Beoefen na soifri relisi foe tan a libi
„Relisi di de soifri èn troe ini den ai foe Gado, na Tata, sa sori ensrefi nanga den sani disi leki . . . foe wan sma hori ensrefi sondro flaka foe grontapoe.” — JAKOBUS 1:27, Phillips.
1. San den taki dati relisi wani taki, èn soema, akroederi san wi kan froestan krinkrin, abi na reti foe poti a difrenti a mindri troe relisi nanga falsi relisi?
RELISI, sma taki, wani taki „na sori di libisma e sori bribi ini èn respeki gi wan krakti di moro hei leki libisma èn di den e erken leki na mekiman èn tiriman foe na universum.” Soboen, soema abi, akroederi san wi kan froestan krinkrin, na reti foe poti a difrenti a mindri troe relisi nanga falsi relisi? Seiker disi moesoe de na Sma di sma e bribi ini en èn e respeki, na Mekiman. Na ini en Wortoe, Jehovah ben skrifi krinkrin fa a e si troe relisi nanga falsi relisi.
Na wortoe „relisi” na ini bijbel
2. Fa wortoeboekoe e froeklari na fosi Griki wortoe di den vertaal nanga „fasi foe anbegi” noso „relisi”, èn tapoe sortoe fasi foe anbegi a kan sori?
2 Na Griki wortoe di den vertaal nanga „fasi foe anbegi”, noso „relisi”, na thres·keiʹa. A Greek-English Lexicon of the New Testament e froeklari a wortoe disi nanga „na anbegi foe Gado, relisi, spesroetoe na a fasi fa dati e sori ensrefi ini relisi dienst noso ini a gi di den gi Gado grani na poebliki”. Na Theological Dictionary of the New Testament e gi moro finifini tori èn e skrifi: „Den no e agri ini a tori foe na etymologie [a bigin foe na wortoe]; . . . njoenmodoten sabiman moro foeroe wani si wan tai nanga therap- (’foe dini’). . . . Wi kan si so srefi taki a wani taki difrenti sani. Na boen sani di a wani taki na ’relisi fajafasi’ . . . , ’anbegi foe Gado’, ’relisi’. . . . Ma a wani taki so srefi wan sani di no boen, namkoe, ’relisi weldri fasi foe tjari densrefi’, ’fowtoe anbegi’.” Foe dati ede meki sma kan vertaal a wortoe thres·keiʹa nanga „relisi” noso „fasi foe anbegi”, awansi a de boen noso fowtoe.
3. Fa na apostel Paulus ben gebroiki na wortoe di den vertaal nanga „fasi foe anbegi”, èn sortoe moi kommentaar den e gi foe na fasi fa den vertaal Kolosesma 2:18?
3 Na wortoe disi e kon fo leisi nomo na ini den kresten Griki Boekoe. Na apostel Paulus ben gebroiki en toe leisi foe sori tapoe falsi relisi. Na ini Tori foe den Apostel 26:5 skrifi taki a ben taki dati bifo a ben tron wan krestensma a „ben libi akroederi na moro fini sekte foe wi fasi foe anbegi [„relisi”, Phillips] leki wan Fariseiman”. Ini en brifi gi den Kolosesma a ben warskow: „No meki no wan sma di abi prisiri ini a sori foe preiprei sakafasi èn wan fasi foe anbegi foe den engel, foefoeroe a prijs poeroe na oenoe” (Kolosesma 2:18). So wan anbegi foe engel, leki fa a sori, ben de foeroe srefisrefi na ini Frygië ini den dei dati, ma a ben de wan fasi foe falsi relisi.a A de wan moi sani foe si taki, ala di wan toe Ingrisitongo bijbelvertaling e vertaal a wortoe thres·keiʹa nanga „relisi” na ini Kolosesma 2:18, dan tokoe moro foeroe foe den e gebroiki a wortoe „anbegi”. Na Njoen-Grontapoevertaling (Bakratongo) ala ten baka e vertaal a wortoe thres·keiʹa nanga „fasi foe anbegi”, ala di wan foetoewortoe na ini a Studiebijbel (Bakratongo) e froeteri ibri leisi di na a Latijn vertaling den gebroiki na tra fasi foe vertaal dati, namkoe „relisi”.
