Foe san ede den e gowe libi relisi?
NA A mindri foe a di foe 19 jarihondro, pikinmoro noiti joe ben sa jere wan sma foe Pruisen (now a noordsei foe Doisrikondre) e taki dati a no de foe wan spesroetoe relisi. Foe taki en leti, te a sma ben sa kenki foe wan relisi di ala sma sabi èn foeroe sma e horibaka gi, go na wan kerki di no e hori ensrefi na den tirilin di foeroe sma gwenti foe hori, dan dati nomo kan meki taki skowtoe sa kon loekoe finifini san a sma e doe. Fa den ten kenki!
Nownowde, ipi-ipi Doisri e gowe libi den kerki. Tori e sori taki wán sma foe ibri fo sma e taki dati a no de foe no wan sortoe relisi. Wan srefi sortoe situwâsi de foe si na Oostenrijk nanga Switserland. Efoe a libibroedoe foe wan relisi na den memre foe wan relisi, dan, soleki fa a Doisri skrifiman Reimer Gronemeyer e taki en, „den kerki foe Europa e lasi broedoe teleki den sa dede”.
Foe san ede den no wani relisi moro
Foe san ede so foeroe sma no wani den relisi di orga moro? Foeroetron, foe monitori ede, spesroetoe na den kondre pe den memre foe a kerki moesoe pai belasting na a kerki. Foeroe sma e aksi: ’Foe san ede mi moni di mi wroko so tranga gi en, moesoe gi na a kerki?’ Son wan e tegoe foe a kefalek bigi goedoe nanga makti foe kerki. Soleki fa a sori, dan den e agri nanga Kardinaal Joachim Meisner foe Keulen, Doisrikondre, di ben taki dati den goedoe foe kerki ben meki taki a ben poti toemoesi foeroe prakseri na tapoe materia sani èn a „no ben si bribi na ini Krestes serjoesoe nofo”.
Son sma e libi a kerki foe den, foe di den feni taki a soi, a no e hari den prakseri, èn a no man tapoe a jeje angri di den abi. Den e pina foe na angriten di a profeiti Amos ben taki na fesi foe en, a „no wan angriten foe brede, èn a no wan dreiwatra foe watra, ma foe sma jere a wortoe foe Jehovah” (Amos 8:11). Foe di pikinmoro den no e feni kowroe-ati na ini a relisi foe den, meki den e gowe libi a relisi foe den.
Ala di den problema di den e miti na troetroe problema, tokoe a de so taki den abi leti foe tapoe nanga ala relisi? Prakseri wan man di abi angri èn di e si wan sani di gersi wan pisi brede. Te a e proeberi foe njan a brede, dan a e si taki a meki foe saksi. A ben sa tapoe foe prakseri taki a wani njan èn tapoe na angri foe en? Nôno, a ben sa soekoe troetroe njanjan. Na a srefi fasi toe, efoe wan relisi no e tapoe a jeje angri foe den memre foe en, dan den memre moesoe tapoe nanga relisi dan? Noso a ben sa moro koni foe soekoe wan fasi foe tapoe a jeje angri foe den? Dati na san boen foeroe sma doe kaba, soleki fa na artikel di e kon now e sori.