel gronprakseri ini wi libi”, na so Steven e go doro. „Disi na a fosi tron ini wi libi, taki wi ben leri san a wani taki foe no prakseri joesrefi nomo èn foe broko joe ede nanga trawan. A fiti di wi ben fiti bijbel gronprakseri ini wi libi, ben tai wi na makandra. Now wi e njan boen foe wan kolokoe, steifi trowlibi.”

Wan krosibei matifasi nanga Gado

No so langa pasa, wan ondrosoekoe di den ben doe foe aksi sma san den e denki foe sani, e sori taki 96 procent foe den Amerkan e bribi na ini Gado èn foeroe foe den sma disi e begi En. Ma tokoe, wan tra ondrosoekoe foe tori ben sori taki a nomroe foe sma di e go na kerki nanga snoga nownowde na a moro lagi nomroe na ini den lasti 50 jari. Son 58 procent foe den Amerkan e taki dati den e go na kerki wán leisi wán moen noso moro mendri. A de krin taki relisi no meki den kon moro krosibei na Gado. Èn a problema disi no de soso na Amerkankondre.

Linda ben gro kon bigi na Bavaria. A ben de wan katolik di ben doe den plekti foe a Katolik kerki èn a ben begi doronomo. Na a srefi ten, a ben frede gi a ten di e kon. A no ben sabi noti foe den sani di Gado abi na prakseri gi libisma. Di Linda ben abi 14 jari nomo, a ben miti Jehovah Kotoigi, èn a e froeteri: „San den ben taki ben hari mi so kefalek, taki mi ben teki toe jepisani foe studeri bijbel èn wantewante mi bigin leisi den.” Baka toe jari, Linda ben bigin studeri bijbel nanga Jehovah Kotoigi. „Ala den sani di mi ben leri foe Gado komoto foe bijbel, ben de boen sani”, a e taki. Linda ben poeroe en nen foe a kerki foe en èn a ben teki dopoe leki wan Kotoigi foe Jehovah di a ben abi 18 jari.

San ben boeweigi Linda foe kenki a relisi foe en? A e tjari kon na krin: „A kerki foe mi ben leri mi froestan taki wan Gado de, èn mi ben leri foe bribi ini en. Ma Gado no ben de wan sma gi mi èn a ben de farawe. A studeri di mi studeri bijbel no wawan ben tranga mi bribi na ini Gado, ma so srefi a ben jepi mi foe kon sabi èn lobi En. Nojaso mi abi wan tranga persoonlijk matifasi nanga Gado, wan sani di warti moro ala tra sani.”

A troe relisi de warti srefisrefi!

A relisi foe joe e tiri joe na jejefasi èn e sori joe fa foe handri nanga den problema ini a libi nanga jepi foe bijbel? A relisi foe joe e leri joe a howpoe foe bijbel gi a ten di e kon? A relisi foe joe e meki joe abi wan krosibei, persoonlijk matifasi nanga a Kriaman, di gron tapoe wan soifri sabi foe bijbel? Efoe dati no de so, dan no lasi-ati. Na presi foe gowe libi relisi, soekoe a fasi foe anbegi di abi en gron steifi tapoe bijbel. Dan joe sa de neleki den wan di a bijbel boekoe Jesaja ben taki profeititori foe den: „Disi na san a Soeverein Masra Jehovah taki: ’Loekoe! Mi eigi foetoeboi sa njan . . . Mi eigi foetoeboi sa dringi . . . Mi eigi foetoeboi sa bari nanga prisiri . . . Mi eigi foetoeboi sa bari foe prisiri bika foe a boen kondisi foe na ati.’ ” — Jesaja 65:13, 14.

[Foetoewortoe]

[Prenki na tapoe bladzijde 4, 5]

Bijbel e jepi wi foe kon sabi èn foe lobi Gado