„Krin èn sondro flaka” ini den ai foe Gado
4, 5. (a) Akroederi Jakobus dan soema en fasi foe si relisi na a moro prenspari wan? (b) San ben kan meki a fasi fa wan sma e anbegi de wan sososani, èn san na wortoe di den vertaal nanga „sososani” wani taki?
4 Den toe tra leisi di den ben gebroiki a wortoe thres·keiʹa, wi e feni na ini a brifi di na disipel Jakobus, wan memre foe na tiri skin foe a fosi jarihondro kresten gemeente, ben skrifi. A ben skrifi: „Efoe wan sma denki taki a de wan vroom anbegiman foe Gado [„foe de wan ’relisisma’”, Phillips] èn tokoe no man dwengi en tongo, ma e go doro foe bidrigi en eigi ati, na fasi foe anbegi [„relisi”, Phillips] foe na sma disi de wan sososani. Na fasi foe anbegi [„relisi”, Phillips] di de krin èn sondro flaka ini den ai foe wi Gado èn Tata, na disi: foe jepi weisi nanga weduwe ini a banawtoe foe den èn foe wan sma hori ensrefi sondro flaka foe grontapoe.” — Jakobus 1:26, 27.
5 Ija, foe respeki a fasi fa Jehovah e si relisi de toemoesi prenspari efoe wi wani foe a feni wi boen èn foe go libilibi na ini a njoen grontapoe di a ben pramisi (2 Petrus 3:13). Jakobus e sori taki wan sma kan denki taki a de wan relisisma troetroe èn tokoe en fasi foe anbegi ben kan de wan sososani. Na Griki wortoe di den vertaal djaso nanga „sososani” so srefi wani taki „sondro waarde, no wani taki wan sani, sondro froktoe, no boen foe noti, sondro krakti, sondro waarheid”. Disi ben kan de na kefal efoe wan sma di e hori taki a de wan krestensma, no ben dwengi en tongo èn no ben gebroiki en foe prèise Gado èn foe bow en kompe krestensma. A ben sa „bidrigi en eigi ati”, èn no ben sa beoefen „relisi di de soifri èn troe ini den ai foe Gado” (Phillips). A fasi fa Jehovah e si sani de prenspari.
6. (a) San na a thema foe na brifi foe Jakobus? (b) Tapoe sortoe sani di den e aksi foe soifri anbegi Jakobus ben poti krakti, èn san na njoenmodoten Tiri Skin ben taki ini a tori disi?
6 Jakobus no e kari ala den sani di Jehovah e aksi èn di abi foe doe nanga a soifri anbegi. Akroederi na algemeen thema foe en brifi, san de bribi di boeweisi nanga jepi foe wroko èn na fanowdoe foe tan farawe foe matifasi nanga a grontapoe foe Satan, a e poti krakti a tapoe soso toe sani di den aksi. Wán na „foe jepi weisi nanga weduwe ini a banawtoe foe den.” Troe kresten lobi de ini a tori disi. Ala ten Jehovah ben sori lobi broko-ede gi weisi nanga weduwe (Deuteronomium 10:17, 18; Maleaki 3:5). Wan foe den fosi sani di na tiri skin foe na kresten gemeente ini a fosi jarihondro ben doe, ben de foe na boen foe kresten weduwe (Tori foe den Apostel 6:1-6). Na apostel Paulus ben gi finifini markitiki ini a tori foe gi lobi sorgoe na den owroe weduwe di ben de pôti èn di jari langa ben sori taki den de kotrow èn di no ben abi famiri foe jepi den (1 Timoteus 5:3-16). Na njoenmodoten Tiri Skin foe Jehovah Kotoigi ben gi soifri markitiki toe ini a tori foe ’Sorgoe gi den pôtiwan’. Den e taki: „Na troe anbegi abi na ini foe jepi kotrow èn loyaal sma di abi jepi fanowdoe na skinfasi.” (Loekoe na boekoe Orga foe doe wi diniwroko (Bakratongo), bladzijde 124, 125.) Den skin foe owroeman noso aparti krestensma di no e bisi toemoesi nanga a sani disi e djompo abra wan prenspari pisi foe na fasi foe anbegi di de krin èn sondro flaka ini den ai foe wi Gado èn Tata.
„Sondro flaka foe grontapoe”
7, 8. (a) San na a di foe toe sani di den aksi foe troe relisi èn di Jakobus ben taki foe en? (b) Den kerkileriman nanga priester e doro a sani disi di den aksi foe den? (c) San wi kan taki foe den Kotoigi foe Jehovah?
7 Na di foe toe sani di den aksi foe troe relisi èn di Jakobus ben taki foe en na „foe wan sma hori ensrefi sondro flaka foe grontapoe”. Jesus ben taki: „Mi kownoekondre no de wan pisi foe grontapoe”; ini akroederi nanga disi dan den troe bakaman foe en no ben sa de „wan pisi foe grontapoe” (Johanes 15:19; 18:36). A de so taki wi kan taki na sani disi foe den kerkileriman nanga priester foe wan foe den relisi foe na grontapoe disi? Den e horibaka gi den Verenigde Naties. Foeroe foe den fesiman foe den ben teki na kari foe na pausoe foe miti na Assisi, Italië, ini oktober 1986 foe begi makandra foe meki na „Internationaal Jari foe Vrede”, di na VN ben orga, abi boen bakapisi. Ma den moeiti foe den ben de foe soso te joe loekoe na den miljoenmiljoen sma di kiri ini den feti foe na jari dati èn ini den jari sensi na ten dati. Foeroe tron den kerkileriman de mati nanga na politiek partij di e tiri, ala di na wan feradelijk fasi den e meki kroederi, na wan kibrifasi, nanga a tra sei so taki awinsi soema e tiri a sma dati sa si den leki „mati”. — Jakobus 4:4.
8 Den Kotoigi foe Jehovah ben bow wan boen-nen taki denfoe de krestensma di no e teki sei ini politiek afersi noso ini den trobi foe na grontapoe disi. So leki fa raportoe foe njoensoe en njoenmodoten tori foe historia e sori ini ala pisi foe grontapoe, dan den Kotoigi e hori densrefi na a fasi disi foe si sani na ala kondre èn na ala natie. Foe troe den de „sondro flaka foe grontapoe”. Na relisi foe den na a „relisi di de soifri èn troe ini den ai foe Gado”. — Jakobus 1:27, Phillips.
Tra marki foe troe relisi
9. San na wan di foe dri sani di den aksi foe troe relisi, èn foe san ede?
9 Efoe relisi na „respeki gi wan krakti di moro hei leki libisma èn di den e erken leki a mekiman èn tiriman foe na universum”, dan seiker troe relisi moesoe poti sma foe go anbegi na wan enkri troe Gado, Jehovah. A no moesoe meki a froestan di sma e froestan Gado kon doengroe foe di a e leri heiden idea so leki wan driwánfasi Gado di e prati en almaktifasi, en glori nanga en tégofasi nanga toe tra sma ini wan Driwánfasi di de wan kibritori (Deuteronomium 6:4; 1 Korentesma 8:6). So srefi a moesoe meki sma kon sabi a nen foe Gado, Jehovah, wan nen di no abi en speri, èn gi grani na a nen dati, ija foe troe tjari a nen foe Gado leki wan pipel di orga (Psalm 83:18; Tori foe den Apostel 15:14). Ini a tori disi den sma di e beoefen troe relisi moesoe waka baka na eksempel foe Krestes Jesus (Johanes 17:6). Soema boiti den kresten kotoigi foe Jehovah e miti den sani disi di den aksi foe den ini a ten disi?
10. San wan relisi moesoe doe, foe gi sma a howpoe foe pasa libilibi go na ini a njoen grontapoe foe Gado, èn foe san ede?
10 Na apostel Petrus ben taki: „Boiti dati, ini no wan tra sma froeloesoe de, bikasi no wan tra nen [Jesus Krestes] ben gi ondro hemel di ben gi na mindri sma, nanga jepi foe soema wi moesoe kisi froeloesoe” (Tori foe den Apostel 4:8-12). Na soifri relisi, di e gi sma a howpoe foe pasa go libilibi na ini a njoen grontapoe foe Gado moesoe boeweigi sma, foe dati ede, foe bribi ini Krestes èn ini na waarde foe na froeloesoe ofrandi (Johanes 3:16, 36; 17:3; Efeisesma 1:7). Moro fara, a moesoe jepi troe anbegiman foe saka densrefi ondro Krestes leki na Kownoe foe Jehovah di e tiri èn leki en Heipriester di kisi salfoe. — Psalm 2:6-8; Filipisma 2:9-11; Hebrewsma 4:14, 15.
11. Tapoe sortoe sani troe relisi moesoe abi en fondamenti, èn san na a fasi fa den Kotoigi foe Jehovah e si sani ini a tori disi?
11 Na soifri relisi moesoe abi en fondamenti tapoe na wani foe na troe Gado, di a ben tjari kon a krin, èn no na tapoe gwenti noso filosofie di libisma meki. Wi no ben sa sabi noti foe Jehovah nanga den kefarlek moi prakseri foe en, so srefi no foe Jesus nanga a froeloesoe ofrandi, efoe wi no ben abi na bijbel. Den Kotoigi foe Jehovah e meki sma kon froetrow na bijbel sondro foe a froetrow dati kan seki. Den e boeweisi so srefi nanga jepi foe a fasi fa den e libi ala dei taki den agri nanga san na apostel Paulus ben taki: „Ala den Boekoe, Gado ben meki den skrifi nanga jepi foe en jeje èn den de boen foe leri sma, foe piri-ai gi sma, foe poti sani leti, . . . so taki na sma foe Gado kon bekwaam dorodoro, de srekasreka dorodoro gi ibri boen wroko.” — 2 Timoteus 3:16, 17.
Na troe relisi — Wan libifasi
12. Boiti taki bribi de fanowdoe, dan san de fanowdoe toe foe anbegi de troe, èn na sortoe fasi troe relisi na wan fasi foe libi?
12 Jesus ben froeklari: „Gado na wan jeje, èn na sma di e anbegi en, moesoe anbegi en nanga jeje èn waarheid” (Johanes 4:24). Na troe relisi, noso fasi foe anbegi, foe dati ede no de wan seti foe sma sori na dorosei taki den e gi densrefi na Gado, nanga jepi foe a doe foe sani so leki den poti den a fesi, akroederi regel, noso nanga jepi foe a hori na gwenti. Na soifri anbegi na wan jeje sani, di abi en fondamenti tapoe bribi (Hebrewsma 11:6). Ma, wroko moesoe horibaka gi na bribi dati (Jakobus 2:17). Na troe relisi e trowe popi lostoe. A e hori ensrefi na den markitiki foe bijbel ini a tori foe krin libifasi nanga krin taki (1 Korentesma 6:9, 10; Efeisesma 5:3-5). Den sma di e beoefen troe relisi e proeberi na wan opregti fasi foe meki den froktoe foe Gado jeje ini na osofamiri libi foe den, na den grontapoe wrokope, na skoro èn srefi te den e koiri (Galasiasma 5:22, 23). Den Kotoigi foe Jehovah e proeberi foe no frigiti na rai foe na apostel Paulus noiti: „Efoe, foe dat ede, joe e njan noso e dringi noso e doe wan tra sani, doe ala sani foe Gado kisi glori” (1 Korentesma 10:31). Na relisi foe den no de soso wan hori di den hori densrefi soifri na a fasi fa a moesoe loekoe na dorosei; a de wan libifasi.
13. San troe anbegi abi na ini, èn foe san ede sma kan taki dati den Kotoigi foe Jehovah de troetroe relisisma?
13 A no de foe taki, dati jeje wroko de ini a tori foe troe relisi. Den sani disi abi na ini joe eigi begi èn begi nanga joe osofamiri, na doronomo studie foe a Wortoe foe Gado nanga poeblikâsi di e jepi joe foe studeri bijbel èn a go na den troe kresten gemeente konmakandra. Den lastiwan disi e bigin èn tapoe nanga singi foe prèise Jehovah èn nanga begi (Mateus 26:30; Efeisesma 5:19). Den e loekoe tori di e bow sma na jejefasi nanga jepi foe publikitaki èn aksi-nanga-piki takimakandra foe sani di druk èn di ala sma kan kisi. Moro foeroe den sortoe konmakandra disi e hori na ini kownoekondrezaal di krin ma di no lai nanga toemoesi foeroe moimoisani, èn di den e gebroiki nomonomo gi relisi marki: doronomo konmakandra, trowtaki, beritaki. Den Kotoigi foe Jehovah e respeki den Kownoekondrezaal foe den nanga den moro bigi Kringhal leki presi di gi abra na a anbegi foe Jehovah. Trafasi leki foeroe foe den kerki foe na krestenheid, dan den Kownoekondrezaal a no sociaal koleisi-oso.
14. San anbegi ben wani taki gi den sma di ben taki na Hebrewtongo, èn sortoe wroko e poti den Kotoigi foe Jehovah aparti ini a ten disi?
14 Wi ben si a fesi kaba taki sabiman e tai a Griki wortoe di den vetaal nanga „fasi foe anbegi” noso „relisi” nanga a werkwortoe „dini”. A de wan moi sani foe si, taki na Hebrew wortoe di wani taki a srefi sani, ‛avo·dhahʹ, sma kan vertaal nanga „dienst” noso „anbegi”. (Teki gersi den foetoewortoe na Exodus 3:12 nanga 10:26.) Gi den Hebrewsma, anbegi ben wani taki dienst. Èn disi na san a wani taki gi troe anbegiman na ini a ten disi. Wan marki foe troe relisi di de toemoesi prenspari na taki ala sma di e beoefen en e teki prati ini a dienst foe Gado foe preiki „na boen njoensoe disi foe a kownoekondre . . . na a heri grontapoe pe libisma e libi leki wan kotoigi gi ala nâsi” (Mateus 24:14; Tori foe den Apostel 1:8; 5:42). Sortoe relisi sma sabi na a heri grontapoe taki den e gi kotoigi na poebliki foe Gado kownoekondre leki na wanenkri howpoe gi na libismafamiri?
Wan positief krakti di e tjari sani kon a wán
15. San na wan aparti marki foe troe relisi?
15 Falsi relisi e tjari prati kon. A ben meki, èn te now ete e meki, sma no wani si trawan na ai èn broedoe lon. Na a tra sei, troe relisi e tjari kon a wán. Jesus ben taki: „Nanga disi ala sma sa sabi taki oenoe na mi disipel, efoe oenoe abi lobi gi makandra” (Johanes 13:35). Na lobi di e tjari den Kotoigi foe Jehovah kon a wán e go moro hei leki den nationaal, sociaal, ekonomia nanga ras skotoemarki di e prati na tra pisi foe a libismafamiri. Den Kotoigi e „tanapoe fasti ini wán jeje, wán foe sili, e feti sei na sei gi na bribi foe na boen njoensoe.” — Filipisma 1:27.
16. (a) Sortoe „boen njoensoe” den Kotoigi foe Jehovah e preiki? (b) Sortoe profeititori e kon troe ini a pipel foe Jehovah, èn sortoe blesi kon foe dati?
16 Na „boen njoensoe” di den e preiki, na taki heri esi Gado en prakseri di no man kenki, sa kon troe. A wani foe en sa doe „neleki na ini hemel, so srefi toe na grontapoe” (Mateus 6:10). Na glori nen foe Jehovah sa kon santa, èn grontapoe sa tron wan paradijs, pe den troe anbegiman sa man foe libi foe têgo (Psalm 37:29). Troetroe miljoenmiljoen sma na ala kondre abi demakandra nanga den Kotoigi foe Jehovah, èn e taki, leki wan kontroe foe bijbel profeititori: „Wi wani go nanga oenoe, bikasi wi ben jere taki Gado de nanga oenoe” (Sakaria 8:23). Jehovah e blesi na pipel foe en. „Na pikinwan” tron foe troe „wan makti nâsi”, wan gemeente di de na heri grontapoe èn di de ini wánfasi ini ala sani — ini denki, ini wroko, ini anbegi (Jesaja 60:22). Disi na wan sani di falsi relisi noiti no ben man doro.
Na fektori foe na soifri relisi
17. San o miti Babilon na Bigiwan, èn fa disi sa doe kon?
17 Gado Wortoe ben taki a fesi foe na pori foe na grontapoe makti foe falsi relisi, di na wan agersifasi den e kari „Babilon na Bigiwan”. Bijbel so srefi e prenki den „kownoe”, noso politiek tiriman foe grontapoe, nanga na agersi sani foe den toetoe foe wan wildermeti. A e froeteri wi taki Gado sa poti na ini den ati foe den tiriman disi, na prakseri foe kanti trowe a seti disi, di gersi wan hoeroe èn di de foe Satan Didibri, èn pori en dorodoro. — Loekoe Openbaring 17:1, 2, 5, 6, 12, 13, 15-18.b
18. Sortoe prenspari reide bijbel e gi foe a pori foe Babilon na Bigiwan, èn oten falsi relisi ben bigin foe waka tapoe a kefarlek takroe pasi disi?
18 Foe san ede Babilon na Bigiwan e froedini foe kisi pori? Bijbel e piki: „Na ini en den ben feni a broedoe foe profeiti èn foe santawan èn foe ala sma di den ben srakti na grontapoe” (Openbaring 18:24). Foe sori taki na broedoe paiman disi, di falsi relisi ben tjari kon tapoe ensrefi, e go moro fara baka ini wan ten srefi bifo den ben meki Babilon, Jesus ben kroetoe den kerkifesiman foe na Judaïsme, di ben tron wan pisi foe Babilon na Bigiwan, di a ben taki: „Oenoe sneki, oenoe sneki pikin, fa oenoe wani foe lon go kibri foe na kroetoe foe Gehenna? . . . Na oen tapoe ala den regtfardikisma broedoe di den ben trowe na grontapoe, foe sensi na broedoe foe regtfardiki Abel, [sa] kon” (Mateus 23:33-35). Ija, falsi relisi, di ben bigin na grontapoe foe sensi na ten foe na oproeroe na ini Eden, moesoe gi frantiwortoe foe en kefarlek takroe broedoe paiman.
19, 20. (a) San den troe anbegiman sa doe baka di na kroetoe ben tjari kon tapoe Babilon na Bigiwan? (b) San o pasa na a ten dati, èn sortoe froewakti ala troe anbegiman sa abi?
19 Baka na pori foe Babilon na Bigiwan, den troe anbegiman na grontapoe sa moksi den sten nanga den hemel singiman di e singi nanga tranga sten: „Prèise Jah, joe pipel! . . . Bika a ben tjari na kroetoe kon tapoe a bigi hoeroe . . . , èn a ben teki refensi foe na broedoe foe den srafoe foe en foe na anoe foe en. . . . Èn na smoko di e komoto foe en e tan go na loktoe foe têgo.” — Openbaring 19:1-3.
20 Dan den tra pisi foe Satan organisâsi di de foe si o kisi pori (Openbaring 19:17-21). A baka disi, Satan, na sma di de a baka ala falsi relisi, nanga den ogri jeje foe en sa trowe ini a peti. Den no sa de fri moro langa foe froefolgoe den troe anbegiman foe Jehovah (Openbaring 20:1-3). Na soifri relisi ben sa wini falsi relisi. Kotrow man nanga oema di e gi jesi na a warskow foe Gado foe komoto nownowde foe Babilon na Bigiwan sa abi na okasi foe tan a libi èn go na ini a njoen grontapoe foe Gado. Drape, den sa man foe beoefen troe relisi èn foe anbegi èn dini Jehovah foe têgo.
[Foetoewortoe]
a Foe kisi wan froeklari foe na anbegi foe engel di den taki foe en na ini Kolosesma 2:18, loekoe Na Waktitoren foe 15 juli 1985, bladzijde 3.
b Foe kisi wan dorodoro froeklari foe na profeititori disi, loekoe na boekoe Openbaring — En moro bigi heymarki de krosibey! (Bakratongo) di kon a doro nanga jepi foe na Watchtower Bible and Tract Society foe New York, Inc., kapitel 33-36.
Loekoe san joe memre
◻ Soema en fasi foe si relisi na a moro prenspari wan, èn foe san ede?
◻ Tapoe sortoe toe sani di den aksi foe troe relisi Jakobus ben poti krakti?
◻ San na tra sani di den aksi foe soifri anbegi?
◻ Sortoe „boen njoensoe” den Kotoigi foe Jehovah e preiki?
◻ Fa troe relisi sa wini falsi relisi?
[Prenki na tapoe bladzijde 17]
Relisi fesiman ben kon makandra na ini Assisi, Italië, ini oktober 1986
[Prenki na tapoe bladzijde 19]
Troe relisi abi na ini toe foe kon makandra foe anbegi